1-2. Ndomo ca tangiwa kukanda 1 Timoteo 6:20, nye ca kundikiwile ku Timoteo?

OLONJANJA vimue tua siata oku eca ovina vietu ku vakuetu oco va vi tate. Handi vali, tua siata oku soleka olombongo vietu kombango. Eci tu ci linga tu lavoka okuti olombongo vietu vi solekiwa ciwa kuenda ka vi nyelela, ale oku nyaniwa. Cilo, tu kuete elomboloko lieci ci lomboloka oku solekisa komunu umue ovina vina vi kuete esilivilo.

² Tanga 1 Timoteo 6:20. Upostolo Paulu wa ivaluisa Timoteo okuti wa tambula ocina cimue ca kuatele esilivilo okuti, ukũlĩhĩso wocipango ca Suku catiamẽla komanu. Yehova wa kundikavo Timoteo ocikele coku “kunda ondaka” kuenda coku “linga upange wukundi.” (2 Tim. 4:2, 5) Paulu wa sapuila Timoteo oku lava eci co kundikiwa. Ndeci Timoteo, etu tua kundikiwavo ovina via velapo. Vipi ovina viaco? Momo lie tu sukilila oku lava ovina Yehova a siata oku tu ĩha?

3-4. Asunga api a lekisa okuti ocili Cembimbiliya ca velapo?

³ Yehova locisola caye wa tu ĩha ukũlĩhĩso wocili una wa velapo u sangiwa Vondaka yaye, Embimbiliya. Ukũlĩhĩso waco wa velapo, momo u tu longisa ndomo tu pondola oku kuata ukamba uwa la Yehova kuenda u tu sapuila eci ci tu nenela esanju komuenyo. Eci tu tava kocili caco kuenda tu ambata omuenyo u likuata locili, tu yovuiwa kupika walongiso esanda kuenda wovituwa ka via sungulukile.—1 Va Kor. 6:9-11.

⁴ Esunga likuavo lia velapo lieci ocili ci sangiwa Vondaka ya Suku ci kuetele esilivilo, lieli okuti Yehova wa situlula lika ocili caco komanu vana okuti ‘vakuotima wa sunguluka.’ (Ovil.  13:48) Omanu vaco vakuotima wa sunguluka, va tava okuti ukuenje wa kolelua haeye wa lunguka o tu longisa ovina via kunamẽla Vembimbiliya koloneke vilo. (Mat. 11:25; 24:45) Ka tu pondola oku lilongisa ocili caco lika lietu kuenda ka kuli eci ca velapo okuti oku kuata elomboloko liocili ci sule.—Olosap. 3:13, 15.

5. Upange upi Yehova a kundika kokuetu?

⁵ Yehova wa tu kundika upange woku longisa omanu ocili catiamẽla kokuaye kuenda kocipango caye. (Mat. 24:14) Esapulo lia Yehova tu kunda, lia velapo momo li kuatisa omanu oku tiamẽla kepata liaye kuenda lieca epuluvi kokuavo oco va kuate omuenyo ko pui. (1 Tim. 4:16) Cikale okuti tu kuete epondolo lioku kunda calua, ale sio, tu kasi oku kuatisa kupange wa velapo u kasi oku lingiwa koloneke vilo. (1 Tim. 2:3, 4) Esumũlũho linene oku kala ondingupange kumue la Suku!—1 Va Kor. 3:9.

6. Nye ca pita la vamue ka va tẽlele oku lavulula?

⁶ Koloneke via Timoteo, Akristão vamue ka va kapeleko esumũlũho va kuata lioku kala ondingupange kumue la Suku. Dema omo lioku sola oluali lulo, eye wa siapo ocikele caye coku talavaya kumue la Paulu. (2 Tim. 4:10) Fungelo, la Hermogene va siapo ocikele cavo momo va kala lusumba woku lambalaliwa, ndeci ca pita la Paulu. (2 Tim. 1:15) Humeneo, Alexandro la Filetu, va linga olonanguluke kuenje va siapo ocili. (1 Tim. 1:19, 20; 2 Tim. 2:16-18) Omanu vosi ava va pamele kespiritu, pole, va liwekapo oku sokolola okuti ocili ci kuete esilivilo.

7. Oloseteko vipi Satana a siata oku tu kapela?

⁷ Satana wa siata oku tu seteka ndati oco tu liwekepo oku linga upange Yehova a tu kundika? Kũlĩhĩsa oloseteko vimue via Satana. Eye o kuama ovitalukilo kuenda ovingungu viasapulo oco ovisimĩlo vietu lekalo lietu, vi tu yapule kamue kamue koku sola Yehova kuenda oku pokola kolonumbi viaye. Eye o seteka oku tu kokela usumba lelambalalo li tunda komanu, oco tu liwekepo oku kunda. Handi vali, eye o tu vetiya oku yevelela “‘ukũlĩhĩso’ wesanda” wolonanguluke oco tu siepo ocili.—1 Tim. 6:20, 21.

8. Nye tu lilongisa kulandu wa manji umue o tukuiwa hati, Daniel?

⁸ Nda ka tua kuatele utate, kamue kamue tu pondola oku siapo ocili. Sokolola kulandu wa manji umue o tukuiwa Daniel, * okuti wa solaile calua ovideo games. Eye wa lombolola hati: “Eci nda fetika oku imba ovideo games nda kuatele lika anyamo ekũi. Kefetikilo nda enda oku kuama olomapalo via sunguluka.  Pole, noke kamue kamue nda fetika oku imba ovideo games yina okuti yi lekisa ungangala kuenda ovina viatiamẽla kolondele.” Vokuenda kuotembo, eye wa enda oku pesela ci soka ekũi latãlo kolowola veteke oku imba ovideo games. Manji Daniel wa popia hati, “Nda kũlĩhĩle okuti olovideo games nda enda oku imba, lotembo nda enda oku pesela, via kala oku tepulula ukamba wange la Yehova. Noke nda limbuka okuti, sia kaile oku kapako olonumbi Viembimbiliya.” Nda ka tua kuatele utate, ovitalukilo vi pondola oku tu yapuisa vocili. Nda oco ca pita letu, tu pondola oku pumba ovina vi kuete esilivilo Yehova a siata oku tu ĩha.

9. Ndomo ca tangiwa kukanda 1 Timoteo 1:18, 19, Paulu wa sokisa le Timoteo?

⁹ Tanga 1 Timoteo 1:18, 19. Paulu wa sokisa Timoteo lesualãli limue kuenda wo vetiya oku “yaka uyaki uwa.” Paulu ka kalele oku tukula uyaki u lingiwa lasualãli vomanu pole, wespiritu. Ndamupi Akristão va sokisiwa ndasualãli va kasi oku linga uyaki? Ovituwa vipi tu sukila oku lekisa ndasualãli va Kristu? Tu konomuisi ovolandu atãlo tu pondola oku lilongisa kocindekaise ca Paulu. Ovolandu aco, a pondola oku tu kuatisa oku kakatela kocili.

10. Oku sumbila Suku ci lomboloka nye kuenda momo lie ci sukiliwila?

¹⁰ Ovituwa vi lekisa okuti wa sumbila Suku. Esualãli limue liwa lia koleliwa. Olio li likolisilako oku yaka oco li teyuile omunu umue eye a sole ale ocina cimue ci kuete esilivilo kokuaye. Paulu wa vetiya Timoteo oco a lekise ovituwa vioku sumbila Suku okuti, oku kala ukuacili ku Suku. (1 Tim. 4:7) Osimbu tu amamako oku sola loku sumbila Suku, onjongole yetu yoku kakatela kocili yi livokiya.—1 Tim. 4:8-10; 6:6.

11. Momo lie tu sukilila oku lipindisa etu muẽle?

¹¹ Lipindisa ove muẽle oku linga eci ca sunguluka. Esualãli limue li sukila oku lipindisa oco li lipongiyile uyaki. Timoteo wamamako oku pama kespiritu momo eye wa kuama elungulo lia Paulu lioku tila oloñeyi vĩvi, oco a kuate ovituwa viwa loku pita otembo Lakristão vakuavo. (2 Tim. 2:22) Oco ci tẽliwe ci sukila oku lipindisa. Tu sukila oku lipindisa oco tu yule uyaki woloñeyi vietu vietimba. (Va Rom. 7:21-25) Handi vali, tu sukila oku lipindisa oco tu amameko oku lula omunu wosimbu loku wala omunu wokaliye. (Va Efe. 4:22, 24) Kuenje vokuenda kuesulilo lieteke okuti tua kava, pamue tu sukila oku likolisilako oku enda kohongele.—Va Hev. 10:24, 25.

12. Kolonepa vipi tu pondola oku mioñoloha poku talavaya Lembimbiliya?

¹² Esualãli limue li sukila oku lilongisa oku talavaya lovimalẽho viaye. Oco li loñolohe olio li sukila oku ci linga olonjanja viosi. Cimuamue haico okuti, tu sukila oku loñoloha koku talavaya Londaka ya Suku. (2 Tim. 2:15) Tu pondola oku lilongisa ovoloño amue kolohongele vietu. Pole, nda tu yongola oku kuatisa vakuetu oco va kolelevo okuti ocili Cembimbiliya ci va kuatisa, tu sukila oku lilongisa Embimbiliya olonjanja viosi. Tu sukila oku talavaya Londaka ya Suku oco tu pamise ekolelo lietu. Eci ci lomboloka okuti ka tu tangi lika Embimbiliya. Tu sukila oku sokolola kovina tua tanga loku linga akonomuiso valivulu etu oco tu kuate elomboloko liasuapo loku kapako Ovisonehua. (1 Tim. 4:13-15) Kuenje tu ka tẽla oku talavaya Londaka ya Suku oco tu longise omanu. Eci ci lomboloka okuti ka tu va tangela lika ovinimbu Viembimbiliya. Tu yongola oku kuatisa olonjeveleli vietu oku kuata elomboloko liocinimbu kuenda ndomo va ci kapako. Poku likolisilako oku lilongisa Embimbiliya  olonjanja viosi, tu pondola oku kala a longisi vawa Vembimbiliya.—2 Tim. 3:16, 17.

13. Ndomo ca tangiwa kukanda ku Va Heveru 5:14, momo lie tu sukilila oku lekisa olondunge?

¹³ Lekisa olondunge. Esualãli limue li sukila oku kũlĩha ohele yi keya kovaso loku yi yuvula. Etu tu sukilavo oku lilongisa oku limbuka ovitangi vi pondola oku tu kokela ohele loku vi yuvula. (Olosap. 22:3; tanga Va Heveru 5:14.) Ndeci, tu sukila oku nõla lolondunge olomapalo vietu kuenda ovitalukilo. Otelevisãu olonjanja vialua yi lekisa olofilme kuenda ovitalukilo via vĩha. Evĩho liaco li sumuisa Suku kuenda li koka ohele. Tu sukila oku yuvula olomapalo viaco momo kamue kamue vi pondola oku tepulula ocisola tu kuetele Suku.—Va Efe. 5:5, 6.

14. Olondunge via kuatisa ndati manji Daniel?

¹⁴ Manji Daniel wa tukuiwa kefetikilo, wa fetika oku limbuka okuti olovideo games vina vi lekisa ungangala kuenda olondele via kala ocitangi. Eye wa linga akonomuiso vo Watchtower Library oco a sange ovolandu o kuatisa oku liyaka locitangi caye. Co kuatisa ndati? Eye wa liwekapo oku imba olovideo games ka via sungulukile. Eye wa liwekapo oku iñila vonumbi yaco loku yuvula oku li kongela la vana va enda oku imba kumue laye. Manji Daniel wa popia hati, “Otembo nda enda oku pesila koku imba ovideo games, nda yi piñainya loku linga ovina vikuavo kuenda oku li kongela lakamba va kasi vekongelo.” Cilo manji Daniel o kasi oku talavaya ndukundi wotembo yosi kuenda ndukulu wekongelo.

15. Ohele yipi yi tunda kovolandu uhembi?

¹⁵ Ndeci Timoteo, tu sukilavo oku limbuka ohele yasapulo esanda a sandekiwa lolonanguluke. (1 Tim. 4:1, 7; 2 Tim. 2:16) Ndeci, ovo va seteka oku sandeka ovolandu esanda atiamẽla ku vamanjetu ale oku koka atatahãi atiamẽla kocisoko ca Yehova. Asapulo aco a pondola oku honguisa ekolelo lietu. Tu sukila oku yuvula oku tava kovohembi aco. Momo lie? Momo ovolandu aco a sandekiwa “lomanu vana vakuavitima via vĩha, haivo ka va kuete elomboloko liocili.” Ocimãho cavo oku fetika ‘umamõhe loku lipatãla lolondaka.’ (1 Tim. 6:4, 5) Ovo va yongola okuti tu tava kalundi avo loku kuata ovisimĩlo ka via sungulukile viatiamẽla ku vamanjetu.

16. Kovina vipi tu sukila oku tiamisila utima?

¹⁶ Amamako oku lavulula. “Ndesualali liwa  lia Kristu Yesu,” Timoteo wa sukilile oku tiamisila utima kupange woku kunda okuti ka yapuisiwa lovina vikuavo. (2 Tim. 2:3, 4) Ndeci Timoteo, ka tu ka eceleli oku yapuisiwa lolonjongole vioku kuata ovokuasi. ‘Ovokuasi a totomisa’ a pondola oku tepulula ocisola tu kuetele Yehova, olopandu tu lekisa Kondaka ya Suku kuenda onjongole yetu yoku sapuilako omanu vakuavo. (Mat. 13:22) Tu sukila oku amamako oku ambata omuenyo umue wa leluka, oku talavaya lotembo yetu kuenda ongusu yetu poku ‘amamako oku sandiliya tete Usoma.’—Mat. 6:22-25, 33.

17-18. Nye tu sukila oku linga oco tu teyuile ukamba wetu la Yehova?

¹⁷ Lipongiya oco o lekise ocituwa conjanga. Esualãli limue li sukila oku liangiliya oco a linge ovina vi pondola oku u teyuila. Oco tu teyuile ovina Yehova a tu kundika, tu sukila oku liangiliya lonjanga eci tu mola ohele. Nye ci tu kuatisa oku ci linga? Tu sukila oku lipongiya selo ndomo tu litunda kocitangi cimue.

¹⁸ Ndocindekaise, eci tu kasi kocipito cimue, omanu va vetiyiwa oku sandiliya ocitumãlo cimue coku tundila ci kasi ocipepi osimbu ocipito caco ka ca fetikile. Momo lie? Oco ci va ecelele oku tunda lonjanga eci ku molẽha ocitangi cimue. Cimuamue haico okuti, tu sukila oku lipongiyila ovina tu ka linga nda vocipikipiki tu mola omanu va kasi epõlõla, ovina vi lekisa ungangala, asapulo olonanguluke vo internet ale osimbu tu tala ofilme kuenda ocipama cimue vo televisãu. Nda tua lipongiyila ovina vi pondola oku pita, tu ka lekisa onjanga oco tu teyuile ukamba wetu la Yehova kuenda oku amamako oku yela kovaso aye.—Osa. 101:3; 1 Tim. 4:12.

19. Asumũlũho api tu ka kuata nda tua lava ciwa ovina viwa Yehova a siata oku tu ĩha?

¹⁹ Tu sukila oku lava ovina vi kuete esilivilo Yehova a siata oku tu ĩha okuti, alongiso ocili a sangiwa Vembimbiliya kuenda esumũlũho lioku longisa ocili caco komanu vakuavo. Poku ci linga tu ka kuata utima wa yela, omuenyo wocili kuenda oku sanjukila oku kuatisa omanu vakuavo oco va kũlĩhe Yehova. Lekuatiso liaye, tu ka tẽla oku lava ovina a tu kundika. —1 Tim. 6:12, 19.