Ovinimbu evi vi tukula ovituwa ecea Akristão va sukila oku kuata okuti: ‘Ocisola, esanju, ombembua, epandi, esunga, ohenda, ekolelo, umbombe kuenda oku likandangiya okuti vi panga onepa kepako liespiritu.’ Pole, ka tu sukila oku tenda okuti ovituwa evi viwa ovio lika espiritu lia Suku li tu kuatisa oku kuata.

Limbuka eci upostolo Paulu a tukula vovinimbu vikuavo hati: “Ovilinga vietimba vievi: evĩho liukahonga, eliño, umbondo, efendelo lioviteka, umbanda, esuvu, ema, ocipululu, onyeño yalua, olonamalala, olonepele, oku kuama alongiso omanu, onya, ovoholua, ayele, lovina via lisoka lavio.” (Gal. 5:19-21) Paulu citava okuti nda wa tukula ovina vikuavo viatiamẽla ‘kovilinga vietimba’ ndevi via tukuiwa ku Va Kolosai 3:5. Kuenje noke lioku tukula ovituwa viwa vi soka eceya, eye wamisako hati: “Ka kuli ocihandeleko ci patãla ovina evi.” Kelimi lio Helasi ondaka “ovina evi” yi lombolokavo ‘ovina via lisoka lavio.’ Eci ci lekisa okuti Paulu ka tukuile ovituwa evi okuti ovio lika vi panga onepa ‘kepako liespiritu.’

Tu kuata elomboloko liwa poku sokisa epako liespiritu lepako liocinyi Paulu a tukula eci a sonehela ekongelo lio ko Efeso hati: “Epako liocinyi li limbukiwila kovina viosi viwa, viesunga kuenda viocili.”(Va Efe. 5:8, 9) “Ohenda” kumue lesunga kuenda ocili vi panga onepa ‘kepako liocinyi,’ pole, yi pangavo onepa ‘kepako liespiritu.’

Handi vali, Paulu wa vetiya Timoteo oku kuata ovituwa epandu ndeci: ‘esunga, oku sumbila Suku, ekolelo, ocisola, epandi kuenda esuluviko.’ (1 Tim. 6:11) Vitatu pokati kavio okuti (ocisola, ekolelo kuenda umbombe) ovio lika vi panga onepa ‘kepako liespiritu.’ Timoteo wa sukililevo ekuatiso liespiritu, oco a tẽle oku kuata ovituwa vikuavo via tukuiwa ndeci: esunga, oku fendela Suku kuenda epandi.—Sokisa la Va Kolosai 3:12; 2 Petulu 1:5-7.

Kuenje tu pondola oku limbuka okuti Va Galatia 5:22, 23 ka ku tukula ovituwa viosi Akristão va sukila oku kuata. Espiritu lia Suku li pondola oku tu kuatisa oku lekisa ovituwa ecea vi panga onepa ‘kepako liespiritu.’ Pole kuli ovituwa vikuavo tu sukila oku kuata osimbu tuamamako oku kula kespiritu loku ‘wala omunu wokaliye una wa lulikiwa locipango ca Suku, lesunga liocili kuenda oku kola.’—Va Efe. 4:24.