OCIPAMA CELILONGISO 5
Tuenda Love
“Tuenda love, momo tua yeva okuti Suku o kasi lene.”—SAK. 8:23.
OCISUNGO 26 Wa ci Lingilivo Ame
OVINA TU LILONGISA *
Olomeme vikuavo okuti (“alume ekũi”) vi kuete esumũlũho lioku fendela Yehova kumue Lakristão olombuavekua okuti (“u Yuda umosi”) (Tala ovinimbu 1-2)
1. Nye Yehova a popia okuti oco ca laikele oku pita koloneke vilo?
YEHOVA wa tukula eci catiamẽla kotembo yetu hati: “Alume ekũi va tunda kolofeka vialimi osi. Va kuata konanga yu Yuda umosi, vati: ‘Tuenda love, momo tua yeva okuti Suku o kasi lene.’” (Sak. 8:23) U “Yuda,” o lomboloka vana va wavekiwa lespiritu sandu. Ovo va tukuiwavo okuti “Isareli wa Suku.” (Va Gal. 6:16) “Alume ekũi” va lomboloka vana va kuete elavoko lioku kala otembo ka yi pui palo posi. Ovo va kũlĩha okuti Yehova wa nõla ocimunga cimue colombuavekua kuenje kokuavo esumũlũho oku fendela kumosi.
2. “Alume ekui” va ‘enda’ ndati lolombuavekua?
2 Ndaño okuti ka ci tẽliwa oku kũlĩha olonduko violombuavekua vi kasi handi palo posi, * pole, vana va kuete elavoko lioku kala palo posi, va pondola oku ‘endela’ kumosi lolombuavekua. Ndamupi? Embimbiliya li popia okuti, “alume ekũi” va ponduile oku “kuata konanga yu Yuda, loku popia vati: ‘Tuenda love, momo tua yeva okuti Suku o kasi lene.’” Ocinimbu eci Cembimbiliya ci tukula u Yuda umosi. Pole, ondaka “love” kuenda “lene,” yi lomboloka omanu valua. Eci ci lekisa okuti u Yuda ka lomboloka lika omunu umosi, pole, o lomboloka ocimunga cosi colombuavekua. Vana okuti halombuavekuako va fendela Yehova kumue lolombuavekua. Pole, ovo ka va tendi olombuavekua ndasongui vavo, momo va kũlĩha okuti Yesu eye Usongui wavo.—Mat. 23:10.
3. Apulilo api tu konomuisa vocipama cilo?
3 Omo okuti Akristão olombuvekua handi va kasi palo posi kumue lafendeli va Suku, omanu vamue va pondola oku lipula ndoco: (1) Akristão Olombuavekua va sukila oku li tenda ndati? (2) Tu sukila oku tenda ndati vana va lia kombolo loku nyua kovinyu Kocipito Conjivaluko? (3) Nda etendelo liomanu va lia kombolo loku nyua kovinyu likasi oku livokiya, anga hẽ ci tu sakalaisa? Ocipama cilo ci ka tambulula apulilo a-a.
AKRISTÃO OLOMBUAVEKUA VA SUKILA OKU LI TENDA NDATI?
4. Elungulo li sangiwa ku 1 Va Korindo 11:27-29, li kuatisa ndati olombuavekua oku sokolola lutate kelungulo liaco, kuenda momo lie?
4 Akristão olombuavekua va sukila oku sokolola lutate kelungulo li sangiwa ku 1 Va Korindo 11:27-29. (Tanga.) Ndamupi ombuavekua yi pondola oku nyua kovinyu loku lia kombolo “losiata”Kocipito Conjivaluko? Eye o pondola oku ci linga, nda o nyua kovinyu loku lia kombolo, pole, ka pokola kolonumbi via Yehova. (Va Hev. 6:4-6; 10:26-29) Una okuti ombuavekua o sukila oku amamako lekolelo nda o yongola oku ‘tambula onima ku Suku yekovongo liokilu vonduko ya Kristu Yesu.’—Va Fil. 3:13-16.
5. Akristão olombuavekua va li tenda ndati?
5 Espiritu sandu lia Yehova li kuatisa afendeli vaye oku lekisa umbombe, okuti ka va lekisa epela. (Va Efe. 4:1-3; Va Kol. 3:10, 12) Olombuavekua ka vi simi okuti va velapo vakuavo. Ovo va kũlĩha okuti Yehova ka eci kokuavo espiritu sandu lialua vali okuti afendeli vakuavo ci sule. Ka va simi okuti va kuete elomboloko lia velapo Liembimbiliya, okuti vakuavo ci sule. Handi vali, lalimue eteke va lilekisa okuti ombuavekua kuenje o fetika oku lia kombolo loku nyua kovinyu Kocipito Conjivaluko. Pole, lumbombe va limbuka okuti Yehova eye lika o laleka omanu oku enda kilu.
6. Ndomo ca lekisiwa ku 1 Va Korindo 4:7, 8, ovituwa vipi Akristão olombuavekua vi sukila oku lekisa?
6 Olombuavekua ndaño via kũlĩha okuti esumũlũho limue linene oku nõliwa oku enda kilu, ovio ka vi lavoka okuti omanu vakuavo va va tata lonjila yimue yilikasi. (Va Fil. 2:2, 3) Ovo va kũlĩhavo okuti eci Yehova a waveka umue, Yehova ka ecelela okuti omanu vakuavo va ci kũlĩha. Omo liaco, ombuavekua ka yi lekisa esakalalo nda vamue ka va tava lonjanga okuti, eye ombuavekua. Eye ivaluka okuti Embimbiliya li tu sapuila okuti, tu sukila oku yuvula oku kala vakuanjanga poku tava omunu una o popia hati Suku wo wiha ocikele cimue ci likasi. (Esit. 2:2) Omo okuti Ukristão ombuavekua ka yongola oku tatiwa lonjila yimue yilikasi, eye ka sapuila komanu vana a lisanga lavo onjanja yatete okuti eye ombuavekua. Kuenda eye ka litunũla, ale oku likapako kovaso omanu vakuavo.—Tanga 1 Va Korindo 4:7, 8.
7. Akristão olombuavekua va sukila oku yuvula nye kuenda momo lie?
7 Akristão olombuavekua ka va simi okuti va sukila oku pita lika otembo lolombuavekua vikuavo, ndu okuti va panga onepa kocimunga cimue ci likasi. Ovo ka va sandiliya olombuavekua vikuavo locimãho coku sapela catiamẽla kekalo liavo, ale oku sokiya ovimunga oco va lilongise Embimbiliya. (Va Gal. 1:15-17) Ekongelo ka likuata omunga nda olombuavekua via linga ovina viaco. Lonjila eyi, ovo nda va lekisa okuti ka va kuãi espiritu sandu, lina li kuatisa afendeli va Suku oku kuata ombuembua loku likuata omunga.—Va Rom. 16:17, 18.
UKRISTÃO OMBUAVEKUA O SUKILA OKU TATIWA NDATI?
Ka tu sukila oku tenda Akristão olombuavekua ale vana va kuete ocikele coku songola, ndomanu va kemãla (Tala ovinimbu 8) *
8. Momo lie o sukilila oku kuata utate konjila ndomo o tenda vana va lia kombolo loku nyua kovinyu Kocipito Conjivaluko? (Tala etosi pombuelo yemẽla.)
8 Tu tata ndati vamanji alume lakãi olombuavekua? Ka ca sungulukile oku komõha calua omunu umue, ndaño muẽle okuti omunu waco manji ombuavekua ya Kristu. (Mat. 23:8-12) Embimbiliya poku tukula catiamẽla kakulu vekongelo, olio li tu vetiya oco tu ‘setukule ekolelo liavo,’ pole, ka li tu sapuila okuti tu sukila oku kuama omunu umue ndusongui. (Va Hev. 13:7) Ocili okuti Embimbiliya li popia okuti vamue “va sesamẽla esumbilo lialua.” Momo ovo “va songola ciwa” kuenda “va talavaya calua koku vangula loku longisa,” hamekondako okuti olombuavekua. (1 Tim. 5:17) Nda tu eca esivayo lialua kuenda esumbilo kolombuavekua, tu va kokela oku sumua. * Ale ca piãla enene, tu va kokela oku lekisa epela. (Va Rom. 12:3) Ocili okuti, lomue pokati ketu o yongola oku kokela ocilondokua vamanji olombuavekua via Kristu!—Luka 17:2.
9. Tu lekisa ndati okuti tua sumbila Akristão olombuavekua?
9 Tu lekisa ndati esumbilo ku vana va wavekiwa la Yehova? Ka tu pondola oku pulisa kokuavo ndomo va linga olombuavekua. Ombuavekua lombuavekua, oyo ya ci kũlĩha, etu ka tu kuete omoko yoku ci kũlĩhĩsa. (1 Va Tes. 4:11; 2 Va Tes. 3:11) Handi vali, etu ka tu pondola oku sima okuti ohueli yombuavekua, olonjali viaye, ale vamue pokati kepata liaye olombuavekuavo. Omunu ka piñala kepata liaye elavoko lioku enda kilu. Eye o tambula ku Suku elavoko liaco. (1 Va Tes. 2:12) Tu sukila oku yuvulavo oku linga apulilo ana a pondola oku sumuisa vakuetu. Ndeci, ka tu pondola oku pulisa ukãi wa manji umue ombuavekua ndomo a liyevite poku sima okuti eye o siala palo posi kuenje ulume waye enda kilu. Omo liaco, tu koleli okuti voluali luokaliye, Yehova “o kutisa viosi vi kasi lomuenyo.”—Osa. 145:16.
10. Tu liteyuila ndati nda tua yuvula ocituwa coku “komõha ovipala”?
10 Nda tua yuvula oku lekisa esumbilo lialua kolombuavekua ci tu kuatisa etu muẽle. Ndamupi? Embimbiliya li tu sapuila okuti olombuavekua vimue pamue ka vi pandikisa kekolelo. (Mat. 25:10-12; 2 Pet. 2:20, 21) Pole, nda tua yuvula “oku komõha ovipala,” lalimue eteke tu ka kuama omanu, cikale okuti olombuavekua ale vana va kasi vocili vokuenda kuayamo alua. (Yuda 16 etosi) Kuenje ndaño ovo ka va pandikisile kekolelo, ale va siapo ekongelo, etu tu ka amamako lekolelo ku Yehova kuenda ka tu liwekapo oku u vumba.
ANGA HẼ TU LISAKALAISA POKU MOLA ETENDELO LIOMANU VA LIA KOMBOLO LOKU NYUA KOVINYU?
11. Nye ci kasi oku lipita letendelo lia vana va lia kombolo loku nyua kovinyu Kocipito Conjivaluko?
11 Kanyamo alua a pita, etendelo liomanu va lia kombolo loku nyua kovinyu lia kala oku tepuluka. Pole cilo, unyamo lunyamo etendelo liaco li kasi oku li vokiya. Anga hẽ tu sukila oku li sakalaisa? Sio. Kaliye tu konomuisa esunga lieci ka tu sukilila oku li sakalaisa.
12. Momo lie ka tu sukilila oku lisakalaisa nda etendelo liomanu va lia kombolo loku nyua kovinyu liamamako oku livokiya Kocipito Conjivaluko?
12 “Yehova wa kũlĩha ava va tiamẽla kokuaye.” (2 Tim. 2:19) Ca litepa la Yehova ceci okuti, vana va siata oku tenda vamanji va panga onepa koku lia kombolo loku nyua kovinyu Kocipito Conjivaluko, ka va kũlĩhĩle muẽle helie ombuavekua. Momo vetendelo liaco, mua kongela vana va sima okuti olombuavekua, pole, halombuavekuako. Ndeci, vana va pangaile onepa koku lia kombolo loku nyua kovinyu, noke va liwekapo. Citava okuti vamue va kuata ocitangi cutue ale kovisimĩlo kuenje ca va vetiya oku sima okuti, va ka viala kumue la Kristu kilu. Ocili okuti, etu ka tua kũlĩhĩle ndomo olombuavekua vialua vi kasi oku siapo ongongo.
13. Anga hẽ Embimbiliya li popia etendelo liolombuavekua vi ka kala handi palo posi, eci ohali ya piãla yi fetika?
13 Kolonepa vialua violuali ku ka sangiwa olombuavekua eci Yesu a keya oco a vambate kilu. (Mat. 24:31) Embimbiliya li popia okuti vokuenda kuoloneke via sulako ku kala ocisupe cimue colombuavekua palo posi. (Esit. 12:17) Pole, Embimbiliya ka li tukula etendelo liolombuavekua li ka kala handi palo posi eci ohali ya piãla yi fetika.
Tu sukila oku liyeva ndati nda umue wa fetika oku lia kombolo loku nyua kovinyu Kocipito Conjivaluko? (See paragraph 14)
14. Ndomo ca lekisiwa ku Va Roma 9:11, 16, nye tu sukila oku kulĩha catiamẽla koku nõliwa kuolombuavekua?
14 Yehova eye wa kũlĩha otembo a sukila oku nõla omunu umue oku kala ombuavekua. (Va Rom. 8:28-30) Yehova wa fetika oku nõla olombuavekua noke liepinduko lia Yesu. Citava okuti kocita catete, Akristão vosi va kala olombuavekua. Vokuenda kuanyamo a kuamamo, valua va litukuile okuti Akristão, ka va kaile olondonge viocili via Kristu. Omo liaco, Vokuenda kuanyamo aco, Yehova wa nõla lika ocimunga cimue citito colombuavekua, okuti Akristão vocili. Ovo va kala ndotiliku Yesu a popia okuti ya laikele oku kulila kumosi losoka. (Mat. 13:24-30) Vokuenda kuoloneke vilo via sulako, Yehova o kasi oku amamako oku nõla omanu va ka panga onepa ketendelo li soka 144.000. * Kuenje nda Suku o nõla vamue osimbu esulilo ka lieyile, etu ka tu pondola oku patãla olondunge viaye. (Tanga Va Roma 9:11, 16.) * Tu sukila oku kuata utate oco ka tu ka sokisiwe lolonalavayi vina Yesu a tukula volusapo luaye. Ovio via fetika oku ñuñunila cime omo lionjila ndomo a tata vana va sulako oku molẽha.—Mat. 20:8-15.
15. Anga hẽ Akristão vosi olombuavekua, va panga onepa kocimunga ‘cukuenje wa kolelua haeye wa lunguka’ ndomo ca tukuiwa kelivulu lia Mateo 24:45-47? Ci lombolola.
15 Vana va kuete elavoko lioku ka kala kilu havosiko va panga onepa ‘kukuenje wa kolelua haeye wa lunguka.’ (Tanga Mateo 24:45-47.) Ndeci ca pita kocita catete, koloneke vilo Yehova kuenda Yesu pocakati cocimunga cimue citito ca vamanji, va kasi oku eca okulia kuespiritu, ale oku longisa omanu valua. Ocimunga cimue citito Cakristão olombuavekua kocita catete oco lika ca vetiyiwa oku soneha Ovisonehua vio Helasi. Koloneke vilo, ocimunga cimue citito Cakristão olombuavekua ci kasi locikele coku eca komanu va Suku “okulia votembo ya sokiyiwa.”
16. Ocipama cilo ca tu longisa nye?
16 Ocipama cilo ca tu longisa nye? Yehova wa panga oku eca omuenyo ko pui kowiñi walua wafendeli vaye va ka kala palo posi kuenda omuenyo ko pui ketendelo limue litito lia vana va ka viala la Yesu kilu. Yehova o sumũlũisa afendeli vaye vosi, okuti u “Yuda” kuenda “alume ekũi” kuenje eye o lavoka okuti ovo va pokola ovihandeleko vimuamue loku amamako lekolelo. Vosi va sukila oku lekisa umbombe. Vosi yavo va sukila oku vumba Yehova loku likuata omunga. Handi vali, vosi va sukila oku amamako oku talavayela kumosi lombembua vekongelo. Osimbu tu panda kesulilo lioluali, vosi yetu tu amamiko oku vumba Yehova kuenda oku kuama Kristu “vocunda cimuamue.”—Yoa. 10:16.
^ tini. 5 Unyamo ulo, Ocipito Conjivaluko colofa via Kristu ci ka lingiwa vovali, keteke 7 ya Kupupu. Helie o kuete omoko yoku lia kombolo loku nyua kovinyu Kocipito Conjivaluko? Anga hẽ tu li sakalaisa nda etendelo liomanu va lia kombolo loku nyua kovinyu li amamako oku livokiya? Atambululo apulilo a-a okuti, a sangiwa vocipama cilo, ca kunamẽla kocipama cimue ca molẽhele Vutala Wondavululi wa Susu wo 2016.
^ tini. 2 Ndomo Osamo 87:5, 6 yi lekisa, kovaso yoloneke citava okuti Suku o ka sitululula olonduko via vosi va ka viala la Yesu kilu.—Va Rom. 8:19.
^ tini. 8 Tanga okakasia losapi hati, “Ocisola ‘ka ci Lingi Akutisasõi’” Vutala Wondavululi wa Susu wo 2016.
^ tini. 14 Ndaño okuti elivulu Liovilinga 2:33, li lekisa okuti espiritu sandu li eciwa pocakati ca Yesu, pole, Yehova eye o nõla omunu lomunu.
^ tini. 14 Oco o kũlĩhe alomboluilo akuavo, tanga ocipama losapi hati, Perguntas dos Leitores Vutala Wondavululi wa 1 ya Kupemba wo 2007 kelimi lioputu.
OCISUNGO 34 Endaendi Lesunga
^ tini. 56 ELOMBOLUILO LIELITALATU: Sokolola okuti manji umue onumiwa yo Kombala Yolombangi Via Yehova kumue lukãi waye va sakalaisua loku va ñuala oco va vope alitalatu kohongele yofeka. Eci ekambo liesumbilo!
