1. Nye Embimbiliya li lombolola catiamẽla kepindiso?

NYE o sima eci o yeva ondaka “epindiso”? Omanu valua va yi tiamisila kekangiso, pole, vepindiso mua kongela ovina vialua. Embimbiliya li popia okuti, epindiso li kuete esilivilo kokuetu kuenda olonjanja vimue li tukula epindiso kumue lukũlĩhĩso, lolondunge, locisola kuenda omuenyo. (Olosapo 1:2-7; 4:11-13) Eci ci lekisa okuti, epindiso lia Suku uvangi wokuti o tu sole kuenda o yongola okuti tu kala otembo ka yi pui. (Va Heveru 12:6) Ndaño okuti olonjanja vimue vepindiso lia Yehova mua kongela ekangiso, pole, lalimue eteke a ci linga lungangala. Omo liaco, velomboloko liondaka “epindiso” mua kongela oku longa, ndeci isia umue a linga lomõlaye a sole.

2, 3. Vepindiso mua kongela ndati elungulo kuenda ekangiso? (Tala ociluvialuvia kefekilo liocipama.)

² Tu kũlĩhĩsi ulandu umue. Kakuenje umue o tukuiwa hati Johnny wa kala oku imba ombunje vonjo. Ina yaye wo sapuila hati: “A Johnny, ove wa kũlĩha okuti ka citava oku papalela  vonjo lombunje, sanga o tetula cimue.” Pole, eye wa sinĩla eci inaye o sapuila kuenda wamamako oku imba ombunje. Noke ombunje ya veta vesanga liotuma kuenje lia tetuka! Nye inaye a linga? Wo lungula loku u lomboluila esunga lieci ovina a linga ka via sungulukilile. Eye wa yonguile okuti omõlaye o kũlĩha okuti, ci kuete esilivilo oku pokola kolonjali loku limbuka okuti epindiso liavo li sukiliwa kuenda lia sunguluka. Oco a kuatise omõlaye, wa nõlapo oku u kangisa poku seleka ombunje yaye okatembo kamue. Ca sumuisa Johonny, pole, co kuatisa oku limbuka okuti nda wa sinĩla olonjali viaye o kuata ovitangi.

³ Omo okuti Tuakristão, tua tiamẽla kekongelo lia Suku. (1 Timoteo 3:15) Isietu Yehova o kuete omoko yoku tumbika olonumbi vieci ciwa leci cĩvi loku tu pindisa eci tu u sinĩla. Handi vali, nda tua kuata ovitangi omo liovilinga vietu, epindiso lia Yehova lieciwa locisola li tu kuatisa oku ivaluka okuti, ci kuete esilivilo oku pokola kokuaye. (Va Galatia 6:7) Yehova o tu sole calua kuenda ka yongola okuti tu tala ohali.—1 Petulu 5:6, 7.

4. (a) Momo lie Yehova a yonguila okuti tu pindisa omanu vakuavo? (b) Nye tu lilongisa vocipama cilo?

⁴ Eci tu eca epindiso lia kunamẽla Vembimbiliya tu kuatisa omõla ale umue tu longisa Embimbiliya oku kala ondonge ya Kristu. Tu talavaya Lembimbiliya oco tu kuatise vana tu longisa Embimbiliya oku tepisa pokati keci ciwa leci cĩvi, loku va kuatisa oku kuata elomboloko ‘liovina viosi Yesu a tu handeleka.’ (Mateo 28:19, 20; 2 Timoteo 3:16) Lonjila eyi, Yehova o yongola okuti ovo va pindisiwa oco va kuatisevo vakuavo oku kala olondonge via Kristu. (Tanga Tito 2:11-14.) Cilo, tu konomuisi apulilo atatu a kuete esilivilo ndeci: (1) Epindiso lia Yehova li situlula ndati ocisola a tu kuetele? (2) Nye tu lilongisila kulandu womanu va pindisiwa la Yehova? (3) Tu setukula ndati Yehova Lomõlaye konjila ndomo va eca epindiso?

⁵ Yehova o lungula, o longisa kuenda o pindisa omo liocisola a tu kuetele. Eye o yongola okuti tu kuata ukamba laye kuenda oku kala otembo ka yi pui. (1 Yoano 4:16) Lalimue eteke a linga ovina vi tu sumuisa ale oku tu tenda okuti ka tu kuete esilivilo. (Olosapo 12:18) Yehova o luluvalela kovituwa vietu viwa kuenda ecelela okuti tu kuata elianjo lioku nõla eci tu yongola oku linga. O tẽla hẽ oku limbuka ndomo epindiso tu tambula vocakati Cembimbiliya,  lialivulu etu, liolonjali vietu, ale liakulu vekongelo li situlula ocisola Yehova a tu kuetele? Ocili okuti, eci akulu vekongelo va tu lungula locisola, ndaño okuti ka tua limbukile oku lueya kuetu, ovo va setukula ocisola Yehova a tu kuetele.—Va Galatia 6:1.

6. Epindiso li situlula ndati ocisola ca Yehova eci umue opiwa ovikele vekongelo?

⁶ Olonjanja vimue vepindiso mua kongela ovina vikuavo okuti elungulo ci sule. Nda umue wa linga ekandu linene, ka citava okuti o tẽlisa vali ovikele vekongelo. Epindiso liaco li lekisa ocisola Yehova o kuetele. Eci cu kuatisa oku limbuka esilivilo lioku lilongisa Embimbiliya loku sokolola kovina a tanga kuenda oku likutilila. Oku linga ovina viaco cu kuatisa oku pamisa ukamba waye la Yehova. (Osamo 19:7) Kuenje vokuenda kuotembo, o tambula vali ovikele vina a pumbile. Eci umue a tundisiwa vekongelo, ci sitululavo ocisola ca Yehova, momo ci teyuila ekongelo kovilinga vĩvi. (1 Va Korindo 5:6, 7, 11) Omo okuti epindiso lia Yehova liwa, li kuatisa omunu wa tundisiwa oku limbuka okuti wa linga ekandu linene. Kuenje o vetiyiwa oku likekembela.—Ovilinga 3:19.

7. Helie wa kala Sevena kuenda ocituwa cipi a kuata?

⁷ Oco tu kuate elomboloko liesilivilo liepindiso, tu kũlĩhĩsi ovolandu avali vomanu Yehova a pindisa. Ulandu watete wa Sevena u Isareli una wa kala kotembo ya Soma Hesekiya, ukuavo wa manji Graham wo kotembo yetu. Sevena wa kala ‘kalei koku lava onjo’ ya Soma Esekiya kuenda wa kuata unene walua. (Isaya 22:15) Pole, eye wa fetika oku kuata epela kuenda wa yonguile okuti vakuavo va sima okuti wa velelepo. Wa li sokotuila eyambo kuenda wa endaila ‘vakãlu ulamba.’—Isaya 22:16-18.

8. Yehova wa pindisa ndati Sevena kuenda onima yipi yeyililako?

 ⁸ Omo okuti Sevena wa lisandela ulamba, Yehova wo wupa ocikele caye kuenje wa ceca kulume ukuavo o tukuiwa hati, Eliakimi. (Isaya 22:19-21) Ovina viaco via pita eci Senakeriva Soma yo ko Asuria, a sokiya oku nyõla o Yerusalãi. Noke, Senakeriva wa tuma vakesongo kaye, lolohoka viaye vialua oco va saluise va Yudea kuenda oco Soma Hesekiya a liece kokuavo. (2 Olosoma 18:17-25) Hesekiya wa tuma Eliakimi lalume vavali oco va lisange la vakesongo vaco. Umue pokati kalume vaco Sevena, una weya oku kala usonehi wokaliye. Kulandu waco tu pondola oku limbuka okuti Sevena wa lilongisa oku kuata umbombe kuenda ka kuatele ocikumbiti ale oku livetela evelo. Sevena wa tava lutima wosi epongoloko liocikele caye. Kulandu waye tu lilongisilako ovina vitatu via pita laye.

9-11. (a) Ovolandu api a kuete esilivilo tu lilongisila ku Sevena? (b) Nye o sima catiamẽla konjila ndomo Yehova a tata Sevena?

⁹ Catete, Sevena poku upiwa ocikele, ci tu ivaluisa okuti “kovaso yepela ku iya oku nyolẽha.” (Olosapo 16:18) Pamue tu kuete ovikele vilikasi vekongelo, kuenje vakuetu va sima okuti tua velapo. Nda oco, anga tu ka amamako oku kala ambombe? Tu ivaluka hẽ okuti ovoloño tu kuete, lovina viwa tu linga viosi via tunda ku Yehova? (1 Va Korindo 4:7) Upostolo Paulu wa lungula ndoco: “Ndu sapuili vosi pokati kene okuti, ko ka simi okuti wa velipo, vakuene va sule.”—Va Roma 12:3.

¹⁰ Cavali, epindiso Yehova a eca ku Sevena lia lekisa okuti eye wa kolelele okuti Sevena wa laikele oku linga epongoloko. (Olosapo 3:11, 12) Ulandu waco u longisa vana vopiwa ovikele vilikasi. Ovo va sukila oku yuvula oku kuata onyeño locikumbiti pole, va amameko oku linga upange wa Yehova lutima wosi. Va sukilavo oku tenda epindiso liaco ndondimbukiso yocisola ca Yehova. Tu ivaluki okuti Isietu o sumũluisa vana va amamako oku lekisa umbombe. (Tanga 1 Petulu 5:6, 7.) Epindiso Yehova a eca locisola, li tu kuatisa lika nda tuambombe kuenda nda tu kasi ndotuma ya leñela.

¹¹ Catatu, tu lilongisa ulandu umue ukuete esilivilo konjila ndomo Yehova a tata Sevena. Ndaño okuti Yehova o suvuka ekandu omunu a linga, pole, ka suvuka omunu waco. Yehova wa kapako ovituwa viwa omanu va kuete. Nda ove wunjali ale wukulu wekongelo, wa siata hẽ oku setukula Yehova poku eca epindiso?—Yuda 22, 23.

12-14. (a) Vamue va tenda ndati epindiso li tunda ku Yehova? (b) Ondaka ya Suku ya kuatisa ndati manji umue oku pongolola ovituwa viaye kuenda onima yipi a kuata?

¹² Omanu vamue eci va pindisiwa va kuata onyeño yalua kuenje va yanduluka Yehova kuenda ekongelo. (Va Heveru 3:12, 13) Anga hẽ eci ci lomboloka okuti lomue o pondola oku va kuatisa? Sio! Tu kũlĩhĩsi ulandu wa manji Graham, wa tundisiwile vekongelo, okuti noke wa tambuiwa vali. Eye wa liwekelepo oku kunda loku endaenda kolohongele. Ukulu umue wekongelo wa likolisilako oku u kuatisa kuenje manji Graham wa pinga kokuaye oco o longise Embimbiliya.

¹³ Ukulu wekongelo wa limbuka okuti “manji Graham wa kala oku lekisa epela. Eye wa enda oku pisa akulu vekongelo va pangele onepa kesombiso liaye. Omo liaco, kelilongiso likuavo, tua konomuisa ovisonehua  viatiamẽla kepela kuenda ovitangi vi yililako. Manji Graham wa fetika oku likũlĩhĩsa lutatete volumuĩlo Luondaka ya Suku kuenje ka solele eci a mola catiamẽla kokuaye! Oku ci linga co kuatisa calua! Noke yoku limbuka okuti wa kala oku yapuisiwa ‘lohangalo’ yepela kuenda ocituwa caye coku pisa, wa linga lonjanga apongoloko. Eye wa fetika oku endaenda vali kolohongele, oku lilongisa Embimbiliya loku likutilila oloneke viosi. Handi vali, wa fetikavo oku tẽlisa ovikele viaye vioku kuatisa epata liaye konepa yespiritu kuenje epata lia kuata esanju.”—Luka 6:41, 42; Tiago 1:23-25.

¹⁴ Ukulu wekongelo wamisako hati: “Eteke limue manji Graham wa ndomboluila cimue ca ndi sanjuisa calua. Eye hati, ‘nda kũlĩha ocili vokuenda kuanyamo alua’ kuenda nda kalavo ukundi wotembo yosi. Pole, cilo lika nda limbuka okuti ndi sole Yehova.” Noke manji Graham wa tambula ocikele coku talavaya languena kolohongele kuenda wa sanjukila ocikele caco. Ukulu wekongelo wamisako hati: “Ongangu yaye ya ndi longisa okuti, nda omunu o lekisa umbombe poku tava kepindiso lia Yehova, o sumũlũisiwa!”

15. Nye tu sukila oku linga oco epindiso tu eca li kuate onima yiwa?

¹⁵ Nda tu yongola oku kala alongisi vawa, tu sukila tete oku kuata ocituwa coku lilongisa. (1 Timoteo 4:15, 16) Cimuamue haico okuti, nda wa siata oku pindisa vakuene, o sukila oku amamako oku lekisa umbombe loku ecelela okuti Yehova o ku songuila. Eci vakuene va limbuka okuti o lekisa umbombe, va ka ku sumbila kuenda ci ka leluka kokuavo oku tava kelungulo weca. Tu pondola oku lilongisila kulandu wa Yesu.

16. Nye tu lilongisila ku Yesu catiamẽla kepindiso kuenda kelongiso?

¹⁶ Yesu olonjanja viosi wa enda oku pokola ku Isiaye, ndaño kapuluvi ana okuti ka ca lelukile oku ci linga. (Mateo 26:39) Eye wa ivaluisa olonjeveleli viaye okuti ovina a kala oku longisa, lolondunge a kuata via tunda ku Isiaye. (Yoano 5:19, 30) Yesu wa lekisile umbombe kuenda epokolo kuenje co kuatisa oku kala ulongisi umue ukuahenda. Omanu va komõha calua oku longisa kuaye. (Tanga Luka 4:22.) Olondaka via Yesu via lembeleka vana va kala lesumuo kuenda vana va honguele. (Mateo 12:20) Eye wa lungula locisola ovapostolo vaye, eci va kala oku lihoya catiamẽla komunu wa velelepo pokati kavo, ndaño okuti nda co temisa.—Marko 9:33-37; Luka 22:24-27.

17. Ovituwa vipi vi kuatisa akulu vekongelo oku tata ciwa ekongelo?

¹⁷ Olonjanja viosi eci akulu vekongelo va eca elungulo Liembimbiliya, va sukila oku setukula Kristu. Nda va ci linga, ci lekisa  okuti va yongola oku songuiwa la Yehova kuenda Omõlaye. Upostolo Petulu wa soneha ndoco: “Lavi ocunda ca Suku co kundikilui, ndangombo, halocikukũiko, te lutima wosi kovaso a Suku; halocipululuko conganyu, te lombili; haloku vialako vana okuti ocipiñalo ca Suku, pole, eci ongangu yiwa kocunda.” (1 Petulu 5:2-4) Nda akulu vekongelo va tava lesanju kolonumbi via Suku levi via Kristu, vosi vekongelo va kuatisiwa.—Isaya 32:1, 2, 17, 18.

18. (a) Nye Yehova a yongola okuti oco olonjali vi linga? (b) Yehova o kuatisa ndati olonjali?

¹⁸ Nye ci popiwa catiamẽla koku eca elungulo kuenda epindiso vepata? Yehova wa handeleka asongui vepata hati: “Ko ka wenguli onyeño yomãla vene, pole, va pindisi lovilongua via Yehova.” (Va Efeso 6:4) Epindiso kuenda elungulo vi kuete hẽ esilivilo? Kelivulu Liolosapo 19:18 tu tangako ndoco: “Pindisa omõlove osimbu kuli elavoko, ku ka tave okuti o nyõleha.” Yehova wa eca ocikele kolonjali oco vi pindise omãla vavo. Nda ka va ci lingile, va kuata ovitangi kovaso aye! (1 Samuele 3:12-14) Pole, Yehova eca kolonjali olondunge kuenda ongusu va sukila, eci va pinga ekuatiso liaye vohutililo, loku ecelela okuti Ondaka yaye lespiritu sandu liaye li va songuila.—Tanga Tiago 1:5.

19, 20. (a) Asumũlũho api tu kuata eci tu tava kepindiso lia Suku? (b) Nye tu ka lilongisa vocipama cikuavo?

¹⁹ Nda tua tava kepindiso lia Yehova loku setukula ongangu Yaye leyi ya Yesu poku eca epindiso, tu ka kuata asumũlũho alua! Apata etu lakongelo va ka kuata ombembua kuenje vosi va ka limbuka okuti va soliwe, va kapiwako kuenda va kolapo. Eci ocidekaise cimue combembua lesanju tu ka kuata kovaso yoloneke. (Osamo 72:7) Epindiso lia Yehova li kasi oku tu pongiya oco tu kale kumosi la vamanji otembo ka yi pui ndepata li kuete ombembua lomunga. (Tanga Isaya 11:9.) Nda tua ivaluka ovina viaco, tu ka limbuka okuti epindiso lia Yehova onjila yimue yiwa yoku lekisa ocisola caye kokuetu.

²⁰ Vocipama cikuavo, tu ka lilongisa vali catiamẽla kepindiso lieciwa vepata kuenda vekongelo. Tu ka kulĩhĩsavo ndomo tu pondola oku lipindisa etu muẽle. Handi vali, tu ka lilongisavo ndomo tu yuvula ocina cimue ci koka evalo lialua okuti evalo li tunda kepindiso li sule.