1. Momo lie Ocipito Conjivaluko eteke limue lia velapo liunyamo? (Luka 22:19, 20)

 KAFENDELI va Yehova eteke Liocipito Conjivaluko yolofa via Kristu, eteke limue lia velapo calua vunyamo. Oco lika ocipito Yesu a handeleka olondonge viaye oku ivaluka. (Tanga Luka 22:19, 20.) Tua sanjukila calua Ocipito Conjivaluko omo liasunga alua. Tu kũlĩhĩsi amue pokati kao.

2. Asunga api tu kuete oku lavoka lesanju Ocipito Conjivaluko?

² Ocipito Conjivaluko, ci tu kuatisa oku sokolola kesilivilo liocisembi kuenda kasumũlũho osi eyililako. Ocipito caco, ci tu ivaluisavo olonjila tu pondola oku lekisa olopandu omo liocilumba ca Yesu. (2 Va Kor. 5:14, 15) Handi vali, ci tu ĩhavo epuluvi lioku ‘likolisa pokati’ la vamanji. (Va Rom. 1:12) Unyamo lunyamo, vana va siapo oku endaenda kolohongele kuenda kupange woku kunda, va siata oku kala Kocipito Conjivaluko. Vamue va siata oku vetiyiwa oku tiuka ku Yehova, omo lioku tambuiwa locisola Konjivaluko. Vakuavo va komõha leci va mola kuenda va yeva kuenje va nõlapo oku fetika oku lilongisa Embimbiliya. Eli olio esunga lieci okuti eteke Liocipito Conjivaluko, eteke limue lilikasi!

3. Ocipito Conjivaluko ci kuatisa ndati vamanji voluali luosi oku likuata omunga? (Talavo ociluvialuvia.)

³ Tua sanjukila eteke Liocipito Conjivaluko, momo tua kũlĩha okuti veteke liaco tu kala vomunga yimuamue la vamanji vosi voluali. Olombangi Via Yehova vi kala Kocipito  Conjivaluko osimbu ekumbi li iñila kamue kamue voluali luosi. Vosi yetu tu yevelela ohundo yimue, yi situlula esilivilo liocisembi. Tu imba ovisungo vivali, ku pitisiwa ombolo lovinyu kuenda volohutililo vikuãla vi lingiwa, kesulilo liohutililo lohutililo, tu tambulula lutima wosi hati, “amene.” Vokuenda kuolowola 24, akongelo osi a kuama esokiyo limuamue. O tẽla hẽ oku sokolola esanju Yehova la Yesu va pondola oku kuata, poku tu mola ndomo tua li kuata omunga loku eca esivayo kokuavo lonjila eyi?

4. Nye tu lilongisa vocipama cilo?

⁴ Vocipama cilo, tu ka tambulula apulilo a kuãimo ndeci: Tu pongiya ndati utima wetu oco tu kale Kocipito Conjivaluko? Tu kuatisa ndati omanu vakuavo, oco va kuatisiwevo Locipito caco? Tu kuatisa ndati vana va liwekapo oku kunda loku endaenda kolohongele? Atambululo kapulilo a-a a ka tu kuatisa oku lipongiyila eteke liaco lia velapo.

TU PONGIYA NDATI UTIMA WETU OCO TU KALE KOCIPITO CONJIVALUKO?

5. (a) Momo lie tu sukilila oku sokolola kesilivilo liocisembi? (Osamo 49:7, 8) (b) Nye wa lilongisa vovideo losapi hati: Momo Lie Yesu a Fila?

⁵ Onjila yimue ya velapo yoku pongiya utima wetu oco tu kale Kocipito Conjivaluko, oku sokolola kesilivilo liocilumba cocisembi ca Yesu Kristu. Ka kuli lacimue tu tẽla oku linga lika wetu, oco ci tu yovole kekandu kuenda kolofa. (Tanga Osamo 49:7, 8; talavo ovideo losapi hati: Momo Lie Yesu a Fila?) a Omo liaco, Yehova wa linga eliangiliyo oco Yesu a ece omuenyo waye okuti o tu yovola. Kuenje Yehova la Yesu va tu ĩha ocina ca velapo calua. (Va Rom. 6:23) Osimbu tu sokolola kovina Yehova la Yesu va tu lingila, ci tu vetiya oku sanjukila ocisembi. Tu kũlĩhĩsa ovina vimue via tĩla Yehova la Yesu va nõlapo oku tu lingila. Pole, catete nye ca kongela vocisembi?

6. Nye ca kongela vocisembi?

⁶ Ocisembi ondando yi fetiwa, ale ofeto yondando yocina cimue. Ulume watete Adama eci a lulikiwa, wa lipuile. Pole, eci a linga ekandu, wa pumba ekalo lioku kala komuenyo otembo ka yi pui, kumue locitumbulukila caye. Oco ku fetiwe eci Adama a pumba, Yesu wa sukilile oku eca omuenyo waye wa lipua ndocisembi. Yesu vokuenda kuomuenyo waye wosi palo posi, “ka lingile ekandu, ndaño vomẽla waye ka mua sangiwile elimbi.” (1 Pet. 2:22) Eci Yesu a fa, wa eca omuenyo ndowu Adama a pumba.—1 Va Kor. 15:45; 1 Tim. 2:6.

7. Oloseteko vipi Yesu a liyaka lavio, osimbu a kala palo posi?

⁷ Yesu wamamako oku pokola ku Isiaye wokilu, ndaño wa liyaka loloseteko vialua, osimbu a kala palo posi. Eci a kala omõla, ndaño wa lipuile, wa sukilile oku pokola kolonjali viaye ka via lipuile. (Luka 2:51) Eci a kala umalẽhe wa liyakavo locitangi coku vetiyiwa lamalẽhe vakuavo, oco a sinile olonjali viaye, ale Yehova. Yesu eci a linga ukulu wa sukilile oku liyaka loloseteko via Satana Eliapu vioku u kokela oku linga ekandu kuenda oku liwekapo oku kolela ku Suku. (Mat. 4:1-11) Satana wa yonguile okuti Yesu o linga ekandu, oco ka ka tẽle vali oku feta ocisembi.

8. Ovitangi vipi vikuavo Yesu a liyaka lavio?

⁸ Yesu vokuenda kupange waye woku kunda palo posi, wa liyakavo loloseteko vikuavo. Eye wa lambalaliwa lovanyãli vaye kuenda va seteka oku u ponda. (Luka 4:28, 29; 13:31) Wa sukililevo oku liyaka lakulueya olondonge viaye. (Mar. 9:33, 34) Eci a sombisiwa, wa tipuiwa kuenda wa pembuiwa. Noke Yesu wa pondiwa  ndondingaĩvi loku yeva evalo lialua. (Va Hev. 12:1-3) Eye wa sukilile oku pandikisa kesombiso lia sulako lika liaye okuti, ka kuatele eteyuilo lia Yehova. b—Mat. 27:46.

9. Tu liyeva ndati catiamẽla kocilumba ca Yesu? (1 Petulu 1:8)

⁹ Ocili okuti, Yesu wa tala ohali yalua oco a ece ocisembi. Anga hẽ eci ka ci tu vetiya oku lekisa ocisola calua ku Yesu, poku sokolola ndomo eye a lieca olumue oco a tu yovole pocakati cocisembi?—Tanga 1 Petulu 1:8.

10. Poku eca ocisembi, Yehova wa liyeva ndati?

¹⁰ Nye ci popiwa ku Yehova? Nye Yehova a sukilile oku linga oco Yesu a fete ocisembi? Yehova la Yesu va kuete ukamba umue wa pama calua, ndowu wa siata pokati ka isia umue lomõlaye. (Olosap. 8:30) Tu pondola oku limbuka ndomo Yehova a liyeva poku mola Yesu oku liyaka loloseteko vialua, eci a kala palo posi. Ka kuli atatahãi okuti, Yehova wa yeva evalo lialua poku mola omõlaye oku tatiwa lãvi, oku pembuiwa kuenda oku tala ohali.

11. Tukula ocindekaise cimue ci lekisa ndomo Yehova a liyeva poku mola Yesu oku pondiwa.

¹¹ Onjali yosi ya fisa omõlaye ya kũlĩha ciwa evalo li tunda koku fisa. Ndaño okuti tua kolela kelavoko liepinduko, pole, eci kufa umue tu sole tu yeva evalo kutima. Ocindekaise eci, ci tu kuatisa oku kuata elomboloko ndomo Yehova a liyeva, eci a mola Omõlaye o soliwe oku tala ohali kuenda oku fa kotembo yonjovo yunyamo wa 33 K.K. c—Mat. 3:17.

12. Nye tu sukila oku linga vokuenda kuolosemana Vionjivaluko?

¹² Oku upisa cilo kuenda Konjivaluko, momo lie kelilongiso liove lio pokolika, ale kefendelo liepata kulilongisila eci catiamẽla kocisembi? Talavo Elivulu Lioku Konomuisa Liolombangi Via Yehova, ale alivulu akuavo mu sangiwa otusapi tu lombolola catiamẽla kocisembi. d Handi vali, kuama esokiyo lioku tangiwa Kuembimbiliya liatiamẽla Kocipito Conjivaluko lia siata oku iyilila Vekalo Lietu Tuakristão Kuenda Oku Kunda. Keteke Lionjivaluko, ku ka ivaleko oku tala ocipama ci likasi Cefendelo Liomẽle. Eci tu pongiyila utima wetu Ocipito Conjivaluko, ci leluka oku kuatisa vakuetu, oco va kuatisiwevo leteke liaco.—Esera 7:10.

 KUATISA OMANU VAKUAVO OCO VA KUATISIWEVO

13. Lipi enanga liatete lioku kuatisa omanu vakuavo oco va kuatisiwevo Locipito Conjivaluko?

¹³ Tu kuatisa ndati omanu vakuavo oco va kuatisiwevo Locipito Conjivaluko? Enanga liatete oku va laleka. Ka tu laleka lika vana tu sanga kupange woku kunda, pole, tu sukilavo oku linga ulala womanu vana tua kũlĩha oco tu va lalekevo. Omu mua kongela vakuepata lietu, vana tu talavayela kumosi, vana tu tangela kumosi kuenda omanu vakuavo tua kũlĩha. Ndaño okuti ka tu kuete ovikanda vi tẽla vio ku laleka omanu, tu sukila oku tumisa esapulo liokokanda kaco pocakati co Internet. Citava okuti vamue, va ka tava kelaleko liaco!—Uku. 11:6.

14. Lombolola esilivilo lioku eca okokanda kelaleko komunu umue.

¹⁴ Ku ka kuate ohele yoku eca okokanda kelaleko komunu umue. Eteke limue, manji umue ukãi wa komõha calua omo ulume waye okuti Hambangiko ya Yehova, wo sapuila hati wa laikelevo oku enda laye Kocipito Conjivaluko. Momo lie manjetu ukãi a komõhela? Momo wo lalekele ale olonjanja vimue, pole, lalimue eteke ulume waye a tavele. Onjanja eyi, nye co vetiya? Eye wa lombolola hati: “Nda tambula ocicapa cokokanda kaco kelaleko kukulu umue wekongelo a kũlĩhĩle ciwa.” Ulume wa manji wa endele Kocipito Conjivaluko cunyamo waco kuenje wamamako kanyamo akuavo.

15. Nye tu sukila oku sokolola poku laleka omanu Kocipito Conjivaluko?

¹⁵ Kũlĩha okuti omanu vamue tu laleka va pondola oku tu linga apulilo atiamẽla Konjivaluko, ca piãla enene nda oyo onjanja yavo yatete oku iya kolohongele vietu. Tu sukila oku lipongiyila apulilo va laika oku linga, oco tu tẽle oku a tambulula ciwa. (Va Kol. 4:6) Ndeci, vamue va pondola oku pula hati: ‘Nye ci ka pita Kocipito caco?’ ‘Otembo yiñami ci ka tumãla?’ ‘Uwalo upi, ndi sukila oku wala?’ ‘Ndi sukila hẽ oku feta cimue?’ ‘Va ka ndi kisika hẽ oku eca olombongo Kocipito Conjivaluko?’ Eci tu laleka umue oku enda Kocipito Conjivaluko tu sukila lika oku pula okuti: “O yongola hẽ oku linga epulilo limue?” Noke tambulula apulilo va  ku linga. Tu sukilavo oku talavaya lolovideo ndeci ovideo losapi hati, Onjivaluko Yolofa Via Yesu kuenda ovideo losapi hati, Nye ci Lingiwa Vonjango Yusoma? oco o kuatise omunu oku kũlĩha ndomo olohongele vietu via siata oku lingiwa. Vocipama 28 celivulu losapi hati: Sanjukili Omuenyo Otembo ka yi Pui! muli atosi alua awa tu pondola oku sapela lomunu.

16. Apulilo api akuavo pamue omanu veya Kocipito Conjivaluko va pondola oku linga?

¹⁶ Vana va lekisa onjongole okuti veyile onjanja yatete Kocipito Conjivaluko, pamue noke va ka kuata vali atatahãi. Citava okuti va pondola oku pula esunga lieci omanu vatito ovo lika va lia kombolo loku nyua kovinyu (nda pa kala.) Ovo va pondolavo oku pula nda Ocipito Conjivaluko ci lingiwa olonjanja viñami. Handi vali, va ka yongola oku kũlĩha nda olohongele Violombangi Via Yehova vi lingiwa lonjila yimuamue. Ndaño okuti atosi aco osi a lomboluiwa ale vokuenda kuohundo, vana va kala onjanja yatete Kocipito Conjivaluko, va ka sukila vali alomboluilo akuavo. Ocipama ci sangiwa vo jw.org losapi hati: “Momo Lie Olombangi Via Yehova vi Lingila Ocipito Conjivaluko ya Ñala Lonjila ya Litepa Latavo Akuavo?” ci ka tu kuatisa oku tambulula amue pokati kapulilo avo. Osimbu Ocipito Conjivaluko ka ca pitĩlile, vokuenda kuoloneke vionjivaluko kuenda noke liocipito caco, tu yongola oku linga cosi ci tava oco tu kuatise ‘vakuotima wa sunguluka’ okuti va kuatisiwavo Locipito Conjivaluko.—Ovil. 13:48.

KUATISA VANA VA LIWEKAPO OKU KUNDA LOKU ENDAENDA KOLOHONGELE

17. Akulu vekongelo va pondola oku kuatisa ndati vana va liwekapo oku kunda loku endaenda kolohongele? (Esekiele 34:12, 16)

¹⁷ Vokuenda Kuocipito Conjivaluko, akulu vekongelo va kuatisa ndati vana va liwekapo oku kunda loku endaenda kolohongele? Lekisi kokuavo okuti wa va kapiko (Tanga Esekiele 34:12, 16.) Osimbu handi eteke Lionjivaluko ka lia pitĩlile, sanda oku laleka valua pokati kavo. Va sapuila okuti o va sole calua kuenda o yongola oku va kuatisa kovina va sukila. Va laleka oku enda Kocipito Conjivaluko. Nda veya, va yolela lesanju. Noke Liocipito  Conjivaluko, amamako oku va pasuisa kuenda va ĩha ekuatiso liosi va sukila konepa yespiritu, oco ci va vetiye oku tiuka ku Yehova.—1 Pet. 2:25.

18. Vosi yetu tu kuatisa ndati vana va liwekapo oku kunda loku endaenda kolohongele? (Va Roma 12:10)

¹⁸ Vosi vekongelo va pondolavo oku kuatisa vana va liwekapo oku kunda loku endaenda kolohongele okuti, va siata oku iya Kocipito Conjivaluko. Ndamupi? Poku va tata locisola, ocikembe kuenda esumbilo. (Tanga Va Roma 12:10.) Ivaluka okuti, pamue ka ci leluka ku vamanji vaco oku tiuka vekongelo. Pamue va kuata ohele yoku sima okuti, vekongelo ka va ka tu tambula ciwa. e Omo liaco, yuvula oku va linga apulilo ana a va kutisa osõi, ale oku popia cimue ci pondola oku va sumuisa. (1 Va Tes. 5:11) Momo ovo handi va manjetu. Tu kuete esanju omo lioku vumbila kumue lavo!—Osa. 119:176; Ovil. 20:35.

19. Tu kuatisiwa ndati poku ivaluka olofa via Yesu?

¹⁹ Tu eca olopandu omo Yesu a tu sapuila okuti, tu sukila oku ivaluka olofa viaye unyamo lunyamo kuenda oku kuata elomboloko lieci ci kuetele esilivilo. Eci tu enda Kocipito Conjivaluko tu li kuatisa etu muẽle kuenda tu kuatisavo vakuetu kolonepa vialua. (Isa. 48:17, 18) Tu vokiya ocisola cetu tu kuetele Yehova kuenda Yesu. Tu lekisavo olopandu omo liovina va tu lingila. Tu pamisa ukamba wetu la vamanji. Nda tua ci linga, tu kuatisa omanu vakuavo oku lilongisa ndomo va pondolavo oku kuatisiwa lasumũlũho a tunda kocisembi. Omo liaco, vosi yetu tu lingi eci citava oco tu lipongiyili Ocipito Conjivaluko cunyamo ulo okuti, olio eteke li kuete esilivilo lialua vunyamo!