Yesu wa popia hati: “Ofeka yi katukila ofeka kuenda usoma u katukila usoma. Ku kala ovilemawe kocitumãlo locitumãlo, onjala, lafengi.” (Luka 21:10, 11) Ovina evi viosi, poku pita votembo yimuamue, vi situlula okuti, “Usoma wa Suku u kasi ocipepi.” Anga hẽ ovolandu aco a laikele oku pita votembo yimuamue kolonepa viosi violuali? Kũlĩhĩsa ovovangi amue.

1. OVOYAKI

Kunyamo 1914, kua fetika uyaki umue ka wa la pita tunde eci omanu va lulikiwa! Vakuovolandu va siata oku tenda unyamo 1914 okuti, unyamo umue u kuete esilivilo kovolandu omo okuti, oco uyaki watete wa pita voluali wa fetika. Kuyaki waco, oko kua fetikiwa oku yaka lovota anene ndeci, atangi, atenda a imbiwa lolombalãu, ovota, inenu vi imbiwa vofela kuenda ovimalẽho vikuavo okuti, via ponda omanu valua kolonepa viñi viñi. Noke mua kuama uyaki wavali wa pita voluali, muna va yakavo latenda anene. Tunde kunyamo 1914, omanu va siata oku tala ohali lovoyaki kovitumãlo via litepa kuenje ovoyaki aco a ponda omanu valua.

2. OVILEMAWE

Elivulu limue lia lekisa okuti, anyamo osi ci soka 100 kovilemawe vinene, via siata “oku nyõla calua.” Vakuakukonomuisa Ovina Via Fẽliwa vo ko Estados Unidos va popia vati: “Ndomo ca lekisiwa vovolandu, (tunde kunyamo 1900), tu lavoka okuti ku pita 16 kovilemawe vinene vunyamo wosi.” Olonoño vimue via popia okuti, cilo kua siata oku pita ovilemawe vialua omo okuti, kuli olonjila vialua vioku vi limbuka. Pole, ndaño okuti uloño wa mioñoloha, ovilemawe via siata oku koka ohali yalua loku ponda omanu valua.

 3. EKAMBO LIOKULIA

Ekambo liokulia voluali luosi, lia siata oku kokiwa luyaki, lovitukiko, lekambo liolombongo kuenda lekambo liesokiyo liwa koku lima. Ulandu Wesokiyo Wokulia Woluali wunyamo “2018 mua Lingiwa Apongoloko,” wa lekisa okuti: “Voluali luosi ci soka 821 kolohuluwa viomanu, ka va kuete eci valia, 124 kolohuluwa viomanu va kasi oku fa lonjala.” Ekambo liovikulia vi tekula etimba, lia siata oku koka olofa vieci ci soka 3,1 kolohuluwa viomãla unyamo lunyamo. Kunyamo 2011, ekambo liovikulia viaco, via koka olofa vionepa yalua yomãla voluali luosi.

4. OVOVEI LAFENGI

Elivulu limue Liocisoko Cuhayele Voluali lia popia okuti: “Vokuenda kuocita 21, kua molẽha afengi alua. Ovovei osimbu ndeci, o kolera, ociyefu, o febre amarela, a tiuka vali kuenje kua siatavo oku molẽha ovovei akuavo ndeci, Uvei Wesuka, ocisinda, Uvei Wesuka wo Kutundilo, o Ebola kuenda o Zika.” Efengi limue lia pita ndopo, lio Covid-19. Ndaño okuti olonoño kuenda olondotolo va siata oku lilongisa calua catiamẽla kovovei, ovo ka va tẽla oku sakula ovovei osi.

5. UPANGE WOKU KUNDA VOLUALI LUOSI

Yesu wa tukulavo onepa yikuavo yondimbukiso eci a popia hati: “Olondaka evi viwa Viusoma vi kundilua koluali luosi ha vi lingi uvangi kolofeka viosi, oco esulilo liya noke.” (Mateo 24:14) Osimbu oluali lu liyaka lovitangi vialua, ci pitahãla ecelãla liolohuluwa viomanu vo kolofeka viosi, va kasi oku kunda olondaka viwa Viusoma wa Suku kolofeka 240 kuenda kueci ci pitahãla 1.000 kalimi. Eci ka ca la pita tunde kefetikilo liomanu!

Ovina Yesu a popia okuti via laikele oku pita, vi kasi oku tẽlisiwa koloneke vilo. Momo lie ci kuetele esilivilo oku ci kũlĩha? Momo Yesu wa popia hati: “Eci vu mola ovina evi viosi vi lingiwa, limbuki okuti Usoma wa Suku u kasi ocipepi.” —Luka 21:31.

Ondimbukiso Yesu a eca kuenda olonepa vikuavo Viembimbiliya, vi tu kuatisa oku kuata elomboloko liokuti, Suku wa tumbika Usoma waye kilu kunyamo 1914. a Kunyamo waco, oco Yesu Kristu a linga Osoma Yusoma wa Suku. (Osamo 2:2, 4, 6-9) Ndopo, Usoma wa Suku u ka viala ongongo kuenda owo u ka nyõla olombiali viosi viomanu loku pongolola ongongo oco yi linge ocumbo celau, muna omanu va ka kala otembo ka yi pui.

Olondaka viohutililo Yesu a longisa viokuti: “Usoma wove wiye. Ocipango cove ci lingiwe palo posi, ndeci ci lingiwa kilu,” ndopo vi ka tẽlisiwa. (Mateo 6:10) Pole, nye Usoma wa Suku wa siata oku linga tunde eci wa fetika oku viala kunyamo 1914? Nye tu lavoka eci Usoma u ka viala ongongo?