INA yange wa ndi pula hati: “Momo lie ku fendelela vakukululu yove? Kua kũlĩhile okuti o kasi komuenyo omo liavo? Ku sukila hẽ oku eca olopandu kokuavo? Momo lie ku lekisila esumbilo koviholo viasiwa kovitumbulukila? Oku liwekapo oku sumbila vakukululu yetu, ci sokisiwa loku popia okuti efendelo lietu ka li kuete esilivilo.” Noke yoku popia olondaka evi, Ina yange wa fetika oku lila.

Eci a ndi sapuila olondaka viaco, pa pitile lika olosãi vimue tunde eci Olombangi Via Yehova via sapela laye catiamẽla Kembimbiliya. Eye ka tavele oku lilongisa, pole omo liesumbilo, wa pinga kokuavo oco va ndongise. Cilo wa sumua lame, pole ka ca siatele omo olonjanja viosi nda pokola kokuaye. Omo okuti nda yonguile oku sanjuisa Yehova, vepuluvi eli ka ca tavele okuti ndi pokola kokuaye. Ka ca lelukile oku ci linga, pole Yehova wa nyĩha ongusu.

Epata liange lia kala vakuetavo lio Budista ndeci omanu valua vofeka yo Japãu. Noke yoku lilongisa olosãi vivali Lolombangi Via Yehova, nda limbuka okuti Embimbiliya liocili. Eci nda lilongisa okuti ñuete Isia umue wokilu, nda yonguile oku u kũlĩha ciwa. Kefetikilo, ame kuenda Ina yange tua solaile oku sapela ovina nda kala oku lilongisa. Nda fetika oku endaenda kolohongele Vocalumingu Vonjango Yusoma. Osimbu nda kala oku amamako oku lilongisa, nda sapuila Ina yange okuti ndi liwekapo oku endaenda ketavo lio Budista. Vonjanja yaco, wa sumua. Eye wa popia hati: “Oku kuata umue vepata okuti ka yongola oku fendela vakukululu yetu, esumuo.” Ina yange wa ñisika oku liwekepo oku lilongisa Embimbiliya loku endaenda kolohongele. Sia la ci sima okuti eteke limue ina yange o ka ndi sapuila ndoco! Eye wa pongoloka.

Tate wa tava kocisimĩlo ca Ina yange. Kelivulu lia va Efeso ocipama 6, nda lilongisa okuti Yehova o yongola okuti ndi pokola kolonjali viange. Nda yonguile okuti epata liange li kuata vali ombembua kuenje nda sima okuti nda nda va yevelela, ovo va ka ndi yevelelavo. Votembo yaco nda kala oku lipongiya oco ha linge oloseteko kosikola, pole nda tava oku linga eci olonjali viange via yonguile, okuti ndi ci linga vokuenda kuolosãi vitatu. Nda likuminya ku Yehova okuti noke liotembo yaco, ndi fetika vali oku enda kolohongele.

Onjila nda nõla ka ya sungulukile omo liasunga avali. Liatete, nda sima okuti noke yolosãi vitatu onjongole yange yoku vumba Yehova yi amamako. Pole, ukamba wange laye wa tepuluka lonjanga. Liavali, olonjali viange, via seteka olonjila vialua vioku ndi tateka oco ndi liwekepo oku vumba Yehova.

Vonjango Yusoma, nda li sanga Lolombangi vialua Via Yehova vi kasivo oku lambalaliwa lepata liavo. Ovo va ndi sapuila okuti Yehova o pondola oku ndi pamisa. (Mateo 10:34-37) Va ndi sapuila okuti, nda ndamamako oku kolela Yehova, citava okuti epata liange li pondolavo oku lilongisa catiamẽla kokuaye. Nda yonguile oku kolela Yehova, kuenje nda fetika oku likutilila olonjanja viosi.

Epata liange lia fetika oku ndi lambalala volonjila viñi viñi. Ina yange wa ndi sapuila oco ndi liwekepo oku lilongisa Embimbiliya kuenda oku ndekisa esunga liaco. Olonjanja vialua sia vangowaile cimue. Eci ndi vangula cimue tu lihoya, momo omunu lomunu o yongola oku lombolola esunga liaye. Cilo nda limbuka okuti, nda nda lekisile esumbilo kovisimĩlo via Ina yange kuenda kovina a tava, pokati ketu nda ka pa kaile oku lihoyisa. Olonjali viange via enda oku nyĩha upange walua oco si ka tunde konjo. Olonjanja vimue, va enda oku ndi yikila vonjo ale ka va ndi sila cokulia.

Ina yange wa ka pingile komanu vakuavo oco va sapele lame okuti, mongolola ovisimĩlo viange. Eye wa sapela lulongisi wange kosikola, pole, ka ca tẽliwile. Ina yange wa ngambata toke ku cime caye kupange oco a ndi sapuile okuti atavo osi ka a sungulukile. Eye wa vangulavo lepata lietu votelefone kuenda wa pinga ekuatiso liavo loku lila. Ovilinga viaco, via ndi sumuisa calua. Pole, kolohongele, akulu vekongelo va ndi sapuila okuti eci Ina yange a vangula lomanu vakuavo catiamẽla kovina via kala oku pita letu, eye o kasi oku eca uvangi kokuavo.

 Olonjali viange via yonguile okuti ndi lilongisila kosikola ya velapo oco ndi sange upange uwa. Ka ca lelukile oku sokiya epuluvi liwa oco tu sapele catiamẽla kondaka yaco kuenje, nda va sonehela ovikanda vialua loku lombolola ovimãho viange. Isiange omo lioku tema calua wa popia hati: “Nda osima okuti o ka sanga upange, u sanga muẽle hẽla, nda kua u sangele, tunda kulo konjo.” Nda li kutilila ku Yehova oco a ñuatise. Keteke lia kuamamo osimbu nda kala kupange woku kunda, pa molẽha vamanji vavali akãi kuenda va nyĩha upange woku longisa omãla vavo. Pole, Isiange ka sanjukilile upange waco kuenje, wa liwekapo oku vangula lame kuenda wa fetika oku ndi pembula. Ina yange wa ndi sapuila okuti hĩse o kale ongangala oku kala Ombangi ya Yehova sio.

Olonjanja vimue nda enda oku lipula nda Yehova o sanjuka eci ame ndi li patãla lolonjali viange. Kuenje, nda likutilila ku Yehova loku sokolola eci Embimbiliya li popia catiamẽla kocisola caye. Oku ci linga ca ñuatisa oku kuata ovisimĩlo via sunguluka kuenda oku kuata elomboloko liokuti olonjali viange vi ndi lambalala omo okuti via ñapako. Yehova wa ñuatisa oku pongolola ovisimĩlo viange kuenda oku kũlĩha eci ndinga. Handi vali, osimbu nda kala oku li kolisilako oku enda enda kupange woku kunda, esanju liange kupange waco, lia livokiya. Nda yonguile oku litumbika kupange wakundi votembo yosi.

Eci nda sapuila vamanji vamue akãi ocisimĩlo cange coku kala ukundi wotembo yosi, ovo va ndi sapuila okuti hĩse oku kevelela toke eci olonjali viange vi pongolola ovisimĩlo viavo. Nda likutilila loku pinga olondunge, nda linga akonomuiso, nda sokolola asunga a mbetiya oku kala ukundi wotembo yosi kuenje, nda sapela la vamanji alume kuenda akãi va loñoloha. Noke nda nõlapo oku sanjuisa Yehova. Nda limbuka okuti ndaño nda talamẽla otembo yimue okuti si fetika upange wakundi votembo yosi, lopo olonjali viange viamamako oku ndi lambalala.

Eci nda kala oku malusula osikola ya pita pokati, nda litumbika kupange wakundi votembo yosi. Noke yoku kala otembo yimue kupange waco, nda yonguile oku ka kundila kocikanjo ku sukila vali akundi. Pole, olonjali viange ka via yonguile okuti nunda konjo. Kuenje nda kevelela toke eci nda tẽlisa 20 kanyamo. Nda pinga ku vamanji ko betele oco va ndi tume kovikanjo via kala kombuelo yofeka yo Japãu oco Ina yange ka ka sakalale enene.

Osimbu nda kala oku kundila vocikanjo caco, nda kuata esanju poku mõla omanu valua nda kala oku longisa Embimbiliya va papatisiwa. Nda fetika oku lilongisa elimi Liongelesi, oco ndi vokiye upange wange. Eci nda limbuka ombili ya vamanji vavali akundi va likasi, nda nõlapo oku litumbikavo kupange wakundi va likasi. Vokuenda kuotembo yaco, Ina yange wa vela calua olonjanja vivali kuenje volonjanja viaco nda tiuka konjo oco ndu u kuatise. Eci co komõhisa, kuenje wa pongolola ekalo liaye.

Eci pa pita epanduvali kanyamo, ukundi umue olikasi o tukuiwa hati Atsushi, okuti umue pokati ka vamanji nda tukula, wa ndi tumisa ukanda. Eye wa lekisa onjongole yoku kuela lame, kuenda wa pula ocisimĩlo cange catiamẽla kokuaye. Lalimue eteke nda kuatele ocisimĩlo coku kuela la Atsushi kuenda siala sima okuti eye o kuete ocisimĩlo caco. Noke liosãi yimosi, ndo tambulula okuti njongola oku u kũlĩha ciwa. Tua limbuka okuti tu kuete ovimãho vimuamue. Tua yonguile oku amamako lupange wotembo yosi kuenda oku tava ovikele viosi va tu ĩha. Noke tua kuela. Nda sanjukile calua omo okuti olonjali viange kuenda epata likuavo veya kuvala wetu.

Noke liotembo yimue, osimbu tua kala kupange wakundi votembo yosi, Atsushi olonjanja vimue wa enda oku tambula ocikele coku nyula akongelo. Noke, tua tambula ocikele coku kala akundi va likasi kuenje tua tumiwa kupange woku nyula  akongelo. Eci tua mala oku nyula akongelo osi ovocikanjo cetu onjanja yatete, vamanji ko betele va tu telefonalela. Ovo va pula nda citava okuti tu ilukila kofeka yo Nepal loku amamako oku nyula akongelo.

Nda sakalalele calua poku sokolola ndomo olonjali viange vi ka kala poku yeva okuti ndi ilukila kofeka yimue okuti ocipãla. Eci nda va telefonalela, Isiange wa tambulula ndoco, “Ove wenda kocitumãlo cimue ca fina.” Osimbu sio telefonalele, umue pokati kakamba a isiange wo wĩha elivulu limue li lombolola ekalo lio ko Nepal, kuenda Isiange wa kala oku sima okuti ocitumãlo cimue ca fina coku nyula.

Tua sola calua oku kala pokati komanu vo ko Nepal okuti ca leluka oku linga lavo ukamba. Noke ofeka yo Bangladesh ya kongeliwa kocikanjo cetu. Ndaño okuti ofeka yaco ya kala ocipepi lo Nepal, ya li tepele calua. Kupange wetu woku kunda tua li yaka lovitangi vialua. Noke lianyamo atãlo, va tu tuma vali kofeka yo Japãu, kuna tu kasi oku amamako kupange woku nyula akongelo.

Nda lilongisa ovina vialua viatiamẽla ku Yehova eci tua kala oku talavaya kofeka yo Japãu, ko Nepal, kuenda kofeka yo Bangladesh. Omanu vokolofeka viaco va kuete ekalo, ovituwa kuenda ovihilahila via litepa. Kuenda omunu lomunu wa litepa. Nda siata oku limbuka ndomo Yehova a tata omunu lomunu, o va tava, o va kuatisa kuenda oku va sumũlũisa.

Ndi kuete ovina vialua vioku pandula Yehova. Eye wa ecelela okuti ndu u kũlĩha, ndi linga upange waye, kuenda wa nyĩha ulume umue uwa Ukristão. Suku wa ñuatisa oku nõla ciwa onjila ndi kuama, kuenda cilo ñuete ukamba uwa laye kuenda lepata liange. Ndi pandula Yehova, omo ame la Ina yange tua linga vali akamba. Nda sanjuka calua omo ndi kuete ombembua la Suku kuenda la ina yange.