1. Momo lie tu sukilila oku lipongiyila alambalalo?

KUTEKE wa sulako osimbu Ñala Yesu ka file, wa popia okuti vosi vana va yongola oku kala olondonge viaye, va laikele oku suvukiwa. (Yoa. 17:14) Oku upisa opo toke cilo, Olombangi via Yehova vakuekolelo, via siata oku lambalaliwa lomanu vana ka va sole ocili. (2 Tim. 3:12) Osimbu tu panda kesulilo lioluali lulo, ovanyali vetu va ka amamako oku tu suvuka.—Mat. 24:9.

2-3. (a) Nye tu sukila oku limbuka catiamẽla kusumba? (b) Nye tu lilongisa vocipama cilo?

² Tu lipongiya ndati cilo, oco tu tẽle oku liyaka lalambalalo? Tu sukila oku yuvula oku sokolola kovina viosi vĩvi vi ka pita letu. Nda tua ci linga, ka tu ka kuata usumba, ale asakalalo. Handi vali, nda tua sokolola kovina vĩvi vi pondola oku pita letu, tu fetika oku hongua kuenje tu liwekapo oku vumba Yehova osimbu ovitangi viaco handi ka vieyile. (Olosap. 12:25; 17:22) Usumba onjanjo yimue ‘unyali wetu Eliapu’ a siata oku kuama oco a tu yapuise. (1 Pet. 5:8, 9) Nye tu sukila oku linga cilo, oco tu pandikise kalambalalo?

³ Vocipama cilo, tu lilongisa ndomo tu pamisa ukamba wetu la Yehova kuenda esunga lieci ci kuetele esilivilo oku ci linga cilo. Tu ka lilongisavo eci tu sukila oku linga, oco tu vokiye utõi wetu. Oku sulako, tu konomuisa ndomo tu pondola oku liyaka lesuvu liomanu vana va tu suvuka.

4. Ndomo ca tangiwa ku va Heveru 13:5, 6, ekolelo lipi tu kuete, kuenda momo lie?

⁴ Limbuka okuti Yehova oku sole kuenda lalimue eteke a ka ku yanduluka. (Tanga Va Heveru 13:5, 6.) Anyamo alua  konyima, Utala Wondavululi wa popele hati: “Omunu wa kũlĩha ciwa Suku, o kolela kokuaye ndaño kotembo yalambalalo.” Eci ocili muele! Oco tu tẽle oku liyaka lalambalalo, tu sukila oku sola loku kolela Yehova lutima wosi kuenda lalimue eteke ka tu ka kuati atatahãi okuti Yehova o tu sole calua.—Mat. 22:36-38; Tia. 5:11.

5. Nye ci ka ku kuatisa oku limbuka ocisola Yehova a ku kuetele?

⁵ Tanga Embimbiliya eteke leteke locimãho coku kuata ukamba wa pama la Yehova. (Tia. 4:8) Osimbu o tanga, sokolola kovituwa via Yehova. Handi vali, kuata elomboloko liocisola a ku kuetele, lovina a popia levi a linga. (Etu. 34:6) Vamue ka va tava okuti Suku o va sole, omo okuti ka va tatiwile locisola. Nda wa siata oku sokolola ndoco, ivaluka olonjanja Yehova a lekisa ohenda locisola kokuove. (Osa. 78:38, 39; Va Rom. 8:32) Osimbu o konomuisa ekalo liove loku sokolola kovina wa siata oku tanga Vembimbiliya, o ka limbuka okuti Yehova wa ku lingila ale ovina vialua. Nda wa lekisa olopandu kovina Yehova a ku lingila, ukamba wove laye u ka pamisiwa.—Osa. 116:1, 2.

6. Ndomo ca tangiwa Kosamo 94:17-19, ohutililo yutima wosi yu ku kuatisa ndati?

⁶ Likutilila oloneke viosi. Sokolola omõla umue ukuenje, o soliwe calua la isiaye. Omõlaco, o liyeva okuti wa kolapo poku vangula la isiaye catiamẽla kovina viwa kuenda kovina vĩvi via lipita laye vokuenda kueteke. Ove o pondolavo oku kolapo, nda wa pamisa ukamba wove la Yehova poku likutilila kokuaye eteke leteke lutima wosi. (Tanga Osamo 94:17-19.) Eci o likutilila ku Yehova ‘esumuo liutima wove li pita ndetande’ kuenda sapuila ku Isiove ukuacisola catiamẽla kusumba wove kuenda asakalalo. (Asiõ. 2:19) Onima yipi o ka kuata? Embimbiliya li popia okuti o kuata “ombembua ya Suku yina ya piãla olondunge viosi.” (Va Fil. 4:6, 7) Osimbu amamako oku likutilila, o ka limbuka okuti ukamba wove la Yehova wa kolapo.—Va Rom. 8:38, 39.

7. Momo lie tu kolelela okuti olohuminyo via Suku viatiamẽla Kusoma waye vi ka tẽlisiwa ocili?

⁷ Kolela okuti asumũlũho Usoma wa Suku a ka tẽlisiwa ocili. (Ate. 23:19) Nda kua kolelele okuti olohuminyo via Suku vi ka tẽlisiwa ocili, ci ka leluka ku Satana kumue loluali luaye oku ku yapuisa. (Olosap. 24:10; Va Hev. 2:15) Cilo, o pondola oku pamisa ndati ekolelo liove Kusoma wa Suku? Sokiya otembo yoku linga akonomuiso atiamẽla kolohuminyo via Suku, Kusoma waye kuenda esunga lieci o sukila oku kolela okuti olohuminyo viaco vi ka tẽlisiwa ocili. Eci ci ku kuatisa ndati? Kũlĩhĩsa ulandu wa manji Stanley Jones, wa kala vokayike anyamo  epanduvali omo liekolelo liaye. * Nye co kuatisa oku pandikisa lekolelo? Eye hati: “Ekolelo liange lia pamele calua omo lioku kũlĩha eci catiamẽla Kusoma wa Suku kuenda ovina owo u ka tẽlisa okuti lalimue eteke nda ci tatãlele kuenje lomue wa ponduile oku ndi tindula ku Yehova.” Nda ekolelo liove kolohuminyo via Yehova lia pama, ukamba wove laye u ka kolapo kuenda o ka yuvula usumba.—Olosap. 3:25, 26.

8. Ocituwa cetu coku endaenda kolohongele ci lekisa nye? Ci lolombolola.

⁸ Amamako oku endaenda kolohongele Viakristão. Olohongele vi tu kuatisa oku pamisa ukamba wetu la Yehova. Ocituwa cetu coku endaenda kolohongele onjila yimue yiwa yoku lipongiyila alambalalo a laika okuiya. (Va Hev. 10:24, 25) Momo lie tu ci popela? Nda cilo tua ecelela okuti ovina vitito vi tu tateka oku endaenda kolohongele, nye ci popiwa eci tu ka kala vesipato okuti ci tĩla oku lisanga la vamanji? Pole, nda tua kakatela oku endaenda kolohongele, ka tu ka liwekapo eci ovanyali va ka seteka oku imũla olohongele vietu. Yilo oyo otembo yoku vokiya ombili yetu yoku endaenda kolohongele. Nda tu kuete ombili yoku endaenda kolohongele, ndaño ceci ovanyali vetu, ale pamue olombiali vi seteka oku imũla efendelo lietu, tu amamako oku pokola ku Suku, komanu hakoko.—Ovil. 5:29.

9. Momo lie oku patekela ovisonehua onjila yimue yiwa yoku lipongiyila alambalalo?

⁹ Patekela ovisonehua vina o sole calua. (Mat. 13:52) Ocili okuti ka tua lipuile, pole, Yehova pocakati cespiritu sandu liaye, o tu kuatisa oku ivaluka ovisonehua tua tanga. (Yoa. 14:26) Tu kũlĩhĩsi ulandu wa manji umue wa kala vokayike Kutundilo wofeka yo Alemanya okuti wa kapiwile vohondo yimue likaliaye. Eye wa popia hati: “Nda kuata esanju lialua omo okuti nda patekela ovisonehua vialua! Oloneke viosi nda kala vokayike, ndaenda oku sokolola kovisonhua vialua via litepa.” Ovisonehua viaco, via kuatisa manji oku pamisa ukamba waye la Yehova kuenda oku pandikisa lekolelo.

10. Momo lie tu sukilila oku patekela ovisungo?

¹⁰ Imba ovisungo vi sivaya Yehova loku vi patekela. Eci Paulu la Sila va kala vokayike  ko Filipu va sivaya Yehova lovisungo vina ovo va patekelele. (Ovil. 16:25) Eci vamanjetu va kala ko União Sovietika vokayike ko Siberia, va pamisiwa ndati? Manji Mariya Fedun, wa popia hati: “Etu tua imba ovisungo viosi tua kũlĩhĩle velivulu liovisungo.” Eye wamisako hati, ovisungo viaco via va lembeleka kuenda via pamisa ukamba wavo la Yehova. Ove hẽ wa siatavo oku pamisiwa poku imba ovisungo o sole? Omo liaco, patekela ovisungo viaco!—Tanga okakasia losapi hati, “ Nyĩhe Utõi.”

11-12. (a) Ndomo ca tangiwa kelivulu lia 1 Samuele 17:37, 45-47, momo lie Daviti a lekisila utõi? (b) Ongangu yipi yiwa tu lilongisila ku Daviti?

¹¹ Oco tu pandikise kalambalalo, tu sukila oku kuata utõi. Nda o liyeva okuti ku kuete utõi, nye o sukila oku linga? Utõi wocili ka wa tambele kutunga, kongusu, ale kuloño wove. Sokolola ongangu ya Daviti okuti eci a kala umalẽhe wa liyaka la Goliata. Oku ci sokisa locindululu caco, Daviti wa kala umalẽhe calua kuenda ka kuatele ovimalẽho vioku yaka. Ndeci, Daviti ka kuatele osipata layimue. Ndaño ndoco, wa lekisa utõi walua. Eye wa liyaka locindululu.

¹² Nye ca kuatisa Daviti oku kuata utõi? Eye wa kũlĩhĩle okuti Yehova wa kala laye. (Tanga 1 Samuele 17:37, 45-47.) Daviti ka luluvalele kutunga wa Goliata, oku li sokisa laye. Pole, eye wa sokolola ndomo Goliata a kala utito kovaso a Yehova. Eci ci tu longisa nye? Ci tu longisa okuti tu pondola oku kuata utõi, nda tua kolela okuti Yehova o kasi letu kuenda oku sokolola okuti ovanyali vetu vatito, kovaso a Suku yetu, Ukuonene Wosi. (2 Asa. 20:15; Osa. 16:8) Tu pondola oku pamisa ndati utõi wetu cilo, osimbu alambalalo ka eyile?

13. Tu vokiya ndati utõi wetu? Ci lombolola.

¹³ Tu pondola oku vokiya utõi wetu poku kundila omanu olondaka viwa Viusoma wa Suku. Momo lie? Momo upange woku kunda u tu longisa oku kolela ku Yehova kuenda oku yuvula oku kuatela usumba omunu. (Olosap. 29:25) Ndeci etimba lietu li pamisiwa poku li pindisa, utõi wetu u pamisiwavo eci tu kunda konjo lanjo, povitumãlo pa sangiwa omanu valua, volokololo kuenda povitanda. Nda cilo tua lekisa utõi kupange woku kunda, tu amamako oku kunda ndaño ceci upange wetu u tatekiwa.—1 Va Tes. 2:1, 2.

14-15. Nye tu lilongisila kulandu wa vamanji Nancy Yuen kuenda Valentina Garnovskaya?

 ¹⁴ Tu lilongisa calua kongangu ya vamanji vavali akãi vakuekolelo okuti va lekisa utõi walua. Manji Nancy Yuen utunga waye wa kala umbumbulu calua ci soka (1, 5 kolometulu) pole, ka kuataile usumba lomunu laumue. * Eye ka tavele oku liwekapo oku kunda olondaka viwa Viusoma wa Suku. Omo liaco, wa kapiwa vokayike loku kalamo ci soka 20 kanyamo kofeka yo China. Akuenje velombe vana va kala oku u sombisa va popia hati, eye “ukualonamalala vialua.”

¹⁵ Cimuamue haico ca pita la manji Valentina Garnovskaya wa kala vokayike ko União Sovietika ci soka 21 kanyamo. * Momo lie? Momo eye wa amamako oku kunda kuenje akuenje velombe vo tukula hati, “omunu umue o koka ohele yalua.” Nye ca kuatisa vamanji ava vavali vakuekolelo oku lekisa utõi? Ovo va kolelele okuti Yehova wa kala lavo.

16. Tu pondola oku kuata ndati utõi wocili?

¹⁶ Ndomo tua ci konomuisa ale, oco tu kuate utõi ka ca tambele kutunga, kongusu, ale kuloño wetu. Pole, tu sukila oku kolela okuti Yehova o kasi letu kuenda eye lika o tu yakelako. (Esin. 1:29, 30; Sak. 4:6) Momo eye ono yutõi wocili.

17-18. Ndomo ca tangiwa kelivulu lia Yoano 15:18-21, elungulo lipi Yesu a tu ĩha? Ci lombolola.

¹⁷ Tu sanjuka poku mola okuti omanu va tu sumbila, pole, ka tu ka simi okuti nda omanu ka va tu sole, ka tu kuete esilivilo. Yesu wa popia hati: “Wa sumũlũhi ndaño omanu vo suvuki, vo tundisi kuenda vo sepuli loku tenda onduko yene okuti ya vĩha, mekonda lia Mõlomunu.” (Luka 6:22) Nye Yesu a yonguile oku popia?

¹⁸ Yesu ka popele okuti Akristão va sanjukila oku suvukiwa. Pole, eye wa kala oku eca  elungulo lieci ca laikele oku pita letu. Etu ka tu pangi onepa yoluali. Tu kuãi alongiso a Yesu kuenda tu kunda esapulo ndeli eye a kunda. Omo liaco, oluali lu tu suvuka. (Tanga Yoano 15:18-21.) Tu yongola oku sanjuisa Yehova. Nda okuti omanu va tu suvuka omo lioku sola Yehova, ka tu ka sumui.

19. Tu setukula ndati ongangu yovapostolo?

¹⁹ Lalimue eteke ku ka ecelele okuti eci omanu va popia, ale ceci va linga ci ku kokela osõi omo lioku kala Ombangi ya Yehova. (Mika 4:5) Tu pondola oku yula usumba womunu poku sokolola kueci ovapostolo ko Yerusalãi va linga noke liolofa via Yesu. Ovo va kũlĩhĩle ciwa okuti va suvukiwile lasongui vatavo va Yudea. (Ovil. 5:17, 18, 27, 28) Oloneke viosi, va amamako oku endaenda konembele oco va lekise okuti olondonge via Yesu omo lioku kunda. (Ovil. 5:42) Ovo ka va ecelele okuti usumba u va tateka. Tu pondolavo oku yuvula usumba womunu poku lisitulula okuti tu Lombangi Via Yehova, ndeci kupange, kosikola kuenda posongo.—Ovil. 4:29; Va Rom. 1:16.

20. Momo lie ovapostolo va sanjukilile ndaño va suvukiwa?

²⁰ Momo lie ovapostolo va sanjukilile? Momo va kũlĩhĩle esunga lieci va suvukiwila kuenje va ci tendele ndesumũlũho oku tatiwa lãvi omo lioku linga ocipango ca Yehova. (Luka 6:23; Ovil. 5:41) Upostolo Petulu wa soneha hati: “Nda vu talisiwa ohali omo lioku linga esunga, wa sumũlũhi.” (1 Pet. 2:19-21; 3:14) Eci tu limbuka okuti tua suvukiwa omo lioku linga esunga lalimue eteke ka tu ka liwekapo oku vumba Yehova omo lioku suvukiwa lomanu.

21-22. (a) Nye wa nõlapo oku linga oco o lipongiyile elambalalo? (b) Nye tu ka konomuisa vocipama cikuavo?

²¹ Etu ka tua kũlĩhĩle otembo alambalalo a ka fetika, ale ceci olombiali vi ka tateka efendelo lietu ku Yehova. Pole, tua kũlĩha okuti tu sukila oku lipongiya cilo poku pamisa ukamba wetu la Yehova, poku vokiya utõi wetu kuenda oku yuvula oku kuatela usumba omunu. Aliangiliyo tu linga cilo, a ka tu kuatisa oku pandikisa kovaso yoloneke.

²² Nye ci lingiwa cilo nda efendelo lietu lieya oku tatekiwa? Vocipama cikuavo tu ka konomuisa olonumbi vi ka tu kuatisa oku amamako oku vumba Yehova ndaño ceci efendelo lietu li tatekiwa.