1. Ukristão umue wa papatisiwa o sukila oku amamako oku linga nye?

ANGA hẽ u umue wa papatisiwa? Nda oco, eci wa papatisiwa, wa lekisa kovaso yomanu okuti o kuete ekolelo ku Yehova kuenda o yongola oku u vumba locisoko caye. * Ocili okuti, ekolelo liove ku Yehova li kasi oku amamako oku kula. Kuenje o sukila oku amamako oku pamisa ekolelo liove liokuti Yehova o kasi oku talavaya locisoko caye koloneke vilo.

2-3. Lonjila yipi Yehova a songuila ocisoko caye koloneke vilo? Tukula ovolandu amue.

² Koloneke vilo, Yehova o songuila ocisoko caye lonjila yimue okuti yi situlula ovituwa viaye, ocipango caye kuenda olonumbi viaye. Tu konomuisa ovituwa vitatu via Yehova via siata oku situluiwa vocisoko caye.

³ Tete, “Suku hokuacameko.” (Ovil. 10:34) Ocisola ca vetiya Yehova oku eca Omõlaye “ndocisembi coku yovola vosi.” (1 Tim. 2:6; Yoa. 3:16) Yehova o tuma afendeli vaye oku kunda olondaka viwa komanu vosi vana va yevelela. Lonjila eyi, eye o kuatisa vosi vana va yongola oku kuatisiwa locisembi oco va popeliwe. Vali, Yehova Hasukuko yombuanja pole yombembua. (1 Va Kor. 14:33, 40) Kuenje, tu sukila oku fendela Yehova lombembua loku yuvula ombuanja. Tatu, Yehova eye “Ulongisi wa Velapo.” (Isa. 30:20, 21) Ocisoko caye ca tiamisila utima koku longisa Ondaka yaye ya sonehiwa, cikale vekongelo ale kupange woku kunda. Ndamupi ekongelo Liakristão lio kocita  catete lia setukula ovituwa evi vitatu via Yehova? Afendeli va Yehova koloneke vilo va setukula ndati ovituwa viaye? Espiritu sandu li ku kuatisa ndati oku vumba cilo locisoko ca Yehova?

4. Ndomo ca lekisiwa kelivulu Liovilinga 1:8, nye Yesu a handeleka kolondonge viaye oku linga kuenda ekuatiso lipi ovo va tambula?

⁴ Kocita catete. Esapulo Yesu a kunda lia eca elavoko komanu vosi. (Luka 4:43) Eye wa handeleka kolondonge viaye oco viamameko lupange eye a fetika, woku eca uvangi “kasukiyo o kilu lieve.” (Tanga Ovilinga 1:8.) Ocili okuti, ovo ka va ponduile oku linga upange waco longusu yavo muẽle. Va sukilile “oñuatisi” okuti espiritu sandu lina Yesu a va likuminyile.—Yoa. 14:26; Sak. 4:6.

5-6. Volonjila vipi espiritu sandu lia kuatisa olondonge via Yesu?

⁵ Olondonge via Yesu via tambula espiritu sandu Kopendekoste yunyamo 33 K.K. Lekuatiso liespiritu, vepuluvi liaco ovo va fetika oku kunda kuenje vokatembo katito, va lua va tava olondaka viwa. (Ovil. 2:41; 4:4) Eci omanu va fetika oku lambalala olondonge, ovo ka va kuatele usumba kuenda ka va liwekelepo oku kunda. Pole, va pinga ku Suku oco a va kuatise. Va likutilila hati: “Eca kakuenje vove utõi woku popia ondaka yove.” Ovo va yukisua lespiritu sandu kuenda “va fetika oku popia ondaka ya Suku lutõi.”—Ovil. 4:18-20, 29, 31.

⁶ Olondonge via Yesu via liyaka lovitangi vikuavo. Ndeci, ovo ka va kuatele o lokopia vialua Viovisonehua. Ka va kuatelevo alivulu akuavo a kunamela Kembimbiliya ndeci tu kuete koloneke vilo. Handi vali, va sukilile oku kundila omanu va vangula alimi alua alitepa. Ndaño lovitangi viaco, olondonge via likolisilako oku kunda, vokuenda kuotembo yimue yitito ovo va kunda olondaka viwa “komanu vosi va kasi vemehi lilu.”—Va Kol. 1:6, 23.

7. Cipitãhala 100 canyamo apita, nye afendeli va Yehova va kũlĩhĩle okuti oco Suku a lavokaile kokuavo kuenda nye ovo va linga?

⁷ Koloneke vilo. Yehova o kasi oku amamako oku songuila afendeli vaye kuenda oku va ĩha ongusu yoku linga ocipango caye. O songuila afendeli vaye pocakati Cembimbiliya, espiritu sandu liaye lia kuatisa oku soneha. Vembimbiliya tu tangamo catiamẽla kupange woku kunda wa Yesu kuenda ocihandeleko a eca kolondonge viaye coku amamako lupange eye a fetika. (Mat. 28:19, 20) Utala Wondavululi Wevambi Linene 1881, wa popia hati: “Yehova ka tu nõlele oco tu sivayiwe lomanu ale oku kala olohuasi, pole, wa tu nõla oco tu talavaye lovina viosi tu kuete kuenda oku kunda olondaka viwa.” Elivulu losapi hati, Helie wa Tambula Ocikele Coku Linga Upange, lia sandekiwa kunyamo 1919 li popia hati: “Kuli upange walua woku linga, pole, Cime cupange o tu ĩha ongusu woku u tẽlisa.” Ndeci Akristão vatete va linga, vamanji a va lutõi va linga upange, loku kolela okuti espiritu sandu li ka va kuatisa oku kundila omanu vosi. Letuvo tua kolela okuti espiritu sandu lika tu kuatisa.

8-9. Olonjila vipi ocisoko ca Yehova ca siata oku kuama oco ku sandekiwe olondaka viwa?

⁸ Ocisoko ca Yehova ca siata oku talavaya lovimalẽho via velapo oco ku sandekiwe olondaka viwa. Vovimalẽho viaco, mua kongela alivulu, o “Foto-Drama da Criação,” ongalamafone, oku talavaya lakãlu a kuete anguena, ovingungu viasapulo, olokombutador kuenda o Internet. Ocisoko ca Suku ca siatavo oku pongolola ovolandu kalimi alua okuti kosimbu cisule! Momo lie? Oco omanu vosi va yeve olondaka viwa kalimi avo. Yehova hokuacameko; eye wa popele okuti olondaka viwa via laikele oku kundiwa “kolofeka viosi,kapata  osi, kalimi osi kuenda komanu vosi.” (Esit. 14:6, 7) Eye o yongola okuti esapulo Liusoma li yeviwa ku vosi.

⁹ Nye ci popiwa ku vana okuti ka ca lelukile oku va sanga, omo okuti pamue va kasi kolonjo vina ka ca lelukile oku iñilako? Locimãho coku sanga omanu vaco, ocisoko ca Yehova ca vetiyiwa oku kuama olonjila vialua vioku kunda. Ndeci, kunyamo 2001, Osungu Yolombangi Via Yehova, ya tava okuti vamanjetu ko Fransa va fetika oku talavaya lotuakãlu tualivulu kuenda olonjila vikuavo. Noke vamanji vo kolonepa vikuavo va fetikavo oku kunda lonjila yaco. Kueyilila onima yiwa. Kunyamo 2011 onjila yaco ya fetikiwavo ko Estados Unidos konepa yimue kupita omanu valua Kolupale luo Nova York. Vokuenda kunyamo watete, kua eciwa eci cisoka 102.129 kalivulu kuenda 68.911 kolorevista. Cisoka 4.701 komanu va pinga oku lilongisa Embimbiliya! Tu pondola oku limbuka okuti Yehova wa talavaya lespiritu sandu liaye oco li kuatise kupange waco. Kuenje Osungu Yolombangi Via Yehova ya tava okuti vamanji vokolonepa viosi violuali va kuama onjila yaco yoku kunda lotuakãlu tualivulu kuenda olonjila vikuavo.

10. Nye tu sukila oku linga oco tu mioñolole upange wetu woku kunda?

¹⁰ Ceci o sukila oku linga. Kolohongele vietu, Yehova wa siata oku tu pindisa oco tu kunde. Kapako eci wa siata oku lilongisa. Olonjanja viosi kundila kumosi locimunga cove cupange woku kunda. Vamanji vo vocimunga cove va pondola oku ku kuatisa oku kunda, oku longisa kuenda oku ku pamisa longangu yavo yiwa. Amamako oku kunda ndaño lovitangi. Tu tẽla oku linga ocipango Suku, hamomoko tua pama, pole, tu u tẽlisa omo lie kuatiso liunene wespiritu sandu. (Sak. 4:6) Tua kolela okuti Suku o ka tu ĩha ongusu tu sukila, momo tu kasi oku linga upange waye.

11. Osungu yakulu kocita catete, ya talavaya ndati kumosi oco ombembua pokati kafendeli va Suku yamameko?

¹¹ Kocita catete. Osungu Yakulu ko Yerusalãi ya likolisilako okuti pokati kafendeli va  Suku pa kala ombembua. (Ovil. 2:42) Ndeci, kunyamo 49 K.K., Akristão valua va kuatele ovisimilo via litepa viatiamẽla koku seviwa evamba, kuenje Osungu Yakulu lekuatiso liespiritu sandu va konomuisa ocitangi caco. Nda ekongelo lia amamaleko oku tepiwa omo liocitangi caco, nda ka va tẽlele oku linga ciwa upange woku kunda. Ndaño va kala va Yudea, ovapostolo kuenda akulu ka va yapuisiwile la va Yudea vana va endaile oku sandeka alongiso esanda. Pole, va tiamisilile ovisimĩlo viavo Kondaka ya Suku kuenda va pinga espiritu sandu, oco li va kuatise oku nõla onjila ya sunguluka. (Ovil. 15:1, 2, 5-20, 28) Onima yipi yeyililako? Yehova wa sumũlũisa onjila va nõla, ekongelo liamamako lombembua kuenda lomunga kuenje vamamako oku kunda.—Ovil. 15:30, 31; 16:4, 5.

12. Nye ci lekisa okuti ocisoko ca Yehova ca sokiyiwa ciwa kuenda muli ombembua koloneke vilo?

¹² Koloneke vilo. Ocisoko ca Yehova ci kuatisa afendeli va Yehova oku likuata omunga loku kuata ombembua. Kunyamo 1895, O Torre de Vigia de Sião kuenda o Arauto da Presença de Cristo, okuti cilo, vi tukuiwa hati Utala Wondavululi lo Despertai! 15 ya Kuvala, mua kala ocipama losapi hati, “Ovina Viosi vi Sokiyiwe Ciwa Loku Lingiwa Lesumbilo,” ca kunamẽlele kukanda 1 Va Korindo 14:40. Ocipama caco ca popele hati: “Ovapostolo va sonehela ovina vialua kekongelo liatete catiamẽla koku sokiya ciwa ovina . . .” Ci kuete esilivilo oku amamako oku pokola ‘ovina via sonehiwila oku tu longisa.’” (Va Rom. 15:4) Ocisoko ca Yehova koloneke vilo ci likolisilako oku talavaya oco ekongelo lisokiyiwe ciwa kuenda oku kuata ombembua ndeci, ca pita kotembo Yakristão vatete. Ndeci: Nda wa enda kekongelo likuavo ndaño muẽle vofeka o kasi, wa kũlĩha ndomo Utala Wondavululi wendisiwa kuenda ocipama ci ka konomuisiwa. Ocili okuti o liyeva ciwa! Espiritu lia Suku olio lika li pondola oku ecelela okuti ovina viaco vi sokiyiwa ciwa!—Sof. 3:9.

13. Ndomo ca lekisiwa kukanda wa Tiago 3:17, apulilo api tu sukila oku linga etu muẽle?

¹³ Ceci o sukila oku linga. Yehova o yongola okuti afendeli vaye va ‘kuata ombembuaomunu  lukuavo, loku likolisilako oku likuata omunga.’ (Va Efe. 4:1-3) Lipula ndoco: ‘Nda siata hẽ oku kuatisa koku likuata omunga kuenda oku sanda ombembua vekongelo? Nda siata hẽ oku pokola ku vana va kuete ocikele coku songola? Vakuetu va pondola hẽ oku ndi kolela, ca piãla enene nda ndi kuete ovikele vekongelo?’ Ñuete hẽ ocituwa coku pitila selo, coku kuatisa kuenda coku lieca olumue? (Tanga Tiago 3:17.) Nda wa limbuka okuti o sukila oku mioñolola kolonepa vimue, likutilila oku pinga espiritu sandu. Eci o likolisilako oku pongolola ovituwa viove kuenda ovilinga viove, vamanji va ka ku sola loku ku kapako.

14. Ndomo ca lekisiwa kukanda ku Va Kolosai 1:9, 10, Yehova wa longisa ndati afendeli vaye kocita catete?

¹⁴ Kocita catete. Yehova o sanjukila oku longisa afendeli vaye. (Osa. 32:8) Eye o yongola okuti tu u kũlĩha, tu u sola kuenda tu kala ndomãla vaye otembo ka yi pui. Cosi eci, nda ka ca tẽliwile nda eye ka tu longisile. (Yoa. 17:3) Yehova wa talavaya lekongelo Liakristão kocita catete, oco a longise afendeli vaye. (Tanga Va Kolosai 1:9, 10.) “Oñuatisi” okuti espiritu sandu lina Yesu a likuminyile, lia kuatisavo olondonge. (Yoa. 14:16) Eci ca eca kolondonge ukũlĩhĩso watiamẽla Kondaka ya Suku kuenda ca va ivaluisa ovina vialua Yesu a popia, levi a linga ndomo ca sonehiwa noke Vavanjeliu. Ukũlĩhĩso waco wa pamisa ekolelo Liakristão vatete, locisola va kuatelele Suku Lomõlaye kuenda ocisola va li kuatelele pokati.

15. Volonjila vipi o lete oku tẽlisiwa kuohuminyo ya Yehova yi sangiwa kelivulu lia Isaya 2:2, 3?

¹⁵ Koloneke vilo. Yehova wa popele okuti “koloneke viesulilo,” omanu vokolofeka viosi va laikele oku iya komunda yaye okuti oku likongela kefendelo liocili oco va longisiwe olonjila viaye. (Tanga Isaya 2:2, 3.) Tu kasi oku mola okuti ocitumasuku eci ci kasi oku tẽlisiwa.  Tu kasivo oku mola okuti efendelo liocili lia velapo efendelo liesanda. Yehova o kasi oku eca kafendeli vaye olonumbi vialua viatiamẽla Kembimbiliya! (Isa. 25:6) Pocakati ‘cukuenje wa kolelua haeye wa lunguka,’ o tu ĩha okulia kualua volonjila via litepa. Ndeci, tu pondola oku tanga ovipama, oku yevelela olohundo kuenda oku tala olovideo vilekisiwa vemẽla li yela. (Mat. 24:45) Pamue tu liyeva ndekamba lia Yovi Elihu wa popia hati: ‘Helie vali o longisa nda [Suku]?’ —Yovi 36:22.

16. Nye o sukila oku linga oco o kule konepa yespiritu?

¹⁶ Ceci o sukila oku linga. Espiritu sandu li ka ku kuatisa oku kapako eci o tanga leci o lilongisa Vondaka ya Suku. Likutilila ndeci Ukualosamo a popia hati: “Ndongise onjila yove, a Yehova, okuti ngendaenda locili cove. Pandeka utima wange kesumbilo lionduko yove.” (Osa. 86:11) Amamako oku tanga loku lilongisa Embimbiliya kuenda alivulu akuavo a sandekiwa locisoko ca Yehova. Ocili okuti ocimãho cove hakukuatako lika ukũlĩhĩso. Ove o yongola oku kapa ocili vutima wove loku ci kapako. Espiritu sandu li pondola oku kuatisa oku ci linga. Handi vali o yongola oku pamisa vamanji. (Va Hev. 10:24, 25) Momo lie? Momo ovo epata lietu konepa yespiritu. Likutilila ku Suku oku pinga espiritu sandu, oco li ku kuatise oku tambulula kolohongele kuenda oku likolisilako oku linga ciwa olonepa kolohongele. Lonjila eyi o lekisa ku Yehova kuenda Komõlaye okuti o sole “otulomeme” tuavo. —Yoa. 21:15-17.

17. Volonjila vipi o lekisa okuti o kasi oku kuatisa ocisoko ca Yehova?

¹⁷ Ndopo, ocisoko ci ka supa lika palo posi, cina ci songuiwa lespiritu lia Suku. Omo liaco, lekisa ombili poku pokola kocisoko ca Yehova. Lekisa okuti o sole omanu vosi nda Suku, poku va kundila olondaka viwa. Setukula ocisola caye poku kuatisa okuti ovina vi sokiyiwa ciwa, lombembua kuenda oku ecelela okuti ekongelo lilikuata omunga. Yevelela Ulongisi wove wa Velapo, loku lilongisa ovolandu osi eye a eca. Eci oluali lua Satana lu ka sulila, ku ka kuata vali usumba. Pole, o ka kolapo poku kala pokati ka vana va kasi oku vumba lekolelo locisoko ca Yehova.