Manji Felisa: Nda kulila vepata limue okuti olohukũi, vofeka yo Espanya. Epata liange liosi lia kala vetavo Liokatolika, kuenda tua li tumbikile calua ketavo liaco. Omo liaco, ci soka, 13 ya vakuepata liange va kala olopatele. Ocimumba ca ina yange wa kalavo o patele, kuenda wa kala ulongisi kosikola yimue yetavo liavo Liokatolika. Pole, noke liolofa viaye, Papa João Paul II wa linga ovihilahila vimue vioku eca esivayo kokuaye. Isiange wa talavaya vonjo yimue yoku panga ovina viutale. Pole, ina yange wa enda oku talavaya vovapia. Tua kala omãla ecelãla, pole, ame ndukulu wavo.

Eci nda tẽlisa 12 kanyamo, vofeka yo Espanya mua fetika oku pita uyaki. Noke liuyaki waco, Isia yange wa tualiwa vokayike, momo ombiali ka ya solele ovina a enda oku popia viatiamẽla kopulitika. Ka ca lelukile ku ina yange oku sanga okulia oco a tu tekule. Omo liocitangi caco vamanjange vatatu ndeci: Araceli, Lauri kuenda Ramoni, va tualiwa konjo yolomandele vimbo lio Bilbao, oco va kale lavo. Konjo yaco, vamanjange va kuatele okulia kualua.

Manji Araceli: Kotembo yaco, nda kuata 14 kanyamo, pole, manjange Lauri wa kuata 12 kanyamo, kuenda Ramoni wa kuata 10 kanyamo. Tu kuetele ongeva epata lietu. Eci tua kala konjo yolomandele, tua kuatele upange woku yelisa vonjo. Pole, eci pa pita anyamo avali, olomandele via linga esokiyo liokuti, tu ilukila vimbo lio Zaragoza muna mua kala onjo yavo yinene yoku tata omanu va kuka. Tua kuatele upange walua woku yelisa vokusinya, kuenje, tua enda oku kava calua.

Manji Felisa: Eci manjange a tualiwa konjo yolomandele, ya kala kofeka yo Zaragoza, ina yange kumue locimumba caye una wa kala o patele yo vimbo liaco, va nõlapo oku ndi tuala kofeka yaco. Momo va kuatele ovisimĩlo viokuti, ndi kala ocipãla lukuenje umue wa yonguile oku namulãla lame. Nda yonguile oku kala konjo yolomandele vokuenda kuotembo yimue, omo liocisola cange ku Suku. Nda kuatele ocituwa coku endaenda vonembele oloneke viosi. Omo okuti ocimumba cange ci kasi kupange wumisionalia vetavo Liokatolika vocifuka co Afrika, nda yonguilevo oku kala kupange waco.

Eci nda kala konjo yolomandele, nda limbukile okuti, si pondola oku linga ovina vialua ndi yongola. Momo, olomandele ka via tavele okuti, ngenda kofeka yikuavo oku fendela Suku, ndeci nda yonguile. Pole, noke  liunyamo umosi, ndeya oku tiukila konjo oku ka nyula ocimumba ca ina yange una wa kala o patele. Ndo lingila upange wo vonjo. Pole, koñolosi tua enda oku lesala otelusu. Nda solele calua oku kapa oloneleho vonembele, oku walisa ociteka cina va tukula vati Maria, kuenda vikuavo “violosandu.”

Manji Araceli: Eci nda kala volupale luo Zaragoza, nda linga olohuminyo vi sukiliwa oco ndi kale omandele. Noke, olomandele via nõlapo oku ndi tepa la vamanjange. Kuenje, nda tumiwa kofeka yo Madrid. Pole, manjange Lauri wa tumiwa konjo yikuavo yolomandele volupale luo Valencia. Manjange Ramoni, eye lika wa sialele volupale luo Zaragoza. Eci nda pitĩla volupale luo Madrid, nda linga ohuminyo yavali yoku kala omandele. Konjo yolomandele kua kala omanu valua ndeci olondonge kuenda vana va kuka. Omo liaco, nda kuata upange walua. Nda talavaya vonjo yolomandele yina ya kala osipitali.

Nda kala oku lavoka ovina via laikele oku pita lame kovaso yoloneke omo lioku kala omandele. Nda simĩle okuti, tua laikele oku tiamisila lika omuenyo wetu koku tanga Embimbiliya, kuenda oku kuata elomboloko liaco. Pole, ndeya oku sumua calua. Momo, lomue wa enda oku tukula ovina vi sangiwa Vembimbiliya, oku vangula eci catiamẽla ku Suku, ale ku Yesu. Nda lilongisa ovina vimue viatiamẽla kelimi Liolatin, omuenyo “wolosandu” Viokatolika, kuenda oku fendela ociñumañuma cina va tukula vati, Maria. Pole, tua enda oku pesila otembo yetu kovopange alua.

Vokuenda kuotembo, ndeya oku sakalala calua kuenda nda sumuile. Noke, nda kuata ovisimĩlo viokuti, ndi sukila oku nganyala olombongo oco ndi kuatise epata liange. Momo, ndaenda oku talavaya vonjo yolomandele oco vi linge olohuasi. Omo liaco, nda sapela la mandele una wa kala usongui wonjo yaco, oco a kũlĩhe ocisimĩlo cange. Kuenje, ndo sapuila okuti, ndi yongola oku tiukila kepata liange. Pole, wa ndi yikila vokahondo kamue ka kala ndokayike. Momo, wa simĩle okuti, ndi pongolola ocisimĩlo cange.

Noke, olomandele via njupa vokahondo kaco. Pole, eci via limbuka okuti ndi kasi oku amamako locisimĩlo coku tiukila kepata liange, via ndi yikila vali vokahondo kaco ka kala ndokayike. Noke lioku ci linga olonjanja vitatu, via ndi sapuila okuti, ndi tiukila lika kepata liange, nda nda soneha olondaka viokuti: “Ndi kasi oku tunda konjo yolomandele, momo, nda nõlapo oku vumba Satana okuti Suku hayeko.” Ocisimĩlo cavo ca ndi sumuisa calua. Ndaño okuti nda kuata ocisimĩlo coku tiukila kepata liange, pole, sia yonguile oku soneha olondaka viaco. Noke, nda pinga ku mandele yaco okuti, ndi yongola oku sapela la patele, kuenje, ndo sapuila ocitangi caco. Eci patele yaco a sapela la mbisipu, wo sapuila oco ndi tiukile konjo yolomandele volupale luo Zaragoza. Eci nda pitĩla konjo yaco, nda kalako lika olosãi vimue, kuenje va ngecelela oku tiukila kepata liange. Ka pa pitile otembo yalua kuenje, manjange Lauri kumue la Ramoni, va tundavo konjo yolomandele.

Manji Felisa: Noke liotembo yimue ndeya oku kuela, kuenje, tua ilukila volupale luo Cantabria, kofeka yo Espanya. Kotembo yaco, nda kuatele ocituwa coku endaenda  konembele olonjanja viosi. Eteke limue vo Calumingu eci tua endele konembele, patele wa temẽla omanu vosi va kala vonembe poku popia hati: “Tali elivulu eli!” Eye wa tu lekisa elivulu A Verdade Que Conduz à Vida Eterna. Noke wa tu sapuila hati: “Nda omunu umue wa ku ĩhi elivulu eli, li neni kokuange, ale linisi!”

Omo okuti sia kuatele elivulu liaco, nda yonguile oku li tambula. Noke lioloneke vimue, akãi vavali veya konjo yange. Ovo Olombangi Via Yehova, kuenje, va ndi nenela elivulu liaco. Nda li tanga eteke liaco kuteke. Eci akãi vaco va tiuka onjanja yikuavo, va ndi pulisa nda ndi yongola oku lilongisa Embimbiliya. Kuenje, nda va tambulula okuti, ndi yongola.

Olonjanja viosi nda kuatele onjongole yoku sanjuisa Suku. Eci nda lilongisa ocili catiamẽla ku Yehova, ca ndi vetiya oku lekisa ocisola calua kokuaye. Kuenje, nda kuata onjongole yoku sapuila komanu vosi catiamẽla kokuaye. Nda papatisiwa kunyamo wo 1973. Kuenje, nda seteka oku sapela lepata liange olonjanja vialua catiamẽla kocili. Pole, epata liange ca piãla enene manjange Araceli, wamamako oku ndi sapuila hati, ovina nda lilongisa viuhembi.

Manji Araceli: Omo okuti nda tatiwa lãvi konjo yolomandele, ndeya oku tema, kuenda nda sumuile calua letavo liange. Pole, ndamamako oku endaenda konembele vo Calumingu, kuenda ndaenda oku lesala otelusu oloneke viosi. Omo okuti nda yonguile oku kuata elomboloko Liembimbiliya, nda pinga ku Suku oco a ndi kuatise. Noke, mana yange Felisa wa ndi sapuila ovina a lilongisa. Omo okuti wa kuatele esanju lialua omo liovina a lilongisa, nda simĩle okuti wa linga eyui. Momo, sia tavele ovina a ndi sapuila.

Noke, ndeya oku enda kolupale luo Madrid kupange woku sanda eteku, kuenje nda kuela. Vokuenda kuanyamo alua nda limbuka okuti, omanu vana va kuatele ocituwa coku endaenda konembele ka va kapeleko ovina Yesu a longisa. Omo liaco, nda liwekapo oku endaenda konembele. Kuenje, sia tavele vali “kolosandu,” kelongiso liondalu yifelu, kuenda kovisimĩlo viokuti, patele o pondola oku ecela akandu omanu. Noke, nda inasi oviñumañuma viosi nda kuatele viatiamẽla ketavo Liokatolika. Omo okuti sia kũlĩhĩle nda onjila nda nõlapo ya sunguluka, ndeya oku sumua calua. Pole, ndamamako oku likutilila ku Suku ndoco: “Ndi yongola oku ku kũlĩha ciwa. Ndi kuatise!” Ndi ivaluka okuti, Olombangi Via Yehova via enda oku iya konjo yange olonjanja vialua, pole lalimue eteke nda yuluile epito liange. Momo nda liwekelepo oku kolela ketavo.

 Manjange Lauri wa kala kofeka yo Fransa, pole Ramoni wa kala ko Espanya. Ovo va fetika oku lilongisa Embimbiliya Lolombangi Via Yehova kunyamo wo 1980. Nda kũlĩhĩle okuti, va longisiwa ovina vialua viuhembi ketavo va kala, ndeci ca pita la mana Felisa. Noke, ndeya oku li sanga la manji Angelines, una nda lisunguile laye vimbo tua kala, kuenje, tua linga akamba vocili. Eye wa kalavo Ombangi ya Yehova. Kuenje, eye kumue lulume waye va sapela lame olonjanja vialua loku ndi pula nda ndi yongola oku lilongisa lavo Embimbiliya. Noke, ndeya oku limbuka okuti, ndaño nda popele okuti sia kapeleko ovina vietavo, pole, nda kuatele onjongole yoku kũlĩha eci catiamẽla Kembimbiliya. Omo liaco, nda va sapuila ndoco: “Ndi tava lika oku ndi longisa Embimbiliya nda weceleli okuti poku linga elilongiso liaco, ndi kuama Vembimbiliya liange!” Kotembo yaco nda kuata Embimbiliya li tukuiwa hati, Nácar-Colunga.

Manji Felisa: Nda papatisiwa kunyamo wo 1973. Kotembo yaco, olupale luo Santander okuti cilo lua linga olupale luo Kantabria, mua kala lika 70 kolombangi via Yehova. Tua enda oku linga ovongende alua lokalela.oco tu kundile omanu vosi va kala ocipãla. Omo liaco, tua linga ovongende alua lokalela, noke tu endela vekãlu, oco tu pitĩle kovaimbo akuavo.

Vokuenda kuanyamo nda longisa Embimbiliya komanu valua, kuenda ci soka 11 va papatisiwa. Omo okuti omanu valua nda longisa Embimbiliya va kala vetavo Liokatolika, nda sukilile oku kuata epandi lavo. Ovo, va sukilile otembo yalua oco va limbuke okuti ovina va kala oku lilongisa vetavo liavo viuhembi, ndeci ca pita lame. Nda kũlĩhĩle okuti, Embimbiliya kumue lespiritu sandu lia Yehova, ovio lika vi pondola oku kuatisa omunu oku linga apongoloko kovisimĩlo viaye, kuenda oku kuata elomboloko liocili. (Va Heveru 4:12) Ulume wange Bienvenido, una wa kala osipayu, wa papatisiwa kunyamo wo 1979. Kuenje, ina yange wa fetika oku lilongisa Embimbiliya, pole ka pa pitile otembo yalua, noke wa fa.

Manji Araceli: Eci nda fetika oku lilongisa Embimbiliya Lolombangi Via Yehova, nda simĩle okuti, si pondola oku kolela kokuavo. Pole, vokuenda kuotembo, nda liwekapo oku kuata ovisimĩlo viaco. Olombangi Via Yehova via ndi longisa Embimbiliya, kuenda oku pokola kolonumbi viaco. Ekolelo liange ku Yehova kuenda kovina nda lilongisa Vembimbiliya lia pamisiwa, kuenje nda kuata esanju lialua. Omo okuti omanu nda lisunguile lavo vimbo lietu va limbukile apongoloko nda linga, va ndi sapuila vati: “A Araceli, amamako oku endela vonjila wa nõla!”

Ndi ivaluka ohutililo nda lingile yokuti: “Ngeca olopandu ku Yehova okuti ka ndi yandulukile, kuenda wa nyiha apuluvi alua oku sanga ukũlĩhĩso wocili Cembimbiliya nda kala oku sandiliya.” Nda sapelavo la mana yange Felisa oco a ngecele, omo liovina vĩvi ndo sapuilile. Omo liaco, tua liwekapo oku kuata olonamalãla pokati ketu. Pole, tu sanjukila lika oku sapela ovina viatiamẽla Kembimbiliya. Nda papatisiwa kunyamo wo 1989, eci nda tẽlisa 61 kanyamo.

Manji Felisa: Cilo, nda tẽlisa 91 kanyamo. Ulume wange wa fa, kuenda si pondola oku linga upange walua. Pole, nda siata oku tanga Embimbiliya oloneke viosi, oku endaenda kolohongele, kuenda kupange woku kunda.

Manji Araceli: Ndi sole oku sapela lolopatele, kuenda olomandele ndi sanga kupange woku kunda, momo nda kalavo omandele. Onjanja yimue nda sapelele la umue pokati kavo, kuenje valua va tambula alivulu kuenda olorevista. Ndi ivaluka o patele yimue okuti, noke lioku sapela layo vokuenda kuakukutu amue, ya tava kovina ndo sapuila. Noke ya ndi sapuila hati: “Ame nda kuka. Nye ndi pondola oku linga vali? Eci omanu vana va siata oku enda vonembele, kumue lepata liange va ka ndi mola, nye va ka popia?” Ndo tambulula ndoco: “Nye Suku a ka popia?” Noke, patele yaco wa limbuka okuti, ndi kuete esunga, kuenje wa sumua. Pole, ka kuatele utõi woku tunda vetavo liaye.

Nda siata oku ivaluka olondaka ulume wange a ndi sapuilile hati: O yongola oku enda kumue lame kohongele. Eci a endele kohongele onjanja yatete, wa kuatele 80 kanyamo. Kuenje, wamamako oku endaenda kolohongele olonjanja viosi. Eye wa lilongisile Embimbiliya, kuenda wa kala ukundi. Ndi ivaluka ovina vialua tua enda oku lingila kumosi kupange woku kunda. Pole, wa fa eci kua kambele oloneke vivali oco a papatisiwe.

Manji Felisa: Eci nda fetika oku fendela Yehova, vamanjange vatatu vakãi ka va solele onjila nda nõla. Pole, noke veya oku tava oku lilongisa Embimbiliya. Owu owo ulandu nda pita lawo komuenyo wange. Momo, vosi yetu tua fetika oku pesila otembo yetu koku sapela ovina viatiamẽla ku Yehova Suku yetu, kuenda Kondaka yaye! Omo liaco, tua linga afendeli va Yehova. *