1, 2. (a) Nye omanu vamue va siata oku sima catiamẽla kondaka yokuti Suku okuete ocisoko cimue? (b) Nye tu lilongisa vocipama cilo?

OMANU vamue va popia hati: “Ove ku sukila oku kuama olonumbi viocisoko cimue. O sukila lika oku kuata ukamba la Suku.” Anga hẽ ovina viaco viocili? Nye ovolandu a lekisa?

² Vocipama cilo, tu lilongisa ndomo Yehova a sokiya ciwa ovina kuenda ndomo afendeli vaye va sokiyiwa ciwa. Tu lilongisavo eci tu sukila oku linga, eci ocisoko ca Yehova ci tu ĩha olonumbi. (1 Va Korindo 14:33, 40) Kocita catete, afendeli va Yehova va kuama olonumbi lekuatiso Liovisonehua kuenda va loñolohẽle poku kunda olondaka viwa kovitumãlo vialua. Koloneke vilo, tua siata oku songuiwa lolonumbi Viembimbiliya. Tua siatavo oku pokola kolonumbi tua siata oku tambula vocisoko ca Suku. Poku ci linga, ci tu kuatisa oku loñolõha poku kunda olondaka viwa koluali luosi. Omo liaco, tu sukila oku amamako oku kuatisa ekongelo oco li yelisiwe, mu kale ombembua kuenda oku likuata omunga.

3. Momo lie o tavela okuti Yehova o Suku yimue yi sokiya ciwa ovina?

³ Eci tu mola ovina Yehova a lulika, ci tu kuatisa oku limbuka  okuti eye o Suku yimue yi sokiya ciwa ovina. Eye “wa sovola oluali lolondunge. Wa lulika ilu luloño.” (Olosapo 3:19) Ocili okuti, kuli ovina vialua Yehova a lulika okuti ka tua vi kũlĩhĩle. Pole, ‘eci tua yeva ovopange aye ca soka ndoku loñola lika.’ (Yovi 26:14) Pole, ovina vitito tua kũlĩha viatiamẽla kovina via lulikiwa vi lekisa okuti via sokiyiwa ciwa. (Osamo 8:3, 4) Olombungululu vi sangiwa kilu vi lekisa okuti via sokiyiwa ciwa. Sokololavo ndomo ongongo lovina vikuavo kilu via siata oku ñuala ekumbi. Ovina viaco vi komõhisa calua momo Yehova wa vi sokiya lonjila yimue okuti, ongongo kuenda olombungululu vi ñuala ñuala lonjila yimue ya sunguluka. Eci tu sokolola ndomo Yehova ‘a lulika ilu lolondunge viaye’ kuenda ongongo, ci tu vetiya oku eca esivayo kokuaye, oku u fendela kuenda oku kolela kokuaye.​—Osamo 136:1, 5-9.

4. Momo lie olonoño ka vi kuete epondolo lioku tambulula apulilo alua a kuete esilivilo lia velapo?

⁴ Olonoño via siata oku kuatisiwa lovina vialua via lulikiwa oco va lilongise eci catiamẽla kovina vi sangiwa voluali okuti, vi pondola oku tu kuatisa kovimuenyo vietu. Pole, ovo ka va kuete uloño woku tambulula apulilo akuete esilivilo lia velapo. Olonoño vina via siata oku tenda olombungululu, ka vi pondola oku popia ocili ndomo ovina via lulikiwa, ndomo via fetika ale esunga lieci omanu, ovinyama kuenda ovikũla vi kasilili vongongo. Omanu valua ka va tẽla oku lombolola esunga lieci ovo va kuetele onjongole yoku kala komuenyo otembo ka yi pui. (Ukundi 3:11) Esunga limue lieli okuti, omanu vamue ka va siatele oku sanga atambululo atiamẽla kapulilo va siata oku linga, momo olonoño kuenda omanu vakuavo va siata oku popia hati, ka kuli Suku kuenda ovina via tukuluka ño. Pole, Suku o tu ĩha atambululo lekuatiso lielivulu liaye okuti, Embimbiliya.

5. Volonjila vipi omanu va sukila oku pokola kolongusu violuali?

⁵ Yehova wa tumbika olongusu violuali. Olongusu viaco ka vi pongoloka. Omanu vana va kuete uloño woku kapa ocinyi volonjo, vakuaku tata ovava, olomitavaso viupange, vakuakuendisa olombalãu, vakuaku pelala kuenda omanu vakuavo, va sukila oku kuama olongusu viaco oco va linge ovopange avo. Utima womunu u sangiwa konepa yimuamue yetimba liomanu vosi, kuenje, eci ci ecelela olondotolo oku pelala omanu vana va kuete uveyi wo vutima. Omanu vosi va kũlĩha okuti nda omunu umue o tẽha komunda yimue ya lepa o fa. Omo liaco, oco tu amameko oku kala lomuenyo, tu sukila oku pokola kolongusu violuali ndeci ongusu yina yi kokela ovina posi.

6. Tua kũlĩha ndati okuti Yehova o yongola okuti afendeli vaye vo fendela lonjila yimue ya sokiyiwa ciwa?

⁶ Yehova wa sokiya oluali lonjila yimue yi komohĩsa. Eye o yongola okuti afendeli vaye vo fendela lonjila yimue ya sokiyiwa ciwa. Omo liaco, wa tu ĩha Embimbiliya oco a tu longise ndomo tu pondola oku u fendela. Tu pondola lika oku kuata esanju komuenyo nda tua kapako olonumbi eye a siata oku tu ĩha, vi sangiwa Vembimbiliya kuenda vocisoko caye.

7. Nye tu pondola oku lilongisa catiamẽla konjila ndomo Embimbiliya lia sonehiwa?

⁷ Embimbiliya ombanjaile yimue yilikasi ya tunda ku Suku. Olonoño vimue via siata oku popia okuti Embimbiliya elivulu limue  lia pongiyiwa locimunga cimue citito ca va Yudea kuenda Akristão. Pole, Suku wa nõla omanu va laikele oku soneha alivulu a sangiwa Vembimbiliya, otembo va laikele oku li soneha kuenda ovina va laikele oku soneha. Eli olio esunga liokuti alivulu osi a sangiwa Vembimbiliya a tu kuatisa oku kuata elomboloko liesapulo li tunda ku Suku. Oku upisa kelivulu Liefetikilo toke Liesituluilo, Embimbiliya li lekisa okuti kua laikele oku kala ‘ombuto’ yina ya laikele oku pongolola ongongo yilo oco yi linge ofeka yelau. Tua siata oku lilongisa okuti, ‘ombuto’ yaco, Yesu Kristu okuti Usoma waye u ka lekisa okuti Yehova okuete omoko yoku viala omanu vosi.​—Tanga Efetikilo 3:15; Mateo 6:10; Esituluilo 11:15.

8. Volonjila vipi okuti va Isareli va kala omanu vamue va sokiyiwa ciwa?

⁸ Va Isareli va kuama Ocihandeleko Suku a ecele kokuavo kuenda va kala omanu vamue va sokiyiwa ciwa. Embimbiliya li lekisa okuti, “akãi vongolokela ha va vumbila puvelo wombalaka yoku ñualẽhẽla la Yehova.” (Etundilo 38:8) Va Isareli va kuatelevo olonumbi vi lekisa ndomo va laikele oku enda kovitumãlo vikuavo kuenda ndomo va ponduile oku ambata otavernakulu lonjila yimue ya sokiyiwa. Noke, Soma Daviti wa sokiya ovitunda kuenda va Lewi oco va linge ovopange vonembele. (1 Asapulo 23:1-6; 24:1-3) Eci va Isareli va enda oku pokola ku Yehova eye wa enda oku va sumũlũisa. Ovo va kala omanu vamue va sokiyiwa ciwa okuti va kuata ombembua kuenda va likuatele omunga.​—Esinumuĩlo 11:26, 27; 28:1-14.

9. Akongelo kocita catete a sokiyiwile ndati?

⁹ Ekongelo lio kocita catete lia sokiyiwilevo ciwa. Kua kalavo Osungu Yakulu, okuti ocimunga cimue calume va enda oku eca olonumbi vakongelo. Catete ocimunga caco ca kala covapostolo. Noke, kua vokiyiwa akulu vakuavo. (Ovilinga 6:1-6; 15:6) Yehova wa songuila omanu vatiamelẽle kosungu yakulu kuenda omanu vakuavo va kala oku talavaya kumue lavo oco va sonehe ovikanda vialungulo kuenda olonumbi, oco vi eciwe kakongelo. (1 Timoteo 3:1-13; Tito 1:5-9) Akongelo a kuatisiwa ndati poku kuama olonumbi via tunda kosungu yakulu?

10. Akongelo kocita catete va kuatisiwa ndati omo lioku kuama olonumbi viosungu yakulu? (Tala ociluvialuvia kefetikilo liocipama.)

¹⁰ Tanga Ovilinga 16:4, 5. Kocita catete, vamanji vamue va enda oku nyula akongelo, oco ‘va pitiye olonumbi via sokiyiwa lovapostolo kuenda akulu vo Yerusalãi’ okuti, via tunda kosungu yakulu. Akongelo va kuama olonumbi viaco, kuenda “va amamako oku pamisiwa vekolelo loku livokiya eteke leteke.” Koloneke vilo, oku kuama ongangu yaco ci pondola oku tu kuatisa ndati vakongelo etu?

11. Nye akulu vekongelo kuenda olonuatisi viekongelo va sukila oku linga eci va tambula olonumbi vi tunda vocisoko ca Yehova Suku?

¹¹ Vamanji va panga onepa Kocisoko Cakulu vo ko Betele, ale vana va panga onepa Kocisoko Cakulu Vofeka, va manji va nyula akongelo kuenda akulu vekongelo, va sukila oku pokola kolonumbi via siata oku tunda kocisoko ca Yehova Suku. Elivulu liaye li tu sapuila okuti tu sukila oku pokola komanu vana va tu songuila. (Esinumuĩlo 30:16; Va Heveru 13:7, 17) Omanu vana va kolela Yehova ka va lekisa esino kuenda va likolisilako oku pokola kolonumbi va tambula. Ka tu yongola oku setukula ongangu ya Deotrefe  okuti, ka pokuile ku vamanji va kala oku songola ekongelo. (Tanga 3 Yoano 9, 10.) Eci tu kapako olonumbi tu tambula, tu ka kuatisa ekongelo oku kuata ombembua kuenda oku likuata omunga. Tu pondola oku lipula ndoco: ‘Anga hẽ nda siata oku vetiya vamanji oco va kolele ku Yehova? Nda siata hẽ oku kapako lonjanga olonumbi via siata oku tunda vociso ca Yehova Suku?’

12. Akulu vekongelo kuenda olonuatisi viekongelo va siata oku nõliwa ndati?

¹² Vanyamo a sulako, Osungu Yolombangi Via Yehova ya linga apongoloko konjila ndomo ku nõliwa akulu vekongelo kuenda oloñuatisi viekongelo. Utala Wondavululi 15 ya Kuvala wo 2014 Kelimi Lioputu kocipama losapi hati: “Apulilo a Lingiwa la Vakuakutanga,” u lombolola okuti kocita catete, osungu yakulu ya eca ku vamanji va nyula akongelo ocikele coku nõla vamanji oco va linge akulu vekongelo kuenda oloñuatisi viekongelo. Kosãi Yenyenye Linene wo 2014, akulu va nyula akongelo va fetika oku linga upange waco. Eci akulu vekongelo va ñola manji umue oco a linge ukulu wekongelo ale oñuatisi yekongelo, manji ukuakunyula akongelo o sanda onjila yoku kũlĩha ciwa manji yaco kuenda epata liaye. Citava okuti, eye o talavaya la manji yaco kupange woku kunda. (1 Timoteo 3:4, 5) Manji ukuakunyula akongelo wa siata oku liongolola lakulu venkongelo. Ovo va konomuisa lutate ovisonhua vi lekisa ovituwa akulu vekongelo kuenda oloñuatisi viekongelo va sukila oku kuata.​—1 Timoteo 3:1-10, 12, 13; 1 Petulu 5:1-3.

13. Tu pondola oku lekisa ndati okuti tu tava kolonumbi tu tambula kakulu vekongelo?

¹³ Akulu vekongelo va siata oku tu ĩha olonumbi lekuatiso Liembimbiliya, momo ovo va yongola oku teyuila kuenda oku tata ekongelo. Tu sukila oku pokola kokuavo, momo olonumbi viaco vi pondola oku tu kuatisa. (1 Timoteo 6:3) Kocita catete, omanu vamue va fetika oku lekisa ‘esino.’ Ovo ka va kaile oku kuatisa ekongelo pole, va enda oku li tenga kekalo liomuenyo womanu vakuavo. Akulu vekongelo va sanda onjila yoku va lungula pole, ovo ka va tavele kalungulo aco. Paulu wa lombolola ndomo omunu waco a sukila oku tatiwa. Eye wa popia hati: “Lavululi omunu waco kuenda ko ka kuati ukamba laye.” Ovo va sukilile oku liwekapo oku kuata ukamba lomunu waco pole, ka ca tavele oku u tata ndunyãli. (2 Va Tesalonike 3:11-15) Akulu vekongelo koloneke vilo, va siata oku likolisilako oku kuatisa omunu una ka tava oku kapako olonumbi via Suku, ndeci omunu o namulãla lomunu ka fendela Yehova. (1 Va Korindo 7:39) Nda omunu ka tava oku pongolola ekalo liomuenyo waye, akulu vekongelo va sukila oku ñolapo oku linga ohundo yimue yi lombolola ndomo ocituwa caco ci pondola oku vetiya omanu oku popia lãvi ekongelo. Nda akulu vekongelo va nõlapo oku linga ohundo yaco, otenda ndati esokiyo liaco? Nda wa kũlĩha omunu waco anga hẽ o ka liwekapo oku kuata ukamba laye? Nda wa ñolapo  onjila yaco, o pondola oku u kuatisa oco a limbuke okuti ekalo liomuenyo waye ka lia sungulukile kuenda li sumuisa Yehova, kuenje citava okuti, o pongolola ekalo liomuenyo waye. ^[1]​—Tala etosi kesulilo liocipama.

14. Tu pondola oku kuatisa ndati ekongelo oco liamameko oku yelisiwa?

¹⁴ Embimbiliya li tu sapuila eci vosi yetu tu sukila oku linga oco ka tu ka eceleli ovina via vĩha vekongelo. Tu konomuisi ovina via pita ko Korindo. Paulu wa solele calua vamanji va kala volupale luaco. Eye wa kuatisa omanu valua pokati kavo oco va lilongise ocili Covisonehua. (1 Va Korindo 1:1, 2) Sokolola, esumuo eye a yeva eci a limbuka okuti, umue pokati kavo wa kala oku linga evĩho liukahonga kuenda vamanji va kala oku ecelela okuti omunu waco amamako oku kala vekongelo! Paulu wa sapuila akulu vekongelo hati, “Omunu waco vu sukila oku weca ku Satana.” Ovo va sukilile oku tundisa omunu waco vekongelo. (1 Va Korindo 5:1, 5–7, 12) Koloneke vilo, citava okuti akulu vekongelo va nõlapo oku tundisa omunu umue nda okuti wa linga ekandu linene kuenda ka yongola oku likekembela. Nda omunu waco wa tundisiwa, anga hẽ tu u tata ndomo ca lekisiwa Vovisonehua? Nda tua ci linga, tu kuatisa ekongelo oco li yelisiwe. Tu sukila oku kuatisa omunu waco oco a limbuke okuti o sukila oku li kekembela kuenda oku pinga ongecelo ku Yehova.

15. Tu pondola oku amamako ndati lombembua vekongelo?

¹⁵ Ko Korindo kua kala ocitangi cikuavo. Momo vamanji vamue va enda oku tuala vamanji vakuavo kombonge. Omo liaco, Paulo wa va pulisa hati: “Momo lie ka vu ecelelela okuti vu lingiwa lãvi?” (1 Va Korindo 6:1-8) Koloneke vilo, vamanji vamue vakongelo va linga olomĩlo la vamanji vakuavo pole, noke va limbuka okuti va kembiwa la vamanji vaco. Omo liaco, va siata oku tuala ocitangi caco kombonge. Pole, eci omanu va limbuka ovina viaco, va siata oku popia ovina vĩvi viatiamẽla kafedeli va Yehova. Ovina viaco vi pondola oku nena ovitangi vekongelo. Elivulu lia Suku li pondola oku tu kuatisa oku limbuka okuti, tu sukila oku amamako oku kuata ombembua la vamanji ndaño okuti ka va yongola oku feta olombongo va tu levala. ^[2] (Tala etosi kesulilo liocipama.) Yesu wa tu longisa ndomo tu pondola oku potolola ovitangi. (Tanga Mateo 5:23, 24; 18:15-17.) Eci tu kapako onumbi yaco, tu amamako oku kuata ombembua kuenda tu kuata omunga vekongelo.

16. Momo lie afendeli va Suku va li kuetele omunga?

¹⁶ Elivulu lia Yehova li tu sapuila hati: “Tali omo ciwa cimue, ca posoka muẽle, nda  ava vasitue va tunga pamosi lombembua!” (Osamo 133:1) Eci va Isareli va enda oku pokola ku Yehova, va enda oku sokiyiwa ciwa kuenda oku likuata omunga. Suku wa popia eci catiamẽla komanu vaye hati: “Ndi va kapa pamuamue ndolomeme vocunda.” (Mika 2:12) Yehova wa popiavo okuti, afendeli vaye va sukilile oku lilongisa ocili ci sangiwa Vembimbiliya loku likuata omunga poku u fendela. Eye wa popia hati: “Kotembo yaco mongolola upopi womanu, ho pui esanda, okuti vosi yavo oco va vilikiya onduko ya Yehova, loku u vumba lutima umuamue.” (Sofoniya 3:9) Omo liaco, tu eca olopandu ku Yehova omo okuti tu pondola oku likuata omunga poku u fendela!

17. Nye akulu vekongelo va sukila oku linga nda manji umue vekongelo wa linga ekandu limue linene?

¹⁷ Nda manji umue wa linga ekandu limue linene, akulu vekongelo va sukila oku u kuatisa lonjanga pole, va sukila oku ci linga locisola. Ovo va kũlĩha okuti, Yehova o yongola okuti, va teyuila ekongelo kovina vĩvi kuenda oku amamako oku yelisiwa loku likuata omunga. (Olosapo 15:3) Paulu wa solele calua vamanji vo ko Korindo, ndomo tu pondola oku ci tanga kukanda waye watete a tumisa kokuavo. Tua kũlĩha okuti, akulu vekongelo vo kotembo ya Paulu va kuama lonjanga olonumbi viaye momo, noke liolosãi vimue, eye wa va pandiya eci a va sonehela ukanda waye wavali. Omo liaco, nda manji umue “wa linga ekandu limue,” akulu vekongelo va sukila oku kuatisa manji yaco lonjila yimue ya sunguluka.​—Va Galatia 6:1.

18. (a) Oku songuiwa londaka ya Suku ca kuatisa ndati ekongelo liokocita catete? (b) Nye tu ka lilongisa vocipama cikuãimo?

¹⁸ Ocili okuti, eci Akristão vo kocita catete va kuama olonumbi Vielivulu lia Suku, akongelo a enda oku yelisiwa, va kuata ombembua kuenda va likuatele omunga. (1 Va Korindo 1:10; Va Efeso 4:11-13; 1 Petulu 3:8) Poku ci linga, vamanji va tẽla oku kundila olondaka viwa “komanu vosi va kasi vemehi lilu.” (Va Kolosai 1:23) Koloneke vilo, afendeli va Yehova va likuetele omunga, kuenda va sokiyiwa ciwa oco va kundile olondaka viwa voluali luosi. Vocipama cikuãimo tu ka lilongisa vali ovolandu akuavo a lekisa okuti a fendeli va Ñala Yehova va yongola oku eca esivayo kokuaye poku kapako olonumbi vi sangiwa Velivulu liaye okuti, Embimbiliya.​—Osamo 71:15, 16.