1. Nye Yehova a ku lingila?

WA LINGA ndati Ombangi ya Yehova? Citava okuti tete, wa yeva “olondaka viwa” pocakati colonjali viove, kua una u talavayela kumosi, u tangela kumosi, ale poku kundiwa konjo lanjo. (Mar. 13:10) Kuenje omunu umue, wa likolisilako calua, oco a ku longise Embimbiliya. Vokuenda kuelilongiso liaco, wa sola Yehova loku limbuka okuti eye oku solevo. Yehova wa ku kokela vocili, kaliye wa linga ondonge ya Yesu Kristu, cilo o kuete elavoko lioku ka kala otembo ka yi pui. (Yoa. 6:44) Ka kuli atatahãi okuti, wa siata oku pandula Yehova omo lioku vetiya omunu umue oco a ku longise ocili loku ku ecelela okuti ove o linga ufendeli Waye.

2. Nye tu konomuisa vocipama cilo?

² Omo okuti cilo tua kũlĩha ocili, tu kuete esumũlũho lioku kuatisa omanu vakuavo oco va likongele letu vonjila yomuenyo. Pamue ci leluka kokuetu oku kundila konjo lanjo, pole, citava okuti ci tĩla calua oku songola elilongiso limue Liembimbiliya. Eci hẽ ca siata oku pita love? O ka sanga olonumbi vimue vi ka ku kuatisa, vocipama cilo. Tu konomuisa eci ci pondola oku tu vetiya oku kuatisa omanu oku linga olondonge. Tu konomuisavo ndomo tu yula ovitangi vi tu tateka oku songola elilongiso limue Liembimbiliya. Tete, tu konomuisa esunga lieci ka tu sukilila lika oku kundila omanu, pole, tu sukilavo oku va longisa olondaka viwa.

3. Momo lie tu kundila?

³ Eci Yesu a kala palo posi, wa handeleka kolondonge viaye oku linga ovina vivali. Tete, eye wa va sapuila oco va kunde olondaka  viwa Viusoma kuenda wa lekisa ndomo va laikele oku ci linga. (Mat. 10:7; Luka 8:1) Ndeci, Yesu wa sapuila olondonge viaye ovina va sukilile oku linga eci omanu va tava kesapulo Liusoma kuenda eci omanu ka va tava. (Luka 9:2-5) Wa va sapuilavo okuti, ovo va laikele oku kundila omanu valua kuenda kovitumãlo vialua okuti oku eca “uvangi kolofeka viosi.” (Mat. 24:14; Ovil. 1:8) Ndaño omanu va laikele oku tava ale sio, pole, Yesu wa handeleka olondonge oku sapuila omanu catiamẽla Kusoma wa Suku kuenda eci owo u ka tẽlisa.

4. Ndomo ca tangiwa ku Mateo 28:18-20, nye tu sukila oku linga poku kunda eci catiamẽla Kusoma?

⁴ Cipi ocina cavali Yesu a handeleka oku linga? Eye wa sapuila olondonge viaye oku longisa omanu oco va pokole kovina viosi eye a handeleka. Anga hẽ upange woku kunda loku longisa wa laikele lika oku lingiwa Lakristão vo kocita catete? Sio, Yesu wa lekisile okuti upange waco wa laikele oku amamako koloneke vietu okuti, “toke kesulilo lioluali.” (Tanga Mateo 28:18-20.) Eci Yesu a eca ocikundi caco, wa molẽha kueci ci soka 500 kolondonge viaye. (1 Va Korindo 15:6) Esituluilo Yesu a eca ku Yoano, eye wa lavokaile okuti olondonge viaye viosi vi kuatisa vakuavo oku lilongisa catiamẽla ku Yehova.—Esit. 22:17.

5. Ndomo ca tangiwa 1 Va Korindo 3:6-9, Paulu wa sokisa le upange woku kunda loku longisa?

⁵ Upostolo Paulu wa sokisa upange woku linga olondonge loku kũla, ci lekisa okuti vupange waco mua kongela ovina vialua okuti, oku kũla lika ci sule. Eye wa ivaluisa va Korindo hati: “Ame nda kũla, Apolosi wa tapela . . . Ene wepia lia Suku.” (Tanga 1 Va Korindo 3:6-9.) Etu tu lonalavayi ‘liepia lia Suku’ kuenje tu kũla ombuto eci tu kunda kuenda tu tapela, eci tu longisa. (Yoa. 4:35) Tua kũlĩha okuti Suku eye o kulisa ombuto, poku kokela omanu kokuaye.

6. Nye ca kongela vupange tu linga woku longisa?

⁶ Etu tu sandiliya “vana vakuotima wa sungulukila omuenyo ko pui.” (Ovil. 13:48) Oco omanu vaco va kale olondonge, tu sukila oku va kuatisa (1) oku kuata elomboloko, (2) oku tava kuenda (3) oku kapako ovina ovo va lilongisa Vembimbiliya. (Yoa. 17:3; Va Kol. 2:6, 7; 1 Va Tes. 2:13) Vosi vekongelo va pondola oku kuatisa ondonge Yembimbiliya poku eca ongangu yiwa yoku lekisa ocisola kokuavo kuenda oku va yolela eci veya kohongele. (Yoa. 13:35) Ukundi o songola elilongiso liaco, o sukila oku likolisilako calua oku kuatisa ondonge oku siapo alongiso esanda kuenda ovituwa ka via sungulukile okuti “ovina via pama ndombonge.” (2 Va Kor. 10:4, 5) Cambata olosãi vialua oku kuatisa omunu umue oku tẽlisa ananga a-a, oco noke a ece enanga lioku papatisiwa. Pole, oku linga apongoloko aco, ci kuete esilivilo lialua.

7. Nye ci tu vetiya oku kunda kuenda oku longisa omanu oco va linge olondonge?

⁷ Momo lie tu litumbikila kupange woku kunda kuenda woku longisa omanu oco va linge olondonge? Tete, momo tu sole Yehova. Eci o likolisilako oku pokola kocikundi coku kunda kuenda coku longisa omanu oco va linge olondonge, o lekisa okuti o sole Suku. (1 Yoa. 5:3) Sokolola ño handi: Ocisola o kuetele Yehova ca ku vetiya oku kunda konjo lanjo. Anga hẽ ca lelukile kokuove oku pokola kocikundi coku kundila omanu? Citava okuti sio. Eci wa totola konjo yimue eteke liatete kupange woku kunda, wa kuata hẽ usumba? Ka kuli atatãhãi okuti wa kala lusumba! Ove wa kũlĩha okuti owu upange umue okuti Yesu o yongola okuti o u linga kuenje ove o sukila oku pokola kocikundi caco. Citava okuti vokuenda kuotembo ca fetika oku leluka kokuove oku linga upange  woku kunda. Cilo, o liyeva ndati eci o songola elilongiso limue Liembimbiliya? Anga hẽ o kuata vali usumba eci o sokolola oku linga upange waco? Citava okuti oco. Kuenje eci o pinga ku Yehova oco a ku kuatise oku yula usumba kuenda oku kuata utõi oco a ku ĩhe elilongiso limue Liembimbiliya, Yehova o ku kuatisa kuenda o pamisa onjongole yove yoku longisa omanu oco va linge olondonge.

8. Ndomo ca tangiwa ku Marko 6:34, nye vali ci tu vetiya oku longisa omanu?

⁸ Vali, ocisola tu kuetele omanu, ci tu vetiya oku va longisa ocili. Ndeci, onjanja yimue Yesu kuenda olondonge viaye, va kavele calua omo va linga upange walua woku kunda. Ovo va sanda ocitumãlo cimue oco va puyuke, pole, owiñi wa va landula. Yesu wa kuatela ohenda omanu kuenda wa fetika oku va longisa “ovina vialua.” (Tanga Marko 6:34.) Eye wa likolisilako calua ndaño okuti wa kavele ale. Momo lie? Yesu wa sokolola ndomo omanu va kala oku liyeva. Eye wa yonguile oku va kuatisa momo wa limbuka okuti, va kala oku talisiwa ohali kuenda va sukilile elavoko. Koloneke vilo, omanu va sangiwavo vekalo limuamue. Ndaño va molẽha ndu okuti va sanjuka kuenda va kuete ekalo liwa komuenyo. Ovo va kasi ndolomeme via nyelela kuenda ka va kuete ungombo o va songuila. Upostolo Paulu wa tukula omanu vaco ndu okuti ka va kuete Suku kuenda elavoko. (Va Efe. 2:12) Ovo va kasi ‘vonjila yi tuala kenyõleho’! (Mat. 7:13) Eci tu sokolola okuti omanu vocikanjo cetu va sukila oku kũlĩha Suku, ocisola kuenda ocikembe ci tu vetiya oku va kuatisa. Kuenje onjila ya velapo yoku va kuatisa, oku lilongisa lavo Embimbiliya.

9. Ndomo ca tangiwa ku Va Filipoi 2:13, Yehova oku kuatisa ndati?

⁹ Citava okuti, wa kuatele ale usumba woku fetika elilongiso limue Liembimbiliya omo lioku kũlĩha okuti o ka sukila oku likolisilako calua oco o pongiye kuenda oku songola elilongiso liaco. Nda o liyevite ndoco, sapuilako Yehova asakalalo ove. Pinga kokuaye oco a ku kuatise oku sanga ondonge yimue Yembimbiliya kuenda oku songola elilongiso liaye. (Tanga Va Filipoi 2:13.) Upostolo Yoano o tu sapuila hati, Suku o tambulula olohutililo viosi vi likuata locipango Caye. (1 Yoa. 5:14, 15) Omo liaco, kolela okuti, Yehova o ka ku kuatisa oku kuata onjongole yoku panga onepa kupange woku longisa omanu oco va linge olondonge.

10-11. Nye pamue ci tu tateka oku songola elilongiso limue Liembimbiliya?

¹⁰ Tu sukila oku velisapo upange woku longisa, ndaño okuti tu liyaka lovitangi vi tu tateka oku linga eci tu yongola kupange woku longisa omanu oco va kale olondonge. Tu konomuisa amue pokati kovitangi viaco kuenda ndomo tu vi yula.

¹¹ Pamue tu liyeva okuti ka tu tẽla oku linga ovina ndomo tu yongola. Ndeci, akundi vamue va kuka, ale uhayele wavo utito. Anga hẽ o sangiwavo vekalo liaco? Nda oco, kũlĩhĩsa vimue pokati kovina tu lilongisila kefengi lio COVID-19. Tua limbuka okuti tu pondola oku songola alilongiso Embimbiliya pocakati cotelefone! Kuenje ci tava oku fetika elilongiso Liembimbiliya oku upisa konjo yove muẽle. Eli ekuatiso limuevo liwa. Vamue va kuete onjongole yoku lilongisa Embimbiliya, pole, ka va sangiwa kolonjo viavo votembo vamanjetu va endako. Pole, citava okuti ovo va kuete otembo komẽle, ale koñolosi. Anga hẽ o lieca olumue oco o longise Embimbiliya komunu umue o kuete otembo vepuluvi liaco? Yesu wa longisa Nikodemo luteke, momo olio lia kala elivala eye a yonguile.—Yoa. 3:1, 2.

12. Nye ci pondola oku tu kuatisa oku kala akundi va loñoloha?

 ¹² Pamue tu sima okuti ka tu kuete uloño woku songola elilongiso Liembimbiliya. Pamue tu liyeva okuti, tu sukila oku kuata vali ukũlĩhĩso, ale uloño woku longisa, osimbu ka tua sangele omunu tu longisa Embimbiliya. Nda o liyevite ndoco, kũlĩhĩsa ovina vitatu vi ku pamisa. Tete, Yehova o ku tenda okuti ove wa loñoloha oco o longise vakuẽle. (2 Va Kor. 3:5) Vali, Yesu okuti eye o kuete “unene wosi wo kilu lowu wo posi,” wa ku ĩha ocikundi coku longisa. (Mat. 28:18) Kuenda tatu, ove o pondola oku kolela vakuẽle oco va ku kuatise. Yesu wa kolelele kueci Isiaye o longisa oku popia, ove citava okuti o ci lingavo. (Yoa. 8:28; 12:49) Handi vali, citava oku pinga ekuatiso ku mitavaso yocimunga cupange woku kunda, kukundi umue wotembo yosi, ale kukundi umue wa loñoloha oco a ku kuatise oku fetika oku songola elilongiso Liembimbiliya. Onjila yimue yoku kala ukundi wa loñoloha oku lilongisila kakundi vana va siata oku songola alilongiso Embimbiliya.

13. Momo lie tu sukilila oku kuama olonjila viokaliye vioku longisa?

¹³ Pamue tu sanga ocitangi coku kuama onjila yokaliye yoku kunda kuenda oku kuama ovimalẽho viokaliye. Onjila yoku songola alilongiso Embimbiliya cilo, ya pongoloka. Ocimalẽho ci kuamiwa poku longisa, elivulu losapi hati, Sanjukili Omuenyo Otembo ka yi Pui!, ci sukila okuti tu pongiya elilongiso liaco kuenda oku songola lonjila yimue ya litepa leyi tua enda oku kuama kosimbu. Tu tanga ovinimbu vitito kuenda otembo yalua yi kala yoku sapela londonge. Eci tu longisa, tu talavaya vali calua lolovideo kuenda ovimalẽho vikuavo ndeci, o JW Library^®. Nda o kuete ocitangi coku talavaya lovimalẽho viaco, pinga oco umue a ku kuatise ndomo o talavaya lavio. Etu tumanu, tu sole oku linga ovina lonjila yetu muẽle. Eli olio esunga lieci ka ci lelukila oku kuama onjila yokaliye yoku linga ovina. Pole, lekuatiso lia Yehova kuenda lia vamanji ci ka leluka kokuove oku kuama onjila yaco yokaliye loku sanjukila oku longisa omanu valua. Ukundi umue wotembo yosi wa popia okuti, onjila eyi yoku songola elilongiso, “yiwa ku vosi ci kale kondonge kuenda kukundi.”

14. Nye tu sukila oku ivaluka nda tu kasi vocikanjo cimue ka ca lelukile oku kundilamo kuenda tu vetiyiwa ndati lolondaka vi sangiwa ku 1 Va Korindo 3:6, 7?

¹⁴ Pamue tu kasi vocikanjo cimue okuti ka ca lelukile oku fetika elilongiso Liembimbiliya. Omanu vaco pamue ka va kapiko esapulo tu kunda, ale va li suvuka. Nye ci tu kuatisa oku tava okuti eteke limue omanu vaco va ka kapako esapulo Liembimbiliya? Ivaluka okuti ekalo liomanu li pongoloka lonjanga voluali lulo lũvi kuenje vana ka va kapaileko esapulo Liusoma va ka limbuka okuti va sukila oku lilongisa ovina viatiamẽla ku Suku. (Mat. 5:3) Valua okuti kosimbu ka va tavaile oku tambula alivulu etu, noke va tava oku lilongisa Embimbiliya. Tua kũlĩhavo okuti Yehova eye Cime coku ungula. (Mat. 9:38) Eye o yongola okuti tu amamako oku kũla loku tapela, pole eye o kuete ocikele coku kulisa. (1 Va Kor. 3:6, 7) Ci sanjuisa calua oku kũlĩha okuti ndaño ka tu kasi oku tẽla oku songola elilongilo Liembimbiliya cilo, Yehova o ka tu sumũlũisa omo lialikolisilo tua siata oku linga! *

15. Yehova o liyeva ndati eci omunu umue a tava ocili Cembimbiliya loku kapako ovina a lilongisa?

¹⁵ Yehova o sanjuka calua eci omunu umue a tava kocili Cembimbiliya loku sapuilako ocili caco komanu vakuavo. (Olosap. 23:15, 16) Handi vali, eye o sanjukavo calua eci a mola afendeli vaye ombili va kuetele kupange woku kunda loku longisa! Ndeci, ndaño lefengi voluali luosi, vokuenda kupange wunyamo 2020, kua songuiwa eci ci soka 7.705.765 kalilongiso Embimbiliya kuenda ci soka 241.994 komanu va litumbika ku Yehova loku papatisiwa. Olondonge viaco viokaliye via songolavo alilongiso Embimbiliya kuenda va kuatisa omanu valua oku kala olondonge. (Luka 6:40) Ocili okuti, tu sanjuisa Yehova eci tu longisa omanu oco va kale olondonge.

16. Ocimãho cipi ciwa tu sukila oku kuata?

¹⁶ Oku longisa omanu oco va kale olondonge, ci sukila oku likolisilako calua, pole, lekuatiso lia Yehova tu tẽla oku panga onepa kupange woku longisa olondonge viokaliye oco va sole Isietu wokilu. Citava hẽ okuti tu kuata ocimãho coku fetika loku songola elilongiso limue Liembimbiliya? Pamue tu ka komõha leci ci ka pita nda tua sanda apuluvi oku pulisa omanu vosi tu lisanga lavo okuti, tu yongola oku va longisa Embimbiliya. Tu koleli okuti Yehova o ka sumũlũisa alikolisilo etu.

17. Tu liyeva ndati nda tu likolisilako oku songola alilongiso Embimbiliya?

¹⁷ Tu kuete esumũlũho limue linene lioku kunda kuenda oku longisa ocili komanu! Upange owu u tu nenela esanju lialua. Upostolo Paulu okuti wa kuatisa valua ko Tesalonike oku kala olondonge, wa lombolola ndomo a liyeva poku popia hati: “Lipi elavoko lietu, pamue esanju, ale ekolowa lioku lipandiya kovaso a Ñala yetu Yesu ketukuluko liaye? Siti ene? Ocili muẽle ene vulamba wetu haene vusanju lietu.” (1 Va Tes. 2:19, 20; Ovil. 17:1-4) Valua koloneke vilo, va siatavo oku liyeva ndoco. Manji umue o tukuiwa Stéphanie okuti vokuenda kuanyamo alua kumue lulume waye va siata oku kuatisa omanu valua toke kepapatiso, wa popia hati: “Kuli esanju lialua li tunda koku kuatisa omanu oku litumbika ku Yehova.”