Momo Lie Tu Sukilila Oku Pitisa Kovaso Upange Wa Yehova?

“Eteke liosi omẽla wange u sapula ovilinga viove viesunga levi vieyovo.”​—OSA. 71:15.

O TAMBULULA NDATI?

Ovina vipi Noha, Mose, la Yeremiya kuenda Paulu va pitisile kovaso?

Nye o sukila oku kũlĩhĩsa oco o limbuke ovina wa pitisa kovaso?

Momo lie wa nõlelapo oku pitisa kovaso upange wa Yehova?

1, 2. (a) Nye ci lekisa okuti, omunu eye o sukila oku litumbika ku Yehova? (b) Ongangu ya Noha, la Mose, leyi ya Yeremiya, kuenda ya Paulu, yoku nõla ovina va pitisile kovaso yi tu vetiya oku linga nye?

 ECI wa litumbika ku Suku poku papatisiwa, wa linga ondonge ya Yesu, kuenda wa eca ananga a velapo. Elitumbiko liove ku Suku, li kuete esilivilo lia velapo. Li sokisiwa lomunu o popia hati: ‘A Yehova ndi yongola okuti o kala Cime cange kovina viosi. Ndinalavayi yove. Ndi yongola okuti, o ndi lekisa ndomo nda siata oku pesela otembo, ovina nda pitisa kovaso, ukuasi wange, kuenda oku loñoloha kuange.’

² Nda wa litumbika ale ku Yehova, kuenje, wa papatisiwa, eyi oyo ohuminyo yatete wa linga kokuaye. Omo liaco, o sesamẽla epandiyo, momo wa linga ocina ca sunguluka haico ca velapo. Wa limbuka hẽ okuti, voku tava ku Yehova oco a linge Cime cove, mua kongela oku kũlĩhĩsa ndomo wa siata oku pesela otembo? Ongangu ya Noha, la Mose, leyi ya Yeremiya, kuenda yupostolo Paulu yi tu kuatisa oku konomuisa epulilo lia lingiwa ndeti. Momo omunu lomunu pokati kavo, wa vumba Yehova lutima waye wosi. Ekalo lietu li sokisiwa leli liavo. Ovina va pitisile kovaso vi tu vetiya oku kũlĩhĩsa ndomo tua siata oku pesela otembo yetu.​—Mat. 28:19, 20; 2 Tim. 3:1.

OSIMBU ETANDE KA LIEYILE HANDI

3. Oloneke vietu, vi sokisiwa ndati levi via Noha?

³ Yesu wa sokisa otembo ya Noha, leyi yetu poku popia hati: “Ndeci ca kaile koloneke via Noha haico ci kala eci [Mõlomunu] a tukuluka. Momo koloneke viaco, osimbu etande ka lieyile, omanu va kala loku lia kuenda oku nyua, oku kuela loku kueliwa, toke keteke Noha a iñila vocimbaluku. Puãi ka va limbukile cimue,  toke eci etande lieya kuenje lia va nyõla vosi.” (Mat. 24:37-39) Koloneke vilo, omanu valua va sakalala lika loku sandiliya ovina viwa viomuenyo, momo ka va limbukile okuti, tu kasi kotembo ya sulako. Omanu vaco, ka va kapeleko alungulo a siata oku eciwa lafendeli va Suku. Valua pokati kavo ka va tava kondaka yokuti, Suku ndopo o ka nyõla olondingaĩvi,​—ndeci a linga koloneke via Noha. (2 Pet. 3:3-7) Ndaño okuti Noha wa kala pokati komanu va vĩha, pole, wa pesela ndati otembo yaye?

4. Kovina vipi Noha a pesila otembo yaye, noke yoku tambula ocikundi ku Yehova, kuenda momo lie?

⁴ Noha noke yoku kũlĩha ovina Suku a laikele oku linga, wa tambula ocikundi coku tunga ocimbaluku oco a popele omanu kumue lovinyama. (Efet. 6:13, 14, 22) Noha wa kundilavo omanu catiamẽla kesombiso Yehova a laikele oku nena kolondingaĩvi. Upostolo Petulu poku lekisa okuti Noha wa velisilepo upange woku kuatisa omanu oco va limbuke okuti ekalo liavo lia kala kohele, wa popia hati, Noha “wa sapula esunga.” (Tanga 2 Petulu 2:5.) O tava hẽ okuti, Noha kumue lepata liaye nda va ecelela oku pitisa kovaso oku sandiliya ovokuasi, loku kuata omuenyo uwa ndowu omanu vo koloneke viaye va kuata? Ka va ci lingile! Ovo, va yuvula oku sandiliya ovina viaco, momo va velisilepo upange va tambuile ku Suku.

OMBUALE YIMUE YO KEGITO, YA NÕLA CIWA ONJILA A KUAMA

5, 6. (a) Elilongiso Mose a tambula Kegito nda lio kuatisa oku lipongiyila ovina vipi? (b) Momo lie Mose a yuvuila ovokuasi o Kegito?

⁵ Tu kũlĩhĩsi ulandu wa Mose okuti, wa kulila kelombe lia soma yo Kegito, momo wa kala omõla wokatumba womõla wukãi wa Fareo. Omo okuti, wa kala ombuale, wa longisiwa ‘uloño wosi wo Kegito.’ (Ovil. 7:22; Etu. 2:9, 10) Wa tambula elilongiso liaco, oco a kuate ovikele via velapo kelombe lia Fareo. Eye nda wa kuata ekemãlo omo lioku kala ombiali ya velapo yo koloneke viaye, kuenje, nda wa kuata ovokuasi, kuenda ekalo liwa. Anga hẽ Mose wa sanjukilile oku kuata ovina viaco?

⁶ Omo liepindiso Mose a tambula kolonjali viaye eci a kala omõla, wa kũlĩhĩle ohuminyo Yehova a linga kuvakukululu vaye, Avirahama, Isake, kuenda Yakoba. Mose wa kolelelele okuti ohuminyo yaco yi tẽlisiwa. Eye, wa sokolola lutate, ovina via laikele oku iya kovaso yoloneke kotembo yaye, kuenje, wa lekisa ekolelo ku Yehova. Nye Mose a linga, eci otembo ya pitĩla yoku nõla pokati koku kala ombuale yo Kegito, ale oku linga upika? Wa nõlapo oku talisiwa ‘ohali kumue lomanu va Suku, poku yuvula oku sanjukila esanju li tunda kekandu.’ (Tanga Va Heveru 11:24-26.) Noke wa tava oku songuiwa lolonumbi via Yehova. (Etu. 3:2, 6-10) Momo lie Mose a ci lingila? Momo wa kolele kolohuminyo via Suku. Eye wa kũlĩhĩle okuti, ka  ponduile oku kuata ekalo liwa Kegito. Handi vali, ofeka Yegito yeya oku yambuiwa afengi ekũi a tunda ku Suku. Ulandu waco u longisa nye afendeli va Yehova koloneke vilo? Ndaño okuti olonjanja vimue tu linga upange woku sanda eteku, kuenda ovitalukilo vi nena esanju, pole, tu sukila oku pitisa kovaso upange wa Yehova.

YEREMIYA WA KŨLĨHĨLE OVINA VIA LAIKELE OKU IYA

7. Ekalo lia Yeremiya li sokisiwa ndati leli lietu?

⁷ Ulume ukuavo okuti wa pitisile kovaso upange wa Yehova, uprofeto Yeremiya. Yehova wa tumĩle Yeremiya oku imba owanji wovaprofeto, poku sapula eyambulo kolonanguluke via kala vo Yerusalãi kuenda vo Yuda. Yeremiya wa kala “koloneke viesulilo,” liotembo yaye. (Yer. 23:19, 20) Eye wa kũlĩhĩle okuti ovitangi via kala koloneke viaye, vi ka sulila.

8, 9. (a) Momo lie Baruke a sukilile oku pengulula ovisimĩlo viaye? (b) Nye tu sukila oku ivaluka nda tu yongola oku linga ocina cimue?

⁸ Ovisimĩlo vipi via sunguluka Yeremiya a kuata? Omo wa kũlĩhĩle okuti ofeka yaco ya laikele oku nyõliwa, ka sandiliyile ovokuasi. Anga hẽ ka sukilile oku ci linga? Pole, Baruke, una wa kala usonehi wa Yeremiya, ka kuatele elomboloko liaco. Omo liaco, Suku wa vetiya Yeremiya oku u sapuila hati: ‘Tala, eci nda tunga ndi ci tungulula, leci nda tuika ndi ci tukũla, okuti ofeka yosi. O kasi oku lisandela calua ovina vinene. Ku ka vi sande, momo, tala, ndi nenẽla omanu vosi ũvi. Ndu ku ĩha omuenyo wove ndohuate yovita kuosi wenda.’​—Yer. 45:4, 5.

⁹ Ka tua kũlĩhĩle “ovina vinene” Baruke a kala oku sandiliya. a Pole, tua kũlĩha okuti, ovina viaco, nda ka vio nenelele epopelo, momo vieya oku nyõliwa eci va Bavulono va tambula o Yerusalãi kunyamo wo 607, K.Y. O pondola oku limbuka ovina tu lilongisa kulandu waco? Ndaño tu sandiliya eteku lieteke leteke, pole, tu sukila oku lipongiyila ovina vi keya kovaso yoloneke. (Olosap. 6:6-11) Anga hẽ ca sunguluka oku pesila otembo longusu yetu kovina ka vi tu kuatisa otembo ka yi pui? Ocisoko ca Yehova ca siata oku tunga Olonjango Viusoma, olofiliale, kuenda ovina vikuavo viatiamẽla kupange waye. Ovina viaco, lalimue eteke vi ka nyõliwa, momo vi kuete ocimãho coku kuatisa kupange Wusoma. Omo liaco, afendeli va Yehova va sukila oku pitisa kovaso ovopange aco, poku sokiya ovina va yongola oku linga. Ove hẽ wa kapako ocikundi coku ‘sandiliya tete usoma, kuenda esunga lia Yehova’?​—Mat. 6:33.

“OVINA VIOSI NDI VI TENDA ÑO NDOVIPELEKESE”

10, 11. (a) Ovina vipi Paulu a pitisile kovaso eci a linga Ukristão? (b) Momo lie Paulu a lingila apongoloko kovimãho viaye?

¹⁰ Kaliye tu konomuisi ongangu ya Paulu okuti, osimbu ka lingile handi Ukristão, wa molehele okuti, o ka kuata omuenyo uwa. Eye wa longisiwile ovihandeleko via va Yudea, lulongisi umue wa kemãlele calua wo koloneke viaye. Kuenda wa tambuile ocikele ca velapo kocitunda cinene ca va Yudea. Paulu wa kuatelevo ukũlĩhĩso wa velapo wovilongua via va Yudea okuti, omanu vakuavo vo koloneke viaye ci sule. (Ovil. 9:1, 2; 22:3; 26:10; Va Gal. 1:13, 14) Pole, eci a limbuka okuti Yehova ka sumũlũisile vali va Yudea, wa pongolola ovisimĩlo viaye.

¹¹ Paulu wa limbukile okuti, oku kuama ovimãho via va Yudea, ka ca kuatele esilivilo kovaso a Yehova, momo ka ci nena elavoko lio kovaso. (Mat. 24:2) Eci Paulu a kuata elomboloko lia velapo liatiamẽla kocipango ca Suku, kuenda esumũlũho lioku  litumbika kupange woku kunda, wa tenda elilongiso lia va Fariseo, “ndepese.” Paulu wa siapo etavo lia va Yudea, kuenje, osimbu ka endele handi kilu, wa litumbikile kupange woku kunda olondaka viwa.​—Tanga Va Filipoi 3:4-8, 15; Ovil. 9:15.

KŨLĨHĨSA OVINA WA PITISA KOVASO

12. Ovina vipi Yesu a pitisile kovaso noke yepapatiso liaye?

¹² Noha, Mose, Yeremiya, la Paulu kuenda afendeli vakuavo, va pesila otembo yalua longusu yavo kupange wa Suku. Ovo va tu sila ongangu yiwa. Pole, Yesu eye ongangu ya velapo pokati kafendeli vosi va Yehova. (1 Pet. 2:21) Yesu noke liepapatiso liaye, wa lieca olumue kupange woku kunda olondaka viwa, kuenda wa sivaya Yehova. Ukristão una wa limbuka okuti Yehova eye Cime caye, o pitisa kovaso upange Waye lutima wosi. Ove hẽ o kuete ovisimĩlo viaco? Tu tẽlisa ndati ovikele vietu vekongelo, osimbu tu linga upange woku sanda eteku?​—Tanga Osamo 71:15; 145:2.

13, 14. (a) Ovina vipi Akristão vosi va sukila oku kũlĩhĩsa lutate? (b) Ocina cipi afendeli va Suku va sanjukila oku linga?

¹³ Vokuenda kuanyamo alua, ocisoko ca Yehova ca siata oku vetiya Vamanji oku kũlĩhĩsa ekalo liavo lolohutilo oco va litumbike kupange wakundi votembo yosi. Omo okuti afendeli vamue va Yehova va siata oku liyaka lovitangi, ka va pondola oku talavaya ci soka 70 kolowola vosãi. Pole, ka va sukila oku sumua. (1 Tim. 5:8) Ove hẽ o kuete uhayele u ku ecelela oku ci linga? O pondola hẽ oku litumbika kupange wakundi va velapo?

¹⁴ Sokolola esanju afendeli valua va Suku va kuata vokuenda kuotembo Yonjivaluko yunyamo ulo. Vokuenda kuosãi Yelombo, kua lingiwa esokiyo limue lilikasi lia ecelela okuti, vamanji va pondola oku linga upange wakundi vasokamo poku nõla oku eca 30 ale 50 kolowola. (Osa. 110:3) Vamanji valua va litumbikile kupange waco, va kuata esanju. O pondola hẽ oku linga esokiyo oco o kuate esanju ndeli vamanji yaco va kuata kupange woku kunda? Manji umue okuti wa litumbikile kupange wakundi vasokamo, kesulilo lieteke leteke wa kuata esanju, kuenje, wa popia hati: “A Yehova nda tẽlisa ovina ndi pondola oku linga kupange wove.”

15. Ocimãho cipi umalẽhe umue Ukristão a sukila oku kũlĩhĩsa osimbu a kasi oku malusula oku tanga kosikola?

¹⁵ Nda ove umalẽhe umue o kasi oku malusula oku tanga kosikola, citava okuti o kuete uhayele, kuenda ku kuete ovikele vialua vepata. Wa kũlĩhĩsa nda hẽ ekalo liove li ku ecelela oku litumbika kupange wakundi va velapo? Pole, alongisi vo kosikola va siata oku vetiya amalẽhe locisimĩlo cokuti, nda va pita kosikola ya velapo va ka kuata upange uwa. Ndaño alongisi vaco va kolela kovokuasi oluali lulo, kuenda kolombongo, ovina viaco ka vi ka popela omanu kovaso yoloneke. Pole, oku kuata ocimãho coku litumbika kupange wa Suku ci nena esanju ka li pui. Nda wa ci linga, o kuama ongangu ya Yesu. Eyi oyo onjila ya sunguluka haiyo yi nena esanju, kuenda yi ku teyuila kovitangi. Ovina viaco vi lekisa okuti, wa kapako ohuminyo yove yoku litumbika ku Yehova.​—Mat. 6:19-21; 1 Tim. 6:9-12.

16, 17. Apulilo api tu sukila oku linga atiamẽla kupange woku sanda eteku kuenda kovina vikuavo?

¹⁶ Koloneke vilo, afendeli valua va Suku va siata oku pesila otembo kupange woku sanda ovina epata li sukila. Vakuavo ndaño va kuete ale ovina va sukila pole, va talavaya calua.   (1 Tim. 6:8) Vakualomĩlu, va siata oku pilisa ovitanda viavo locimãho coku tu vetiya oco tu lande ovina viokaliye. Pole, Akristão vocili ka va yongola oku vetiyiwa loluali lulo lua vialiwa la Satana. (1 Yoa. 2:15-17) Vana va liwekapo oku talavaya kupange woku sanda eteku, momo lie ka va litumbikila kupange wakundi votembo yosi, oco va pitise kovaso upange wa Yehova?

¹⁷ Afendeli vosi va Yehova va sukila oku lipula ndoco: Ovina vipi nda pitisa kovaso? Nda pitisa hẽ kovaso upange Wusoma? Nda siata hẽ oku kuama ongangu ya Yesu yoku lieca olumue? Nda kapako hẽ elaleko lia Yesu lioku u kuama otembo yosi? Ndi sukila hẽ oku linga esokiyo liwa oco ndi kuate otembo yoku kunda kuenda oku linga ovopange akuavo Usoma? Nda okuti cilo ekalo liange ka li ngecelela oku vokiya upange woku kunda, ndi pondola hẽ oku lekisa ocituwa coku lieca olumue?

‘KUATA OMBILI YOKU LINGA UPANGE’

18, 19. Ovina vipi o sukila oku kongela volohutililo, kuenda momo lie epingilo liaco li ponduila oku sanjuisa Yehova?

¹⁸ Tua siata oku limbuka ombili afendeli va Suku va kuete. Pole, vamanji vamue ndaño ka va kuete ovina vi va tateka, ka va yongola oku litumbika kupange wakundi votembo yosi. (Etu. 4:10; Yer. 1:6) Nda wa siata oku liyaka locitangi caco, nye o sukila oku linga? Ku sukila hẽ oku ci kongela volohutililo viove? O sukila oku ci linga. Paulu wa sapuila Akristão hati, Yehova ‘o kasi oku linga upange waye vokati kene, oco vu kuate ombili yoku linga ocipango caye.’ (Va Fil. 2:13) Nda ku kuete ombili yoku vokiya upange woku kunda, pinga ku Yehova oco a ku kuatise oku kuata ombili loku loñoloha kupange waco.​—2 Pet. 3:9, 11.

¹⁹ Noha, Mose, Yeremiya, la Paulu, kuenda Yesu, vosi yavo va liecele olumue kupange woku kunda. Va pesila otembo longusu yavo koku kunda esapulo liatiamẽla kalungulo a Yehova. Ovo va yuvula oku tatekiwa lovitalukilo violuali. Omo okuti, esulilo lioluali lulo li kasi ocipepi, vosi yetu tu sukila oku litumbika ku Suku, loku likolisilako oku kuama ongangu yomanu va tukuiwa Vovisonehua. (Mat. 24:42; 2 Tim. 2:15) Nda tua ci linga, tu sanjuisa Yehova, kuenda tu kuata asumũlũho alua.​—Tanga Malakiya 3:10.

[Atosi pombuelo yamẽla]

[Apulilo Elilongiso]

[Elitalatu kemẽla 21]

Omanu ka va tavele kelungulo lia Noha

[Elitalatu kemẽla 24]

Wa kũlĩhĩsa hẽ ekalo liove nda o pondola oku litumbika kupange wakundi va velapo?