1. Apongoloko api a lingiwa kovitumãlo vimue kanyamo a pita?

KANYAMO apita, omanu valua va tiamẽlele ketavo limue. Pole, vokuenda kuanyamo kueya oku pita epongoloko linene kovitumãlo vimue. Omanu valua ka va kuete etavo. Kolofeka vimue onepa yalua yomanu va popia okuti ka va tiamẽlele ketavo lalimue. *—Mat. 24:12.

2. Momo lie omanu valua ka va kuetele etavo?

² Momo lie etendelo lialua liomanu li popia okuti ka va tiamẽlele ketavo limue, li kasilili oku livokiya? * Momo vamue citava okuti va tiamisila lika utima koku sanda ovokuasi, ale kovitangi viavo muẽle. (Luka 8:14) Omanu vana va tiamẽlele ketavo limue, cilo ka va tava vali okuti kuli Suku. Vamue va tava okuti kuli Suku pole, va sima okuti etavo ka li kuatisa vali kuenda lilipatãla lelongiso liokuti ovina viatukulukaño. Ovo pamue vakuama olonumbi viakamba, vialongisi, ale ceci omidia yi popia okuti omuenyo watukulukaño, pole, ovo ka va yongola oku kapako olonumbi via sunguluka viokuti, kuli Suku. Handi vali, vakuavo ka va tava kasongui vetavo omo okuti asongui vaco va yongola lika olombongo kuenda ekemãlo. Kovitumãlo vimue olombiali vi tateka upange watavo.

3. Cipi ocimãho cocipama cilo?

³ Yesu wa tu handeleka oco tu ‘longise omanu vo kolofeka viosi oco va linge olondonge.’ (Mat. 28:19) Tu kuatisa ndati  omanu vana okuti ka va tiamẽlele ketavo limue, oku sola Suku loku linga olondonge via Kristu? Tu sukila oku limbuka okuti onjila ndomo omunu a tenda esapulo lietu, ca tamba lika kocitumãlo omunu a kulila. Ndeci, omanu vo ko Europa citava okuti ka va yevelela esapulo tu va kundila, osimbu okuti omanu vo ko Asia va pondola oku tu yevelela. Momo lie? Ko Europa omanu valua va kuete ukũlĩhiso umue wa tiamẽla Kembimbiliya kuenda va kũlĩha okuti Suku wa lulika ovina viosi. Pole, omanu vo ko Asia ka va kuete ukũlĩhiso walua, ale lacimue va kũlĩha catiamẽla Kembimbiliya kuenda ka va tava okuti kuli Ululiki wovina viosi. Ocimãho cocipama cilo, coku tu kuatisa oku kundila omanu vosi tu sanga kupange woku kunda.

4. Momo lie tu sukilila oku amamako oku kuata ovisimĩlo via sunguluka?

⁴ Kuata Ovisimĩlo Via Sunguluka. Anyamo osi, omanu vana okuti ka va tiamẽlele ketavo limue va siata oku linga Olombangi Via Yehova. Valua va kũlĩhile ale olonumbi via sunguluka, va limbuka uhembi watavo. Vakuavo okuti ka va kapeleko olonumbi via sunguluka va sukilile oku siapo ovituwa vĩvi. Lekuatiso lia Yehova tu koleli okuti tu ka sanga vana “vakuotima wa sungulukila omuenyo ko pui.”—Ovil. 13:48; 1 Tim. 2:3, 4.

5. Olonjanja vialua, nye ca siata oku vetiya omanu oku tava kesapulo lietu?

⁵ Lekisa ohenda kuenda kuata utate. Nda okuti omanu va tava kesapulo lietu, hamekondako lieci tua popia pole, mekonda lionjila ndomo tua popia. Omanu va sole calua eci tu vangula lavo lohenda, lutate kuenda oku lekisa ocisola cocili kokuavo. Etu ka tu va kisika oku kuama ocisimĩlo cetu. Pole, tu likolisilako oku kũlĩha esunga lieci va tendela etavo lonjila yimue. Ndeci, tua kũlĩha okuti vamue ka va sole oku sapela catiamẽla ketavo lomunu umue ka va kũlĩhĩle. Vakuavo va sima okuti ka ca sungulukile oku pulisa komunu umue catiamẽla ku Suku. Handi vali, vakuavo va kala losõi eci va limbuka okuti va letiwe lomanu vakuavo osimbu va tanga Embimbiliya, ca piãla enene Lombangi yimue ya Yehova. Omo liaco, tu sukila oku likolisilako oku kapako ovisimĩlo viavo.—2 Tim. 2:24.

6. Upostolo Paulu wa kuama ndati olonjila via litepa kuenda tu setukula ndati ongangu yaye?

⁶ Nye tu linga nda umue ka liyevi ciwa eci tu tukula olondaka ndeci, “Embimbiliya,” “oviluvo,” “Suku,” ale “etavo”? Tu pondola oku setukula upostolo Paulu loku pongolola onjila yikuavo yoku sapela lavo. Eci Paulu a enda oku sapela la va Yudea, wa enda oku tanga Ovisonehua. Pole, eci a enda oku sapela lolonoño vio ko Areópago, eye ka endaile oku tukula Ovisonehua. (Ovil. 17:2, 3, 22-31) Tu setukula ndati ongangu ya Paulu? Nda okuti wa sanga omunu una ka tava Kembimbiliya, yuvula oku tukula ovisonehua eci o sapela laye. Nda wa limbuka okuti omunu wa sanga ka sole oku muiwa lomanu vakuavo eci a tanga Embimbiliya, u tangela lonjila yina okuti omanu ka va ci limbuka, ndeci vo telefone.

7. Nye tu sukila oku linga oco tu setukule ongangu ya Paulu ndomo ca lekisiwa kukanda 1 ku Va Korindo 9:20-23?

⁷ Sanda Oku Kuata Elomboloko Kuenda Kala Ukuakuyevelela. Tu sukila oku likolisilako oku kuata elomboloko lieci omanu va sima. (Olosap. 20:5) Sokolola vali kulandu wa Paulu. Eye wa kulila pokati ka va Yudea. Kuenje wa sukilile oku pongolola onjila yaye yoku kundila Vakualofeka, okuti omanu vana ka va kũlĩhĩle lacimue catiamẽla ku Yehova kuenda Kovisonehua. Tu sukilavo oku kuama onjila yaco poku linga akonomuiso, ale oku pula vamanji vekongelo va pama kespiritu, catiamẽla kekalo liomanu vocikanjo cetu, oco tu kuate elomboloko  liatiamẽla kovisimĩlo viavo kuenda ndomo ovo va liyevite.—Tanga 1 Va Korindo 9:20-23.

8. Onjila yipi yiwa yoku fetika ombangulo yatiamẽla Kembimbiliya?

⁸ Ocimãho cetu oku sanda ava va “sesamẽla.” (Mat. 10:11) Oco tu kuate onima yiwa, tu sukila oku ecelela okuti omunu o lianja poku situlula ovisimĩlo viaye kuenda oku u yevelela lutate. Manji umue kofeka yo Inglaterra o pulisa omanu ovisimĩlo viavo viatiamẽla koku kuata esanju volohuela, ndomo kutatiwa omãla, ale ndomo tu liyaka lekambo liesunga. Noke lia manji oku yeva ovisimĩlo viavo, eye o pulisa hati: “Nye o sima catiamẽla kelungulo limue lia sonehiwa osimbu yalua ci panda 2.000 kanyamo?” Eye o yuvula oku tukula ondaka “Embimbiliya,” pole, o lekisa ocisonehua cimue a sokiya votelefone yaye.

9. Tu kuatisa ndati omanu vana ka va sole oku vangula catiamẽla ku Suku?

⁹ Omanu vana ka va sole oku popia ovina viatiamẽla ku Suku, tu pondola oku vetiya ovitima viavo poku vangula lavo ovina va sole. Ndeci, ovina vialua via lulikiwa vi komõhisa. Omo liaco, tu pondola oku popia ndoco: “Pamue wa kũlĩha okuti ovina viosi via pangiwa lolonoño, va setukula ovina via lulikiwa. Oco olonoño vipange anguena vi setukula ovatũi kuenda oco vi pange omakina yokupa alitalatu vi setukula ovaso. Nye o sima catiamẽla kovina via lulikiwa? Osima hẽ okuti via tukuluka longusu yimue yi komohisa, omunu umue wa vi lulika, ale ca tukuluka ño?” Noke yoku u yevela lutate tu pondola oku popia ndoco: “Oco olonoño vi pange anguena lolomakina viokupa alitalatu, va setukula ovina via lulikiwa, oco hẽ helie wa va ĩha uloño waco? Ame nda komõha calua eci umue usonehi kosimbu a soneha hati: ‘U wa kapa etũi hẽ, ka yevi? U wa lulika iso hẽ, ka lete? . . . Eye Una o longisa omanu olondunge!’ Olonoño vimue vi tavavo kolondaka evi. (Osa. 94:9, 10) Tu pondola oku lekisa ovindeo yimue vonumbi yetu jw.org^® vemehi liosapi hati: Apulilo kuenda Ovolandu, vonepa hati “Ovisimĩlo Viatiamẽla Kono Yomuenyo.” (Tala vonepa hati, VALIVULU > OLOVIDEO.) Noke tu pondola oku eca kokuaye ombrochura A Vida—Teve um Criador? ale ombrochura A Origem da Vida—Cinco Perguntas Que Merecem Resposta.

10. Tu fetika ndati ombangulo lomunu una okuti ka yongola oku vangula catiamẽla ku Suku?

¹⁰ Omanu valua va yongola ekalo liwa lio kovaso yoloneke. Valua va sima okuti ongongo yi  ka nyõliwa kuenda ka mu ka tunga vali omanu. Manji umue ukuakunyula akongelo kofeka yo Noruega wa popia hati, omanu valua ka va sole oku vangula catiamẽla ku Suku, pole, va sole vali oku sapela catiamẽla kovina vi pita voluali. Noke yoku lama omanu manji o pula hati: “Nye o sima catiamẽla kovaso yoloneke? Anga hẽ elavoko lietu li tunda ko pulitika, kolonoño, ale komanu vakuavo?” Noke yoku yevelela lutate, manji o tanga ocisonehua cimue ci lombolola elavoko liwa lio kovaso yoloneke. Vamue va komõha poku kũlĩha ohuminho yi sangiwa Vembimbiliya yokuti, ongongo ka yi ka nyõliwa kuenda omanu vawa va ka kala otembo ka yi pui.—Osa. 37:29; Uku. 1:4.

11. Momo lie tu sukilila oku kuama olonjila via litepa vioku fetika ombangulo kuenda tu setukula ndati ongangu yupostolo Paulu ndomo ca tangiwa ku Va Roma 1:14-16?

¹¹ Tua sukilile oku kuama olonjila via litepa poku sapela lomanu. Momo lie? Momo omanu ka va lisokele. Ombangulo yi vetiya omunu umue, pamue ka yi vetiya omunu ukuavo. Omanu vamue va sole oku sapela catiamẽla ku Suku kuenda Kembimbiliya, pole, vakuavo va sanjukila oku vangula ovina vikuavo. Ndaño omanu ka va lisokele, kapuluvi osi tu sukila oku sapela lomanu vosi tu sanga. (Tanga Va Roma 1:14-16.) Tua kolela okuti Yehova eye o kulisa ocili vutima womanu vana va sole esunga.—1 Va Kor. 3:6, 7.

12. Nye tu sukila oku linga oco tu kundile omanu vo kofeka yo Asia ka va kuete ukũlĨhĨso laumue wa tiamẽla Kululiki?

¹² Akundi valua voluali luosi va kasi oku sanda omanu vo kofeka yo Asia oku kongelamo vana va tunda kovitumãlo kuna okuti olombiali vi kasi oku tateka efendelo liavo. Kolofeka vialua vio ko Asia, omanu valua ka va kapeleko ocisimĩlo cokuti kuli Ululiki umue. Vamue va tava elilongiso Liembimbiliya, pole, vakuavo ka va lekisa onjongole yoku lilongisa. Nye tu sukila oku linga oco tu va kundile ocili? Akundi vamue va loñoloha va limbuka okuti, ceca onima yiwa oku fetika ombangulo lonjila yi lekisa ukamba, oku lekisa onjongole komunu loku lombolola ulandu umue ndomo omuenyo wove wa pongoloka omo lioku kapako ocisonehua cimue Cembimbiliya.

13. Tu kuatisa ndati omanu oku sola Embimbiliya? (Tala elitalatu koñoño.)

¹³ Omanu valua va kasi oku tava kocili ci sangiwa Vembimbiliya. (Uku. 7:12) Volupale luo Nova Yorke manji umue ukãi wa sapela lomunu o vangula elimi lio Mandarim wa popia hati: “Ame ndi likolisilako oku lekisa onjongole komanu kuenda oku va yevelela. Nda nda limbuka okuti omanu vaco va tunda kofeka yikuavo, ndi pula ndoco: ‘Ndamupi o liyevite poku ilukila kulo? Wa sanga ale upange? Omanu vakulo va kasi hẽ oku ku tata ciwa?’” Olonjanja vialua eci ci kuatisa manji oku fetika elilongiso Liembimbiliya. Nda citava manji o pondola oku popia vali ndoco: “Kocisimĩlo cove, nye tu sukila oku linga oco tu kuate ukamba uwa la vakuetu? Citava hẽ okuti, hu lekisa ocinimbu cimue Cembimbiliya? Oco ci popia hati: “Oku fetika uyaki kua soka loku papula ovava, oco liwekiko osimbu okuliyenja ka kua fetikile.” Osima hẽ okuti elungulo eli li pondola oku tu kuatisa oku kuata ukamba uwa la vakuetu?” (Olosap. 17:14) Ombangulo eyi yi pondola oku tu kuatisa oku limbuka omanu va yongola oku amamako oku yevelela kesapulo liusoma.

14. Manji umue kofeka yo Kutundilo, o kuatisa ndati omanu vana ka va tava okuti kuli Suku?

¹⁴ Nye tu sukila oku popia ku vana ka va tava okuti kuli Suku? Manji umue ulume wa siata oku kundila omanu havakuetavoko vokuenda kuayamo alua kofeka yimue yo Kutundilo, wa lombolola hati: “Eci omunu umue a popia  okuti ka tava ku Suku, ci lomboloka okuti eye ka yongola oku fendela olosuku vi fendeliwa lomanu vo kofeka yaye. Kuenje ame nda siata oku lekisa okuti olosuku vimue via pangiwa muẽle lomanu kuenda haviociliko. Olonjanja viosi, ndi tanga elivulu lia Yeremiya 16:20 ku popia hati: “Omunu nga, o litungila olosuku? Olosuku viaco halosukuko.” ‘Tu limbuka ndati Suku yocili kuenda olosuku vina via siata oku pangiwa lomanu?’ Ndu yevelela lutate noke ndu tangela Isaya 41:23 ku popia hati: “Tu sapuili ovina viya ha tu limbuka ocili okuti vulosuku. Noke ndu lekisa ovina Yehova a popia viatiamẽla kovaso yoloneke.”

15. Nye tu lilongisila kulandu wa manji umue Kutundilo wo Asia?

¹⁵ Manji umue ulume Kutundilo wo Asia, poku ka linga epasu wa popia ndoco: “Ndi va lekisa olondunge viocili vi sangiwa Vembimbiliya, oku tẽlisiwa kuovitumasuku kuenda ovihandeleko vi teyuila oluali. Noke ndi va sapuila okuti, cosi eci ci lekisa okuti kuli Ululiki wa loñoloha haiye o kasi lomuenyo. Eci omunu a limbuka okuti kuli Suku, ndi lekisa kokuaye eci Embimbiliya li popia catiamẽla ku Yehova.”

16. Ndomo ca lekisiwa ku Va Heveru 11:6, momo lie vana tu longisa Embimbiliya va sukilila oku pamisa ekolelo liavo ku Suku kuenda Kembimbiliya kuenje tu va kuatisa ndati oku ci linga?

¹⁶ Poku songola elilongiso Liembimbiliya komunu una okuti hukuetavoko, tu sukila oku amamako oku u kuatisa oku tava okuti kuli Suku. (Tanga Va Heveru 11:6.) Handi vali, tu sukila oku u kuatisa oku kolela Kembimbiliya. Poku ci linga, ci ka sukila oku pitulula atosi alua. Olonjanja viosi tu lilongisa laye tu sukila oku lombolola uvangi wokuti Embimbiliya Ondaka ya Suku. Tu pondolavo oku lombolola ndomo ovitumasuku Viembimbiliya via tẽlisiwa, ndomo Embimbiliya lia suapo poku tukula uloño, lasapulo kuenda ndomo Embimbiliya li tu kuatisa komuenyo wetu weteke leteke.

17. Ocisola cetu ci vetiya ndati omanu?

¹⁷ Tu kuatisi omanu oku kala olondonge via Kristu poku lekisa ocisola kokuavo, cikale okuti vakuetavo, ale sio. (1 Va Kor. 13:1) Poku va longisa, ocimãho cetu oku lekisa okuti Suku o tu sole kuenda tu yongolavo oku sola omanu. Unyamo lunyamo, omanu valua okuti va kuatele onjongole yitito yoku tiamẽla ketavo limue, ale ka va tavele ketavo, va kasi oku papatisiwa, omo lioku lilongisa catiamẽla ku Suku. Omo liaco, kuata epandi kuenda lekisa ocisola loku kapako omanu vosi. Va yevelela ciwa. Kuata elomboloko liekalo liavo. Longangu yove, va longisa oku kala olondonge via Kristu.