Poku Tata Umue Ukuepata O Vela Lipamisa Kespiritu

MANJI umue ukãi o tukuiwa hati Kim, ndaño wa kala ale locipumbu konele yoluongo, olondotolo via limbuka okuti wa kalavo luvei wo kanser. * Ulume waye Steve wa popia hati: “Noke yoku pepaliwa ocipumbu caco, Kim, wa enda oku siũliwa lolomakina kuenda oku tambula ovihemba vialua. Ovihemba viaco vio honguisa, kuenje, ka tẽlele vali oku enda.”

Ove o tẽla oku sokolola evalo Steve a yeva poku mola ndomo ukuacisola caye a kala oku hongua? Pamue o kuete umue ukuepata liove wa hongua omo lioku vela, ale wo liyaka lovitangi viyilila koku kuka. (Uku. 12:​1-7) Oco o tate locisola ngandiove o vela, o sukila oku litata ove muẽle. Nda wa hongua kespiritu, ku ka kuata ongusu yoku tata ngandiove o vela. O pondola hẽ oku lipamisa ndati kespiritu osimbu o tata umue ngandiove o vela, ale wa kuka? Nye vamanji vekongelo va sukila oku linga oco va lekise ocisola komunu umue o vela?

O Lekisa Ndati Esunguluko?

Oco amameko oku lipamisa kespiritu, o sukila oku lekisa esunguluko osimbu o tata ngandiove o vela, kuenda oku sokiya ciwa otembo longusu yove. Elivulu Liolosapo 11:​2, NW, li popia hati: “Ava va sunguluka puãi, ovo va kuete olondunge.” Vocinimbu eci, ondaka oku “sunguluka,” yi lomboloka oku limbuka okuti ka tu tẽla oku linga ovina viosi. Oco ku ka linge ovina vi pitahãla epondolo liove, kũlĩhisa ciwa esokiyo liove kuenda ovikele o kuete.

 Steve, wa lekisa olondunge lesunguluko poku kũlĩhisa ovopange a kala oku linga. Ndaño lupange woku sanda eteku, eye wa kala usongui wakulu vekongelo, haeye mitavaso yupange vekongelo Liolombangi via Yehova ko Irlanda. Eye wa tiamẽle ko Comissão de Ligação Hospitalar. Steve wa lombolola hati: “Ndaño lovikele nda kuatele, Kim lalimue eteke a liyeyele okuti sio kapeleko. Puãi, nda limbuka okuti si kuete epondolo lioku linga ovina viosi.” Oco hẽ, Steve wa tetulula ndati ocitangi caco? Eye wa popia hati: “Noke yoku ci kũlĩhisa ciwa lohutililo, nda nõla oku siapo ocikele coku kala usongui wakulu vekongelo. Nda amamako oku kala ukulu wekongelo, pole, oku eca ku vakuetu ovikele vimue nda kuatele, ca ñuatisa oku pita otembo yalua la Kim loku u lingila ovina vikuavo a sukilile.”

Vokuenda kuotembo, Kim wa fetika oku kuata uhayele. Steve lukãi waye Kim, va kũlĩhisa omuenyo wavo, kuenje, eye wa tambula vali ovikele a kuatele vekongelo, lekuatiso liukãi waye. Steve wa lombolola hati: “Tua likolisilako oku talavaya  ndaño luhayele utito. Ngeca olopandu ku Yehova kuenda mandulavo ukãi wange, okuti ndaño loku vela, wa ñuataisa.”

Kũlĩhisavo ulandu wa Jerry lukãi waye Maria, va kala kupange woku nyula akongelo. Ovo va siapo upange waco oco va tate olonjali viavo via kuka. Maria, hati: “Ame lulume wange tua kuatele ocimãho coku kala olomisionaliu kofeka yikuavo. Omo Jerry wa kala omõla wongunga, olonjali viaye via sukilile ekuatiso, yu tua nõlapo oku kala ko Irlanda. Eci ca tu ecelela oku kuatisa isia ya Jerry wa kala kosipitali toke eci a fa. Cilo, tua siata oku sapela la ina ya Jerry eteke leteke, kuenda tu u kuatisa eci a sukila cimue. Ekuatiso vamanji vekongelo va ecaeca ku ina ya Jerry, li tu ecelela oku amamako kupange woku nyula akongelo.”

Ndomo Vakuetu va Kuatisa

Upostolo Paulu poku lombolola ekuatiso li eciwa kovimbumba via kuka vekongelo, wa soneha hati: “Umue nda ka kuatisa vangandiaye, ca piãla vakuanjo yaye, ca lomboloka okuti wa likala etavo liaye, u ka tavele wo velapo.” Paulu wa ivaluisa Akristão okuti, oco ovilinga viavo vi ‘sunguluke ku Suku’ te va kuatisa lolombongo olonjali viavo kuenda va inakulu yavo va kuka. (1 Tim. 5:​4, 8) Pole, vamanji vosi vekongelo va kuetevo ocikele coku eca ekuatiso.

Kũlĩhisa ulandu wa Hakan la Inger, olohueli vimue via kuka kofeka yo Suesia. Hakan wa popia hati: “Eci va tu sapuila okuti ukãi wange o kuete uvei wo kanser, tua sumua calua. Inger wa kuatele uhayele haeye wa pamele. Omo tu endaenda kosipitali oloneke viosi, ovihemba vio honguisa calua. Inger wa kala konjo, kuenda ame ndaenda oku kala laye oco ndu kuatise.” Ekongelo lia kuatisa ndati Hakan la Inger?

Akulu vekongelo va linga esokiyo lioku va kuatisa oku yevelela ovipama violohongele votelefone. Handi vali, vamanji va enda oku va nyula loku sapela lavo votelefone. Va va tumasailevo ovikanda. Hakan wa popia hati: “Vamanji kumue la Yehova va tu pamisa calua. Kuenje, eci ci tu kuatisa oku pama kespiritu. Tua sanjuka calua omo Inger o kasi oku kaya kuenda kaliye tu tẽla oku enda kolohongele Vonjango Yusoma.” Eci vamanji kuenda akulu vekongelo va likolisilako oku kuatisa olombeyi kumue lomanu va kuka, va linga ‘akamba va sole olonjanja viosi, haivo va linga vamanjetu koloneke viohali.’​—⁠Olosap. 17:⁠17.

Yehova o Sanjukila Alikolisilo Ove

Ocili okuti ka ca lelukile oku tata ngandietu o vela. Soma Daviti wa soneha hati: “U ivaloka olohukui” lava va kasi oku vela, “wa sumũlũha.”​—⁠Osa. 41:⁠1.

Momo lie tu popela tuti, u o tata omunu o vela wa sumũlũha? Elivulu Liolosapo 19:​17, li popia hati: “U o linga olosuke ohenda wondika Yehova, kuenje Yehova u tiuwila oviali viaye.” Suku yocili wa kapako afendeli vaye vana va vela kuenda o sumũlũisa vana va lekisa ohenda kolombeyi. Ukualosamo Daviti, wa imba hati: “Yehova u kolisa eci a kasi pula loku vela. Eci a vela o sakula ovovei aye osi.” (Osa. 41:⁠3) Tu koleli okuti eci tu kuatisa vana va tala ohali, Yehova o tu kuatisavo.

Oku limbuka okuti Yehova Suku o lete ekuatiso tu eca ku vangandietu va vela, ci tu sanjuisa calua! Ndaño ka ca lelukile oku ci linga, Ovisonehua vi lekisa okuti “Suku o sanjukila ovilumba ndevi.”​—⁠Va Hev. 13:⁠16.

[Atosi pombuelo yamẽla]

[Olondaka vielitalatu kemẽla 18]

Lipamisa kespiritu kuenda tava ekuatiso lia vakuene