Kosãi ya Cembanima yunyamo wo 2009, esombiso lia lingiwa Lekanga Linene lio ko Rusia, lia tuma oku yika Onjango Yusoma Yolombangi Via Yehova volupalo luo Taganrog, ko Rusia. Kuenje, va tambula eci ci soka 34 kalivulu ana ovo va simĩle okuti, ka a sungulukile. Esapulo liaco, lia kapiwa vonumbi yo Internet Yolombangi Via Yehova, kumue lalitalatu Olombangi Via Yehova via pita locitangi caco, oku kongelamo omãla.

Noke yolosãi vimue, Oseketa yi songuila Upange Wolombangi Via Yehova ko Rusia, ya tambula okakasia kamue mua endela ukanda wepata limue li kasi volupale luo Queensland, ko Australia. Epata liaco, lia mola ulandu Wekanga lia lingiwa, kuenje va popia hati: “A Vamanji wa Soliwi. Omãla vetu ndeci: Cody la Larissa, va pamisiwa calua, omo liekolelo lepandi vamanjavo ko Rusia va lekisa poku lambalaliwa. Ovo va soneha ovikanda, kuenda va eca olombanjaile tu kasi oku tumisa komãla va sangiwa volupale luo Taganrog, oco va kũlĩhe okuti, kovitumãlo vikuavo kulivo omãla va kasi oku vumba Yehova lekolelo kuenda va kapiwako. Ovo va tuma ovilamo viocisola kokuavo.”

Noke yoku tambula olombanjaile viaco, omãla vo ko Taganrog va soneha ovikanda violopandu, kuenda va vi tumisa kepata li sangiwa ko Australia. Olondaka vi pamisa via tunda ‘vomẽla womãla, via vetiya manji umue o talavaya ko Betele yo ko Rusia’ oku sonehela Cody la Larissa hati: “Oku limbuka ndomo omãla lakulu va talisiwa ohali omo liovina ka va lingile, ci nena esumuo lialua. Ndaño vamanjetu ko Taganrog ka va lingile cimue cĩvi, pole, Onjango yavo Yusoma ya yikiwa. Omo liaco, va sumuile calua. Pole, eci va limbuka okuti va kapiwako la vamanji vo kolofeka vikuavo, ca pamisa ekolelo liavo. Tua pandula calua omo liocisola kuenda ocali wa lekisi kokuavo!”​—Osa. 8:2.

Etu tu panga onepa kongongela ya vamanji voluali luosi, kuenda ocisola tu li kuetele pokati ci tu kuatisa oku yula ovitangi kuenda alambalalo. Osimbu ekanga li lingiwa kuenda alivulu Olombangi Via Yehova a suvukiwa, omãla vetu va li kuetele ukamba la vakuavo. Kuenje, va yuvula olonepele viapata levi violofeka, kuenda va pokola kolondaka via Yesu wa popia hati: “Kokulisola kuene pokati, oko omanu vosi va limbukila okuti vulondonge viange.”​—Yoa. 13:35.