1. Nye Paulu a yeva vutima omo lia vamanji va likolisilako oku kunda olondaka viwa?

UPOSTOLO Paulu wa velisilepo vamanjaye va kala oku likolisilako oku kunda olondaka viwa. Omo liaco, wa soneha ndoco: “Kovaso a Suku Isia tu ivaloka upange wene wekolelo, lovilinga viene viocisola kuenda ndomo elavoko vu kasi lalio vu Ñala yetu Yesu Kristu vu li kuetele epandi.” (1 Va Tesalonike 1:3) Yehova ivalukavo ovina viosi afendeli vaye va siata oku u lingila, kuenda wa va kapako, cikale okuti, va linga upange walua ale utito.—Va Heveru 6:10.

2. Nye tu konomuisa vocipama cilo?

² Cikale kosimbu, ale koloneke vilo, Akristão vocili va siata oku likolisilako oco va pesile otembo yalua kupange wa Yehova. Vocipama cilo, tu lilongisa ndomo Akristão vo kocita catete va vumba Yehova. Tu konomuisavo ovina vamanji va litumbika kupange wotembo yosi va siata oku linga koloneke vilo, kuenda ndomo tu pondola oku va kuatisa.

3, 4. (a) Olonjila vipi vamanji vo kocita catete va kuama poku vumba Yehova? (b) Akundi Vusoma kocita catete, va enda oku feta ndati ovina va sukilile?

³ Eci Yesu a papatisiwa, wa fetika oku kunda ovina viatiamẽla Kusoma, kuenda wa longisa omanu vakuavo oco va lingevo upange waco. (Luka 3:21-23; 4:14, 15, 43) Noke liolofa via Yesu, olondonge viaye via songuila upange woku kunda, kuenda via amamako oku sandeka esapulo liaco. (Ovilinga 5:42; 6:7) Akristão vamue va silepo olonjo viavo, kuenje, va linga olomisionaliu. Filipu wa kundila kolonepa vialua vio Palestina. (Ovilinga 8:5, 40; 21:8) Omo okuti Paulu wa kalavo omisionaliu, wa kundila olondaka viwa kolofeka vialua, ocipãla lofeka a citiwila. (Ovilinga 13:2-4; 14:26; 2 Va Korindo 1:19) Omanu vakuavo oku kongelamo Marko, la Luka, kuenda Siluanu, va soneha alivulu amue Embimbiliya. (1 Petulu 5:12) Vamanji valua akãi, va talavaya kumosi lavo. (Ovilinga 18:26; Va Roma 16:1, 2) Vovisonehua vio Helasi, tu sangamo ovolandu awa a vamanji alume, kuenda akãi. Ovolandu aco a tu ivaluisa okuti, Yehova wa kapako upange afendeli vaye va siata oku linga, kuenda eca kokuavo ovina va sukila.

⁴ Akundi Vusoma kocita catete, va enda oku feta ndati ovina va sukilile? Ovo, ka va endele oku kisika vamanji oco va kuatisiwe, momo, pamue va enda oku linga upange woku sanda eteku volowola vimue veteke. (1 Va Korindo 9:11-15) Pole, va enda oku tava ekuatiso. Vamanji va kuatele ocituwa coku va laleka oco va lie lavo kolonjo viavo, oku eca kokuavo ohondo yoku sikĩla, ale ekuatiso likuavo. Omunu lomunu vekongelo, wa enda oku eca ekuatiso kokuavo.—Tanga Ovilinga 16:14, 15; Va Filipoi 4:15-18.

5. Nye manji umue lukãi waye va popia catiamẽla kupange wotembo yosi?

⁵ Koloneke vilo, vamanji valua va litumbika kupange wotembo yosi, va siatavo oku vumba Yehova volonjila via litepa. (Tala pokakasia losapi hati: “ Olonjila Via Litepa Viupange Wotembo Yosi.”) Nye va yeva kutima omo liomuenyo va nõla? O pondola oku vetiyiwa, nda wa pula umue pokati kavo. Manji umue wa kala ukundi wotembo yosi, ukundi olikasi, omisionaliu, kuenda wa talavaya ko Betele kofeka yikuavo wa popia hati: “Nda limbuka okuti, oku litumbika kupange wotembo yosi, oyo onjila ya velapo kokuange. Eci nda tẽlisa 18 kanyamo, nda liyaka locitangi coku nõla nda ndi lilongisila kosikola ya velapo okuti, noke ndi talavaya kupange woku sanda eteku, ale ndi iñila kupange wakundi votembo yosi. Ovolandu a lekisa okuti, Yehova ka ivalako vana va likolisilako oku litumbika kupange wotembo yosi. Uloño Yehova a nyiha, wa siata oku ndi kuatisa oku linga upange waye lonjila yimue yi  komõhisa okuti, nda nda nõlelepo oku litumbika kovopange oluali, nda sia tẽlele oku tẽlisa ocimãho caco.” Ukãi waye wa popiavo hati: “Ovopange osi a Yehova nda tambula, a ndi kuatisa oku pamisa ekolelo liange. Tua limbuka ndomo Yehova a siata oku tu teyuila, loku tu songuila okuti, nda tua kalele kimbo lietu, nda ka tua kuatele ekuatiso liaco. Oloneke viosi nda siata oku eca olopandu ku Yehova, omo lioku litumbika kupange wotembo yosi.” O yongola hẽ oku kuama ongangu yavo komuenyo wove?

6. Nye Yehova a yeva vutima omo liupange o kasi oku u lingila?

⁶ Kuli vamanji vamue okuti, ka va pondola oku litumbika kupange wotembo yosi, pole, va kasi oku likolisilako oku linga upange wa Yehova. Tua kũlĩha okuti, upange va kasi oku linga, u kuete esilivilo ku Yehova. Vukanda wa Filemone 1-3, Paulu wa tuma ovilamo ku vamanji vosi vekongelo lio ko Kolosai, kuenda wa tukula olonduko via vamue pokati kavo. (Tanga.) Paulu wa velisilepo upange va kala oku linga, ndeci Yehova a ci linga. Cimuamue haico ci kasi oku pita love okuti, Yehova wa kapako upange o kasi oku u lingila. Nye o pondola oku linga oco o kuatise vamanji va litumbika kupange wotembo yosi?

7, 8. Nye ca kongeliwa vupange wakundi votembo yosi, kuenda vamanji vakuavo va pondola oku va kuatisa ndati?

⁷ Ndeci akundi vo kocita catete va lekisile ombili, koloneke vilo, akundi votembo yosi va siatavo oku vetiya vamanji vekongelo. Valua pokati kavo, va siata oku pesila kupange woku kunda ci soka 70 kolowola vosãi. O pondola oku va kuatisa ndati?

⁸ Manji umue ukãi okuti ukundi wotembo yosi o tukuiwa hati Shari, wa popia ndoco: “Akundi votembo yosi va pama, omo liupange va siata oku linga oloneke viosi. Pole, va sukila oku va kolisa.” (Va Roma 1:11, 12) Manji ukuavo ukãi okuti ukundi wotembo yosi vokuenda kuanyamo alua, wa lombolola eci catiamẽla kakundi votembo yosi vekongelo a kasi. Eye wa popia hati: “Akundi votembo yosi va siata oku likolisilako calua kupange woku kunda. Nda vamanji va lieca oco va ende lavo kupange woku kunda, oku va laleka oco va lie lavo, kuenda oku eca kokuavo olombongo vioku va kuatisa, ovo va eca olopandu. Poku ci linga ci lekisa okuti, o kasi oku va kuatisa.”

9, 10. Nye vamanji vamue va siata oku linga oco va kuatise akundi votembo yosi va kasi vekongelo?

⁹ Onjila yikuavo yoku kuatisa akundi votembo yosi, oku enda kumue lavo kupange woku kunda. Vamanji vavali akãi okuti akundi votembo yosi va lombolola okuti, va sukila oku enda kupange woku kunda la vamanji valua komẽle lo kekumbi vokuenda kuosemana. Manji umue ukãi okuti cilo o kasi ko Betele yo Brooklyn, ivaluka ekuatiso a tambuile eci a kala ukundi wotembo yosi. Eye wa popia hati: “Manji umue ukãi o kuete ekãlu wa ndi sapuila hati: ‘Nda wa limbuka okuti ku kuete manji umue enda laye kupange woku kunda, ndi vilikiye, oco tu endele kumosi.’ Eye, wa ndi kuatisa calua oku amamako kupange wakundi votembo yosi.” Manji Shari wa popia hati: “Noke liupange woku kunda vokuenda kueteke, akundi votembo yosi okuti ka va kuelele, pamue va kala ulika. Citava okuti olonjanja vimue o pondola oku laleka vamanji ka va kuelele kefendelo liene liepata. O pondolavo oku va laleka kovopange akuavo oco ci va kuatise oku pamisa ekolelo liavo.”

 ¹⁰ Manji umue ukãi okuti o kasi kupange wotembo yosi ci soka 50 kanyamo, wa lombolola eci catiamẽla kekuatiso va tambuile la vamanji vakuavo poku popia hati: “Akulu vekongelo va enda oku tu nyula olonjanja viosi noke yoku pita olosãi vivali. Poku sapela letu, va kũlĩhĩsa ovina viatiamẽla kuhayele wetu, kupange wetu woku sanda eteku, kuenda ovina vikuavo tu sukila. Va endavo oku tu nyula konjo, oco va limbuke nda tu sukila ekuatiso limue.” Akulu vaco vekongelo kuenda vakuavo, va kuãi ongangu ya Onesiforo. Ndaño okuti eye, wa kuatele ocikele coku tata epata liaye, pole, wa kuatisavo upostolo Paulu kovina a sukilile.—2 Timoteo 1:18.

11. Nye ca kongeliwa voku kala ukundi olikasi?

¹¹ Onjila yikuavo yoku litumbika kupange wotembo yosi, oku kala ukundi olikasi. Akundi valua valikasi, va pesila kupange woku kunda ci soka 130 kolowola vosãi, kuenda va siatavo oku tẽlisa ovikele vikuavo viekongelo. O Betele ya siata oku eca kokuavo ekuatiso limue litito liolombongo osãi losãi, momo, ka va kuete otembo yoku talavaya kupange woku sanda eteku. Olombongo viaco, vi va kuatisa oku landa ovina va sukila, oco va pesile otembo yalua kupange woku kunda.

12. Akulu vekongelo kuenda vamanji vakuavo va pondola oku kuatisa ndati akundi valikasi?

¹² Nye tu sukila oku linga oco tu kuatise akundi valikasi? Ukulu umue wekongelo o kasi ko Betele okuti wa siata oku sapela lakundi valua valikasi, wa popia hati: “Akulu vekongelo va sukila oku sapela lavo, kuenda oku kũlĩha ekalo liavo, oco va limbuke ndomo va pondola oku va kuatisa. Vamanji vamue va lombolola vati, akundi valikasi va sesamẽla oku tatiwa ciwa, ndaño va siata oku tambula ekuatiso li tunda ko Betele. Pole, vamanji vekongelo va pondolavo oku va kuatisa lovina vikuavo.” Omo liaco, akundi votembo yosi, kuenda akundi valikasi, va siata oku eca olopandu eci va limbuka okuti, vamanji vakuavo va enda lavo kupange woku kunda. O pondola hẽ oku enda lavo kupange woku kunda?

13, 14. (a) Nye tu sukila oku ivaluka catiamẽla ku vamanji vakuakunyula akongelo kumue lakãi vavo? (b) Nye o sukila oku linga oco o kuatise vamanji vana va litumbika kupange woku nyula akongelo?

¹³ Vamanji vakuakunyula akongelo kumue lakãi vavo, va loñoloha calua kupange woku kunda, va kuete ekolelo lia pama, kuenda va siata oku tu vetiya calua. Pole, ka tu ka ivaliko okuti, va sukilavo evetiyo lietu. Momo, va sukilavo oku enda kupange woku kunda la vamanji vosi. Nda va lalekiwa la vamanji oco va linge lavo olomapalo vimue vi nena esanju, va eca olopandu. Nda umue pokati kavo o vela okuti o kasi kosipitali, tu pondola oku va nyula, kuenda oku va kuatisa lovina vikuavo va sukila. Omo okuti Luka wa kala “ondotolo ya soliwa,” wa kuatisa Paulu, la vamanji vakuavo va kala oku nyula akongelo alua.—Va Kolosai 4:14; Ovilinga 20:5–21:18.

¹⁴ Vamanji vakuakunyula akongelo kumue lakãi vavo, va sukila oku vetiyiwa locisola, kuenda oku linga lavo ukamba. Manji umue o nyula akongelo wa soneha ndoco: “Akamba vange va siata oku limbuka eci ndi sukila ekuatiso. Omo okuti va ndi linga apulilo amue lutate, ci ndi kuatisa oku va lomboluila ovitangi viange. Ovo, va siata oku ndi kuatisa calua, omo lioku yevelela ovina ndi va sapuila.” Vamanji vakuakunyula akongelo, va siata oku eca olopandu eci va limbuka okuti, vamanji vekongelo va lekisa ocisola kokuavo, kuenje, va linga akamba vavo vocili.

15, 16. Momo lie upange u lingiwa la vamanji va kasi ko Betele, la vana va talavaya Volonjango Violohongele vinene u kuetele esilivilo, kuenda tu va kuatisa ndati?

¹⁵ Vamanji va kasi ko Betele, la vana va  kasi Kolonjango Violohongele vinene, va siata oku linga upange wa velapo woku kuatisa koku kunda olondaka viwa. Nda vekongelo liene, ale vocikanjo cene muli vamanji vaco, o pondola oku va sokolola ndati?

¹⁶ Eci va pitĩla ko Betele, pamue va yeva esumuo, ongeva lepata liavo, kuenda akamba va sia kimbo va tunda. Vamanji vaco, va siata oku eca olopandu eci va limbuka okuti, vakuavo va kasi ko Betele, kuenda vamanji vekongelo, va yongola oku va kũlĩha ciwa, oco va linge akamba vavo. (Marko 10:29, 30) Upange u lingiwa ko Betele, u va ecelela oku endaenda kolohongele, kuenda kupange woku kunda olosemana viosi. Pole, vamue pokati kavo olonjanja vimue, va siata oku kuata ovopange akuavo koñolosi, ale kesulilo liosemana. Omo liaco, vamanji va kasi vakongelo va sukila oku kuata elomboloko liupange vamanji va kasi ko Betele va siata oku linga. Nda va ci linga, ci lekisa okuti, va kapako upange waco.—Tanga 1 Va Tesalonike 2:9.

17, 18. Vamanji va litumbika kupange wotembo yosi kolofeka vikuavo, ovikele vipi va siata oku tambula?

¹⁷ Vamanji vamue va litumbika kupange wotembo yosi, va siata oku tava ovikele kolofeka vikuavo. Eci va pitĩla kolofeka viaco, pamue va sukila oku kũlĩha ovikulia vikuavo, oku lilongisa elimi likuavo, oku kapako ovituwa viofeka yaco, kuenda ekalo liomuenyo waco. Ovikele vipi va siata oku tambula kolofeka vikuavo va ilukila?

¹⁸ Vamue pokati kavo olomisionaliu, kuenda va siata oku pesila olowola vialua kupange woku kunda. Ovo, va loñoloha kupange woku kunda, koku longisa, kuenda va siata oku sapela la vamanji vakuavo vekongelo, catiamẽla kovina va lilongisa. O Betele ya siata oku eca ku vamanji vaco onjo yimue yoku kala, kuenda olombongo vimue vi va kuatisa oku landa ovina va sukila. Olomisionaliu vimue via siata oku tumiwa kolofeka vikuavo, oco vi linge upange ko Betele, ale vi kuatisa kupange woku tunga Olombetele vikuavo, oloseketa vioku pongoluila alivulu kalimi, Olonjango Violohongele vinene, ale Olonjango Viusoma. O Betele, ale vamanji  va kasi vakongelo, va siata oku eca kokuavo ovina va sukila ndeci, okulia, kuenda onjo yimue yoku kala. Olomisionaliu viaco, vi endaenda kolohongele, kuenda kupange woku kunda, ndeci vamanji va kasi ko Betele va siata oku linga. Vamanji va kasi vakongelo, va siata oku kuatisiwa lovoloño avo.

19. O pondola oku kuatisa ndati vamanji va litumbika kupange wotembo yosi, va kasi vofeka yene?

¹⁹ O pondola oku kuatisa ndati vamanji va litumbika kupange wotembo yosi, va tunda kolofeka vikuavo? Ivaluka okuti, eci va pitĩla, ka va kũlĩhĩle ovikulia vimue viofeka yaco. Nda wa va laleka oco veye okulia konjo yove, o pondola oku va pula nda va yongola oku seteka okulia kuokaliye, ale kuli okulia kumue ka va sole. Nda va seteka oku lilongisa elimi liove, kuenda ovituwa viofeka yene, pamue ka ci leluka kokuavo. Omo liaco, kuata epandi lavo, kuenda va kuatisa, momo, va yongola oku lilongisa!

20. Tu pondola oku kuatisa ndati vamanji va litumbika kupange wotembo yosi va kasi kolofeka vikuavo, kuenda olonjali viavo?

²⁰ Vokuenda kuotembo, vamanji va litumbika kupange wotembo yosi okuti va kasi ocipãla lofeka yavo, pamue va sandiliya onjila yoku kuatisa olonjali viavo via kuka. Nda olonjali viavo Olombangi Via Yehova, vi yongola okuti, omãla vavo va amamako kupange wavo. (3 Yoano 4) Ocili okuti, omãla vaco va likolisilako oku tata olonjali viavo, kuenda va linga esokiyo lioku va nyula olonjanja vimue. Pole, vana va kasi ocipepi lolonjali, va pondolavo oku kuatisa vamanji va litumbika kupange wotembo yosi okuti, va kasi kolofeka vikuavo. Va ci linga nda va limbuka okuti, olonjali vi sukila ekuatiso. Tu sukila oku ivaluka okuti, vamanji va litumbika kupange wotembo yosi okuti va kasi kolofeka vikuavo, va kuete upange walua woku kuatisa koku kunda olondaka viwa okuti koloneke vilo, owo u kuete esilivilo lia velapo voluali. (Mateo 28:19, 20) O pondola hẽ oku va sokolola poku kuatisa olonjali viavo?

21. Vamanji va litumbika kupange wotembo yosi, nye va siata oku yeva kutima, catiamẽla kekuatiso va tambula, kuenda evetiyo li eciwa la vamanji vakuavo?

²¹ Kuli omanu valua va kasi oku talavaya calua, momo, va yongola oku linga olohuasi. Pole, vamanji vana va nõlapo oku litumbika kupange wotembo yosi, va talavaya calua, momo, va yongola oku linga upange u sanjuisa Yehova, kuenda oku kuatisa omanu vakuavo. Omo liaco, va sanjukila ekuatiso liosi vamanji vakuavo va siata oku eca kokuavo. Manji umue ukãi okuti, wa litumbika kupange wotembo yosi, kuenje wa ilukila kofeka yikuavo wa popia hati: “Nda umue oku ĩha okokanda koku eca olopandu, ci lekisa okuti, omanu vakuavo va ku kapako, kuenda va sanjukila upange o kasi oku linga.”

22. Nye o sima catiamẽla kupange wotembo yosi?

²² Vamanji vana va litumbika kupange wotembo yosi, va siata oku nõla ekalo li va nenela esanju komuenyo. Oku linga upange waco koloneke vilo, oco ci nena esanju komuenyo. Vamanji va litumbika kupange wotembo yosi, va pondola oku lilongisa ovituwa viwa, kuenda ovina vikuavo vi sukiliwa cilo okuti, vi ka sukiliwavo voluali luokaliye. Ndopo, afendeli vosi va Yehova, va ka linga upange u ka va nenela esanju lialua eteke leteke. Omo liaco, tu amamiko oku ivaluka ‘upange wekolelo, lovilinga viocisola’ via vamanji va litumbika kupange wotembo yosi.—1 Va Tesalonike 1:3.