1-3. (a) Akristão vocili va siata oku lekisa ndati okuti va kuete onjongole yoku lisanga la vamanji kolohongele? (Tala elitalatu kefetikilo liocipama cilo.) (b) Nye tu konomuisa vocipama cilo?

UMALẼHE umue ufeko o tukuiwa hati Corinna, eci a tẽlisa 17 kanyamo inaye wa kuatiwa, kuenje wa tualiwa vokayike muna a talisiwa ohali lupange walua. Noke, omõla waye Corinna wa tualiwa kofeka yo Siberia okuti, ya kala ocipãla lonjo yavo. Eci va pitĩla kofeka yaco, wa talavaya vepia limue okuti, wa talisiwa ohali ndupika. Ndaño okuti ka kuatele uwalo woku liteyuila kombambi, pole, olonjanja vimue wa enda oku kisikiwa oku talavaya vocitumãlo cimue muli ombambi yalua. Umalẽhe Corinna kumue la mana yaye va liyaka lovitangi viaco, pole, va nõlapo oku talavaya calua vepia, oco va ende kohongele.

² Umalẽhe Corinna wa popia hati: “Tua enda oku tunda kupange koñolosi, kuenje tu linga ungende u soka 25 kolokilometulu toke kocitumãlo coku londela vomboyo. Noke, omboyo yaco ya enda oku fetika ungende kowola yavali kociteketeke, kuenje tu linga ungende wolowola epandu. Eci tu loka vomboyo, tu linga vali  ungende ukuavo wolokilometulu epandu toke kocitumãlo coku lingila olohongele.” Umalẽhe Corinna wa kuatele esanju lialua omo liungende va linga. Eye wa popia hati: “Kolohongele tua enda oku lilongisa Utala Wondavululi loku imba ovisungo Viusoma. Tua sola calua ulandu waco, kuenda wa pamisa ekolelo lietu.” Ovo va tiukila lika konjo noke yoloneke vitatu. Pole, usongui wavo ka limbukile okuti, ka va kalele vepia.

³ Koloneke vilo, afendeli va Yehova va kuete onjongole yoku endaenda kolohongele, oco va li sange la vamanji. Akristão vo kocita catete, va enda oku lekisa onjongole yoku lisanga la vamanji, oco va fendele Yehova, kuenda oku lilongisa ovina viatiamẽla kokuaye. (Ovilinga 2:42) Ove wa siatavo oku kuata onjongole yoku enda kolohongele. Ove pamue o kasivo oku liyaka locitangi coku endaenda kolohongele olonjanja viosi, ndeci ca siata oku pita la vamanji vakuavo. Citava okuti o sukila oku talavaya olowola vialua kupange woku sanda eteku. Pamue o kuete upange walua o sukila oku linga, ale o kava calua. Pole, nye ci tu kuatisa oku likolisilako oco tu endaende kolohongele olonjanja viosi? ^[1] (Tala etosi kesulilo liocipama.) Tu pondola oku kuatisa ndati vana tu longisa Embimbiliya, kuenda omanu vakuavo oco va endaende kolohongele olonjanja viosi? Ocipama cilo, ci lombolola asunga atatu a lekisa esilivilo lioku endaenda kolohongele ndeci: (1) Ci kuete esilivilo kokuetu. (2) Ci kuatisa omanu vakuavo. (3) Ci sanjuisa Yehova. ^[2]—Tala etosi kesulilo liocipama.

4. Oku kala la vamanji kolohongele ci ku kuatisa ndati oku lilongisa ovina viatiamẽla ku Yehova?

⁴ Olohongele vi tu longisa ovina vialua. Olohongele viosi vi tu longisa ovina vialua viatiamẽla ku Yehova. Vokuenda kuanyamo a pita, vamanji valua Velilongiso Liembimbiliya Vekongelo va kuama elivulu Kuata Ukamba Wocili la Yehova. Nye wa yeva vutima eci tua lilongisa ovituwa via Yehova, kuenda eci wa limbuka esanju vamanji va kuete omo lioku lilongisa eci catiamẽla kokuaye? Ovina viaco via ku vetiya oku vokiya ocisola cove ku Yehova. Kolohongele, tua siatavo oku lilongisa ovina vialua viatiamẽla Kembimbiliya poku yevelela lutate olohundo, oku tala ovindekaise vi lingiwa, kuenda oku yevelela oku tangiwa Kuembimbiliya. (Nehemiya 8:8) Sokolola ovina vialua tua siata oku lilongisa vokuenda kuolosemana viosi, eci tu pongiya oku tangiwa Kuembimbiliya, kuenda eci tu yeva ovina vamanji va lilongisa Vembimbiliya.

5. Olohongele via ku kuatisa ndati oku kapako ovina wa lilongisa Vembimbiliya, kuenda oku mioñolola uloño wove kupange woku kunda?

⁵ Olohongele vi tu longisa oku kapako ovina tua lilongisa Vembimbiliya. (1 Va Tesalonike 4:9, 10) Anga hẽ eteke limue wa endele kohongele yimue okuti kua lingiwa elilongiso liocipama cimue Cutala Wondavululi kuenje ca ku vetiya oku vokiya otembo yove kupange woku kunda, oku mioñolola olohutililo viove, ale oku ecela manji umue wa ku lueyela? Olohongele via siata oku lingiwa vokuenda kuosemana, vi pondola oku tu longisa ndomo tu kunda olondaka viwa. Vi tu longisavo ndomo tu kuatisa omanu, oco va kuate elomboloko liocili Cembimbiliya.—Mateo 28:19, 20.

6. Olohongele via siata oku tu kuatisa ndati oco tu pamise ekolelo lietu?

⁶  Olohongele vi pamisa ekolelo lietu. Oluali lulo lua Satana, lu pondola oku honguisa ekolelo lietu, lu tu vetiya oku sakalala calua, kuenda oku tu sumuisa. Pole, olohongele vi pamisa ekolelo lietu, kuenda vi tu ĩha ongusu yoku amamako oku fendela Yehova. (Tanga Ovilinga 15:30-32.) Olonjanja vimue tua siata oku konomuisa ndomo ovitumasuku vimue Viembimbiliya via tẽlisiwa. Poku ci linga, ci tu kuatisa oku kolela okuti, ovina viosi Yehova a likuminya vi ka tẽlisiwa kovaso yoloneke. Vamanji ka va siatele lika oku pamisa ekolelo lietu poku linga olohundo kolohongele. Pole, va siatavo oku ci linga poku eca atambululo, kuenda poku imba ovisungo vioku sivaya Yehova. (1 Va Korindo 14:26) Nda tu sapela la vamanji osimbu ohongele ka ya fetikile, ale kesulilo, tu kuata esanju. Momo, tu kuete akamba valua okuti, va siata oku tu tata ciwa.—1 Va Korindo 16:17, 18.

7. Momo lie oku endaenda kolohongele ci kuetele esilivilo?

⁷ Kolohongele tua siata oku kuatisiwa lespiritu sandu lia Suku. Yesu wa siata oku songuila akongelo lekuatiso liespiritu sandu. Eye wa tu sapuila hati: ‘Yeveleli eci espiritu sandu li popia kakongelo. (Esituluilo 2:7) Espiritu sandu li pondola oku tu kuatisa oku tamalãla eci tu yonjiwa, kuenda li tu kuatisavo oku kuata utõi poku kunda olondaka viwa. Li pondolavo oku tu kuatisa oku nõla onjila ya sunguluka. Eli olio esunga lieci tu sukilila oku likolisilako oku endaenda kolohongele oco tu kuatisiwe lespiritu sandu lia Suku.

8. Vamanji va pondola oku kuatisiwa ndati eci va limbuka okuti tua siata oku endaenda kolohongele, tu eca atambululo, kuenda tu imba ovisungo? (Talavo pokakasia losapi hati: “ Eye wa Siata Oku Kuata Esanju Kolohongele.”)

⁸ Eci tu enda kolohongele tu kuata epuluvi lioku lekisa ku vamanji okuti, tu va kuetele ocisola. Vamanji valua va kasi vekongelo lietu va siata oku pandikisa kovitangi. Upostolo Paulu wa soneha ndoco: ‘Li pamisi pokati.’ (Va Heveru 10:24, 25) Tu pondola oku lekisa okuti tua siata oku tata ciwa vamanji, poku lisanga lavo, kuenda oku li vetiya pokati. Eci tu enda kolohongele tu lekisa ku vamanji okuti, tu yongola oku kala kumosi lavo, oku sapela lavo, kuenda oku lekisa onjongole yoku kũlĩha ndomo va kasi. Tu pamisavo vamanji eci va yeva  atambululo tu eca kolohongele, kuenda eci tu imba ovisungo lutima wosi.—Va Kolosai 3:16.

9, 10. (a) Lombolola ndomo olondaka Yesu a popia kelivulu lia Yoano 10:16, vi tu kuatisa oku kuata elomboloko lieci oku lisanga la vamanji kolohongele ci kuetele esilivilo. (b) Nda tu kuete ocituwa coku endaenda kolohongele tu kuatisa ndati manji umue wa tundisiwa konjo la vakuepata liaye?

⁹ Eci tu enda kolohongele tu kuatisa vamanji oku li kuata omunga. (Tanga Yoano 10:16.) Yesu wa li sokisa lungombo, kuenda wa sokisavo olondonge viaye locunda colomeme. Kũlĩhĩsa ocindekaise eci: Nda olomeme vivali vi kasi komunda, vikuavo vivali vi kasi venyala limue, kuenda omeme yikuavo yi kasi pocitumãlo cikuavo, anga hẽ olomeme viaco vitãlo vi panga onepa kocunda colomeme? Sio, ka vi pangi onepa kocunda. Momo, ocunda colomeme ca siata oku kala pamosi, kuenda ci kuama lika ungombo wavo. Cimuamue haico ci pita letu okuti, ka tu sukila oku kala ocipãla la vamanji, omo liocituwa coku yuvula oku endaenda kolohongele. Omo liaco, tu sukila oku kala kumosi la vamanji, oco tu pange onepa ‘kocunda’ okuti, tu kuama lika “ungombo” umosi.

¹⁰ Olohongele vi tu kuatisa oku li kuata omunga, ndeci ci pita la vakuepata limue va li kuetele ocisola. (Osamo 133:1) Vekongelo muli vamanji vamue okuti, va tundisa konjo lolonjali viavo, ale la vamanjavo. Pole, Yesu wa likuminya oku eca kokuavo epata limue li va kuetele ocisola okuti, va tatiwa ciwa. (Marko 10:29, 30) Nda wa lekisa ocituwa coku endaenda kolohongele olonjanja viosi, o kala ndonjali, ale nda manji womunu umue o kasi vekongelo. Eci tu sokolola ovina viaco, ci tu vetiya oku likolisilako oku endaenda kolohongele olonjanja viosi.

11. Nye Yehova a pondola oku yeva vutima, nda tu pokola konumbi yoku endaenda kolohongele?

¹¹ Kolohongele, tu eca ku Yehova ovina a sesamẽla. Omo okuti Yehova eye wa tu Lulika,  tu sukila oku eca olopandu, oku u sumbila, kuenda oku eca esivayo kokuaye. (Tanga Esituluilo 7:12.) Tu pondola oku ci linga kolohongele eci tu sapela la Yehova poku likutilila, kuenda poku imba ovisungo. Omo liaco, tu kuete esumũlũho lioku fendela Yehova olosemana viosi!

12. Nye Yehova a pondola oku kuata vutima eci tu pokola konumbi yoku endaenda kolohongele?

¹² Omo okuti Yehova eye wa tu lulika, tu sukila oku pokola kokuaye. Eye wa siata oku tu vetiya oku endaenda kolohongele kumosi la vamanji, osimbu tu lavoka oku iya kueteke liesulilo. Omo liaco, nda tu pokola kocihandeleko caco, Yehova o kuata esanju. (1 Yoano 3:22) Momo, o limbuka okuti, tu kuete onjongole yoku endaenda kolohongele olonjanja viosi. Kuenje, o kapako alikolisilo etu oku lisanga la vamanji kolohongele.—Va Heveru 6:10.

13, 14. Oku endaenda kolohongele ci tu kuatisa ndati oku kuata ukamba la Yehova, kuenda la Yesu?

¹³ Eci tu enda kolohongele, tu lekisa ku Yehova okuti, tu yongola oku kuata ukamba laye, kuenda Lomõlaye. Kolohongele, tua siata oku lilongisa Embimbiliya, tu lilongisavo ku Yehova ovina tu sukila oku linga, kuenda ovituwa tu lekisa komuenyo wetu. (Isaya 30:20, 21) Nda omanu vana ka va fendela Yehova veya kolohongele, va pondola oku limbuka okuti, tu kasi oku songuiwa la Yehova. (1 Va Korindo 14:23-25) Yehova wa siata oku songuila olohongele vietu lekuatiso liespiritu sandu, kuenda ovina viosi tu lilongisa vi tunda kokuaye. Omo liaco, eci tu enda kolohongele, tu yevelela ovina Yehova a tu sapuila. Kuenje, tu limbuka ocisola a tu kuetele, kuenda tu kuata ukamba laye.

¹⁴ Omo okuti Yesu eye Utue wekongelo wa popia hati: “Apa pa liongoluila [omanu] vavali ale vatatu vonduko yange, ñala pokati kavo.” (Mateo 18:20) Embimbiliya li popiavo hati, Yesu o kasi oku “endela pokati” kakongelo. (Esituluilo 1:20–2:1) Yehova kumue la Yesu va kasi letu, kuenda va siata oku pamisa ekolelo lietu kolohongele. Nye o sima okuti oco Yehova a yeva vutima eci a limbuka ndomo o kasi oku likolisilako oco o kuate ukamba laye, kuenda Lomõlaye?

15. Oku endaenda kolohongele ci tu kuatisa ndati oku lekisa ku Yehova okuti, tu yongola oku pokola kokuaye?

¹⁵ Eci tu enda kolohongele, tu lekisa ku Yehova okuti, tu yongola oku pokola kokuaye. Yehova ka tu kisika oku linga ovina a popia. (Isaya 43:23) Nda tua nõlapo oku pokola konumbi ya Yehova yoku endaenda kolohongele, tu lekisa okuti, tu u kuetele ocisola. Kuenje, tu tava okuti, Yehova o kuete omoko yoku tu sapuila ovina tu sukila oku linga. (Va Roma 6:17) Nye tu sukila oku linga nda cime cetu kupange woku sanda eteku o tu kisika oku talavaya calua kuenje, ka tu kuata otembo yoku endaenda kolohongele? Citava okuti ombiali yofeka yi kapa ocihandeleko cokuti, nda omunu umue enda kohongele oco a fendele Yehova, o kangisiwa, o feta olombongo viekangiso liaco, o kapiwa vokayike, ale o tambula ekangiso likuavo. Citava okuti pamue tu nõlapo oku linga ovina vikuavo okuti ka tu endi kohongele. Nda tu kasi oku liyaka locitangi caco, tu  sukila oku nõla onjila tu kuama. (Ovilinga 5:29) Pole, nda tua nõlapo oku pokola ku Yehova, tu sanjuisa utima waye.—Olosapo 27:11.

16, 17. (a) Tua kũlĩha ndati okuti olohongele via kuatele esilivilo lia velapo Kakristão vo kocita catete? (b) Nye manji George Gangas a yeva vutima omo lioku endaenda kolohongele?

¹⁶ Noke liohongele Akristão vatete va linga keteke lio Pendekoste kunyamo wa 33, va fetika oku endaenda kolohongele olonjanja viosi, oco va fendele Yehova. Ovo va kakatela “kelongiso liovapostolo, loku kala kumosi.” (Ovilinga 2:42) Kuenje, ka va liwekelepo oku endaenda kolohongele, ndaño ceci va enda oku lambalaliwa lombiali ya va Roma, kumue lasongui vetavo lia va Yudea. Ndaño okuti kotembo yaco ka ca lelukile oku ci linga, pole, va likolisilako oku endaenda kolohongele.

¹⁷ Koloneke vilo, afendeli va Yehova va siatavo oku eca olopandu omo lioku endaenda kolohongele, kuenda oku sanjukila oku lisanga la vamanji vakuavo. Manji George Gangas okuti, wa pangele onepa Kosungu Yolombangi Via Yehova vokuenda kueci ci soka 22 kanyamo, wa popia hati: “Oku kala pamosi la vamanji kolohongele, ci ndi nenela esanju lialua komuenyo, kuenda ci pamisa ekolelo liange. Ndi sole oku pitĩla tete Vonjango Yusoma. Ndi solevo oku kala omunu wa sulako poku tunda Vonjango Yusoma kesulilo liohongele. Nda siata oku kuata esanju lialua poku sapela lafendeli va Suku. Omo liaco, eci ndi lisanga la vamanji kolohongele, ndi kala ndu okuti ndi kasi lepata liange, kuenda ukamba ndi kuete lavo u ndi nenela esanju lialua.” Noke wamisako loku popia hati: “Ndi kuete onjongole yoku endaenda kolohongele olonjanja viosi.”

18. Nye o yeva vutima catiamẽla kolohongele, kuenda nye wa nõlapo okuti oco o linga?

¹⁸ Ove hẽ, o kuetevo ovisimĩlo viaco viatiamẽla koku fendela Yehova? Nda o kuete ovisimĩlo viaco, amamako oku endaenda kolohongele, ndaño okuti pamue ka ca lelukile oku ci linga. Lekisa okuti o kuãi ongangu ya Soma Daviti wa popia hati: “A Yehova, [ndi] sole onjo yove omu o tumayala.”—Osamo 26:8.