“Yehova​—Osuku Yimue yi Sesamela Oku Kũlĩhĩwa”

Anga hẽ kua ku kambela cimue ci kuete esilivilo komuenyo wove? Nda kua kũlĩhĩle ovina vialua viatiamẽla ku Suku, etambululo oco. Momo lie? Momo, ndeci omanu valua va ci limbuka, oku kũlĩha Suku usovoli Wembimbiliya cinena asumũlũho komuenyo. Asumũlũho aco a tu kuatisa cilo kuenda kovaso yoloneke.

Yehova Suku usovoli Wembimbiliya, o yongola okuti tu u kũlĩha. Ukualosamo wa soneha ndoco: “Omanu va limbuke okuti ove, onduko yove Yehova, Ove lika wove Fũ kilu lieve liosi.” Eye o cĩ okuti nda tuo kũlĩha tu kuatisiwa calua. “Ame ndi Yehova, ndi Suku yove, Una o ku longisa eci ci ku kuatisa.” Tu kuatisiwa ndati poku kũlĩha Yehova Suku Ukuonene Wosi?—Olosamo 83:18; Isaya 48:17.

Esumũlũho liocili lieli okuti, tu kuata olonumbi vi tu kuatisa oku tetulula ovitangi eteke leteke elavoko liapama lio kovaso yoloneke kuenda oku kuata ombembua yovutima. Handi vali, oku kũlĩha ciwa Yehova ci tu kuatisa oku kuata ovituwa via litepa, viatiamẽla kapulilo a kuate esilivilo omanu voluali luosi va siata oku linga koloneke vilo. Apulilo api?

Omuenyo Wove Ukuete hẽ Ocimãho?

Ndaño loku livokiya kuloño, omanu handi va siata oku linga apulilo amuamue a kuete esilivilo ndeci: “Momo lie ñasilili komuenyo?” Nye ci ka pita kovaso yoloneke? Cipi ocimãho comuenyo? Eci omunu ka sangi a tambululo a suapo, omuenyo waye ka u kuata ocimãho cocili. Anga hẽ eci ca siata oku pita lomanu valua? Elilongiso limue lia lingiwa ko Alemanya, vokuenda kuesulilo lianyamo 1990, lia situlula okuti onepa yalua yava va pulisiwa olonjanja vialua ale olonjanja vimue va enda oku sima okuti omuenyo ka ukuete ocimãho la cimue. Pamue kocitumãlo o kasi kuli ocitangi cimuamue.

Nda omuenyo wetu ka u kuete ocimãho, omunu ka kuata ono ya kolapo yi pamisa ovimãho viaye. Valua va sanda oku piñainya ekambo liaco, lupange umue uwa ale oku kuata ovokuasi. Pole, ndaño ndoco, va liyeva okuti va kambela cimue. Oku kala okuti omunu ka kuata ocimãho komuenyo ca siata oku kokela vamue ocisimĩlo coku fa. Eci oco ca pita lukãi umue wa posoka okuti, ndomo ca lomboluiwa vukanda umue wa sapulo International Herald Tribune, “eye wa kulila vepata limue liolowasi kuenda lia kuatele asumũlũho alua.” Ndaño okuti wa kuata omuenyo umue uwa, wa enda oku liyeva ulika kuenda wa li tendele okuti omuenyo waye ka u kuete ocimãho. Eye wanyua ovihemba viotulo kuenje vo sanga okuti wa fa. Citava okuti wa kũlĩha omanu vakuavo va enda oku liyeva ndoco kuenje va li pondavo.

Wa yevele ale umue oku popia okuti uloño u pondola oku tu sapuila cosi catiamẽla komuenyo? Ukanda umue wa sapulo woku Alemanya, Die Woche wa lekisa ndoco: “Uloño ndaño okuti wa kunamela kovovangi ocili, pole konepa yespiritu ka wa suilepo.”  Elongiso liokuti ovina via tukulukaño kuenda o fisica, ka vieci elembeleko kuenda ka vi kuatisa oku kolapo.” Ovina via limbukiwa lolonoño via kuatisa calua oco ku lomboluiwe omuenyo volonjila via liyekala, ovovo kuenda ovina vi vi teyuila. Pole, uloño ka u tẽla oku lombolola esunga lie tu kasilili komuenyo ndaño muẽle oku situlula ovina tu lavoka kovaso yoloneke. Nda tua kolela lika kuloño, apulilo etu a tiamẽla kocimãho comuenyo ka a ka tambuluiwa. Onima yaco ndomo ca sapuiwa vukanda umue wa sapulo Süddeutsche Zeitung yeyi yokuti, “tu ka kuata esukila lialua liolonumbi.”

Lomue wa velapo koku eca olonumbi viaco okuti ululiki wetu ci sule. Omo okuti eye wa kapa omanu kilu lieve, eye wa kũlĩha esunga lieci tu kasilili komuenyo. Embimbiliya li lombolola okuti Yehova wa lulika omanu oco va kale vongongo loku yi tata. Omanu kovopange avo osi va sukilile oku sokolola kovituwa viaye, ndeci esunga, olondunge kuenda ocisola caye. Momo tu kuete elomboloko liesunga lieci Yehova a tu lulikila kuenda esunga lieci tu kasilili komuenyo.—Efetikilo 1:26-28.

Nye o Pondola Oku Linga?

Nda handi kua sangele a tambululo asuapo a pulilo ndeci: ‘Momo lie ñasilili komuenyo? Nye ci ka pita kovaso yoloneke? Cipi ocimãho comuenyo?’ Embimbiliya li ku vetiya oco o kũlĩhe ciwa Yehova. Yesu wa popia hati: “Eci ci lomboloka omuenyo ko pui okuti, ovo va ku kũlĩha okuti, ove lika wu Suku yocili kuenda va sukila oku kũlĩhavo una ove wa tuma, Yesu Kristu.” Ove wa va vetiyiwavo oku kuata ovituwa vi sanjuisa Suku, ca piãla enene ocisola kuenda oku nõlapo oku songuiwa Luviali wa Mesiya. Kuenje o ka kuata ocimãho komuenyo kuenda elavoko lia kolapo liokovaso yoloneke. Apulilo a kuete esilivilo a enda oku ku sakalaisa toke cilo, a ka tambuluiwa.— Yoano 17:3; Ukundi 12:13.

Oku litepa kupi ku kasipo? Hans wa kũlĩha ciwa etambululo liepulilo eli. * Vanyamo a pita wa kuata ekolelo limue litito lia tiamẽla ku Suku, pole, ekolelo liaye ka lia vetiyile omuenyo waye. Eye wa solele epangue, oku yoloka lolomoto, ovipuepue kuenda oku litumbika kungangala. Eye wa popia hati “ka kuatele esanju komuenyo.” Eci a kuata 25 kanyamo wa nõlapo oku kũlĩha Suku poku tanga Embimbiliya lutate. Noke lioku kũlĩha ciwa Yehova loku kuata ocimãho comuenyo Hans, wa pongolola ekalo liomuenyo waye kuenje wa papatisiwa Ndombangi ya Yehova. Cilo o kasi kupange wotembo yosi anyamo ekũi. Eye wa popia lutima wosi hati: “Oku vumba Yehova olio ekalo lia velapo komuenyo. La cimue ci sokisiwa laco. Oku kũlĩha Yehova ca nyiha ocimãho komuenyo.”

Ocili okuti ocimãho comuenyo hacoko lika ocitangi ci sakalaisa valua. Osimbu ovitangi vio luali vi livokiya, ku votuiwa epulilo likuavo li sakalaisa omanu.

Momo Lie Eci ca li Pitila?

Eci ku pita ocilunga cimue, epulilo liya vutima lieli: momo lie eci ca li pitila? Oku tẽla oku liyaka locitangi cimue catamba calua ketambululo lia suapo kepulilo eli. Nda ka kuli etambululo lia suapo, ohali yamamako kuenda omunu wa pita locitangi caco o sumua calua. Ndeci, kũlĩhĩsa ulandu wa Bruni.

Bruni wa popia hati: “Omõlange ukãi wa fa vanyamo amue a pita.” Nda tavele ku Suku, kuenje nda sanda elembeleko kocitunda. Eye wa ndi sapuila hati Suku wa ambata Susanne kilu, eye cilo ungelo umue. Sia kuatele lika esumuo omo liolofa viaye, nda suvukilevo Suku omo o wambata kilu. “Evalo, kuenda ohali ya Bruni viamamako, vanyamo alua. Kuenje Ombangi yimue ya Yehova ya ndekisa Vembimbiliya okuti sia kuatele esunga lalimue lioku suvuka Suku. Yehova ka ambatele Susanne kilu kuenda eye ungeloko. Uveyi waye onima yekambo lioku lipua. Susanne wa pekela kolofa, loku lavoka okuti Yehova o ko pindula. Nda lilongisavo okuti, eye wa lulika omunu oco a kale otembo ka yi pui palo posi vocumbo celau kuenda eci oco ci ka pita kovaso yoloneke. Eci nda fetika oku kuata elomboloko ndomo Yehova a tuwa, nda amela kokuaye kuenje esumuo liange lia fetika oku tepuluka.”—Olosamo 37:29; Ovilinga 24:15; Va Roma 5:12.

Omanu valua va siata oku liyaka lovitangi volonjila via litepa, ndeci ovilunga ovoyaki onjala ale lovilemawe. Bruni wa yeva ekavuluko eci a mola Vembimbiliya okuti Yehova hayeko o kuete eko omo liovitangi tu liyaka lavio kuenda lalimue eteke a kuatele ocimãho cokuti, omanu va tala ohali kuenda ndopo o ka malako ũvi. Oku livokiya kuevĩho ondimbukiso yokuti tu kasi “koloneke via sulako” violuali lulo. Epongoloko likomohĩsa tu lavoka li kasi ocipepi.—2 Timoteo 3:1-5; Mateo 24:7, 8.

Oku Kũlĩha Suku

Hans la Bruni va kuatele ovisimĩlo ka via suilepo via tiamẽla ku Suku. Va tavele kokuaye ndaño ka va kũlĩhĩle ovina vialua viatiamẽla kokuaye. Eci va likolisilako oku u kũlĩha Yehova ndomunu, alikolisilo avo kuata onima. Va kuata atambululo asuapo apulilo a kuete esilivilo koloneke vilo. Kuenje ca va kuatisa oku kuata ombembua yovutima kuenda elavoko lia kolapo liokovaso yoloneke. Olohuluwa via fendeli va Yehova va kuatavo ovolandu amuamue.

Oku kũlĩha Suku ku fetikila loku konomuisa lutate Embimbiliya lina li tu sapuila catiamẽla kokuaye kuenda eci a tu yonguila. Eci oco vamue kocita catate va linga. Ulume umue ukuavolandu haiye ndotolo Luka wa lombolola okuti, vamanji vovekongelo lia va Yudea ko Berea ko Helasi, “va tambula ondaka [ya Paulu la Sila] lonjongole yalua kuenda va enda oku konomuisa lutate Ovisonehua eteke leteke loku kũlĩhĩsa nda ovina Paulu a popia viocili.”—Ovilinga 17:10, 11.

Akristão vo kocita catete va enda oku liongolola va kongelo. (Ovilinga 2:41, 42, 46; 1 Va Korindo 1:1, 2; Va Galatia 1:1, 2; 2 Va Tesalonike 1:1) Cimuamue haico koloneke vilo. Akongelo Olombangi Via Yehova a siata oku linga olohongele via pongiyiwa ciwa oco ci kuatise omunu lomunu oku kuata ukamba la Yehova loku kuata esanju poku uvumba. Oku likongela Lolombangi Via Yehova pocitumãlo o kasi cinena esumũlũho likuavo. Omo okuti omanu va seteka oku setukula Suku una vavumba, Olombangi Via Yehova vi lekisa ovituwa eye a kuete ndaño lonjila yi sulemo. Omo liaco, oku liongolola lavo ci tu kuatisa oku kũlĩha ciwa Yehova.— Va Heveru 10:24, 25.

Ci sukila hẽ elikolisilo lialua oco tu kũlĩhe omunu umue? Ocili okuti ci sukila. Pole, eci ka ci tiamisiwilavo hẽ kovina vialua viomuenyo o yongola oku kuata? Sokolola elikolisilo umue wa kemãla ko ku yoloka a linga oco a li pindise. Ndeci, Jean-Claude Killy, ko Fransa, wa yula ocingangu conjivaluko culu ko esqui, wa popia eci sukiliwa oco omunu a li tunde ciwa komapalo yi lingiwa lolofeka vi kuavo hati: “Ci sukila oku fetika oku lipongiya selo osimbu ka papitile 10 kanyamo loku ci sokiya anyamo akuamamo kuenda oku ci sokolola  oloneke viosi . . . upange umue u lingiwa oloneke 365 vunyamo kovisimilo kuenda ketimba.” Otembo yosi eyi kuenda elikolisilo li pesiwa komapalo yimue yoku yoloka okuti pamue yi tumala lika akukutu ekũi! Ocili okuti asumũlũho eyilila koku kũlĩha Yehova a velapo vali kuenda a kala otembo yosi.

Ukamba Umue wa Pama

Helie o yongola oku pumba ocina cimue ci kuete esilivilo komuenyo? Lomue. Omo liaco, nda wa limbuka okuti omuenyo wove ka u kuete ocimãho cocili ale o yongola oku kuata elomboluilo lieci ku kasilili ovitangi, nõlapo oku kũlĩha Yehova Suku usovoli Wembimbiliya. Oku lilongisa catiamẽla kokuaye ci pondola oku pongolola omuenyo wove cilo kuenda otembo ka yi pui.

Anga hẽ eteke limue ka ku kala vali oku lilongisa catiamẽla ku Yehova? Vana va kasi ale oku uvumba vanyamo alua toke cilo va komõha leci va lilongisa catiamẽla kokuaye kuenda ovina vio kaliye va kasi oku amamako oku lilongisa viatiamẽla kokuaye. Oku lilongisa ovina viaco ci tu nenela esanju kuenda ci tu amisa kokuaye. Omo liaco, tu kapiko ovisimilo viupostolo Paulu wa soneha hati: “Ukuasi, lolondunge, lukũlĩhĩso wa Suku via longa cimue! Lomue o tẽla oku kuata elomboloko lionjila yoku tetulula kuaye kuenda lomue o tẽla oku kũlĩha olonjila viaye! Momo “helie wa kũlĩha ovisimĩlo via Yehova, ale helie wa linga ondunguli yaye? ”—Va Roma 11:33, 34.

[Etosi Pombuelo Yemẽla]

[Olondaka vi teta onimbu kemẽla 5]

Omanu lopo handi va linga apulilo amuamue a kuate esilivilo ndeci: “Momo lie ñasilili komuenyo? Nye tu lavoka kovaso yoloneke?” Cipi ocimaho komuenyo?

 [Olondaka vi teta onimbu kemẽla 6]

“Eci nda fetika oku kuata elomboloko ndomo Yehova a tuwa, nda amela kokuaye.”

[Olondaka vi teta onimbu kemẽla 7]

“Oku vumba Yehova olio ekalo lia velapo komuenyo. La cimue ci sokisiwa laco. Oku kũlĩha Yehova ca nyiha ocimãho komuenyo.”