1. Nye Yehova a siata oku lingila komunu lomunu pokati ketu?

YEHOVA wa siata oku tu kokela kokuaye. (Yoa. 6:44) Sokolola kueci oco ci lomboloka. Omo okuti Yehova o kũlĩhĩsa lutate olohuluwa viosi viomanu voluali, eye wa limbuka cimue ciwa vokuove okuti utima wa sunguluka una wa ponduile oku amamako oku u sola. (1 Asa. 28:9) Yehova wa ku kũlĩha, o kuete elomboloko ndomo o liyevite kuenda o ku sole. Eci ci lembeleka calua!

2. Yesu o tu kuatisa ndati oku limbuka ndomo Yehova a tata omunu lomunu pokati ketu?

² Yehova wa kapako calua ekalo liove kuenda Liakristão vosi. Oco tu kuate elomboloko lietosi eli, Yesu wa sokisa Yehova lungombo umue. Nda pokati kueci ci soka 100 kolomeme pa nyelela yimosi, nye ungombo a linga? Eye o ‘sia 99 kolomunda kuenda o ka sandiliya yimosi ya nyelela.’ Eci ungombo a sanga omeme yaco, eye ka temi layo. O sanjuka. Lipi etosi? Olomeme viosi vi kuete esilivilo kovaso a Yehova. Yesu wa popia hati: “Haico okuti Isiange o kasi kilu, ka yongola okuti pokati kava vatito pa nyelela umue.”—Mat. 18:12-14.

3. Nye tu lilongisa vocipama cilo?

³ Etu lalimue eteke ka tu yongola oku kala ono yoku kokela esumuo ku vamanjetu. Tu yuvula ndati oku kokela vakuetu ocilondokua? Nye tu sukila oku linga nda umue wa tu sumuisa? Ocipama cilo, ci ka eca atambululo aco. Pole, tete tu konomuisa  vali kueci catiamẽla “pokati kava vatito” va tukuiwa ku Mateo ocipama 18.

4. Helie “umue pokati kava vatito”?

⁴ “Pokati kava vatito” va lomboloka olondonge via Yesu vakuotunga viosi. Vosi yavo va sokisiwa “ndomãla” momo va lekisa utima wa sunguluka woku longisiwa la Yesu. (Mat. 18:3) Ndaño va sangiwa kovitumãlo via litepa, lovituwa via litepa, loku tenda ovina lonjila ya litepa kuenda ekalo lia litepa, vosi yavo va kolela Kristu. Kuenje Kristu o va solevo calua.—Mat. 18:6; Yoa. 1:12.

5. Yehova o liyeva ndati eci umue a kokela ocilondokua, ale a sumuisa umue ufendeli Waye?

⁵ Vosi “pokati kava vatito” va soliwe la Yehova. Oco tu kuate elomboloko ndomo eye a liyeva, kũlĩhĩsa ndomo tu liyeva eci ci pita lomõla umue. Etu tu va sole calua. Tu yongola oku va teyuila, momo ovo ka va kuete ongusu yoku liteyuila kuenda ka va loñolohele ndeci akulu. Ndeci etu ka tu sole oku mola umue oku kangisa ukuavo, tu sumuavo calua eci tu mola umue o kangisa omõla umue. Cimuamue haico okuti, Yehova o yongola oku tu teyuila. Eye o tema calua eci umue a kokela ocilondokua, ale a sumuisa ufendeli Waye!—Isa. 63:9; Mar. 9:42.

6. Ndomo ca tangiwa 1 Va Korindo 1:26-29, ndamupi omanu voluali va tenda olondonge via Yesu?

⁶ Yipi onjila yikuavo olondonge via Yesu vi tendiwa okuti “vatito”? Velie oluali lu tunda okuti va velapo? Vana okuti olohuasi, va kemãla, kuenda vakuonene. Kuenje olondonge via Yesu olonjanja vialua vi sokisiwa okuti ka vi kuete esilivilo kuenda “vatito.” (Tanga 1 Va Korindo 1:26-29.) Pole, Yehova ka tu tendi lonjila eyi.

7. Yehova o yongola okuti tu tenda ndati vamanji?

⁷ Yehova o sole afendeli vaye vosi, ci kale vana va kasi oku u vumba vokuenda kuanyamo alua, ale vana va fetika ndopo. Vamanji vosi va kuete esilivilo ku Yehova kuenje tu sukila oku va tenda lonjila yimuamue. Etu tu yongola oku ‘sola vamanji vosi,’ ka tu soli lika omanu vamue. (1 Pet. 2:17) Tu sukila oku likolisilako oku linga cosi citava oco tu va teyuila loku va tata. Nda tua limbuka okuti tua sumuisa umue, ka tu ka popi okuti omunu waco o tema lonjanga kuenda eye ka sukila oku ci kapako. Momo lie vamue va sumuĩla lonjanga? Momo citava okuti kocitumãlo va kulila vamue va tendiwa okuti va sule vakuavo va velapo. Vakuavo ndopo va kasi vocili; kuenda ka va lilongisile handi ndomo va pondola oku likandangiya kakulueya a vakuavo. Cosi omunu a tuwa, tu sukila oku likolisilako oku sanda ombembua. Handi vali, omunu una okuti olonjanja viosi o sumuisiwa la vakuavo, eye o sukila oku limbuka okuti eci ocituwa cimue ka ca sungulukile okuti, omunu o sukila oku linga apongoloko. Nda eye wa ci linga o kuata ombembua yovutima kuenda ukamba uwa la va manji.

8. Ocituwa cipi omanu va kuata kotembo ya Yesu okuti, ca laikele oku yapuisa olondonge viaye?

⁸ Nye ca vetiya Yesu oku popia catiamẽla ‘kuava vatito’? Olondonge viaye vio pula viti: “Helie wa velapo Vusoma wovailu?” (Mat. 18:1) Va Yudea valua kotembo ya Yesu, va yonguile okuti vakuavo va kuata ovisimĩlo viokuti, ovo va velapo. Onoño yimue ya popia hati: “Omanu vamue va kala komuenyo va fa omo lioku sandiliya esivayo, oku livelisapo, ekemãlo, oku taviwa kuenda esumbilo.”

9. Nye olondonge via Yesu via sukilile oku linga?

 ⁹ Yesu wa kũlĩhĩle okuti olondonge viaye via sukilile oku likolisilako calua oco va yuvule ocituwa ca kala pokati ka va Yudea coku li velisapo. Eye wa va sapuila hati: “Una wa velapo pokati kene a linge umalẽhe kuenda una o kala ndusongui, a linge ndu o vumba.” (Luka 22:26) Etu tu kala ‘ndamalẽhe’ eci tu tenda ‘vakuetu okuti, va velapo’ etu tu sule. (Va Fil. 2:3) Eci tu likolisilako oku lekisa ocituwa caco, ci ka tĩla calua oku kokela vakuetu ocilondokua.

10. Elungulo lipi lia Paulu tu sukila oku kapako?

¹⁰ Vamanji vosi kovina vimue va velapo okuti etu tu sule. Ca leluka oku kuata elomboloko liaco nda tu tiamisila utima kovituwa viavo viwa. Etu tu sukila oku kapako elungulo Paulu a eca ku va Korindo liokuti: “Nye cu ku velisapo okuti ukuẽle o sule? Nye o kuete okuti kua ci tambuile? Nda wa ci tambula o lipandela nye ndu okuti kua ci tambuile?” (1 Va Kor. 4:7) Tu sukila oku kuata utate oco ka tu ka litendi okuti etu tua velapo vakuetu va sule. Nda manji umue ulume o linga ciwa olohundo, ale manji umue ukãi o kuete uloño woku fetika alilongiso alua Embimbiliya, olonjanja viosi o sukila oku eca esivayo ku Yehova omo liovina a tẽla oku linga.

11. Nye Yesu a tu longisa catiamẽla kolusapo luosoma yimue kuenda upika waye?

¹¹ Noke lia Yesu oku eca elungulo kolondonge viaye oco ka va ka kokele vakuavo ocilondokua, eye wata olusapo lua tiamẽla kosoma yimue kuenda kupika waye. Soma wa ecela ofuka yupika waye okuti lalimue eteke nda a tẽla oku yi feta. Noke upika waco, ka tavela oku ecela ofuka upika ukuavo o kuatelele. Kuenje soma wa tuma oku kapa vokayike upika waco ũvi. Nye tu lilongisilako? Yesu hati: “Haico Isiange o kasi kilu a ka linga lene nda omunu lomunu pokati kene ka ecela manjaye lutima wosi.”—Mat. 18:21-35.

12. Nda ka tu ecela nye tu kokela vakuetu?

¹² Ocituwa upika a lekisa, ka lio kokelele lika eye ovitangi pole, ca kokelavo vakuavo. Tete, eye ka kuatelele ohenda upika ukuavo poku u “kapa vokayike toke eci a feta eci a levalele.” Vali, eye wa sumuisa calua upika ukuavo wa kala oku mola ovina eye a kala oku linga. Eci “apika vakuavo va ci mola, va sumua calua.” Cimuamue haico okuti, nda ovilinga vietu ka via sungulukile vi sumuisa vakuetu. Nda umue wa tu lueyela kuenda ka tu yongola oku wecela nye ci pondola oku pita? Tete, tu u sumuisa momo tu likala oku wecela kuenda citava okuti ka tu u kapiko loku likala oku lekisa ocisola kokuaye. Vali, tu sumuisa vamanji vekongelo eci va limbuka okuti ka tu kasi lombembua la una wa tu lueyela.

13. Nye wa lilongisa kulandu wukundi umue wotembo yosi?

¹³ Eci tu ecela vamanjetu tu kala ciwa kuenda tu kuatisavo vakuetu oku liyeva ciwa. Eci oco ca pita lukundi umue wotembo yosi tu tukula konduko hati Crystal. Eye wa sumuisiwa la manji umue vekongelo. Manji Crystal wa popia hati: “Olondaka viaye olonjanja vimue via enda oku toma ndomoko yimue. Kupange woku kunda sia yonguile oku tunda laye. Nda fetika oku tepulula ombili kupange woku kunda kuenda esanju liange.” Manji Crystal wa liyevele okuti wa kuatele esunga lioku tema. Pole, eye ka kaile locikumbiti. Manji Crystal lumbombe walua wa kapako elungulo Liocisonehua ci sangiwa Vutala Wondavululi 15 ya Mbalavipembe 1999 kocipama  losapi hati: “Ecela Lutima Wosi.” Eye wa ecela manji. Manji Crystal hati: “Cilo nda limbuka okuti vosi yetu tu kasi oku likolisilako oku wala omunu wokaliye kuenda Yehova wa siata oku tu ecela ateke osi. Ndi liyevite ndu okuti va njupa ocilemo cimue kapepe. Ndi kasi oku tumbulula esanju liange.”

14. Ndomo ca tangiwa ku Mateo 18:21, 22, ci lekisa okuti Petulu wa kuatele ocitangi ce kuenda nye tu lilongisila ketambululo lia Yesu?

¹⁴ Tua kũlĩha okuti ocina ca velapo tu sukila oku linga; oku ecela. Pole, pamue ci tĩla calua etu oku ci linga. Citava okuti upostolo Petulu wa kuatelevo ocitangi coku ecela. (Tanga Mateo 18:21, 22.) Nye ci pondola oku kuatisa? Tete, sokolola ndomo Yehova a ku ecela. (Mat. 18:32, 33) Etu ka tua sesamẽlele ongecelo yaye, pole, eye wa ci linga lutima wosi. (Osa. 103:8-10) Kuenje, “tu sesamẽlavo oku li sola pokati.” Oku ecela ocina cimueko tu sukila oku nõla nda tu ci linga, ale sio. Eci ocikele cimue tu kuetele vamanjetu oku va ecela. (1 Yoa. 4:11) Vali, sokolola kueci ci pita eci tu ecela. Citava okuti tu kuatisa omunu wa tu lueyela oku kolisa ekongelo, oku teyuila ukamba wetu la Yehova kuenda oku liyeva ciwa. (2 Va Kor. 2:7; Va Kol. 3:14) Oku sulako likutililako omunu Una wa tu pinga ongecelo. Ku ka ecelele okuti Satana o nyõla ukamba uwa o kuete la vamanji. (Va Efe. 4:26, 27) Tu sukila ekuatiso lia Yehova oco tu kuate ombembua vekongelo.

15. Ndomo ca lekisiwa ku Va Kolosai 3:13, nye tu sukila oku linga nda ocituwa ca manji umue ci tu kokela ocilondokua?

¹⁵ Pole, nda ovilinga via manji umue vi ku kokela ocilondokua, nye o sukila oku linga? Likolisilako oku sanda ombembua. Sapela la Yehova ndomo o liyevite. Pinga ku Yehova oco a kuatise omunu wa ku lueyela  kuenda oco a ku kuatisevo oku limbuka ovituwa omunu waco a kuete okuti ovituwa vina Yehova a sanjukila kokuaye. (Luka 6:28) Nda ku kasi oku ivalako eci manji a ku lingila, sokolola konjila yiwa o pondola oku sapela laye. Olonjanja viosi tu sukila oku sokolola okuti hanjongoleko ya manji oku tu sumuisa. (Mat. 5:23, 24; 1 Va Kor. 13:7) Eci o sapela laye lekisa kokuaye okuti eye o kuete ovisimĩlo viwa. Nda hẽ eye ka yongola oku lisunguluisa? ‘Amamako oku u kapako.’ Amamako oku pandikisa laye. (Tanga Va Kolosai 3:13.) Ocina ca velapo, lalimue eteke ku ko kuatele ocikumbiti, momo ci pondola oku kapa kohele ukamba wove la Yehova. Ku ka ecelele okuti cimue ci ku kokela ocilondokua. Nda wa ci linga, o ka lekisa okuti ocisola o kuetele Yehova ca velapo.—Osa. 119:165.

16. Ocikele cipi omunu lomunu a kuete?

¹⁶ Etu tu sanjukila esumũlũho lioku vumba Yehova vomunga, “vocunda cimuamue” kuenda vemẽhi ‘liungombo umuamue’! (Yoa. 10:16) Elivulu Organizados Para Fazer a Vontade de Jeová kemẽla 165 ku popia hati: “Oco o kuatisiwe lomunga yaco o kuete ocikele coku pangavo onepa yove.” Kuenje tu sukila “oku likolisilako oku tenda vamanji ndeci Yehova a va tenda.” Ku Yehova vosi va tendiwa okuti “vatito” va kuete esilivilo. Ove hẽ o tendavo vamaji ndoco? Yehova o sanjukila kuenda wa kapako ovina viosi o linga oco o va kuatise kuenda oku va tata.—Mat. 10:42.

17. Nye wa nõlapo oku linga?

¹⁷ Etu tu sole vamanjetu. Kuenje tu “nõlipo oku yuvula oku kapela ewe liocilondokua, ale onjanjo manji umue.” (Va Rom. 14:13) Etu tu tenda vamanjetu okuti va velapo etu tu sule kuenda tu yongola oku va ecela lutima wosi. Ka tu ka eceleli okuti umue o tu kokela ocilondokua. Omo liaco, tu nõlipo oku ‘kakatela kovina vi koka ombembua kuenda kovina vioku likolisa pokati.’—Va Rom. 14:19.