Ondaka epindiso yi lomboloka oku songuila ale oku longisa. Pamue mua kongela oku pindisa omõla umue o lekisa ovituwa vĩvi. Olonjanja vialua oku pindisa ku lomboloka oku longisa omõlove etepiso li kasi pokati keci ciwa leci cĩvi. Kuenje eci ci ko kuatisa oku nõla olonjila viwa okuti ka ka sukila oku pindisiwa.

Kanyamo a sulako, olonjali vimue ka via siatele oku pindisa omãla vavo omo lioku sima okuti, ci tepulula esumbilo liomãla. Pole, olonjali vi kuete olondunge, vi lekisa olonumbi via sunguluka loku pindisa omãla vavo oco va vi pokole.

“Omãla va sukila oku kuata olongave oco va kale akulu vakuesunguluko. Nda ka va pindisiwile va kala ndowato umue ka u kuete ocipando. Owato wosi ka u kuete ocipando, noke yotembo yimue wambatiwa kuosi ofela yi sikila ale pamue u viluka.”—Pamela.

Kakatela kueci o popia. Nda omõlove ka kuama olonumbi viove, o sukila oku u pindisa. Pole, ku ka liwekepo oku pandiya omõlove eci a lekisa epokolo.

“Olonjanja viosi ndi pandiya omãla vange omo lioku lekisa epokolo voluali lulo luesino. Nda tu kuete ocituwa coku pandiya omãla, ci ka leluka kokuavo oku tava epindiso vepuluvi li sukiliwa.”—Christine.

CECI EMBIMBILIYA LI POPIA: “Eci omunu a kũla, haico a kongula.”—Va Galatia 6:7.

Kala ukuesunguluko. Eci weca epindiso, kapako anyamo, luloño womõlove kuenda eci eye a lueya. Olonjanja vialua, epindiso li kuata onima yiwa nda li kuete elitokeko leci ca lueyiwa. Ndeci, pamue omõlove ka pokola konumbi yoku talavaya ciwa lotelefone. Kuenje ove o nõla nda, eye o kala layo otembo yimue ale o yi tambula votembo yimue. Nda omõlove ka lingile cimue cĩvi, yuvula oku u sumuisa.

“Ame ndi seteka oku kũlĩha esunga lieci omõlange ka pokuilile nda wa ci linga omo liocipango ale nda wa nõla lonjanga onjila yaco. Momo kuli etepiso liocituwa cĩvi ci sukila oku tukũiwa kolumbombo kuenda oku lueya kuaño.”—Wendell.

CECI EMBIMBILIYA LI POPIA: “Ko ka wenguli onyeño yomãla vene, oco ka va ka sumue.”—Va Kolosai 3:21; etosi.

Lekisi ocisola. Ci leluka komãla oku tava loku kapako epindiso eci va limbuka okuti, olonjali vi ci lingila omo liocisola.

“Eci omõletu a enda oku lueya, tua kuatele ocituwa coku u sapuila okuti, tua enda oku sanjukila olonjila viwa eye a nõlele. Tua enda oku u lomboluila okuti, nda wa lingile eci ci sukiliwa oco a linge ovina lonjila yikuavo, oku lueya kuaco nda ka kua nyõlele ekalo liaye. Ocimãho cetu, oku lekisa kokuaye okuti, tu kasi konele yaye oco tu u kuatise.”—Daniel.

CECI EMBIMBILIYA LI POPIA: “Ocisola ci pandikisa kuenda ci lingainga uwa.”—1 Va Korindo 13:4.