OVE hẽ wa kuatele ale ocitangi cimue kuenje kua kuatele laumue oku kuatisa? Tu kasi koloneke vimue okuti ‘ekalo lia tĩla calua hailio li koka ohele,’ okuti li tu kokela oku yeva esumuo kuenda ulika. (2 Tim. 3:1) Pole, eci tu liyaka lovitangi kuli omanu va pondola oku tu kuatisa. Embimbiliya li popia okuti akamba vocili va pondola oku tu kuatisa calua “kotembo yohali.”—Olosap. 17:17.

Upostolo Paulu wa kuatisiwa lakamba vaye a lingaile lavo ovongende. (Va Kol. 4:​7-11) Eci Paulu a kala vokayike ko Roma, akamba vaye va linga ovopange ana eye ka tẽlele oku a linga lika liaye. Ndeci, Epafrodito wa nena ku Paulu ovina vimue eye a sukilile vina vamanji vo ko Filipu va tuma. (Va Fil. 4:18) Tukiko wa eca ovikanda via Paulu kakongelo a litepa. (Va Kol. 4:7) Paulu lekuatiso liakamba vaye, wa tẽlisa upange woku kunda ndaño wa kala vokayike konjo yaye muẽle, ale likawaye vokayike. Tu pondola oku kala ndati akamba vocili koloneke vilo?

Ovolandu o koloneke vilo, a lekisa esilivilo lioku kala ekamba liocili. Kũlĩhĩsa ulandu wa manji umue ukãi o tukuiwa Elisabet ukundi wotembo yosi ko Espanya okuti, wa lombolola ndomo manji umue o kuatisa kotembo yovitangi. Eci ina yaye a limbukiwa luvei wo kanser, manji umue wa enda oku tuma ku manji Elisabet asapulo alua a lembeleka ana a kunamẽla Vembimbiliya. Manji Elisabet wa popia hati: “Eci nda mola asapulo aco nda sanjuka poku kũlĩha okuti, umue wa ndi kapako kuenda nda pamisiwa poku liyeva okuti si kasi ulika.”—Olosap. 18:24.

Tu pondolavo oku pamisa ukamba wetu la vamanji, poku va kuatisa kupange woku kunda, ale kolohongele. Ndeci, o pondola hẽ oku lieca olumue poku ambata vamanji va kuka kolohongele, ale kupange woku kunda? Nda wa ci linga, o ka va pamisa kuenda ovo va ka ku pamisavo. (Va Rom. 1:12) Pole, vamanji vamue ka va tẽla oku tunda kolonjo viavo. Oco hẽ o pondola oku va kuatisa ndati?

Ndeci, vamue ka va pondola oku enda kohongele Vonjango Yusoma omo lioku vela calua. Kũlĩhĩsa ulandu wa manji David wa limbukiwa luvei wo kanser. Eye wa tambula etato liuvei waco ci pitahãla olosãi epandu. Vokuenda kuotembo yaco eye kumue lukãi waye Lidia va enda oku kala kolohongele pocakati co internet.

Vamanji vekongelo va va kuatisa ndati? Noke liohongele, vamanji vamue Vonjango Yusoma va enda oku likolisilako oku sapela la manji David kuenda ukãi waye Lidia pocakati covideokonferensia.  Handi vali, eci ovo va eca etambululo kolohongele, noke liohongele vamanji va tuma asapulo okuti va sola calua atambululo avo. Manji David kuenda Lidia va liyeva ndati? Va liyeva okuti va soliwe calua la vamanji.

Tu pondolavo oku linga esokiyo lioku kunda la manji umue ka pondola oku tunda konjo. Citava okuti tu linga apongoloko amue kesokiyo lietu, oco tu kundile kumosi la vamanji vaco. (Olosap. 3:27) Tu pondola oku sokiya lavo oku soneha ovikanda, ale oku eca uvangi pocakati co telefone. Akulu vekongelo citavavo oku sokiya okuti olohongele viupange woku kunda vi lingiwilavo pocakati co videokonferensia. Manji David kuenda Lidia va sanjukilavo esokiyo liaco. Manji David wa lombolola hati: “Oku kala locimunga cetu cupange woku kunda vokatembo katito oku konomuisa ocisonehua cimue loku linga ohutililo, ca tu pamisa calua.” Handi vali, nda ekalo li ecelela ale ca sunguluka oku ci linga, otembo lotembo tu pondola hẽ oku ambata ondonge yimue Yembimbiliya konjo ya manji o vela, oco a tẽlevo oku kuama elilongiso liaco?

Eci tu kundila kumosi la vamanji ka va pondola oku tunda konjo, tu kũlĩha ciwa ovituwa viavo viwa kuenda tu linga akamba vavo. Ndeci, eci ove o mola ndomo ovo va longisa Ondaka ya Suku komunu umue kuenda oku u kuatisa oku kala ekamba lia Yehova, citava okuti ove o ka vetiyiwa calua. Eci o kuatisa vamanji kupange woku kunda kuenda kolohongele, o linga akamba vokaliye.—2 Va Kor. 6:13.

Eci Paulu a kala oku liyaka lovitangi, ekamba liaye Tito weya oku u nyula kuenje ca kuatisa Paulu oku liyeva ciwa. (2 Va Kor. 7:​5-7) Ulandu owu u tu ivaluisa okuti, ka tu lembeleka lika vakuetu kolondaka, pole, tu ci lingavo poku kala lavo kuenda oku linga eci tu tẽla oco tu va kuatise.—1 Yoa. 3:18.

Vamanjetu ko Rússia, va siata oku lekisa ongangu yiwa poku li kuatisa pokati. Kũlĩhĩsa eci ca lipita la manji Sergey kuenda ukãi waye Tatyana. Akuenje velombe va iñila vonjo yavo oku sandiliyamo ovina va yonguile noke manji Sergey lukãi waye vambatiwa kombonge. Manji Tatyana eye wa yovuiwa tete kuenje wa tiukila konjo. Manji Sergey wa lombolola hati: “Eci ukãi wange Tatyana a pitĩla konjo, manji umue ukuotõi haico eya konjo oku u nyula. Noke vamanji valua veya kuenje va tu kuatisa oku yelisa onjo yetu.”

Manji Sergey wamisako hati: “Ndi sole calua elivulu Liolosapo 17:​17, kuna ku popia hati: ‘Ekamba liocili li lekisa ocisola otembo yosi, kuenda olio li linga manjove kotembo yohali.’ Yehova wa vetiya akamba vakuotõi kuenje va ndi kuatisa.” a

Osimbu ekalo liamamako oku tĩla calua, tu sukila akamba vocili oco va tu kuatise kotembo yovitangi. Tu ka va sukila calua vokuenda kuohali ya piãla. Omo liaco, cilo tu likolisiliko oku kala akamba vocili! —1 Pet. 4:​7, 8.