1-3. (a) Apongoloko api okuti, pamue ka ca lelukile oku a linga noke liepapatiso lietu? (b) Nda ka tu kasi oku pamisa ukamba wetu la Yehova ndomo tua yonguile, apulilo api tu sukila oku linga? (Tala elitalatu kefetikilo liocipama cilo.)

VOKUENDA kuanyamo alua Manji umue o tukuiwa hati Kevin, osimbu ka lingile Ombangi ya Yehova, wa litumbikile kolomapalo vioku nganyala olombongo, oku sipa, ovoholua, kuenda oku nyua olodroga. ^[1] (Tala etosi kesulilo liocipama.) Vokuenda kuotembo yaco wa lilongisa ovina viatiamẽla ku Yehova, kuenda wa yonguile oku kala ekamba liaye. Pole, oco a tẽlise ocimãho caco, wa sukilile oku linga apongoloko alua. Eye wa tẽla lika oku linga apongoloko aco lekuatiso lia Yehova, kuenda lunene Wondaka yaye yi sangiwa Vembimbiliya.—Va Heveru 4:12.

² Manji Kevin noke yoku papatisiwa wa sukilile oku amamako oku linga apongoloko, oco a linge Ukristão umue o kuete ovituwa viwa. (Va Efeso 4:31, 32) Momo, wa enda oku tema lonjanga.  Eye wa limbuka okuti, ka ca lelukile oku lilongisa ndomo a pondola oku likandangiya. Omo liaco, wa lombolola hati, oku likandangiya ocina cimue ka ca lelukile kokuaye okuti, oku liwekapo oku linga ovina ka via sungulukile osimbu ka papatisiwile ci sule! Pole, wa tẽla oku linga apongoloko aco, omo lioku pinga ekuatiso ku Yehova, kuenda oku lilongisa Embimbiliya.

³ Osimbu ka tua papatisiwile, valua pokati ketu tua sukilile oku linga apongoloko alua, oco tuambate omuenyo u litava leci Embimbiliya li popia. Pole, toke cilo tua limbuka okuti, tu sukila oku linga apongoloko kovina vimue, oco tu lekise ovituwa ndevi via Suku kuenda via Kristu. (Va Efeso 5:1, 2; 1 Petulu 2:21) Pamue tu limbuka okuti, tua siata oku lisiõsiõla calua, ale tu linga olombonde, kuenje tu popia ovina ka via sungulukile viatiamẽla komanu vakuavo. Olonjanja vimue tu kuata usumba omo lieci omanu va sima, ale ceci va popia okuti, ka tu kasi oku linga ovina via sunguluka. Citava okuti tu kasi oku likolisilako oku linga apongoloko vokuenda kuanyamo alua. Pole, toke cilo tua siata oku linga ovina viaco ka via sungulukile. Omo liaco, tu sukila oku lipula ndoco: ‘Momo lie ka ca lelukilile kokuange oku linga a pongoloko kovina vitito? Nye ndi sukila oku linga oco ndi kapeko eci Embimbiliya li popia okuti, ci ndi kuatisa oku amamako oku linga apongoloko komuenyo wange?’

4. Momo lie ka tu ponduila oku sanjuisa Yehova kovina viosi tu linga?

⁴ Omo okuti tu kuetele ocisola Yehova, tu yongola oku linga ovina viu nenela esanju. Pole, omo okuti ka tua lipuile, ka tu pondola oku u sanjuisa olonjanja viosi. Pamue tu kala nda Paulu wa popia hati: “Ñuete onjongole yoku linga eci ciwa, pole, si kuete uloño woku ci linga.”—Va Roma 7:18; Tiago 3:2.

5. Apongoloko api tua linga osimbu ka tua papatisiwele? Oloñei vipi vĩvi tu kasi oku liyaka lavio toke cilo?

⁵ Osimbu ka tua fetikile oku panga onepa kekongelo, tua sukilile oku yuvula oku linga ovina Yehova a nyãle. (1 Va Korindo 6:9, 10) Pole, toke cilo tu kasi oku amamako lekambo lietu lioku lipua. (Va Kolosai 3:9, 10) Omo liaco, tu kasi oku amamako oku linga ovina ka via sungulukile ndaño okuti tunde eci tua papatisiwa pa pita ale anyamo alua. Olonjanja vimue tua siata oku kuata olonjongole vĩvi, kuenda ovisimĩlo ka via sungulukile. Pamue tu limbuka okuti, ka ca lelukile oku likandangiya kovisimĩlo viaco ka via sungulukile. Citava okuti, tu kasi oku liyaka loloñei vĩvi vokuenda kuanyamo alua.

6, 7. (a) Nye ca ecelela okuti, tu kuata ukamba la Yehova ndaño ka tua lipuile? (b) Momo ka tu sukilila oku kuata ohele yoku pinga ongecelo ku Yehova?

⁶ Ndaño okuti ka tua lipuile, pole tu pondola oku kuata ukamba la Yehova kuenda oku u fendela. O sukila oku ivaluka ndomo wa linga ekamba lia Yehova. Momo eye lika wa limbuka ovituwa viwa kokuove, kuenda, eye o yongola okuti, u kũlĩha ciwa. (Yoano 6:44) Yehova wa kũlĩhavo okuti, ove wa siata oku lueya, kuenda oku linga ovina ka via sungulukile. Ndaño wa siata oku linga ovina viaco pole, eye o yongola okuti, o linga ekamba liaye.

⁷ Omo okuti Yehova o tu kuetele ocisola calua, wa tu ĩha ombanjaile yi kuete esilivilo lia velapo. Eye wa tumile Yesu Palo posi, oco a ece omuenyo waye ndocisembi coku tu yovola kakandu. (Yoano 3:16) Nda tu linga ekandu, tu sukila oku pinga ongecelo ku Yehova. Omo liocisembi, tua kolela okuti, Yehova o  pondola oku tu ecela, kuenje tu linga akamba vaye. (Va Roma 7:24, 25; 1 Yoano 2:1, 2) Ivaluka okuti, Yesu wa fila omanu vana va likekembela akandu avo. Ndaño tua limbuka okuti tua linga ocina cimue cĩvi, pole, tu sukila oku amamako oku likutilila loku pinga ongecelo ku Yehova. Nda ka tu pingi ku Yehova oco a ecele akandu etu, tu kala ndu okuti, ka tu yongola oku pusa povaka etu a liña. Omo liaco, tu eca olopandu ku Yehova wa ecelela okuti, ndaño ka tua lipuile, pole tu pondola oku kala akamba vaye!—Tanga 1 Timoteo 1:15.

8. Momo lie tu sukilila oku limbuka oloñei vĩvi tua siata oku kuata?

⁸ Tu sukila oku limbuka oloñei vĩvi tua siata oku kuata, kuenda oku yuvula oku li sandela esunga eci tu lueya. Yehova wa siata oku tu sapuila ovituwa tu sukila oku lekisa oco tu kale akamba vaye. (Osamo 15:1-5) Omo liaco, nda tu yongola oku kuata ukamba laye, tu sukila oku setukula ongangu yaye kuenda Yomõla waye. Tu sukilavo oku likandangiya kolonjongole vĩvi. Nda tua ci linga, ci tu kuatisa oku yuvula olonjongole viaco. Ndaño okuti pa pita otembo yalua tunde eci tua papatisiwa, pole, tu sukila oku likolisilako oku kuata ovituwa via sunguluka.—2 Va Korindo 13:11.

9. Tua kũlĩha ndati okuti tu pondola oku amamako oku kuata ovituwa viokaliye?

⁹ Upostolo Paulu wa sapuila Akristão vosi hati: “Ene wa longisiwi oku lula omunu wosimbu, una wa tiamẽla kovituwa viene viosimbu, okuti viu yapuisi loloñeyi vialuo vĩvi. Amamiko oku kuata ovituwa viokaliye, kuenda wali omunu wokaliye una wa lulikiwa locipango ca Suku, lesunga liocili kuenda oku kola.” (Va Efeso 4:22-24) Olondaka evi vi lomboloka okuti, tu sukila oku likolisilako oku linga apongoloko, kuenda “oku kuata ovituwa viokaliye.” Ndaño okuti tu kasi oku fendela Yehova vokuenda kuotembo yalua, pole, tu pondola oku lilongisa ovina vialua viatiamẽla kovituwa viaye. Embimbiliya li pondola oku tu kuatisa oku amamako oku linga apongoloko komuenyo wetu, oco tu kuate ovituwa ndevi via Yehova.

10. Nye tu sukila oku linga oco tu amameko oku linga apongoloko lekuatiso Liembimbiliya? Apulilo api tu sukila oku linga?

¹⁰ Vosi yetu tu yongola oku kapako ovina Embimbiliya li popia. Pole, nda tu yongola oku linga apongoloko, tu sukila oku likolisilako. Momo lie tu sukilila oku likolisilako? Anga hẽ Yehova ka pondola oku leluisa ovina oco tu linge eci ca sunguluka?

11-13. Momo lie Yehova a yonguila okuti, tu likolisilako oco tu yule oloñei vĩvi?

¹¹ Eci tu sokolola ovina viosi vi kasi voluali, ka tu kuata atatahãi oku limbuka okuti, Yehova o kuete unene woku linga ovina viosi. Yehova wa lulika ekumbi li kuete unene walua. Vokuenda kuekukutu limosi, ekumbi li eca ocinyi calua, kuenda owuya. Pole, oco vongongo mu kale omuenyo, mu sukila lika onepa yitito yocinyi kuenda owuya. (Osamo 74:16; Isaya 40:26) Yehova wa siatavo oku eca unene kafendeli vaye palo posi, nda va u sukila.  (Isaya 40:29) Nda Yehova wa kuatele onjongole yoku ci linga, nda wa leluisa ovina oco tu tẽle oku liyaka loloñei vĩvi okuti, tu liwekapo oku linga ovina ka via sungulukile. Momo lie ka ci lingila?

¹² Yehova wa tu ĩha elianjo lioku nõla eci tu yongola oku linga. Eye wa siata oku ecelela oco tu nõle nda tu pokola kokuaye ale sio. Nda tua nõlapo oku pokola ku Yehova kuenje tu likolisilako oku linga ocipango caye, tu lekisa okuti, tu u kuetele ocisola, kuenda tu yongola oku linga ovina viu sanjuisa. Satana wa popia hati, Yehova ka kuete omoko yoku viala. Pole, nda tua nõlapo oku pokola ku Yehova tu lekisa okuti, tu yongola okuti, o linga Ombiali yetu. Tua kolela okuti, Yehova isietu ukuacisola wa kapako alikolisilo tua siata oku linga, oco tu pokole kokuaye. (Yovi 2:3-5; Olosapo 27:11) Nda tu likolisilako oku yuvula oloñeyi vĩvi, ndaño ka ca lelukile oku ci linga, tu eca uvangi wokuti, tua kolela Yehova. Kuenje tu lekisa ku Yehova okuti, tu yongola oco a linge Ombiali yetu.

¹³ Yehova wa siata oku tu vetiya oco tu likolisileko oku setukula ovituwa viaye. (Va Kolosai 3:12; tanga 2 Petulu 1:5-7.) Yehova o yongolavo okuti, tu likolisilako oco tu lavulule ovina viosi ka via sungulukile vi kasi vutima wetu. (Va Roma 8:5; 12:9) Nda tua likolisilako oku linga epongoloko limue kuenje tua li yula, tu kuata esanju lialua.

14, 15. Nye tu sukila oku linga oco tu kuate ovituwa Yehova a sole? (Tala pokakasia losapi hati: “ Embimbiliya Kumue Lolohutililo Via Pongolola Omuenyo Wavo.”)

¹⁴ Nye tu sukila oku linga oco tu kuate ovituwa Yehova a sole? Nda tu yongola oku linga epongoloko limue, tu sukila oku yuvula oku li  nõlela onjila tu yongola oku kuama. Pole, tu ecelela okuti, Yehova o tu songuila poku ci linga. Kelivulu lia Va Roma 12:2 ku popia hati: “Ko ka setukuli ovituwa violuali lulo, puãi pongololi ovisimĩlo viene okuti vu limbuka ndeci ci kasi ocipango ca Suku okuti ciwa, ca sunguluka kuenda ca pua eko.” Oco tu limbuke ovina Yehova a yongola kokuetu, tu sukila oku kolela kekuatiso a siata oku tu ĩha. Tu sukilavo oku tanga Embimbiliya oloneke viosi, oku sokolola ovina tua tanga, kuenda oku likutilila ku Yehova oco a tu ĩhe espiritu sandu liaye. (Luka 11:13; Va Galatia 5:22, 23) Nda tua ci linga, Yehova o tu kuatisa oku kuata elomboloko liovina viu nenela esanju, kuenje, tu kuata ovisimĩlo ndevi viaye. Noke, ovina viosi tu sima, levi tu popia, kuenda evi tu linga, vi sanjuisa Yehova, kuenda vi tu kuatisavo oku likandangiya koloñei vĩvi. Ndaño tu likolisilako oku ci linga, pole, tu sukila oku amamako loku pandikisa poku liyaka loloñeyi vĩvi.—Olosapo 4:23.

¹⁵ Ndaño okuti tua siata oku tanga Embimbiliya oloneke viosi, pole, tu sukila oku lilongisa Embimbiliya lekuatiso lialivulu etu ndeci: Utala Wondavululi, kuenda o Despertai! Ovipama vialua via siata oku sandekiwa volorevista viaco, vi tu longisa ndomo tu pondola oku setukula ovituwa via Yehova, kuenda ndomo tu likolisilako poku liyaka loloñei vĩvi. Tu pondola oku sanga ovipama vimue, ale ovinimbu Viembimbiliya, vi tu kuatisa oku ci linga. Tu pondolavo oku nõla ovinimbu vimue Viembimbiliya kuenda ovipama vikuavo Vutala Wondavululi, kuenda vo Despertai! Kuenje, tu vi tanga olonjanja vialua vapuluvi akuavo.

16. Momo lie tu sukilila oku kuata epandi nda ka tu kasi oku kasi oku linga apongoloko lonjanga?

 ¹⁶ Oco omunu a lilongise ovituwa via Yehova, o sukila oku pita otembo yimue. Omo liaco, nda wa limbuka okuti kua lingile apongoloko alua o yongola, kuata epandi. O sukila oku likolisilako oco o linge ovina Embimbiliya li popia. Nda wa kuata ovisimĩlo kuenda ovituwa okuti ovio Yehova a yongola, ci leluka kokuove oku kuata ovisimĩlo ndevi via Yehova. Nda wa ci linga, ci ku kuatisa oku linga ovina via sunguluka.—Osamo 37:31; Olosapo 23:12; Va Galatia 5:16, 17.

17. Asumũlũho api tu pondola oku lavoka nda tua lekisa ekolelo ku Yehova?

¹⁷ Tu lavoka otembo eci tu ka li pua okuti, tu ka fendela Yehova otembo ka yi pui. Kotembo yaco ka tu ka liyaka vali lolonjongole vĩvi, kuenda ci ka leluka oku setukula Yehova. Pole, otembo yilo tu pondola oku fendela Yehova, omo liombanjaile yocisembi a tu ĩha. Ndaño ka tua lipuile, pole tu pondola oku sanjuisa Yehova, nda tuamamako oku linga apongoloko, kuenda tu pokola kovina a siata oku tu longisa vi sangiwa Vembimbiliya.

18, 19. Momo lie tu tavela okuti Embimbiliya li kuete unene woku tu kuatisa oco tu linge apongoloko komuenyo wetu?

¹⁸ Manji Kevin wa likolisilako calua oco a likandangiye konyeño. Eye wa sokolola lutate ovina a lilongisa Vembimbiliya, kuenje wa linga apongoloko komuenyo waye. Eye wa tava kelungulo vamanji va eca kokuaye. Ndaño okuti wa pita anyamo amue oco a lekise ovituwa viwa, pole, noke weya oku linga oñuatisi yekongelo. Pa pita ale 20 kanyamo tunde eci a linga ukulu wekongelo. Pole, toke cilo wa kũlĩha okuti, o sukila oku amamako oku liyaka lolonjongole vĩvi.

¹⁹ Tu pondolavo oku lekisa ovituwa viwa, ndeci manji Kevin a linga. Nda tua ci linga, ci tu kuatisa oku amamako oku pamisa ukamba wetu la Yehova. (Osamo 25:14) Nda tua likolisilako ku linga apongoloko oco tu sanjuise Yehova, eye o tu kuatisa oku kuata ekalo liwa. Omo liaco, tua kolela okuti, lekuatiso Liembimbiliya, tu pondola oku linga apongoloko komuenyo wetu.—Osamo 34:8.