Sio, momo ci kaile Embimbiliya, ale ovolandu, ka a lekisa okuti oco ca pita.

Onjila ndomo ocinimbu eci ca pongoluiwa Vambimbiliya alua, ci kokela omanu oku sima okuti oku papatisiwila vovava vonduko yava va fa ca pita kotembo ya Paulu. Ndeci: Ambimbiliya amue a popia okuti: “Nda ka kuli epinduko, nye ci pita la vana va kasi oku papatisiwa lava va fa?”

Kũlĩhĩsa olondaka viomanu vavali vakuakukonomuisa Embimbiliya. Umue o tukuiwa Dr. Gregory Lockwood, wa popia hati, Vembimbiliya kuenda vasapulo ka mu sangiwa uvangi laumue u lekisa okuti, umue wa “papatisiwa vonduko yomunu umue wa fa.” Ulongisi o tukuiwa hati, Gordon D. Fee, wa sonehavo hati: “Vembimbiliya kuenda vasapulo ka mu sangiwa epapatiso liaco.” Eci lalimue eteke ca tukuiwile vo Testamento Yokaliye kuenda ka kuli ovovangi la amue a lekisa okuti, ca lingiwa Lakristão vokocita catete, ale latavo amue a tumbikiwa noke lioku fa kuovapostolo.”

TEmbimbiliya li popia okuti olondonge via Yesu via ‘longisa omanu vo kolofeka viosi oco va linge olondonge, loku va papatisa . . . kuenda oku va longisa oku linga ovina viosi’ eye a va kundika. (Mat. 28:19, 20) Osimbu omunu umue ka lingile ondonge ya papatisiwa, o sukila oku lilongisa catiamẽla koku kolela Yehova kuenda Komõlaye loku va pokola. Omunu umue wa fa, ale o kasi veyambo ka pondola oku ci linga; ndaño Ukristão o kasi lomuenyo ka pondola oku u lingilako.—Uku. 9:5, 10; Yoa. 4:1; 1 Va Kor. 1:14-16.

Nye Paulu a yonguile oku popia?

Akristão vamue va popia okuti, ava va fa ka va pondola oku pinduiwa. (1 Va Kor. 15:12) Paulu wa pisa ocisimĩlo caco. Eye wa popia okuti, ‘eteke leteke wa kala kohele yoku fa.’ Pole lopo, wa kala lomuenyo. Ndaño wa kala kohele, eye wa kolelele okuti noke yoku fa o pinduiwila omuenyo wokilu ndeci Yesu.—1 Va Kor. 15:30-32, 42-44.

Va Korindo va sukilile oku limbuka okuti oku kala Ukristão Ombuavekua ci lomboloka oku tala ohali eteke leteke kuenda oku fa tete osimbu ka va pinduiwile. Voku “papatisiwila vu Kristu Yesu” mua kongela oku “papatisiwilavo vokufa kuaye.” (Va Rom. 6:3) Epapatiso liavo liocindekaise lilomboloka ekalo limue lia laikele oku va tuala koku fa kuenda koku pinduiwila omuenyo wokilu.

Ci pitahãla anyamo avali noke lia Yesu oku papatisiwa vovava, wa sapuila kolondonge viaye vivali hati: “Vu papatisiwa lepapatiso ñasi oku papatisiwa lalio.” (Mar. 10:38, 39) Yesu wa kala oku popia okuti, oku pandikisa lekolelo ku Suku ci tuala koku fa. Paulu wa soneha okuti, olombuavekua via sukilile oku “talela kumue ohali loku muisua kumue ulamba.” (Va Rom. 8:16, 17; 2 Va Kor. 4:17) Omo liaco, ovo va sukililevo oku fa oco va pinduiwile omuenyo wo kilu.

Olondaka via Paulu citava oku vi pongolola lonjila eyi: “Nda hacoko, vana va kasi oku papatisiwa locimãho coku fa, va ka linga nye? Nda vana va fa, ka va ka pinduiwa, momo lie va papatisiwila locimãho coku pinduiwa?”