Sanjukila Oku Kala Onjali

KOLONEKE vilo, voluali luosi kuli akãi valua okuti ka vosayala kolonjo omo liupange. Kolofeka vina viamako kuloño, akãi va siata oku linga upange u lingiwa lalume. Pole, kolofeka vikuavo, akãi upange wavo oku lima oco va kuatise epata.

Akãi valua va sakalala lonjongole yoku sandiliya eteku kuenda oku tata epata. Momo akãi vaco, ndaño va nganyala olombongo vioku landa okulia, uwalo, lonjo va kala, eci va pitĩla konjo poku tunda kupange, haivo va kuete ocikele coku teleka okulia, oku sukula uwalo, kuenda oku yelisa onjo.

Handi vali, akãi Akristão va kuete ocikele coku longisa omãla vavo ovina viespiritu. Kristina, ukãi umue o kasi oku tekula omãla vavali vafeko, wa popia hati: “Ka ca lelukile oku tepisa otembo yoku sanda eteku loku tata epata. Ca piãla enene oku sanda otembo yoku kala pamosi lomãla.”

Nye ci vetiya olonjali oku sanda upange weteku? Ovitangi vipi va siata oku liyaka lavio? Anga hẽ oku kuata upange umue wa kemãla oco lika ci nena esanju kakãi?

Esunga Lieci Akãi va Talavayela

Akãi valua va sukila oku kuata upange weteke leteke. Vamue ka va kuete alume va va kuatisa. Vakuavo, alume vavo ka va nganyala olombongo vi tẽla oku tekula epata.

Ocili okuti, asukila omuenyo haoko lika a vetiya akãi oku talavay. Valua va talavayela oku sanda ekemãlo. Vamue va ci lingila oco va kuete olombongo vialua okuti va ambata omuenyo ndomo va panga. Vakuavo va kuete upange uwa kuenda va u sanjukila.

Akãi vamue va talavaya omo va vetiyiwa lomanu vakuavo. Ndaño akãi vana va talavaya va siata oku yeva ekavo kuenda esumuo, vana vo sayala konjo, va siata oku pembuiwa. Ukãi umue wa popia hati, “ka ca lelukile oku sapuila vakuetu esunga lieci nda siatela oku usala konjo. Omanu vamue va ku vetiya oku sima okuti o kasi oku pesela ño  otembo yove.” Rebeka, ukãi umue o kasi oku tekula omãla vavali vakãi wa popia hati: “Ndaño tu kasi pokati komanu va kũlĩha esunga lieci ukãi a sukilila oku tata omãla vaye, ndi sima okuti, ukãi wosi usayala konjo, ka kapiwileko.”

Ocili ca Litepa Lesanda

Kolonepa vimue violuali, ovingungu viasapulo via siata oku lekisa okuti, “ukãi wocili” yuna o kuete upange uwa okuti o fetiwa ciwa, o kuete uwalo wa kemãla, kuenda wa kolapo. Eci a pitĩla konjo, o kuete unene woku tetulula ovitangi viomãla vaye, o vetela evelo ulume waye, kuenda o potolola ovitangi viosi vio vonjo. Akãi vañamiñami va tẽla oku kuata omuenyo waco.

Ovopange akãi vamue va siata oku kuata, a kavisa kuenda ka a feti ciwa. Handi vali, ovopange aco, ka a ecelela oku lekisa eci va tẽla oku linga. Elivulu Social Psychology lia lekisa okuti, “Ndaño akãi va likolisilako oku li sokisa lalume, lopo alume ovo va talavaya povitumãlo via velapo haivo va fetiwa vali ciwa. Akãi ndaño va talavaya apa pa kemãla, lopo ka va lisokele lalume.” Onjornale yimue yo ko Espanya yi tukuiwa hati El País, ya popia hati: “Olonjanja vimue akãi va kuete vali esumuo omo liesakalalo lioku tẽlisa ovikele viavo kocitumãlo cupange kuenda konjo.”

Ndomo Alume va Pondola Oku Kuatisa

Ukãi Ukristão eye o nõla nda o talavaya ale sio. Eye, kumue lulume waye, ovo va nõla onjila va sukila oku kuama poku konomuisa ovina viosi via kongelamo.​—⁠Olosapo 14:⁠15.

Nye ci popiwa nda omo liekambo liolombongo kavali kavo va kisikiwa oku talavaya eteke leteke? Vepuluvi liaco, ulume o kuete olondunge, o sukila oku kapako onumbi eyi Yembimbiliya: “Ene alume, kali lakãi vene lolondunge. Sumbili ukãi ndocikuata ca leñela, momo wakapiñala kumuamue kocali comuenyo.” (1 Petulu 3:⁠7) Ulume o lekisa okuti wa sumbila ukãi waye poku kapako oku leñela kuetimba kuenda kovisimĩlo. Eye o sukila oku kuatisa ukãi kovopange o vonjo nda otembo yecelela. Ulume o sukila oku linga ovopange a sule ndeci Yesu a linga. (Yoano 13:​12-​15) Eye o sukila oku tenda ovopange a sule vonjo ndepuluvi lioku lekisa ocisola kukãi waye. Kuenje ukãi eca olopandu kulume waye omo lioku u kuatisa.​—⁠Va Efeso 5:​25, 28, 29.

Ocili okuti nda ulume lukãi va nõlapo oku talavaya, va sukila oku likuatisa pokati. Ondaka eyi ya lekisiwa vonjornale yo ko Espanya yi tukuiwa hati ABC. Poku pitiya ulandu Wocisoko Coku Tetulula Ovitangi Viepata, onjornale yaco ya lekisa okuti, “ekambo liolonumbi vietavo kuenda ovituwa viwa,” havioko lika via siata oku nena ovitangi vepata. Pole kuli ovitangi vikuavo ndeci, “akãi va iñila kupange, kuenda alume ka va kuatisa akãi vavo kovopange o vonjo.”

Akãi Akristão va Kuete Ocikele Cinene

Ndaño Yehova wa eca kalume ocikele coku pindisa omãla, akãi Akristão va kũlĩha okuti va kongeliwavo vocikele caco, ca piãla vali omãla vatito. (Olosapo 1:8; Va Efeso 6:⁠4) Vocikele Yehova a ecele ku va Isareli coku longisa Ocihandeleko komãla vavo, wa kongelamo alume kuenda akãi. Eye wa kũlĩha okuti ci sukila epandi, ca piãla enene eci omãla va kasi oku kula. Eli olio esunga lieci Suku a handelekela olonjali oku pindisa omãla konjo, poku endela vetapalo, poku pasuka, kuenda poku pekela.​—⁠Esinumuĩlo 6:​4-7.

 Ondaka ya Suku yi lekisa esilivilo liocikele akãi va kuete poku handeleka omãla hati: “Ku ka tombe alungulo a nyõho.” (Olosapo 6:​20) Ocili okuti ukãi o sukila oku pulisa ulume waye osimbu handi ka tumbikile ocihandeleko cimue. Ndomo ca lekisiwa vocinimbu eci, akãi va kuete omoko yoku tumbika ovihandeleko. Kuenda omãla vana va kapako ovina viespiritu haivo va kuete ovituwa viwa omo lioku longisiwa lolonjali via sumbila Suku, vaka kuata asumũlũho alua. (Olosapo 6:​21, 22) Teresa, ukãi umue o kasi oku tata omãla vavali valume wa lombolola esunga lieci ka sandiliyile upange weteke leteke. Eye wa popia hati: “Ocikele nda velisilepo vali oku kuatisa omãla vange oku vumba Suku. Onjongole yange oku likolisilako oku tẽlisa ocikele caco.”

Akãi va Lekisa Ongangu Yiwa

Soma Lemuele wo ko Isareli wa limbukile alikolisilo a inaye. “Olondaka” inaye o “longisa” via kongeliwa Vondaka ya Suku. (Olosapo 31:1; 2 Timoteo 3:​16) Olondaka viaco viatiamẽla kukãi wa sunguluka, via siata oku kuatisa omãla valua oku nõla ohueli yiwa. Alungulo a eca atiamẽla koku yuvula ukahonga kuenda oku nyua enene a kuete esilivilo cilo ndeci kotembo a sonehiwa.​—⁠Olosapo 31:​3-5, 10-31.

Kocita catete, upostolo Paulu wa pandiya Eunike omo lioku pindisa omõlaye Timoteo. Omo okuti ulume waye wa kala ufendeli wolosuku vio ko Helasi, Eunike wa sukilile oku longisa Timoteo “ovisonehua vi kola.” Otembo yipi Eunike a fetika oku longisa Timoteo Ovisonehua? Embimbiliya li lekisa okuti wa ci linga “tunde kuñaña.” (2 Timoteo 1:5; 3:​14, 15) Epindiso kuenda ekolelo liaye lia kuatisa Timoteo oku li tumbika kupange wumisionaliu.​—⁠Va Filipoi 2:​19-22.

Vembimbiliya mu sangiwavo ulandu wakãi vamue okuti omo liocituwa cavo coku yekisa afendeli va Suku va kuatisa omãla vavo oku kuata ukamba lomanu vawa. Ukãi u Siunami wa yekisile uprofeto Elisia konjo yaye. Eci omõlaye a fa, Elisia wo pindula. (2 Olosoma 4:​8-10, 32-​37) Tu kũlĩhĩsi ulandu wa Maria, ina ya Marko usonehi Wembimbiliya. Eye wa ecele onjo yaye ko Yerusalãi oco olondonge vi lingilemo olohongele. (Ovilinga 12:​12) Marko wa kuatisiwa lukamba a kuata lovapostolo kuenda Akristão vakuavo va endaile konjo yaye.

Yehova wa sanjukila upange wakãi vana va enda oku longisa olonumbi Viaye komãla vavo. Eye wa sanjukilile ekolelo kuenda alikolisilo avo omo liekalo liwa konepa yespiritu va kuatele kolonjo viavo.​—⁠2 Samuele 22:26; Olosapo 14:⁠1.

Ceci ci Nena Esanju Lia Velapo

Ndomo ca lekisiwa Vovisonehua, oku tata epata kekalo kuenda konepa yespiritu oco ci nena esanju lia velapo. Pole ka ca lelukile oku ci linga. Upange wo vonjo akãi va siata oku linga, vamue va u tenda okuti wa tĩla calua okuti woku sanda eteku u sule.

Eci ukãi a siapo upange woku sanda eteku omo lioku tava kelungulo liulume waye, va leluisa omuenyo vepata liavo, pole vana ka va kũlĩhĩle esunga liaco, va fetika oku u pembula. Pole, o pondola oku tambula asumũlũho alua omo lioku ci linga. Paki, ukãi umue o kuete omãla vatatu, wa siata oku talavaya lika olowola vimue veteke. Eye wa popia hati: “Nda siata oku sapela lomãla vange eci va tunda ko sikola oco ndi va kuatise.” Omãla vaye va siata oku kuatisiwa ndati? Eye wamisako hati: “Nda siata oku va kuatisa poku pongiya ovipama vio kosikola kuenje eci va kuata ovitangi, ndi  vi potolola lonjanga. Otembo nda siata oku pita kumue lavo eteke leteke, yi tu kuatisa oku pamisa ukamba wetu. Nda velisapo calua otembo ndi pita lomãla vange okuti oku talavaya eteke liosi kupange ci sule.”

Akãi valua va limbuka okuti oku talavaya olowola vimue kupange ci kuatisa epata liosi. Kristina tua tukula kefetikilo liocipama cilo, wa popia hati: “Epata lietu lia kuata esanju lialua eci nda liwekapo oku talavaya. Nda kuata otembo yoku sapela lomãla vange kuenda oku kuatisa veyange oku tata ovikele viaye. Nda fetika oku longisa omõlange wufeko oku amamako oku kula kespiritu.” Handi vali, Kristina wamisako hati: “Omõlange wulume haeye uveli, wa fetika oku enda eci a kala konjo yoku tata omãla. Pole, omõla wavali wukãi, wa lilongisila oku enda konjo. Ame muẽle ndo longisa oku enda. Eci ca ñokela esanju lialua!”

Ocina cikuavo tu sukila oku konomuisa ceci okuti akãi va talavaya, va pesela vali olombongo okuti vina nda va pesila koku u sayaila konjo vi sule. Kristina wa lombolola hati: “Onepa yalua yolombongo ndaenda oku nganyala nda yi pesila koku feta omanu va enda oku tata omõla. Eci tua konomuisa ciwa ekalo lietu tua limbuka okuti upange wange ka wa vokiyile olombongo lavimue vepata.”

Noke yoku kũlĩhĩsa lutate ekalo liavo, olohueli vimue vi limbuka okuti eci ukãi a talavaya olowola viosi veteke, epata li pesela vali olombongo. Paulu, ulume wa Kristina, wa popia hati: “Nda sanjukila calua ukãi wange momo wa siata oku linga upange wo vonjo kuenda oku tata omãla vetu vavali. Eci ukãi wange a kala oku talavaya, tua kuatele asakalalo alua.” Onjila va nõla ya kuatisa ndati omãla vavo vavali vafeko? Paulu wa tambulula hati: “Onjila yaco ya va teyuila kovituwa vĩvi tunde vutila wavo.” Momo lie olohueli evi via limbukila okuti oku pesela otembo yalua lomãla vavo ci kuete esilivilo? Paulu wa kumbulula ndoco: “Nda kolela okuti nda etu tulonjali ka tua longele omãla vetu, omunu umue wiñi oka va longisa ovituwa vĩvi.”

Omo liaco, olohueli vi sukila oku kũlĩhĩsa lutate ekalo liavo. Ka kuli omunu o pondola oku vetela evelo ocisimĩlo cukuavo. (Va Roma 14:4; 1 Va  Tesalonike 4:​11) Omo liaco, epata lepata li sukila oku kũlĩhĩsa ciwa asumũlũho va pondola oku kuata, nda ukãi o nõla oku tata onjo yavo. Handi vali, Teresa, una tua tukula vocipama cilo, wa popia hati: “Ka kuli esanju lia velapo okuti oku pesela otembo yoku tata omãla loku va longisa ci sule.”​—⁠Osamo 127:⁠3.

[Olondaka vielitalatu kemẽla 29]

Akãi Akristão va kuatisa kupange wa velapo woku pindisa omãla