1. Momo lie tu sukilila oku yuvula oku pua epandi?

 OLONEKE via sulako violuali lua Satana, via fetika kunyamo wo 1914, eci Usoma wa Suku wa tumbikiwa kilu. Noke, Yesu wa tundisa kilu Satana Eliapu kumue lolondele viaye, kuenje, va imbiwa palo posi. (Tanga Esituluilo 12:7-9.) Momo wa kũlĩha okuti, kuo kambela ‘otembo yitito.’ (Esit. 12:12) Omo okuti ‘otembo yaco yitito’ yi kasi oku amamako toke cilo, omanu va siata oku sima okuti, esulilo ka likasi oku iya lonjanga. Anga hẽ epandi lietu li kasi oku tepuluka, osimbu tu talamẽla toke eci Yehova a ka kundula oluali lulo lua vĩha?

2. Nye tu konomuisa vocipama cilo?

² Oku pua epandi ci nena ovitangi. Momo, ci tu vetiya oku linga ovina lonjanga okuti ka tu sokolola vali. Tu pondola ndati oku kuata ocituwa coku talamẽla? Ocipama cilo, ci tu kuatisa oku tambulula apulilo a kuãimo ndeci: (1) Ongangu ya Mika yoku talamẽla yi tu longisa nye? (2) Ovina vipi vi lekisa okuti, esulilo li kasi ocipepi? (3) Tu pondola ndati oku sanjukila epandi lia Yehova?

3. Ocituwa cipi va Isareli va lekisa koloneke via Mika?

³ Tanga Mika 7:2-6. Mika uprofeto wa Yehova, wa limbuka ekalo lĩvi lia va Isareli va kala kotembo ya Soma Ahasi, una wa kala ondingaĩvi. Uprofeto Mika wa sokisa va Isareli vana va tomba ovihandeleko via Yehova, ‘nduti umue u kuete olosongo vi toma.’ Ndeci uti u kuete olosongo u pondola oku toma omanu vana va pita ponele yaco, va Isareli va enda oku lingila ovina vĩvi komanu vakuavo. Ovitangi pokati kavo vieya oku li vokiya, momo apata ka va li kuatelele vali ocisola. Omo okuti Mika ka tẽlele oku tetulula ovitangi viaco, wa likutilila ku Yehova oco a kuatisiwe. Noke, wa talamẽla lepandi oco Yehova a tetulule ocitangi caco. Mika wa kolelele okuti, Yehova wa laikele oku tetulula ­ocitangi caco votembo a sokiya.

4. Ovitangi vipi tua siata oku liyaka lavio?

 ⁴ Koloneke vilo, tu kasivo pokati komanu vakuavituwa vĩvi, ndeci ca pita kotembo ya Mika. Valua pokati kavo va linga ‘vakualutukãi, ka va kuete efendelo, kuenda ocikembe la vangadiavo.’ (2 Tim. 3:2, 3) Tu sumua calua poku mola ndomo omanu tu talavaya lavo kupange woku sanda eteku, lava tu tangela kosikola yimuamue, kuenda vana tu lisungue lavo, va lekisa ovituwa viaco ka via sungulukile. Afendeli vamue va Yehova va siata oku liyaka lovitangi vikuavo. Yesu wa sapuila olondonge viaye hati, elambalalo li pondola oku tunda vepata. Omo liaco, wa tukula olondaka vimuamue vi sangiwa kelivulu lia Mika 7:6, oco a lombolole esilivilo liesapulo liaye poku popia hati: “Ndeyilila oku puiyisa omunu la isiaye kuenda omõla ukãi la inaye, londombua la ndatembo yaye yukãi. Kuenje, ovanyali vomunu vakuepata liaye.” (Mat. 10:35, 36) Ka ca lelukile oku lambalaliwa la vakuepata lietu okuti, ka va fendela Yehova! Ka tu ka eceleli oku yapuisiwa lelambalalo liepata lietu. Pole, tu sukila oku amamako loku pandikisa toke eci Yehova a tetulula ovitangi viaco. Nda tua pinga ekuatiso ku Yehova, o tu ĩha ongusu kuenda olondunge tu sukila, oco tu pandikise.

5, 6. Yehova wa sumũlũisa ndati uprofeto Mika omo liepandi a lekisa? Ovina vipi Mika ka muile eci via tẽlisiwa?

⁵ Yehova wa sumũlũisa Mika omo liepandi a lekisa. Eye wa mola oku nyoliwa kua Soma Ahasi, kumue luviali waye wa vĩha. Uprofeto Mika wa mola eci Soma Hesekiya omõla a Ahasi a kapiwa komangu yuviali, kuenda eci a tumbulula efendelo liocili. Mika wa molavo oku tẽlisiwa kuesapulo lia Yehova liatiamẽla koku nyoliwa kua va Samaria, eci va Asuria va kundula uviali wo konano yo Isareli.—Mika 1:6.

⁶ Uprofeto Mika, ka muile oku tẽlisiwa kuolondaka viosi Yehova o sapuilile. Eye wa soneha ndoco: “Koloneke via sulako . . . omunda yonembele ya Yehova oyo yi lepa, olomunda viosi vikuavo vi sule. Koku lepa yi pitahãla oviwulu viosi, kuenje owiñi womanu wamẽla kokuayo. Kuenje, olofeka via lua viya, vi popia, viti: ‘Enjui, tu lamani komunda ya Yehova.’” (Mika 4:1, 2) Eci uprofeto Mika a fa, olondaka viaye ka via tẽlisiwile viosi. Pole, wa amamako oku kolela ku Yehova, ndaño wa liyaka lovitangi vi nena olofa, kuenda ovina vikuavo vĩvi omanu va enda oku u lingila. Uprofeto Mika wa amisako oku soneha ndoco: “Omanu vo kolofeka viosi va ka endela vonduko ya suku yavo, pole, etu tu ka endela vonduko ya Suku yetu otembo ka yi pui.” (Mika 4:5, NW) Uprofeto Mika wa amamako oku pandikisa ndaño lovitangi viaco, momo wa kolelele okuti, Yehova wa laikele oku tẽlisa olohuminyo Viaye viosi. Omo liaco, wa amamako oku kolela ku Yehova.

7, 8. (a) Esunga lie tu kuete lioku kolela ku Yehova? (b) Nye ci tu kuatisa oku limbuka okuti, otembo yi pita lonjanga?

⁷ Anga hẽ tua kolelavo ku Yehova? Tu kuete esunga lioku kolela kokuaye, momo tua siata oku mola oku tẽlisiwa kuocitumasuku ca Mika. Vokuenda ‘kuoloneke vilo via sulako,’ omanu valua va tunda kolofeka viosi, kapata osi, kuenda kalimi osi, va kasi oku londa ‘komunda yonembele ya Yehova.’ Ndaño okuti omanu vaco va tunda volofeka vina muli ukuse, pole, va kasi oku vumba Yehova. Kuenje, ‘olosipata viavo va vi linga atemo,’ kuenda ‘ka va lingi vali uyaki.’ (Mika 4:3) Omo liaco, tu kuete esumũlũho lioku kala pokati kafendeli va Yehova va li kuetele ombembua!

⁸ Tu yongola okuti, Yehova o nena esulilo lioluali lulo lua vĩha. Oco tu talamẽle lepandi, tu sukila oku kuata ovisimĩlo ndevi via Yehova.  Eye, wa sokiya eteke lioku nyõla olondingaĩvi lekuatiso lia Yesu Kristu, una a nõla oco a linge upange waco.’ (Ovil. 17:31) Pole, osimbu eteke liaco ka lieyile, Yehova o kasi oku eca epuluvi komanu okuti va kuata ‘ukũlĩhĩso wocili,’ loku kapako ovina va lilongisa oco va popeliwe. Momo, omuenyo womanu u kasi kohele. (Tanga 1 Timoteo 2:3, 4.) Nda tua lekisa ombili koku longisa omanu oco va kuate ukũlĩhĩso wa Yehova Suku, tu limbuka okuti, otembo yi pita lonjanga. Omo okuti eteke liaco li kasi ocipepi, eci li pitĩla, tu ka eca olopandu ku Yehova, omo lioku tu ĩha epuluvi lioku pitisa kovaso upange woku kunda olondaka viwa Viusoma!

9-11. Anga hẽ ocitumasuku ci sangiwa kelivulu lia 1 Va Tesalonike 5:3 ca tẽlisiwa? Ci lombolola.

⁹ Tanga 1 Va Tesalonike 5:1-3. Ndopo olombiali violuali vi ka popia viti: ‘Tua kolapo, kuenda tu kasi lombembua!’ Oco ka tu ka yapuisiwe lesapulo liaco, tu sukila ‘oku lavulula loku lisuluvika kovina vĩvi’. (1 Va Tes. 5:6) Oco tu amameko oku pamisa ekolelo lietu, tu konomuisi ovina vi ka pita eci ku ka eciwa esapulo liaco.

¹⁰ Kesulilo liovoyaki avali a pita voluali luosi, olombiali violofeka via linga esapulo lioku nena ombembua. Noke, liuyaki watete wa pita voluali luosi, ocisoko ci tukuiwa hati, Liga das Nações, ca likuminyilevo oku nena ombembua. Noke liuyaki wavali wa pita voluali luosi, ocisoko cikuavo ci tukuiwa hati, Nações Unidas, ca likuminyile komanu okuti ci ka nena ombembua voluali luosi. Olombiali kumue lasongui vatavo esanda va simĩle okuti, ovisoko vivali via tukuiwa ndeti, via laikele oku nena ombembua. Ocisoko colo Nações Unidas ca tukula unyamo wo 1986 hati: Unyamo Wombembua Voluali Luosi. Kunyamo waco, olombiali kumue lasongui vatavo esanda, oku kongelamo ocitunda cavelapo Cetavo lio Katolika, va likutilila locimãho coku nena ombembua voluali.

¹¹ Cikale esapulo lioku popia hati, tua kolapo, kuenda tu kasi lombembua, ale asapulo akuavo, lalimue lia tẽlisa ocitumasuku ci sangiwa kelivulu lia 1 Va Tesalonike 5:3.  Momo lie? Momo ocitumasuku coku ‘nyõla oluali ocipikipiki,’ ka ca tẽlisiwile handi.

12. Nye tua kũlĩha catiamẽla kesapulo liokuti, ‘Tua kolapo, kuenda tu kasi lombembua’?

¹² Helie o ka linga esapulo liokuti, ‘tua kolapo, kuenda tu kasi lombembua’? Asongui Vatavo kumue latavo akuavo esanda, va ka kuatisa ndati koku linga esapulo liaco? Olombiali violuali vi ka kongeliwa ndati koku eca esapulo liaco? Embimbiliya ka li lombolola ndomo ci ka lingiwa. Ndaño tua kũlĩha okuti esapulo liaco li ka yevala voluali luosi, pole, ka li ka nena ‘ombembua yocili loku kolapo.’ Momo, Satana eye o kasi oku viala oluali lulo lua vĩha. Nda tua tava kesapulo liaco liuhembi, kuenda ka tu yuvula oku litenga vopulitika, tu kuata ovitangi!

13. Momo lie ovangelo va kasilili oku tateka oku fetika kuohali ya piãla?

¹³ Tanga Esituluilo 7:1-4. Osimbu tu talamẽla oku tẽlisiwa kuocitumasuku ci sangiwa kelivulu lia 1 Va Tesalonike 5:3, ovangelo va kasi oku lavulula toke eci ohali ya piãla yi fetika. Nye va kasi oku talamẽla? Va kasi oku talamẽla oku tẽlisiwa kuocitumasuku upostolo Yoano a tukula catiamẽla koku nõliwa Kuakristão olombuavekua va sulako okuti, “apika va Suku yetu.” a Eci etendelo lia sulako liolombuavekua li tẽlisiwa, ovangelo va ka ecelela okuti, ohali ya piãla yi fetika. Nye ci ka pita noke?

14. Nye ci lekisa okuti, o Bavulono Yinene ndopo yi ka kunduiwa?

¹⁴ O Bavulono yinene okuti oyo ocisoko catavo esanda, ndopo yi nyõliwa. ‘Omanu va tunda kolofeka viosi, kuenda kalimi osi,’ ka va ka tẽla oku teyuila o Bavulono oco ka yi ka nyõliwe. Momo, tu lete ovina vi eca uvangi u lekisa okuti, enyõleho liaco li kasi ocipepi. (Esit. 16:12; 17:15-18; 18:7, 8, 21) Tua siata oku yeva asapulo oluali a lekisa ndomo omanu va kasi oku popia lãvi atavo esanda, kuenda asongui vaco. Asongui vo Bavulono Yinene, ka va limbukile okuti, ndopo va ka nyõliwa. Momo, ovisimĩlo viavo ka via sungulukile! Noke lioku eca esapulo liokuti, ‘Tua kolapo, kuenda tu kasi lombembua!,’ olombiali violuali lulo lua Satana, vi ka ñualelapo atavo osi esanda, loku a kundula. O Bavulono Yinene ka yi ka kalako vali! Omo liaco, tu sukila oku talamẽla lepandi, toke eci ocitumasuku caco ci ka tẽlisiwa.—Esit. 18:8, 10.

15. Momo lie Yehova ka kasi oku nyõlela lonjanga oluali lulo?

¹⁵ Ndaño okuti omanu ka va sumbilile onduko ya Suku, pole, o kasi oku talamẽla lepandi, momo wa sokiya eteke a ka nyõla oluali lulo lua vĩha. Yehova ka yongola okuti, ambombe va nyõliwa. (2 Pet. 3:9, 10) Anga hẽ, tu kuetevo ovisimĩlo ndevi via Yehova? Osimbu eteke lia Yehova ka lieyile, tu pondola oku lekisa okuti, tua sanjukila epandi liaye, poku kapako ovina vi kuãimo.

16, 17. (a) Momo lie tu sukilila oku kuatisa vana va liwekapo oku kunda loku endaenda kolohongele? (b) Momo lie va sukilila oku tiuka lonjanga vocisoko ca Yehova?

¹⁶ Kuatisa vana va liwekapo oku kunda loku endaenda kolohongele. Yesu wa popia hati, ovangelo va kuata esanju eci va limbuka okuti, umue wa liwekelepo oku linga upange wa Yehova, wa tiuka vocisoko caye. (Mat. 18:14; Luka 15:3-7) Yehova wa kapako omanu vana va sumbila onduko yaye, ndaño okuti pamue va liwekapo oku u vumba. Eci tu kuatisa omanu vaco oku tiuka vocisoko ca Yehova, ci sanjuisa Yehova kuenda ovangelo.

¹⁷ Ove hẽ o kasivo pokati komanu vana va liwekapo oku vumba Yehova? Citava okuti, manji umue vekongelo wa ku lingilile ocina cimue ka ca sungulukile, kuenje, wa liwekapo oku kala vocisoko ca Yehova.  Omo okuti pa pita ale otembo yalua tunde eci wa liyaka locitangi caco, o sukila oku lipula ndoco: ‘Cilo ndi kuete hẽ ekalo liwa komuenyo kuenda esanju? Anga hẽ Yehova eye wa ndi sumuisa, ale omunu umue ka lipuile? Anga hẽ Yehova wa lingile ocina cimue ca ndi sumuisa?’ Ocili okuti, Yehova wa siata lika oku tu lingila ovina viwa. Ndaño okuti ka tu kasi oku linga ovina vi likuata lelitumbiko lietu kokuaye, pole, wa siata oku tu ĩha ovina viwa tu sukila. (Tia. 1:16, 17) Ndopo eteke lia Yehova lioku nyõla oluali lulo lua vĩha li pitĩla. Yilo oyo otembo yoku tumbulula ukamba wetu la Yehova, kuenda oku tiukila vocisoko caye. Momo, omo lika tu pondola oku sanga ocitililo koloneke vilo via sulako.—Esin. 33:27; Va Hev. 10:24, 25.

18. Momo lie tu sukilila oku kuatisa vamanji vana va kuete ocikele coku songuila ekongelo?

¹⁸ Tu kuatisi vamanji va kuete ocikele coku songuila ekongelo. Omo okuti Yehova Ungombo umue ukuacisola, wa siata oku tu songuila, kuenda oku tu teyuila. Eye wa nõla Omõlaye oco a songuile ocunda caye. (1 Pet. 5:4) Akulu vekongelo va kasi kueci ci pitahãla 100.000 kakongelo, va siata oku sokiya otembo yoku kuatisa omunu lomunu pokati kolomeme via Yehova Suku. (Ovil. 20:28) Nda tu kuatisa vamanji vana va kuete ocikele coku songuila ekongelo, ci lekisa okuti, tua sanjukila ovina viosi Yehova la Yesu va siata oku tu lingila.

19. Tu pondola ndati oku likuata omunga?

¹⁹ Tu kuati ukamba la vamanji. Olondaka evi vi lomboloka nye? Nda asualali vamue va pindisiwa va kasi kohele yoku kuatiwa lovanyãli vavo, va likuata omunga oco lomue ka ka pondiwe. Koloneke vilo, Satana o kasivo oku lambalala afendeli va Yehova. Omo liaco, tu sukila oku yuvula oku nyõla ukamba wetu la vamanji. Tu likuati omunga la vamanji, kuenda ka tu ka kapiko akulueya avo. Pole, tu amamiko oku kolela ku Yehova.

20. Nye tu sukila oku linga cilo?

²⁰ Vosi yetu tu sukila oku pamisa ekolelo lietu, kuenda oku lekisa ocituwa coku talamẽla. Omo liaco, tu talamẽli lepandi osimbu tu lavoka esapulo liokuti: “Tua kolapo, kuenda tu kasi lombembua!,” loku tẽlisiwa kuoku nõliwa kuolombuavekua via sulako. Noke liovina viaco, ovangelo vakuãla va ka kundula o Bavulono Yinene. Osimbu tu talamẽla oku tẽlisiwa kuovina viaco, tu pokoli kolonumbi via siata oku eciwa la vamanji va nõliwa la Yehova oco va songuile ocisoko caye. Omo liaco, tu yuvuli oku yapuisiwa Leliapu kumue lolondele viaye! Yilo oyo otembo yoku kapako olondaka ukualosamo a popia hati: “Vosi yene wa koleli ku Yehova, kuati utõi, kuenda pamisi ovitima viene.”—Osa. 31:24, NW.