1, 2. (a) Momo lie o tavela okuti Yehova o sole afendeli vaye? (b) Omanu va lulikiwa lonjongole yoku linga nye?

MOMO lie o tavela okuti Yehova o sole afendeli vaye? Osimbu kua tambuluile epulilo eli, konomuisa ovolandu a kuãimo ndeci: Vokuenda kuanyamo alua vamanji va vetiya manji umue o tukuiwa hati, Taylene. Ovo vo sapuila vati ka sukila oku kevelela ovina vialua vi tunda kalikolisilo aye muẽle. Eye wa popia hati: “Nda Yehova ka ndi kuetele ocisola, nda ka kasi oku amamako oku eca alungulo kokuange.” Manji umue o tukuiwa hati Brigitte okuti wa tekula omãla vavali likaliaye noke liolofa viulume waye wa popia hati: “Ka ca lelukile oku tekula omãla voluali lulo lua Satana, ca piãla enene konjali yi kasi likaliaye. Pole, ndi tava kocisola Yehova a ndi kuetele momo wa siata oku ndi songuila vepuluvi liohali kuenda lalimue eteke a ecelele okuti ndi liyaka lovitangi vina si tẽla oku pandikisa lavio.” (1 Va Korindo 10:13) Manji umue o tukuiwa hati Sandra, o kasi oku liyaka luvei umue okuti ka u kuete ovihemba vioku u sakula. Eci a endele kohongele yimue yofeka, manji umue ukãi  wa lekisa onjongole kokuaye. Omo liaco, ulume wa manji Sandra wa popia hati: “Ndaño ka tua kũlĩhĩle ekalo lia manji yaco, esakalalo a lekisa kokuetu lia tu nenela esanju lialua. Olondaka viocisola vamanji va tu sapuila via lekisa ndomo Yehova a tu kuetele ocisola.”

² Yehova wa lulika omanu lonjongole yoku lekisa ocisola kuenda oku limbuka okuti va soliwe. Pole, ca leluka oku sumua omo lioku vela, ekambo liolombongo, ale ceci ka tu limbuka onima yi tunda kupange woku kunda. Nda tua fetika oku sima okuti Yehova ka tu kuetele ocisola, tu sukila oku ivaluka okuti tu soliwe laye, kuenda o tu kuata peka liondio oco a tu kuatise. Nda tua lekisa ekolelo kokuaye lalimue eteke a ka tu ivala.​—Isaya 41:13; 49:15.

3. Nye ci pondola oku tu kuatisa oku tava okuti Yehova o tu kuetele ocisola ka ci pui?

³ Vamanji va tukuiwa vocipama cilo va tava okuti Suku wa siata oku va kuatisa poku liyaka lovitangi. Tu pondolavo oku kolela okuti Yehova Suku o tu kuatisa. (Osamo 118:6, 7) Vocipama cilo tu konomuisa olombanjaile vikuãla vi eca uvangi wokuti Yehova o tu kuetele ocisola. Olombanjaile viaco vievi: (1) Ovina a lulika, (2) Embimbiliya, (3) ohutililo, kuenda (4) ocisembi. Oku sokolola ovina viwa Yehova a siata oku tu lingila ci tu kuatisa oku eca olopandu kocisola caye ka ci pui.​—Tanga Osamo 77:11, 12.

4. Ovina Yehova a lulika vi tu longisa nye?

⁴ Eci tu tala ovina Yehova a lulika, tu limbuka ocisola calua a tu kuetele. (Va Roma 1:20) Yehova wa lulika ongongo oco tu kalemo kuenda oku linga ovina vikuavo. Eye wa siata oku tu ĩha ovina vialua tu sukila oco tu kuate esanju komuenyo. Omo okuti tu sukila oku lia, Yehova wa siata oku tu ĩha okulia kualua kua litepa ku tu nenela esanju! (Ukundi 9:7) Manji umue o tukuiwa hati Catherine wa siata oku sanjukila ovina via lulikiwa ca piãla enene vokuenda kuotembo yondombo kofeka yo Kanada. Eye wa popia hati: “Ndi komõha calua poku mola ndomo ovina vimue vi kasi vongongo vi pita vapongoloko. Momo kuli olonelẽho vimue okuti vi telẽha lika vokuenda kuotembo yimue. Kulivo olonjila vimue via siata oku tiuka kuna via kala vokuenda kuotembo yimue, oku kongelamo onjila yimue yitito yi tukuiwa hati kacinjonjo okuti yi sandiliya ndomo yi lia ovikulia vi kasi ponjanela yo vokusinya kuange. Yehova o tu sole momo wa siata oku tu ĩha ovina vi nena esanju.” Isietu o sole ovina viosi a lulika kuenda o yongola okuti tu kuatavo esanju omo liovina viaco.​—Ovilinga 14:16, 17.

5. Ocisola ca Yehova ca situluiwa ndati ndomo a lulika omanu?

⁵ Yehova wa tu lulika luloño woku linga ovopange awa okuti a tu nenela esanju. (Ukundi 2:24) Eye wa ecele komanu ocikele coku licita oco va yukise oluali, oku lima osi, oku tata olõsi, olonjila, kuenda ovina vikuavo vi kasi lomuenyo. (Efetikilo 1:26-28)Yehova wa tu lulikavo  lovituwa viwa okuti tu pondola oku u setukula!—Va Efeso 5:1.

6. Momo lie tu sukilila oku sola calua ondaka ya Suku?

⁶ Yehova wa tu ĩha Embimbiliya omo liocisola calua a tu kuetele. Olio li tu sapuila ovina tu sukila oku kũlĩha viatiamẽla kokuaye, kuenda ndomo a tenda omanu. Embimbiliya li tu sapuila okuti olonjanja vimue Yehova wa sumuile calua omo okuti va Isareli ka va lekisile epokolo kokuaye. Osamo 78:38 yi popia hati: “Omo ukuahenda, wa va ecela evĩho liavo, ka va nyõlele. Olonjanja via lua wa likandangiya kokutema kuaye, ka wenguile onyeño yaye yosi.” Oku sokolola ocinimbu eci, ci ku kuatisa oku limbuka ocisola Yehova a ku kuetele kuenda ndomo a siata oku ku tata. Tu pondola oku kolela okuti Yehova wa tu kapako.​—Tanga 1 Petulu 5:6, 7.

7. Momo lie Embimbiliya li kuetele esilivilo kokuetu?

⁷ Embimbiliya li kuete esilivilo lia velapo kokuetu. Momo lie? Momo Yehova wa siata oku sapela letu lekuatiso Liembimbiliya.  Nda isia o kuete ocituwa coku sapela lomõla waye, ocisola cavo ci livokiya, kuenda va likolela pokati. Yehova eye Isietu ukuacisola. Ndaño okuti lalimue eteke tua muile Yehova ale oku yeva ondaka yaye, eci tu tanga Embimbiliya ci kala ndu okuti tu kasi oku sapela laye. Tu sukila oku amamako oku u yevelela! (Isaya 30:20, 21) Eci tu tanga ondaka ya Suku ci tu kuatisa oku u kũlĩha kuenda oku kolela kokuaye, momo wa siata oku tu songuila loku tu teyuila.​—Tanga Osamo 19:7-11; Olosapo 1:33.

8, 9. Nye Yehova a yongola okuti oco tu sukila oku kũlĩha? Tukula ulandu umue Wembimbiliya.

⁸ Yehova o yongola oco tu kũlĩhe okuti o tu kuetele ocisola, kuenda wa siata oku mola ovina vialua okuti ekambo lietu lioku lipua ci sule. Momo wa kapako ovina viwa tu linga. (2 Asapulo 16:9) Tu konomuisi ndomo Yehova a limbuka ovina viwa ku Soma Yehosafata wo ko Yuda. Eye wa nõlele onjila ka ya sungulukile yoku likongela ku Soma Ahava wo ko Isareli, kuenje wa linga uyaki lolohoka via va Asuria ko Romote Gileada. Ndaño okuti ci soka 400 kovaprofeto vesanda va sapuila Ahava ovina viuhembi viokuti wa laikele oku yula uyaki, pole Mika uprofeto wocili wa Yehova wa sapuila Yehosafata kuenda Ahava hati, nda va linga uyaki ka va yuli. Kuenje olondaka viaco vieya oku tẽlisiwa. Momo Ahava wa fila kuyaki, pole Yehosafata wa puluka kolofa. Noke liuyaki waco, Yehova weya oku tuma Yehu oco a ece elungulo ku Yehosafata omo liakulueya aye. Kuenje Yehu wo sapuilavo hati: “Kokuove kua sangiwa [ovina] vimue viwa.”​—2 Asapulo 18:4, 5, 18-22, 33, 34; 19:1-3.

⁹ Osimbu ulandu waco ka wa tẽlisiwile, Yehosafata wa sapuilile olombuale, la va Lewi, kuenda ovitunda oco va nyule alupale osi o ko Yuda locimãho coku longisa omanu Ocihandeleko ca Yehova. Noke va kuata onima yiwa, momo omanu va tundile kolofeka vikuavo veya oku kũlĩha Yehova. (2 Asapulo 17:3-10) Ndaño okuti Yehosafata noke wa nõla onjila yimue ka ya sungulukile, pole Yehova ka ivaleleko ovina viwa a lingile tete komuenyo waye. Ulandu waco u tu lembeleka calua, momo olonjanja vimue tua siatavo oku lueya. Pole, nda tua likolisilako oku vumba Yehova, eye o pondola oku amamako oku lekisa ocisola kokuetu kuenda ka ivalako ovina viwa tua siata oku linga.

10, 11. (a) Momo lie ohutililo ombanjaile yimue yilikasi ya tunda ku Yehova? (b) Suku wa siata oku tambulula ndati olohutililo vietu? (Tala elitalatu kefetikilo liocipama cilo.)

¹⁰ Isia ukuacisola, o sokiya otembo yoku yevelela omãla vaye nda va yongola oku sapela laye. Eye o yongola oku kũlĩha ovina vi kasi vovitima viavo, momo wa siata oku va tata ciwa. Yehova Isietu ukuacisola, wa siatavo oku ci linga. Eye o tu yevelela eci tu likutilila kokuaye. Oku sapela la Isietu esumũlũho liocili!

¹¹ Tu pondola oku likutilila ku Yehova vapuluvi osi. Omo okuti eye Ekamba lietu, o yevelela olohutililo vietu olonjanja viosi. Manji Taylene wa tukuiwa kefetikilo liocipama cilo, wa popia hati: “O pondola oku sapuila ku [Yehova] ovina viosi o yongola.” Eci tu sapuila ku Yehova ovisimĩlo vietu, o tu tambulula lekuatiso Liembimbiliya, locipama cimue tu sanga valivulu etu, ale levetiyo lieciwa la vamanji. Yehova wa siata oku yevelela apingilo tu linga lutima wosi,  kuenda o kuete elomboloko liekalo lietu momo ka kuli omunu ukuavo o pondola oku ci linga. Atambululo a siata oku eca kolohutililo vietu, a lekisa okuti o tu kuetele ocisola ka ci pui.

12. Momo lie tu sukilila oku konomuisa olohutililo vi sangiwa Vembimbiliya? Tukula ulandu umue.

¹² Tu pondola oku lilongisa ovina vialua volohutililo vi sangiwa Vembimbiliya. Pamue vefendelo liepata oku lilongisa olohutililo vimue via tukuiwa Vembimbiliya ci kuete esilivilo. Nda tua sokolola olohutililo afendeli va Suku va linga lutima wosi kosimbu, ci tu kuatisavo oku linga olohutililo viwa. Tu sukila oku lilongisa ohutililo Yona a linga lumbombe eci a kala vimo liombisi yimue yinene. (Yona 1:17–2:10) O pondolavo oku ivaluka ohutililo Salomone a linga lutima wosi eci a tumbika onembele ku Yehova. (1 Olosoma 8:22-53) Sokololavo ohutililo Yesu a longisa. (Mateo 6:9-13) Ocina ca velapo ceci okuti, olonjanja viosi “apingilo ene a sapuiwe ku Suku, kuenje ombembua ya Suku, yina ya piãla olondunge viosi, yi lava ovitima viene lovisimĩlo viene.” Olopandu vietu vi ka amamako oku livokiya omo liocisola ca Yehova ka ci pui.​—Va Filipoi 4:6, 7.

13. Epuluvi lipi tu kuete omo liocisembi?

¹³ Yehova wa tu ĩha ombanjaile yocisembi oco ‘tu kuate omuenyo’ ko pui. (1 Yoano 4:9) Upostolo Paulu poku tukula olondaka viwa viocisola ca Suku wa soneha ndoco: “Eci ka tua kaile longusu, otembo yaco haiyo Kristu a fila vakuakandu. [Momo] nda umue o tava naito oku fila ukuesunga, puãi mbi umue o kuete utõi o tava oku fila u wa pua eko. Puãi Suku wa tu muisa ocisola caye okuti, osimbu tua kala vakuakandu oco Kristu a tu fila.” (Va Roma 5:6-8) Ocisembi ci situlula ocisola ca velapo Suku a tu kuetele, kuenda ceca komanu epuluvi lioku kuata ukamba laye.

14, 15. Nye ocisembi ci lomboloka (a) Kakristão olombuavekua? (b) Komanu vana va kuete elavoko lioku kala palo posi?

¹⁴ Ocimunga cimue Cakristão vocili va kuete esanju lonjila yimue yilikasi omo liocisola ca Yehova ka ci pui. (Yoano 1:12, 13; 3:5-7) Yehova Suku wa waveka Akristão vaco lespiritu sandu, kuenje cilo va linga omãla vaye. (Va Roma 8:15, 16) Omo okuti vamue pokati kavo va kasi handi palo posi, momo lie Paulu a popela hati, va tumala “kumue la Kristu Yesu ... kilu”? (Va Efeso 2:6) Momo Yehova wa eca kokuavo elavoko lioku kuata omuenyo ko pui kilu.​—Va Efeso 1:13, 14; Va Kolosai 1:5.

¹⁵ Akristão vana okuti ka va pangi onepa kolombuavekua citava okuti va linga akamba va Suku nda va lekisa ekolelo kocisembi. Ovo va pondolavo oku linga omãla va Suku kuenda oku kala otembo ka yi pui  voluali luokaliye palo posi. Ocisembi ci situlula ocisola Yehova a kuetele omanu vosi. (Yoano 3:16) Tu sanjuka calua poku kũlĩha okuti nda tua vumba Suku lekolelo, o ka tu ĩha esumũlũho lioku kala voluali luokaliye! Omo liaco, tu amamiko oku lekisa okuti tua velisapo ocisembi, momo ceca uvangi wocisola ka ci pui Suku a tu kuetele.

16. Nye tu sukila oku linga noke lioku sokolola ocisola ca Suku?

¹⁶ Ka tu tẽla oku tenda olonjila vialua Yehova a siata oku kuama poku lekisa ocisola caye kokuetu. Soma Daviti wa imba ocisungo hati: “A Suku, ovisimĩlo viove ndi vi sole ca lua. Oku vi tenda via lua muẽle. Nda ndi vi tenda, via lua, eseke li sule.” (Osamo 139:17, 18) Oku sokolola olonjila vialua Yehova a siata oku kuama poku lekisa ocisola caye kokuetu, ci tu vetiya oku lekisa ocisola kokuaye kuenda oku likolisilako oku u lingila upange tu tẽla.

17, 18. Olonjila vipi vi tu kuatisa oku lekisa ocisola cetu ku Yehova Suku?

¹⁷ Kuli olonjila vialua vioku lekisa ku Yehova okuti tu u kuetele ocisola. Tu pondola oku lekisa ocisola cetu ku Yehova poku kuata ombili yoku sapuila komanu catiamẽla kolondaka viwa Viusoma. (Mateo 24:14; 28:19, 20) Tu lekisavo ocisola cetu ku Yehova poku pandikisa kovitangi vina vi kapa voseteko ekolelo lietu. (Tanga Osamo 84:11; Tiago 1:2-5.) Ndaño okuti pamue tu liyaka loloseteko vialua, pole tu pondola oku kolela okuti Yehova o lete ohali yetu kuenda o tu kuatisa, momo tu kuete esilivilo kokuaye.​—Osamo 56:8.

¹⁸ Ocisola tu kuetele Yehova ci tu vetiya oku sokolola ovina viosi vi komõhisa a lulika. Tu lekisa ku Yehova okuti tu u kuetele ocisola kuenda tua kapako Ondaka yaye poku kuata ombili yoku lilongisa Embimbiliya. Tu likutilila ku Yehova olonjanja viosi omo liocisola tu u kuetele, kuenda tu yongola oku pamisa ukamba wetu laye. Nda tu sokolola ombanjaile ya velapo yocisembi, ocisola tu kuetele Yehova ci livokiya. (1 Yoano 2:1, 2) Evi ovio vimue pokati kolonjila vialua tu sukila oku kuama poku lekisa ku Yehova okuti tua kapako ocisola caye ka ci pui a tu kuetele.