1, 2. Yehova wa siata oku tu longisa ndati oku lekisa ocisola kokuaye?

ONJILA ya sunguluka onjali yi sukila oku kuama poku longisa omãla vaye, oku lekisa ongangu yiwa. Nda onjali yi lekisa ocisola komãla vaye, yi va longisa ndomo va lekisa ocisola. Ka kuli omunu wa lekisa ocisola kokuetu ndeci Isietu Yehova a siata oku linga. Omo liaco, tua lilongisa ndomo tu lekisa ocisola, “momo eye wa lianga oku tu sola.”​—1 Yoano 4:19.

² Ndamupi Yehova a siata oku lekisa okuti “eye wa lianga oku tu sola”? Embimbiliya li popia ndoco: “Osimbu tua kala vakuakandu oco Kristu a tu fila.” (Va Roma 5:8) Yehova Isietu ukuacisola, wa eca Omõlaye ndocisembi oco ci tu yovole kekandu kuenda kolofa. Ombanjaile yaco yi kuete esilivilo lia velapo, ya tu ĩha epuluvi lioku kuata ukamba la Yehova, kuenda oku lekisa ocisola cetu kokuaye. Yehova wa lekisa ongangu yiwa poku linga eliangiliyo liaco. Eye wa tu longisa okuti, tu sukila oku lekisa ocisola, oku kala omanu vawa, kuenda vakuacali.​—1 Yoano 4:10.

3, 4. Tu lekisa ndati okuti tu sole Suku?

³ Ocisola ocituwa cimue ca velapo ca Yehova. Omo liaco,  tu pondola oku kuata elomboloko lieci Yesu a popela hati ocihandeleko ca velapo ceci cokuti: “Sola Yehova Suku yove lutima wove wosi, lomuenyo wove wosi, lolondunge viove viosi, longusu yove yosi.” (Marko 12:30) Yehova o yongola okuti tu lekisa ocisola kokuaye ‘lutima wetu wosi.’ Tu pondola oku sumuisa Yehova nda tu lekisa ocisola calua komunu umue ale kocina cikuavo. Pole, ka tu sukila lika oku lekisa ocisola lovisimĩlo vietu. Yehova o lavokavo okuti tu lekisa ocisola kokuaye ‘lolondunge vietu viosi,’ kuenda ‘longusu yetu yosi.’ Olondaka evi vi lomboloka okuti, vocisola tu kuetele Yehova mua kongela onjila tu kuama poku sokolola, kuenda ovina tu linga.​—Tanga Mika 6:8.

⁴ Tu sukila oku sola Yehova lovituwa vietu viosi kuenda lovina viosi tu kuete. Nda tua kapa tete Yehova komuenyo wetu, tu lekisa kokuaye okuti, tu u kuetele ocisola. Vocipama ca pita, tua konomuisa olonjila vikuãla Yehova a siata oku kuama poku lekisa ocisola komãla vaye. Omo liaco, cilo tu konomuisa ndomo tu pondola oku vokiya ocisola cetu ku Yehova, kuenda oku lekisa okuti tu u sole.

5. Eci tu sokolola ovina viosi Yehova a siata oku tu lingila ci tu vetiya oku linga nye?

⁵ Nda omunu umue oku ĩha ombanjaile, o sukila oku lekisa kokuaye okuti wa sanjukila ombanjaile yaco. Omo okuti wa kapako ombanjaile yaco, o kuatisiwa layo. Tiago wa soneha ndoco: “Ocali cosi ciwa longavelo yosi ya kanguka via tunda kilu, ku Isia yovinyi. Kokuaye ka kuli oku pongoloka ndaño okuñualapo ku nena undembo.” (Tiago 1:17) Tu eca olopandu ku Yehova omo okuti wa siata oku tu ĩha ovina viosi tu sukila komuenyo oco tu kuate esanju. Omo lioku limbuka okuti Yehova o tu sole calua, tu yongolavo oku lekisa kokuaye okuti tu u kuetele ocisola. Ove hẽ o kuetevo ovisimĩlo viaco?

6. Nye va Isareli va sukilile oku linga nda va yonguile oku amamako oku tambula asumũlũho a tunda ku Yehova?

⁶ Va Isareli va tambuile ovina vialua viwa via tunda ku Yehova. Vokuenda kuanyamo alua wa va songuila lovihandeleko viaye, kuenda wa ecele kokuavo ovina viosi va sukilile oco vi va kuatise. (Esinumuĩlo 4:7, 8) Va Isareli va sukilile oku eca olopandu ku Yehova poku pokola kovihandeleko viaco. Eci va Isareli va eca ovilumba ku Yehova, va sukilile oku eca “ovaima a tete a tunda” vovapia avo. (Etundilo 23:19) Va Isareli va kũlĩhĩle okuti, Yehova wa laikele oku amamako oku va sumũlũisa nda va lekisa epokolo kokuaye, loku likolisilako oku linga upange waye.​—Tanga Esinumuĩlo 8:7-11.

7. Tu lekisa ndati ku Yehova okuti tu u kuetele ocisola poku eca kokuaye ‘ovipako vietu’?

⁷ Tu pondola oku lekisa ku Yehova okuti tu u kuetele ocisola poku eca kokuaye ‘ovipako vietu’. (Olosapo 3:9) Tu ci linga poku eca ovina tu kuete oco tu ece esivayo kokuaye. Tu pondola oku eca olombanjaile oco vi kuatise kupange Wusoma vekongelo lietu, kuenda kolonepa viosi violuali. Cikale okuti tu kuete ovina vialua, ale sio, vosi yetu tu pondola oku eca eci tu kuete, oco tu lekise ocisola ku Yehova. (2 Va Korindo 8:12) Pole, kuli olonjila vikuavo tu pondola oku kuama oco tu lekise ku Yehova okuti, tu u kuetele ocisola.

8, 9. Onjila yipi yikuavo tu pondola oku kuama oco tu lekise ku Yehova okuti tu u kuetele ocisola? Nye manji Mike kumue lepata liaye va linga?

⁸ Yesu wa tu longisa oco tu amameko oku sandiliya tete Usoma, kuenda oku yuvula oku sakalala leci tu lia, kuenda eci tu wala. Momo, Isietu wa likuminya oku tu ĩha ovina tu sukila. (Mateo 6:31-33) Tua kolela ku Yehova, kuenda tua kũlĩha okuti o ka tẽlisa olohuminyo viaye. Nda ove o sole calua omunu umue, o kolela kokuaye. Cimuamue haico okuti, nda tua kolela ku Yehova, tu pondola oku lekisa kokuaye okuti, tu u kuetele ocisola. (Osamo 143:8) Omo liaco, tu sukila oku lipula ndoco: ‘Anga hẽ esokiyo nda siata oku linga lonjila ndi kuama poku pesela otembo kuenda ongusu yange vi lekisa okuti ndi kuetele ocisola Yehova? Oloneke viosi nda siata hẽ oku kolela ku Yehova oco a ndi kuatise kovina viosi ndi sukila?’

⁹ Manji Mike kumue lepata liaye va kolela ku Yehova. Eci a kala umalẽhe wa kuatele onjongole yoku ka kundila kofeka yikuavo. Ndaño okuti noke yoku kuela wa kuata omãla vavali, pole handi wa lekisile onjongole yaco. Eci manji Mike kumue lepata liaye va konomuisa ovina viatiamẽla ku vamanji vakuavo va kala oku kundila kovikanjo ku sukila akundi, va nõlapo oku leluisa omuenyo wavo. Noke, va landisa onjo yavo, kuenje va ilukila vonjo yimue yitito. Manji Mike wa tepulula etendelo liomanu va enda oku pinga oco va linge upange woku yelisa, kuenje wa sanda onjila yoku songuila onjo yaco yupange lekuatiso lio Internet, ndaño okuti o kasi kofeka yikuavo. Noke, manji Mike kumue lepata liaye va ilukila kofeka yikuavo, kuenje veya oku kuata esanju lialua kupange woku kunda. Omo liaco, manji Mike wa popia hati: “Tua limbuka ocili colondaka via Yesu vi sangiwa kelivulu lia Mateo 6:33!”

10. Ndeci ca pita la Soma Daviti, momo lie ca sungulukila oku sokolola ovina tua lilongisa viatiamẽla ku Yehova?

¹⁰ Onjanja yimue Soma Daviti wa sonenehele ndoco: “Ilu li sapula ulamba wa Suku. Oluali lu situlula ovilinga viovaka aye. Noke wa amisako hati: “Ovihandeleko via Yehova via sunguluka, vi kavuluisa utima. Uvangi wa Yehova wocili, u muisa olondunge ava va wulua.” Osimbu Daviti a kala oku sokolola ovihandeleko via Yehova, lovina via posoka via lulikiwa, co vetiya oku pamisa ukamba waye la Yehova, kuenda wa yonguile oku lekisa ocisola kokuaye. Omo liaco, Daviti wa popia hati: “Olondaka viomela wange lovisimĩlo viutima wange vi sunguluke kokuove, a Yehova, wucikolo cange, haive wunjovoli yange.”​—Osamo 19:1, 7, 14.

11. Ukũlĩhĩso Yehova a siata oku tu ĩha u tu kuatisa ndati oku lekisa ocisola kokuaye? (Tala elitalatu kefetikilo liocipama cilo.)

¹¹ Koloneke vilo, Yehova wa siata oku tu longisa ovina viatiamẽla kokuaye, kocipango caye, kovina a lulika, kuenda Kondaka yaye. Omanu voluali va siata oku vetiya vakuavo oco va lilongise, pole, olonjanja vimue ovina va lilongisa kosikola ya velapo via siata  oku va vetiya oku liwekapo oku lekisa ocisola ku Suku. Tua kũlĩha okuti Yehova ka yongola lika okuti tu kuata ukũlĩhĩso, pole o yongolavo oku tu kuatisa oco tu kuate olondunge. Eye o yongola okuti ovina tua lilongisa vi tu kuatisa, kuenda tu kuatisa lavio omanu vakuavo. (Olosapo 4:5-7) Yehova o yongola okuti, tu sapuila komanu ‘ ukũlĩhĩso wocili,’ kuenda oku va kuatisa oco va popeliwe. (1 Timoteo 2:4) Tu lekisa ocisola ku Yehova poku longisa omanu valua ovina viatiamẽla Kusoma waye, kuenda eci Usoma waco u ka linga.​—Tanga Osamo 66:16, 17.

12. Manji umue ufeko nye a popia catiamẽla kombanjaile ya tunda ku Yehova?

¹² Amalẽhe va pondolavo oku sokolola ovina viosi Yehova a siata oku eca kokuavo, kuenda oku va longisa. Manji umue o tukuiwa hati Shannon toke cilo ivaluka esanju a yeva eci a endele kohongele yimue yofeka okuti otembo yaco wa kuata 11 kanyamo, kuenda manjaye wa kuata 10 kanyamo. Vokuenda Kuohongele Yofeka losapi hati: “Oku Sumbila Suku,” amalẽhe vosi oku kongelamo manji Shannon kumue la manjaye, va pingiwa oku tumãla pocitumãlo cimue cilikasi. Tete, wa lekisa esakalalo. Pole, noke wa komõha calua eci a limbuka okuti amalẽhe vosi va tambula elivulu losapi hati: Os Jovens Perguntam—Respostas Práticas. Ombanjaile yaco ya posoka yo vetiya oku kuata ovisimĩlo vipi viatiamẽla ku Yehova? Eye wa popia hati: “Vepuluvi liaco, nda limbuka okuti Yehova omunu umue wocili, kuenda o ndi sole calua. Tu kuete esanju lialua omo Suku yetu Yehova ukuonene wa velapo a tu  ĩha ombanjaile yimue ya posoka, haiyo ya lipua!”

13, 14. Nye tu sukila oku linga nda tu tambula epindiso lia Yehova, kuenda momo lie?

¹³ Embimbiliya li tu ivaluisa ndoco: “Yehova o pokuisa u a sole, ndeci ci lingainga onjali lomõlaye a sanjukila.” (Olosapo 3:12) Nda tu tava kelungulo lia Yehova loku ecelela okuti o tu pindisa, tu lilongisa oku linga ovina via sunguluka kuenda tu kuata ombembua. Ocili okuti “epindiso tete ka li sanjuisa, pole, li koka evalo.” (Va Heveru 12:11) Nye tu sukila oku linga eci tu tambula epindiso lia Yehova? Tu sukila oku amamako oku kapako alungulo a Yehova, kuenda oku yuvula esumuo nda ka tua solele ovina tua yeva. Omo okuti tu sole Yehova, tu sukila oku yevelela kokuaye, kuenda oku linga apongoloko a sukiliwa.

¹⁴ Koloneke via Malakiya, va Yudea valua ka va endele oku yevelela Yehova. Ovo, ka va kapeleko esilivilo lioku eca ovilumba vi sanjuisa Yehova. Omo liaco, Yehova wa ecele kokuavo alungulo atiamẽla kovina viaco. (Tanga Malakiya 1:12, 13.) Ndaño okuti Yehova wa va lungula olonjanja vialua, pole ka va kapeleko alungulo aco. Omo liaco, Yehova wa va sapuila hati: “Ndu [ku] siñali, kuenje mongolola asumũlũho ene okuti a linga asumuo.” (Malakiya 2:1, 2) Nda ka tua kapeleko alungulo a Yehova, ale tu a tenda ndu okuti ka a kuete esilivilo, tu nyõla ukamba wetu laye.

15. Ovisimĩlo vipi tu sukila oku yuvula?

¹⁵ Oluali lua Satana lua siata oku vetiya omanu oco va kuate epela kuenda oku livelisapo. Omanu valua ka va sole oku va lungula ale oku va sapuila ovina va sukila oku linga. Omanu vamue va siata oku pokola lika omo okuti va kisikiwa oku ci linga. Tu sukila oku yuvula oku kala ndomanu vaco. Embimbiliya li tu sapuila hati: “Ko ka lisetahaisi loluali lulo.” Pole, tu sukila oku kuata elomboloko lieci Yehova a kevelela kokuetu, kuenda oku linga ovina viu sanjuisa. (Va Roma 12:2) Eye wa siata oku tu ĩha alungulo lekuatiso liocisoko caye votembo ya sokiyiwa. Alume va siata oku ivaluisiwa ovituwa va sukila oku lekisa nda va kasi ponẽle yakãi, kuenda akãi va sukilavo oku ci linga. Cikale alume ale akãi va ivaluisiwavo ndomo va sukila oku nõla akamba, kuenda oku nõla ovina va yongola oku linga poku puyuka. Nda tu kuete onjongole yoku tava kelungulo lia  Yehova, kuenje tu linga apongoloko oco tu u sanjuise, tu lekisa okuti tua sanjukila olonumbi viaye kuenda tu u kuetele ocisola.—Yoano 14:31; Va Roma 6:17.

16, 17. (a) Momo lie tu sukilila oku kũlĩha ovisimĩlo via Yehova osimbu ka tua nõlele onjila tu yongola oku kuama? (b) Nye va Isareli va linga omo liekambo lioku kolela ku Yehova?

¹⁶ Omãla vatito va kolela kolonjali viavo okuti vi va kuatisa kuenda vi va teyuila. Akulu va sukilavo oku pinga kolonjali viavo oco vi va kuatise. Ndaño va kũlĩha okuti va tẽla oku nõla ovina va sukila oku linga, pole olonjali viavo vi pondola oku eca kokuavo alungulo awa. Isietu Yehova wa siata oku ecelela okuti, tu li nõlela onjila tu yongola oku kuama. Omo okuti tua kolela kokuaye kuenda tu u kuetele ocisola, tua siata oku pinga ekuatiso kokuaye loku likolisilako oco tu kũlĩhe ovisimĩlo viaye osimbu ka tua nõlele onjila tu yongola oku kuama. Nda tua kolela ku Yehova, o tu ĩha espiritu sandu liaye oco li tu kuatise oku linga ovina via sunguluka.​—Va Filipoi 2:13.

¹⁷ Koloneke via Samuele va Isareli va yuliwile la va Filisiti. Omo okuti ka va pingile ku Yehova ovina va sukilile oku linga, va popia vati: “Tu kopi ocikasia covisila via Yehova ci kasi ko Silo, tu ci nena kulo okuti eye o kala pokati ketu loku tu popela kongusu yovanyãli vetu.” Nye ceyilila konjila va nõlelepo? “Ekundu liaco lia kãla enene, momo kua fa asualali va va Isareli olohũlũkai akũi atatu. Locikasia covisila via Suku lacovo ca kuatiwa.” (1 Samuele 4:2-4, 10, 11) Omo okuti va Isareli va kala Locikasia, va simĩle okuti Yehova wa laikele oku va kuatisa kuenda oku va teyuila. Ovo ka va pingile ekuatiso ku Yehova, ale oku kũlĩhĩsa ovisimĩlo viaye. Pole, va linga ovina va simĩle okuti via sunguluka, kuenje va tala ohali yalua.​—Tanga Olosapo 14:12.

18. Nye Embimbiliya li ku longisa catiamẽla koku kolela ku Yehova?

¹⁸ Omo okuti ukualosamo wa solele calua Yehova kuenda wa kolelele kokuaye, wa soneha ndoco: “Imba ovaso Suku, momo ndu sivaya vali. Eye oñuatisi yange, haeye Suku yange. Utima wa petama vokati kange, oco nda ku ivalukila.” (Osamo 42:5, 6) Ove hẽ o kuetevo ovisimĩlo vimuamue viatiamẽla ku Yehova? O tava hẽ okuti ukamba liaye kuenda wa kolela kokuaye? Citava okuti o lilongisa oku kolela calua kokuaye. Embimbiliya li tu sapuila ndoco: “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove.”​—Olosapo 3:5, 6.

19. O pondola oku lekisa ndati ku Yehova okuti u kuetele ocisola?

¹⁹ Omo okuti Yehova eye wa lianga oku tu sola, wa siata oku tu longisa ndomo tu lekisa ocisola kokuaye. Olonjanja viosi tu sukila oku sokolola ovina vialua a siata oku tu lingila, kuenda ocisola calua a tu kuetele. Omo liaco, tu amamiko oku lekisa ocisola kokuaye lutima wetu wosi, lomuenyo wetu wosi, lolondunge vietu viosi, kuenda longusu yetu yosi.​—Marko 12:30.