Vocipama ca pita, tua konomuisa ondimbukiso Yesu a eca. Ondimbukiso yaco, uvangi wokuti, Usoma wa Suku wa tumbikiwa ale kilu kuenda Yesu Kristu eye Soma yaco.

Embimbiliya li lombolola okuti, eci Yesu a linga Osoma, wa laikele oku tundisa Satana kilu kumue lolondele viaye. Kaliye, ovo va kasi palo posi, kuenje eli limue pokati kasunga eci ovitangi via livokiyila tunde kunyamo 1914. —Esituluilo 12:7, 9.

Ndaño loku livokiya kuekalo lĩvi palo posi, Yesu, Osoma Yusoma wa Suku, wa siata oku linga ovina vi kuatisa omanu voluali luosi. Omo liupange woku longisa Embimbiliya u kasi oku lingiwa voluali luosi ndomo Yesu a ci popele, omanu valua va kasi oku lilongisa loku kapako olonumbi Viembimbiliya komuenyo wavo weteke leteke. (Isaya 2:2-4) Omanu valua va siata oku lilongisa ndomo va kuata esanju vepata, oku kuata ocituwa ca sunguluka catiamẽla kupange kuenda kovokuasi. Ovo va kasi oku lilongisa oku kuata omuenyo wesanju cilo kuenda oku kala omanu vana Suku a yongola okuti, va ka kala olonungi Viusoma palo posi kovaso yoloneke.

Ndaño okuti Yesu o kasi ale oku viala kilu, handi olombiali viomanu vi kasi oku viala palo posi. Kuenje Suku wa sapuila Yesu hati: “Viala muẽle pokati kovanyali vove.” (Osamo 110:2) Ndopo, Yesu o ka kundula ovanyãli vaye vosi kuenda oku nena ekavuluko ku vana va pokola lutima wosi ku Suku.

Eci otembo yaco yi pitĩlapo, Usoma wa Suku:

• U ka malako etavo liesanda. Atavo ana a longisa ovohembi atiamẽla ku Suku ha-o a siata oku kokela ovitangi komanu, a ka kunduiwa. Embimbiliya li sokisa etavo liesanda ndocipuepue. Ekundu lialio, li ka sanga valua ocipikipiki. —Esituluilo 17:15, 16.

• U ka kundula olombiali viomanu. Usoma wa Suku u ka nyõla olombiali viosi viomanu. —Esituluilo 19:15, 17, 18.

• U ka kundula olondingaĩvi. Nye ci ka pita lomanu vana va nõlapo oku linga ovina ka via sungulukile haivo ka va pokola ku Suku? “Vakuakandu puãi va tundisua vofeka.” —Olosapo 2:22.

• U ka kundula Satana lolondele viaye. Satana lolondele viaye, ka va ka “yapuisa vali olofeka.” —Esituluilo 20:3, 10.

Pole, ovina vipi viwa vi ka pita la vana va pokola kolonumbi Viusoma wa Suku?

Ovina Yesu a ka linga Ndosoma, ka vi sokisiwa levi ombiali yimue yomanu yi tẽla oku linga. Yesu o ka kuatisiwa leci ci soka 144.000 komanu va nõliwa palo posi, va ka viala laye kilu. (Esituluilo 5:9, 10; 14:1, 3) Yesu o ka lingisa okuti ocipango ca Suku, ci lingiwa palo posi. Nye Usoma wa Suku u ka lingila omanu palo posi?

• U ka malako ovovei kuenda oku fa. “Layimue onungi yi popia yiti, ‘Ndi vela,’” kuenda “oku fa ka ku kalako vali.” —Isaya 33:24; Esituluilo 21:4.

• U ka nena ombembua yocili kuenda oku kolapo. “Okusalala kuomãla vove ku lua” kuenda “vosi va tumãla, omunu omunu vemi liuyuva waye, pamue vemi liukuyu waye, kuenje lomue o va lingisa usumba.” —Isaya 54:13; Mika 4:4.

• U ka eca komanu vosi upange umue u sanjuisa. “Lava va nõlĩwa lame va lialia ño-o kupange wovaka avo. Ka va lingi upange olivova.” —Isaya 65:22, 23.

• U ka tetulula ovitangi viofela. “Ekalasoko lofeka ya kukuta vi sanjuka, ekango li yolela, kuenje li telẽha ndelosa.” —Isaya 35:1.

• U ka longisa omanu eci va sukila oku linga oco va kale otembo ka yi pui. “Omuenyo ko pui u lomboloka okuti ovo va ku kũlĩha okuti ove lika wu Suku yocili kuenda una ove wa tuma, Yesu Kristu.” —Yoano 17:3.

Suku o yongola okuti, ove o tambula asumũlũho aco. (Isaya 48:18) Ocipama ci kuãimo, ci ka lombolola eci o sukila oku linga cilo, oco o tambule asumũlũho aco kovaso yoloneke.