1. Nye Yesu a popia catiamẽla kukuasi wo kilu?

OLOMBANJAILE haviosiko okuti vi muiwa. Ocili okuti olombanjaile via velapo, ka vi muiwa. Yesu Vohundo a lingila Komunda, wa tukula ovokuasi o kilu okuti a velapo ovokuasi a palo posi. Eye wamisako hati: “Oku ku kasi ukuasi wove haiko ku kala utima wove.” (Mat. 6:19-21) Ocili okuti, eci tu sanga cimue ci kuete esilivilo tu vetiyiwa oku ci kuata. Etu tu lisolekela “ukuasi wo kilu” poku kuata ovituwa viwa, ale oku kuata ukamba la Suku. Yesu wa lombolola okuti ovokuasi aco, lalimue eteke a ka nyõleha, ale oku nyaniwa.

2. (a) Ndomo ca tangiwa 2 Va Korindo 4:17, 18, Paulu o tu vetiya oku tiamisila pi utima? (b) Nye tu konomuisa vocipama cilo?

² Upostolo Paulu o tu vetiya oku “luluvalela . . . kovina ka vi muiwa.” (Tanga 2 Va Korindo 4:17, 18.) Ovina viaco ka vi muiwa, mua kongela asumũlũho tu ka kuata voluali luokaliye lua Suku. Vocipama cilo, tu konomuisa olombanjaile vikuãla ka vi muiwa vi pondola oku tu kuatisa cilo okuti, ukamba wetu la Yehova, ombanjaile yohutililo, ekuatiso lispiritu sandu lia Suku kuenda ekuatiso tu tambula ku Yehova, ku Yesu kuenda kovangelo eci tu kasi kupange woku kunda. Tu konomuisavo ndomo tu pondola oku lekisa olopandu kovina ka vi muiwa.

3. Ombanjaile yipi ya velapo okuti ka yi muiwa kuenda tu pondola oku yi kuata ndati?

³ Ombanjaile yimue ya velapo okuti ka yi muiwa, ukamba wetu la Yehova Suku. (Osa. 25:14) Citava ndati okuti Suku o linga  ukamba lomanu vakuakandu, pole, handi eye amamako oku kola? Eye o ci linga, momo ocisembi ca Yesu ‘cupa akandu oluali.’ (Yoa. 1:29) Osimbu Yesu keyile palo posi oku fila omanu, Yehova wa kũlĩhĩle ale okuti Yesu wa ponduile oku pandikisa lekolelo, oco a yovole omanu. Eli olio esunga lieci Yehova a lingila ukamba lomanu vana va kala komuenyo osimbu Kristu keyile palo posi oku fila omanu.—Va Rom. 3:25.

4. Tukula ovolandu afendeli vamue vo kosimbu okuti va kala akamba va Suku.

⁴ Kũlĩhĩsa ulandu walume vamue va kala akamba va Suku kosimbu. Avirahama wa kala ulume umue ukuekolelo lia pama. Ci pitahãla 1.000 kanyamo noke ya Avirahama oku fa, Yehova wo tukula hati ‘ekamba liange.’ (Isa. 41:8) Eci ci lekisa okuti, nda umue wa kala ekamba lia Yehova ndaño wa fa amamako oku kala ekamba liaye. Avirahama ndaño okuti wa fa, pole, o kasi vovisimĩlo via Yehova. (Luka 20:37, 38) Ulandu ukuavo wa Yovi. Eteke limue eci ovangelo va liongolola oko kilu, Yehova wa vangula eci catiamẽla ku Yovi. Yehova wo tukula hati, “omunu wa pua etondelo, haeye ukuesunga, o sumba Suku, kuenje o suvuka evĩho.” (Yovi 1:6-8) Pole, Yehova wa liyeva ndati catiamẽla ku Daniele, una wa vumba Suku lekolelo, vokuenda kueci ci soka 80 kanyamo vofeka yimue okuti, omanu vaco va enda oku fendela olosuku viesanda? Olonjanja vitatu ovangelo va eca uvangi wokuti Daniele okuti wa kukile ale, wa kala ‘ulume wa soliwa calua’ la Suku. (Dan. 9:23; 10:11, 19) Tu pondola oku kolela okuti Yehova o kuete ongeva yoku pindula akamba vaye va soliwe okuti va fa.—Yovi 14:15.

5. Nye tu sukila oku linga oco tu kuate ukamba wa pama la Yehova?

⁵ Omanu ka va lipuile koloneke vilo va pondola oku kuata ndati ukamba wa pama la Yehova? Koloneke vilo, kuli omanu valua va kuete ukamba wa pama la Yehova. Tua ci kũlĩha momo alume valua, lakãi kuenda omãla koluali luosi, va kasi oku lekisa pocakati covilinga viavo okuti akamba vocili va Suku. Embimbiliya li popia okuti, Yehova “o kolela ava va sunguluka.” (Olosap. 3:32) Ukamba waco u tẽliwa lika omo liekolelo va kuete kocilumba cocisembi ca Yesu. Omo liaco, Yehova o tava okuti tu litumbika kokuaye loku papatisiwa. Eci tu linga ovina evi vi kuete esilivilo, tu likongela kolohuluwa viomanu va litumbika ku Suku loku papatisiwa haivo “akamba” Womunu una wa velapo voluali luosi!

6. Tu lekisa ndati okuti tua velisapo ukamba tu kuetele Suku?

⁶ Tu lekisa ndati okuti tua velisapo ukamba wetu la Suku? Ndeci Avirahama kuenda Yovi, okuti va kolele Suku vokuenda kuanyamo alua, tu pondolavo oku amamako lekolelo ndaño tu kasi ale oku vumba Yehova vokuenda kuanyamo alua voluali lulo lũvi. Ndeci Daniele a linga, etu tu sukila oku velisapo ukamba wetu la Suku okuti ka tu litendi lika etu muẽle. (Dan. 6:7, 10, 16, 22) Lekuatiso lia Yehova, tu pondola oku pandikisa kovitangi viosi tu liyaka lavio kuenda tu ka amamako oku kuata ukamba wa pama laye.—Va Fil. 4:13.

7. (a) Ndomo ca lekisiwa Kolosapo 15:8, Yehova o liyeva ndati catiamẽla kolohutililo vietu? (b) Yehova o tambulula ndati olohutililo vietu?

⁷ Ombanjaile yikuavo okuti ka yi muiwa, ohutililo. Akamba vocili va lisapela pokati catiamẽla kovisimĩlo viavo kuenda kasakalalo. Anga hẽ, cimuamue haico lukamba wetu la Yehova? Oco, cimuamue! Yehova o vangula letu pocakati Condaka yaye kuenje oyo yi tu situluila ovisimĩlo viaye kuenda eci a yongola kokuetu. Etu tu pondola oku sapela laye pocakati  cohutililo loku u situluila ovisimĩlo vietu kuenda asakalalo. Yehova o sanjuka calua poku yevelela olohutililo vietu. (Tanga Olosapo 15:8.) Omo okuti Yehova Ekamba limue Liocisola, ka yevelela lika olohutililo vietu, pole, o vi tambululavo. Olonjanja vimue, o vi tambulula lonjanga. Pole, olonjanja vikuavo, tu sukila oku likutilila olonjanja vialua catiamẽla kocitangi cimue. Handi vali, tu sukila oku kolela okuti etambululo liohutililo yetu li pitĩla votembo yi sesamẽla kuenda vepuluvi liwa. Ocili okuti, etambululo lia Suku pamue ka liya ndomo tua lavokaile. Ndeci, eye kopiko ovitangi vietu, pole, o tu ĩha olondunge kuenda ongusu okuti tu tẽla oku ‘pandikisa.’—1 Va Kor. 10:13.

8. Tu lekisa ndati okuti tua sanjukila ombanjaile yohutililo?

⁸ Tu lekisa ndati okuti tua sanjukila ombanjaile yohutililo? Onjila yimue, poku kuama onumbi ya Yehova yokuti “likutilili olonjanja viosi.” (1 Va Tes. 5:17) Yehova ka tu kisika oku likutilila kokuaye. Pole, eye wa sumbila elianjo lietu kuenda o tu vetiya hati, “pandikisi lolohutililo.” (Va Rom. 12:12) Omo liaco, tu sukila oku lekisa olopandu vietu poku likutilila olonjanja vialua veteke. Volohutililo vietu tu sukila oku kongelamo olondaka violopandu kuenda vioku sivaya Yehova.—Osa. 145:2, 3.

9. Manji umue ulume o liyeva ndati catiamẽla kohutililo kuenda ndamupi ove o liyevavo?

⁹ Osimbu tuamamako oku lekisa ombili ku Yehova loku limbuka ndomo a tambulula olohutililo vietu, ombili yetu yoku likutilila yi livokiya. Ndeci, kũlĩhĩsa ulandu wa manji umue ulume, o tukuiwa Chris o kasi kupange wotembo yosi ci soka 47 kanyamo. Eye wa popia hati: “Ci sanjuisa calua oku kuata elivala limue komẽle lioku likutilila ku Yehova. Ci kuatisa calua oku sapela la Yehova osimbu kuca okuti ekumbi li tuila ovina viosi! Eci ci tu vetiya oku eca olopandu omo liolombanjaile viosi Yehova a tu ĩha oku kongelamo esumũlũho lioku likutilila kokuaye. Kuenje poku likutilila kesulilo lieteke ci sanjuisa calua oku pekela lutima wa yela.”

10. Momo lie tu sukilila oku velisapo espiritu sandu lia Suku?

¹⁰ Espiritu sandu lia Suku, ombanjaile yikuavo ka yi muiwa tu sukila oku velisapo. Yesu o tu vetiya oku lipilika oku pinga espiritu sandu. (Luka  11:9, 13) Yehova pocakati cespiritu liaye o tu ĩha “unene wa piãla.” (2 Va Kor. 4:7; Ovil. 1:8) Lekuatiso liespiritu lia Suku, tu pondola oku yula ovitangi viosi tu liyaka lavio.

11. Espiritu sandu li pondola oku tu kuatisa ndati?

¹¹ Espiritu sandu lia Suku, li pondola oku tu kuatisa oku tẽlisa ciwa ovikele vietu kupange wa Yehova. Handi vali, espiritu sandu lia Suku li tu kuatisavo koku mioñolola uloño wetu. Kuenje tua kũlĩha okuti, onima yosi yiwa tu kuata kupange wa Yehova, ci tẽliwa lika omo liekuatiso liespiritu sandu.

12. Ndomo ca tangiwa Kosamo 139:23, 24, tu likutilila oku pinga espiritu sandu oco li tu kuatise oku linga nye?

¹² Onjila yikuavo yoku lekisa okuti tua velisapo espiritu sandu lia Suku, poku pinga vohutililo okuti espiritu liaco, li tu kuatisa oku limbuka ovisimĩlo vĩvi lolonjongole ka via sungulukile vi kasi vutima wetu. (Tanga Osamo 139:23, 24.) Nda tua ci linga, Yehova pocakati cespiritu liaye o tu kuatisa oku limbuka ovisimĩlo lolonjongole viaco. Kuenje nda tua limbuka okuti tu kuete ovisimĩlo vĩvi lolonjongole ka via sungulukile, tu sukila oku likutilila oku pinga espiritu lia Suku, oco li tu ĩhe ongusu yoku tamalãla lavio. Nda tua ci linga, tu ka lekisa okuti tua nõlapo oku yuvula oku linga ovina vi koka okuti, Yehova o liwekapo oku eca espiritu liaye kokuetu.—Va Efe. 4:30.

13. Tu pondola oku vokiya ndati olopandu vietu omo liombanjaile yespiritu sandu?

¹³ Tu vokiyavo olopandu vietu kombanjaile yespiritu sandu, poku limbuka eci espiritu sandu lia siata oku linga koloneke vilo. Osimbu Yesu ka endele kilu wa sapuila olondonge viaye hati: “Puãi eci espiritu sandu liya kokuene vu tambula unene, vu linga olombangi viange . . . toke kasukiyo o kilu lieve.” (Ovil. 1:8) Olondaka evi via siata oku tẽlisiwa lonjila yimue yi komõhisa. Lekuatiso liespiritu sandu, ci soka ecelãla kolohuluwa viomanu, va kasi  oku fendela Yehova. Handi vali, afendeli va Yehova va sanjukila oku kala vocumbo celau cespiritu, omo okuti espiritu lia Suku li va kuatisa oku lekisa ovituwa viwa ndeci, ocisola, esanju, ombembua, epandi, esunga, ohenda, ekolelo, umbombe kuenda oku likandangiya. Ovituwa evi vi panga onepa ‘kepako liespiritu.’ (Va Gal. 5:22, 23) Ocili okuti espiritu sandu ombanjaile yimue ya velapo!

14. Ekuatiso lipi ka li muiwa tu kuata eci tu kasi kupange woku kunda?

¹⁴ Etu tu kuete ombanjaile ka yi muiwa okuti oku “talavaya kumosi” la Yehova, Yesu kuenda ovangelo. (2 Va Kor. 6:1) Tu pondola oku talavaya lavo eci tu kasi kupange woku kunda. Paulu wa litukula eye muẽle kuenda vana va lingavo upange waco hati: “Tulondingupange kumue la Suku.” (1 Va Kor. 3:9) Eci tu linga upange woku kunda tu kalavo olondingupange kumue la Yesu. Ivaluka okuti Yesu noke yoku sapuila olondonge viaye oku ‘longisa omanu vo kolofeka viosi oco va linge olondonge,’ wa va sapulavo hati: “Ñasi kumue lene.” (Mat. 28:19, 20) Nye ci popiwa catiamẽla kovangelo? Esumũlũho limue linene oku songuiwa lovangelo osimbu tu kunda ‘olondaka viwa viotembo ka yi pui kuava va tunga kilu lieve”!—Esit. 14:6.

15. Tukula ulandu umue Wembimbiliya u lekisa ekuatiso lia velapo Yehova a siata oku eca kupange woku kunda.

¹⁵ Lekuatiso li tunda kilu, tu tẽla oku linga nye? Eci tu waya ombuto yesapulo Liusoma, olombuto vimue vi kupukila vovitima viomanu va lekisa onjongole kuenje vi kula. (Mat. 13:18, 23) Helie o koka okuti olombuto viocili vi kula kuenje vi eca apako? Yesu wa lombolola okuti omunu o pondola lika oku kala ondonge yaye nda “Isia . . . u koka.” (Yoa. 6:44) Embimbiliya li eca uvangi waco. Sokolola eci Paulu a kundila ocimunga cimue cakãi ocipãla lolupale luo Filipu. Embimbiliya li popia eci catiamẽla ku umue ukãi pokati kavo, o tukuiwa Ludia hati: “Yehova wa yulula utima waye oco a tave ovina Paulu a kala oku popia.” (Ovil. 16:13-15) Ndeci ca pita la Ludia omanu valua va siata oku kokiwa la Yehova.

16. Helie o sesamẽla esivayo omo lionima yiwa tu kuata kupange woku kunda?

¹⁶ Helie o sesamẽla esivayo omo lionima yiwa tu kuata kupange woku kunda? Paulu wa eca etambululo liaco eci a sonehela kekongelo lia va Korindo hati: “Ame nda kũla, Apolosi wa tapela, pole, Suku wa kulisa, ci kale u wa kũla, ci kale u wa tapela vosi yavo hacimueko, te Suku o kulisa.” (1 Va Kor. 3:6, 7) Ndeci ca linga Paulu, olonjanja viosi tu kuata onima yiwa kupange woku kunda, tu sukila oku eca esivayo liaco ku Yehova.

17. Tu lekisa ndati olopandu omo liesumũlũho lioku “talavaya kumosi” la Suku, la Kristu kuenda ovangelo?

¹⁷ Tu lekisa ndati olopandu omo liesumũlũho lioku “talavaya kumosi” la Suku, la Kristu kuenda ovangelo? Tu pondola oku ci linga poku kundila vakuetu olondaka viwa. Kuli olonjila vialua vioku ci linga ndeci poku eca uvangi volokololo kuenda “konjo lanjo.” (Ovil. 20:20) Valua va sole oku eca uvangi ka wa sokiyiwile. Eci va lisanga lomunu umue vo lama lesanju kuenda va fetika ombangulo yimue. Nda omunu waco wa tambuluiya ciwa, lutate vo kundila esapulo Liusoma.

18-19. (a) Tu pondola oku tapela ndati ombuto yocili Condaka ya Suku? (b) Tukula ulandu umue u lekisa ndomo Yehova a kuatisa ondonge yimue Yembimbiliya.

¹⁸ Omo okuti “tulondingupange kumue la Suku” ka tu sukila lika oku kũla ombuto, pole, tu sukilavo oku yi tapela. Eci tu sanga omunu umue wa lekisa onjongole tu sukila oku u sandiliya konjo yaye oco tuamiseko lombangulo, ale tu linga esokiyo okuti manji umue o ka  sanda omunu waco oco a fetike laye elilongiso Liembimbiliya. Osimbu elilongiso liaco li amamako, tu sanjuka eci tu limbuka okuti Yehova o kasi oku kuatisa omunu waco oku linga apongoloko kovisimĩlo viaye kuenda kovituwa.

¹⁹ Kũlĩhĩsa ulandu wulume umue o tukuiwa Rapalalane, wa kala ocimbanda kofeka yo Afrika do Sul. Eye wa solaile calua ovina a kala oku lilongisa kelilongiso liaye Liembimbiliya. Pole, ca tĩlile calua kokuaye oku tava kueci Embimbiliya li popia catiamẽla kohele yoku sapela lomanu va fa. (Esin. 18:10-12) Kamue kamue wa ecelela okuti Suku o pongolola ovisimĩlo viaye. Kuenje vokuenda kuotembo, wa siapo ovina viatiamẽla kumbanda ndaño okuti ovina viaco ovio via enda oku u kuatisa konepa yeteku. Rapalalane okuti cilo o kuete 60 kanyamo, wa popia hati: “Ndi pandula calua Olombangi Via Yehova omo lioku ñuatisa kolonepa vialua ndeci, oku sanga upange woku sanda eteku. Handi vali, ndi pandulavo Yehova omo lioku ñuatisa oku linga apongoloko komuenyo wange, oco ndi kunde olondaka viwa Ndombangi yaye ya papatisiwa.”

20. Nye tua nõlapo oku linga?

²⁰ Vocipama cilo, tua lilongisa olombanjaile vikuãla ka vi muiwa. Pokati kolombanjaile viaco, yavelapo esumũlũho lioku kuata ukamba wa pama la Yehova. Ukamba waco u tu kuatisa oku kuata olombanjaile vikuavo ka vi muiwa ndeci, tu pondola oku amẽla ku Yehova vohutililo, tu tambula ekuatiso liespiritu sandu liaye kuenda ekuatiso li tunda kilu kupange wetu woku kunda. Kuenje tu nõlipo oku vokiya olopandu vietu kolombanjaile evi ka vi muiwa. Omo liaco, lalimue eteke ka tu ka liwekipo oku eca olopandu ku Yehova omo lioku kala Ekamba limue liwa calua.