Embimbiliya li lekisa okuti poku tẽlisiwa kuocipango ca Suku, angelo olonjanja vialua va enda oku teyuila afendeli va Suku. (Osamo 34:7) Kũlĩhĩsa ovolandu amue:

• Eci Yehova a laikele oku nyõla olupale luo Sodoma kuenda Gomora, angelo va kuatisa ukuesunga Lote kumue lepata liaye oku tila.—Efetikilo 19:1, 15-26.

• Ko Bavulono yosimbu eci amalẽhe vatatu va Heveru va imbiwa vofolono oco va fe, Suku “wa tuma ungelo waye, wa popela akuenje vaye vo kolela.”—Daniele 3:19-28.

• Eci ukuesunga Daniele a imbiwa veleva liolohosi, eye wa lombolola okuti wa popeliwa momo ‘Suku wa tuma ungelo waye, wa yika ovimẽla violohosi.’—Daniele 6:16, 22.

Kosimbu angelo va Suku va kuatisa ekongelo Liakristão eci ca sukilile oku tẽlisa ocipango ca Yehova. Ndeci:

• Ungelo umue wa yikula apito okayike kuenda wa tundisa ovapostolo va kalamo oco va amameko oku kunda vonembele.—Ovilinga 5:17-21.

• Ungelo umue wa songuila ukundi Filipu oku enda kombuelo vonjila yi lokila ko Yerusalãi oku enda ko Gasa oco a ka kundile ulume umue u Etiopia wa endele oku ka fendela ko Yerusalãi.—Ovilinga 8:26-33.

• Eci vana ka va kaile va Yudea va linga Akristão, ungelo umue wa molehẽla ku Korneliu vocinjonde cimue kuenda wo handeleka oco a laleke upostolo Petulu konjo yaye.—Ovilinga 10:3-5.

• Eci upostolo Petulu a kala vokayike, ungelo umue wa mõleha kokuaye kuenje wo upa vokayike.—Ovilinga 12:1-11.

Ka kuli uvangi u lekisa okuti Suku wa siata oku tuma angelo oco va kuatise omanu oku linga ocikomo lekuatiso Liembimbiliya. Pole, Yesu wa popia hati: “Olondaka evi viwa Viusoma vi kundilua koluali luosi ha vi lingi uvangi kolofeka viosi, oco esulilo liya noke.” (Mateo 24:14) Ku tava hẽ okuti olondonge via Kristu vi kasi oku linga upange waco lekuatiso liovangelo?

Elivulu Liesituluilo li lekisa okuti ovangelo va siata oku lekisa ombili poku kuatisa omanu palo posi oku lilongisa ovina viatiamẽla ku Yehova Suku kuenda kocipango caye catiamẽla komanu. Upostolo Yoano wa soneha ndoco: “Kuenje nda mola ungelo ukuavo o palãla vokati kilu, wambata olondaka viwa viotembo ka yi pui kuava va tunga kilu lieve okuti, kolofeka viosi, kapata osi, kalimi osi kuenda komanu vosi. Wa kaluka lolukandi hati: ‘Sumbili Suku, u wĩhi ulamba, momo owola yoku sombisa kuaye ya pitĩla kuenje fendeli Una wa lulika ilu, osi, lokalunga kuenda olono viovava.’” (Esituluilo 14:6, 7) Ovolandu alua okoloneke vilo, a eca uvangi wokuti ovangelo va kasi oku kuatisa kupange woku kunda Usoma u kasi oku lingiwa voluali luosi. Omo liaco, eci omunu umue ukuakandu a likekembela kuenda o tiuka ku Yehova, “pokati kovangelo va Suku pa kala esanju.”—Luka 15:10.

Nye ci ka pita eci upange woku kunda u ka tẽlisiwa? Angelo okuti “olohoka vio kilu,” va ka kuatisa Yesu Kristu Soma yolosoma ‘kuyaki weteke linene lia Suku Ukuonene Wosi’ okuti, o Armagedo. (Esituluilo 16:14-16; 19:14-16) Ovangelo vakuonene va panga onepa kesombiso lia Suku ndeci Ñala Yesu poku “nena efetuluinyo ku vana . . . ka va pokola kolondaka viwa via Ñala yetu Yesu.”—2 Va Tesalonike 1:7, 8.

Kolela okuti ovangelo va kuete onjongole yoku ku kuatisa. Ovo va kapako ekalo liomanu vana va yongola oku fendela Yehova Suku kuenda eye wa siata oku vetiya angelo oco a pamise loku teyuila afendeli vaye vakuekolelo palo posi.—Va Heveru 1:14.

Omunu lomunu pokati ketu o sukila oku nõla onjila yimue. Anga hẽ tu ka yevelela loku pokola kolondaka viwa vi kasi oku kundiwa voluali luosi? Olombangi Via Yehova vocikanjo cove vi sanjukila oku ku longisa ndomo o kuatisiwa lovangelo va Suku.