ULANDU WOMUENYO
Eci Nda Linga, Oco ca Ndi sesamẽla Oku Linga
Kueci ci pitahãla 30 kanyamo, Donald Ridley wa kuatisa Olombangi via Yehova koku tetulula ovitangi viatiamẽla kombonge. Eye wa kuata ocikele cimue ci kuete esilivilo coku teyuila omoko olombei vi kuete yoku nõla nda yi kapiwa osonde, ale sio. Eye wa kuatisa Olombangi via Yehova oku kuata ayulo alua Kombonge ya velapo ko Estados Unidos. Don ndomo a enda oku tukuiwa lakamba vaye, wa kala ondingupange, embombe kuenda wa kuata ocituwa coku lieca olumue.
Kunyamo wo 2019, Don wa konomuisiwa lolondotolo kuenje va limbuka okuti o kasi luvei umue ka u kuete esaku. Pole, uvei waco wa livokiya lonjanga kuenje keteke 16 Yenyenye wo 2019 eye wa fa. Owu ulandu womuenyo waye.
Ame nda citiwa kunyamo wo 1954, volupale luo St. Paul, Minnesota, kofeka yo Estados Unidos. Olonjali viange via kala va Katolika kuenda ame ndumõla wavali pokati komãla vatãlo. Nda tangela kosikola yo Katolika kuenda nda kala oñuatisi ya patele. Pole, sia kũlĩhĩle ovina vialua viatiamẽla Kembimbiliya. Ndaño nda tavele okuti kuli Suku wa lulika ovina viosi, noke ekolelo liange ketavo lia tepuluka.
CECI NDA KŨLĨHA OCILI
Kunyamo watete eci nda kala kosikola ya velapo oku lilongisa Ovihandeleko viofeka, ohueli yimue Olombangi via Yehova, via totola kepito lionjo yange. Omo okuti nda kala oku sukula, nda pinga kohueli yaco oco yi tiuke noke kuenje ohueli locisola ya likuminya oku tiuka. Eci ohueli ya tiuka nda linga apulilo avali okuti: “Momo lie omanu vawa ka va kuete ekalo liwa komuenyo? Nye ci sukiliwa oku linga oco tu kuate esanju?” Noke nda tava oku tambula elivulu losapi hati, A Verdade Que Conduz à Vida Eterna kuenda o Tradução do Novo Mundo das Escrituras Sagradas okuti lia posoka ciwa. Kuenje nda tava elilongiso Liembimbiliya. Elilongiso Liembimbiliya lia ñuatisa oku kuata elomboloko. Nda komõha calua poku kũlĩha okuti Usoma wa Suku, Uviali umue wa velapo okuti owo u ka tetulula ovitangi viomanu palo posi. Nda limbukavo okuti uviali womunu ka u kuete unene woku malako ovitangi ndeci, evalo, ohali, ungangala kuenda ovilunga.
Nda litumbika ku Yehova kefetikilo liunyamo wo 1982 kuenje noke liolosãi vimue nda papatisiwa Kohongele yofeka losapi hati, “A Verdade do Reino” ya lingiwa kocitumãlo cimue cinene volupale St.Paul. Kosemana ya kuamamo, nda tiukila kosikola yo Minnesota oku ka linga oloseteko. Kefetikilo liosãi ya Mbalavipembe, nda yeva okuti koseteko yo kosikola nda pita kuenje eci ca ecelela okuti ndi kala onganji.
Vokuenda kuohongele yofeka losapi hati, “A Verdade do Reino” nda kũlĩha Mike Richardson. Eye wa tiamẽlele kepata lio Betele yo ko Brooklyn wa ndi sapuila okuti, Kombala ku kasi oku sokiyiwa oseketa yimue yoku tetulula ovitangi kombonge. Ame nda ivaluka olondaka via kalei vi sangiwa kelivulu Liovilinga 8:36 noke nda lipula ndoco, ‘Nye ci nateka oku pinga oco ndi talavaye Koseketa Yoku Tetulula Ovitangi Kombonge?’ Noke nda soneha ocicapa cupange wo Betele.
Olonjali viange ka via ci solele eci nda linga Ombangi ya Yehova. Isiange wa ndi pula nda, oku talavaya ko Betele ca ponduile oku ndi kuatisa kelilongiso liange lioku kala onganji. Ndo sapuila okuti upange nda kala oku linga woku lieca olumue kuenda ndo sapuilavo okuti vosãi ndi ka tambula 75 kolondolare okuti olio ekuatiso vana va kasi kupange wo Betele va kala oku tambula vosãi.
Noke lioku tẽlisa ocikele cange kupange, nda fetika upange wo Betele yo Brooklyn, Nova Yorke kunyamo 1984. Nda tumiwa oku talavaya Koseketa Yoku Tetulula Ovitangi Kombonge. Upange woku tetulula ovitangi kombonge wa ndi pongiya kovopange a laikele oku iya kovaso.
OKU SEMULUIWA KUOCITUMÃLO CO STANLEY
Ndomo ocitumãlo Stanley ca kala eci ca landiwa
Ocitumãlo co Stanley Volupale luo Jersey, wa landiwa kosãi ya Kuvala kunyamo wo 1983. Vamanji va pinga oco va semũlule onepa yolusu kuenda yovava vocitumãlo caco. Eci vamanji va liongolola lasongui vamue vombiali, va lombolola okuti va yongola oku landa ocitumãlo co Stanley, oco ci kale Onjango yolohongele Yolombangi via Yehova. Eci ca nena ocitangi cimue. Ovihandeleko vio volupale ndomo ku tungiwa onjo yimue ceci okuti, olonjo viefendelo via ponduile oku kala lika pokati kolonjo vikuavo. Pole, ocitumãlo co Stanley ca kala volupale pokati kolonjo vioku lingila olomĩlu. Omo liaco, asongui vo volupale ka va tavele okuti ku lingiwa upange waco. Kuenje vamanji va pinga ekuatiso Kombonge pole, epingilo liaco ka lia taviwile.
Osemana yatete nda fetika oku talavaya ko Betele, Ocisoko ca eca ocitangi caco Kolombonge. Omo okuti tunde eci nda tunda kupange woku talavaya kombonge wo ko St. Paul, Minnesota nda tẽlisa ale anyamo avali, nda kuatele elomboloko liasuapo liatiamẽla kocitangi caco. Umue pokati kolonganji wa popia hati, Ocitumãlo co Stanley kua enda oku lingiwa ovipito vialua vinene, oku lekisiwa olofilme kuenda olomiluko. Momo lie ceciwila oco mu lingiwe ovipito viefendelo? Ombonge ya limbuka okuti Olupale luo Jersey ka ya kapeleko elianjo lietu lioku fendela. Olonganji via tuma okuti olupale lu eca elianjo li sukiliwa. Kuenje nda limbuka okuti Yehova wa kala oku sumũlũisa olonjila ocisoko ca siata oku kuama poku tetulula ovitangi kombonge. Nda kuata esanju lialua momo nda panga onepa kupange waco!
Vamanji va fetika upange woku semũlula ocitumãlo caco. Eci ca kala keteke 8, Yenyenye Linene wo 1985, okuti unyamo ka wa tẽlele noke lioku fetika upange woku semulula, kua lingiwa Osikola 79 yo Gileada. Nda kuata esumũlũho lioku kuatisa kupange Wusoma poku panga onepa koku tetulula ovitangi kombonge. Esanju nda kuata ka li sokisiwa leli nda kuatele kovopange akuavo ombonge eci handi sia lalekiwile oku enda ko Betele. Sia lavokaile okuti Yehova wa laikele oku nyĩha ovopange alua atiamẽla kombonge.
OKU TEYUILA OMOKO YOKU SAKUIWA OKUTI KA KU KAPIWA OSONDE
Oku upisa kunyamo wo 1980, olondotolo olonjanja vimue ka va sumbalaile Ombangi ya Yehova okuti ukulu o likala oku sakuiwa lovihemba mua kongela osonde. Vamanji akãi va kala latimba avali, va liyaka lovitangi vialua momo olonganji va enda oku va tenda okuti ka va kuete omoko yoku likala oku sakuiwa losonde. Olonganji via enda oku popia okuti, nda ina umue wa likala oku kapiwa osonde, eye o fa kuenje oñaña yi siala lika liaye.
Keteke 29 ya Cembanima wo 1988 manji Denise Nicoleau, wa pita osonde yalua poku cita oñaña. Osonde yaye ya tepulukile calua kuenje ndotolo yaye wo pinga oco a kapiwe osonde. Manji Denise ka tavele. Keteke likuavo komẽle, olondotolo via pinga kombonge, yi va ecelele oku kapa osonde ku manji. Onganji ka ya pulisile vali manji Denise lulume waye, nda ci tava oku kapiwa osonde kuenje wa tuma olondotolo oku kapa.
Votãlo keteke 30 ya Cembanima, olondotolo via kapa osonde ku manji Denise. Olondotolo via ci linga, ndaño okuti ulumue waye kuenda epata liavo va seteka oku ci tateka. Vuteke waco, valua vakuepata lia manji Denise kuenda akulu vavali vekongelo va kapiwa vokayike. Ovo va lundiliwa okuti va tateka olondotolo oku kapa osonde ku manji Denise. Vocasapalo komẽle keteke 31 ya Cembanima ovingungu viasapulo violupale luo Nova Yorke kuenda vio Long Island, via lombolola eci ca kala oku pita vokayike.
La Philip Brumley eci tua kala amalẽhe
Sengunda komẽle nda sapela lusongui wolonganji o tukuiwa Milton Mollen. Nda lombolola ocitangi caco, loku u sapuila okuti onganji ya tuma oku kapa osonde, pole, ka vanguile letu. Onganji Mollen wa ndi pinga oco ngende voseketa yaye kekumbi liaco oco tu sapele ovina via pita kuenda ovihandeleko via kongelamo. Manji Philip Brumley usongui woseketa yetu, tua enda oku ka lisanga la Mollen onganji vuteke waco. Onganji yombonge, ya kovonga onganji yo ko sipitali oco tu sapele. Tua sapela otembo yalua. Vepuluvi limue manji Brumley wa soneha olondaka vimue vokapapelo hati, “vangula levando.” Lia kala elungulo limue liwa, momo nda fetika oku vangula lonyeño loku patãla olondaka vionganji.
Kondio lo kepĩli vamanji Richard Moake, Gregory Olds, Paul Polidoro, Philip Brumley, ame, kuenda Mario Moreno okuti tua kala olonganji via potolola ovitangi kombonge ya Velapo yo ko Estados Unidos viatiamẽla ko Watchtower v Imbo lio Stratton.—Tanga o Despertai! 8, ya Susu wo 2003
Noke lioku pita owola, onganji Mollen wa popia okuti ocitangi cetu, oco ci ka sombisiwa tete keteke likuavo komẽle. Eci tua kala oku tunda koseketa yonganji Mollen, eye wa popia okuti “onganji yosipitali yi ka kuata upange walua hẽla”. Kuenje ka ca lelukile konganji yosipitali oku lekisa okuti olondotolo via kuatele esunga lioku kisika manji Denise oku kapiwa osonde. Vepuluvi liaco, nda limbuka okuti Yehova wa kala oku ndi lembeleka okuti tu laika oku litunda ciwa. Ca ñomohisa calua oku mola ndomo Yehova a talavaya letu oco tu tẽlise ocipango caye.
Tua talavaya uteke wosi oku pongiya olondaka tua laikele oku popia eteke likuavo. Omo okuti ombonge ya kala ocipepi lo Betele yo Brooklyn, ca ecelela okuti vamanji valua tu talavayela kumosi voseketa yetu, va endela posi oku enda kombonge yi tetulula ovitangi. Eci olonganji vikuãla via mala oku yevelela ombangulo yetu, ya teyuila manji Denise. Ovo va popia okuti onganji yina yatete ka ya sukilile oku kisika manji Denise oku kapiwa osonde kuenda ya pisa elinga liaco lioku nõla onjila yimue osimbu ka yevelile ocisimĩlo comunu o kasi oku sakuiwa.
Noke ombonge ya velapo yo Nova Yorke, ya limbuka okuti Manji Denise wa kuata omoko yoku likala oku kapiwa osonde. Noke lioku tetulula ocitangi ca manji Denise, nda kuata esumũlũho lioku kuatisa vali oku tetulula ocitangi ca vamanji vatatu kuenda ovo va sombisiwa lolombonge via velapo. (Tanga okakasia losapi hati “ Ayulo Kolombonge Via Velapo.”) Handi vali, nda likongela kolonganji vikuavo vio Betele, oco tu tetulule ovitangi viatiamẽla koku lava omãla, koku linyãla, koku tunga kuenda koku semulula olonjo.
OLOHUELA KUENDA EPATA LIANGE
Lukãi wange, Daw
Eci nda kũlĩha Dawn, ukãi wange, wa kala ukãi wa linyãla lulume waye. Eye wa kala oku tekula omãla vatatu lika liaye, wa kala oku talavaya kupange woku sanda eteku kuenda wa kala ukundi wotembo yosi. Dawn wa pita lovitangi vialua kuenje ca ñomohisa calua oku mola ombili eye a kuatela kupange wa Yehova. Kunyamo wo 1992, tua kala Kohongele Yofeka losapi hati, “Portadores de Luz” kuenje ndo pula nda ci tava okuti tu namulãla. Kuenje vunyamo wa kuamamo, tua kuela. Dawn, ombanjaile yimue ya Yehova. Eye wa pama konepa yespiritu haye ukuacisola. Ndi popia siti, ukãi wange wa kala oñuatisi yimue yiwa vokuenda kuomuenyo wetu wosi.—Olosap. 31:12.
Eci tua likuela omãla va kuatele ale 11, 13, kuenda 16 kanyamo. Omo okuti nda yonguile oku kala onjali yimue yiwa kokuavo, nda tanga loku kapako ovina nda sanga valivulu etu viatiamẽla koku kala Isia wokatumba. Vokuenda kuanyamo ka ca lelukile kokuetu, pole, ndi sanjuka omo okuti omãla va ndi tenda ndekamba liavo lia koleliwa kuenda ndonjali yimue ukuacisola. Tua kuata ocituwa coku tambula ciwa akamba vomãla vetu veya konjo kuenda tu sanjukila oku kala lavo konjo yetu!
Kunyamo wo 2013, ame la Dawn tua ilukila ko Wisconsin oco tu tate olonjali vietu via kuka. Nda sanjuka omo okuti nda amamako oku linga upange wange wo Betele. Kuenje va ngecelela oku amamako lupange woku kuatisa ocisoko cetu koku tetulula ovitangi viatiamẽla kombonge.
EPONGOLOKO LIMUE SIA LAVOKAILE
Kosãi Yenyenye Linene wo 2018, nda limbuka okuti nda kala oku li kolomola calua. Ndotolo yange wa ndi konomuisa, pole, ka tẽlele oku limbuka eci ca koka ocitangi caco. Noke, ndotolo ukuavo wa ndi sapuila oco ndi sande umue ukuakukonomuisa eci catiamẽla vowoño. Kosãi ya Susu wo 2019, ndotolo yaco noke yoku ndi konomuisa wa limbuka okuti ndi kuete uvei umue vowoño.
Noke lioloneke vitatu osimbu nda kala oku linga omapalo yange ndi sole calua, nda teka okuokuo kuondio. Ame ndaenda oku linga omapalo yaco vokuenda kuomuenyo wange wosi kuenda nda loñolohele calua komapalo yaco. Kuenje nda kũlĩhĩle okuti sia kuatele epondolo lioku liteyuila. Oku upisa opo, uvei wange wa kala oku livokiya lonjanga. Kuenje ca tĩlile oku vangula oku enda kuenda oku ina oku lia.
Nda kuata esumũlũho lioku talavaya ndonganji oco ndi kuatise kupange Wusoma poku tetulula ovitangi viatiamẽla kombonge. Nda kuata esanju lioku soneha ovipama vialua vovikanda viasapulo vi tangiwa lolondotolo, la vana va tetulula ovitangi viatiamẽla kombonge kuenda olonganji. Handi vali, nda teyuilavo omoko afendeli va Yehova va kuete yoku nõla oku sakuiwa lonjila yimue okuti ka va kapiwa osonde. Handi lopo, ndi vangula ndeci usonehi Luka a popia kelivulu lia Luka 17:10 hati, ‘Ndupika waño. Eci nda linga, oco ca ndi sesamẽla oku linga.’
