Suku o Kuete hẽ Onduko?
Suku o Kuete hẽ Onduko?
Omanu vamue va tambulula ndoco:
▪ “Onduko yaye Ñala.”
▪ “Eye ka kuete onduko.”
Nye Yesu a popia?
▪ “Oco li kutilili ndeci, hoti, A Isietu o kasi kilu. Onduko yove yi sumbiwe.” (Mateo 6:9) Yesu wa kolelele okuti Suku o kuete onduko.
▪ “Nda va lomboluila onduko yove kuenje lopo ndi va yi lomboluila, okuti ocisola wa sola laco ame, oco ci kale volonulo viavo, kuenje ame ñala volonulo viavo.” (Yoano 17:26) Yesu wa sapula onduko ya Suku.
▪ ‘Ndu sapuili siti, Ko moli vali, te vu popia, hoti, U iya vonduko ya Yehova a sivayiwe.’ (Luka 13:35; Osamo 118:26) Yesu wa tukola onduko ya Suku.
SUKU o tu sapuila onduko yaye. Eye wa popia hati: “Ame Yehova, oyo onduko yange.” * (Isaya 42:8) Onduko Yehova, ya kũlĩhĩwa ciwa velimi liumbundu ndomo yi sangiwa kelimi lio Heveru. Pamue o komõha eci o limbuka okuti onduko yaco, oyo lika yi molẽha olonjanja vialua Vembimbiliya kelimi lio Heveru. Onduko yaco, yi molẽha olonjanja vialua Vembimbiliya okuti onduko yikuavo ci sule.
Omanu vamue eci va pulisiwa okuti, “Onduko ya Suku helie?” va tambulula hati, “Eye Ñala.” Cimuamue haico ci pita eci va pulisiwa hati, “Helie wa yula ocela?” ovo va tambulula hati, “mbiali.” Ci kale ondaka “Ñala,” kuenda “Mbiali,” ka vieci atambululo a suapo, momo halondukoko.
Momo lie Suku a tu sapuilila onduko yaye? Wa ci lingila oco tu u kũlĩhe ciwa. Kũlĩhĩsa ocindekaise eci; omunu umue pamue vo vilikiya hati, Ñala, Cime, Tate ale Pakũlu. Olondaka evi viesumbilo vi situlula eci catiamẽla komunu waco. Pole, onduko yaye yi tu ivaluisa ndomo omunu waco a tuwa. Cimuamue haico ci pita la Suku. Olondaka ndeci Ñala, Tõlo, Isia kuenda Ululiki, vi tu lekisa ovina viatiamẽla kovopange Aye. Pole onduko yaye Yehova, yi tu ivaluisa ovina tua kũlĩha viatiamẽla kokuaye. Oco hẽ o pondola oku kũlĩha ndati Suku nda kua kũlĩhĩle onduko yaye?
Ku sukila lika oku kũlĩha onduko yaco, o sukilavo oku yi tukula. Momo lie? Embimbiliya li tu sapuila hati: “Vosi va vilikiya loku tukula onduko ya [Yehova] va popeliwa.”—Va Roma 10:13; Yoeli 2:32.
[Atosi pombuelo yamẽla]
^ Ovinimbu 9 Oco o sange elomboloko lionduko ya Suku, kuenda esunga lieci onduko yaco ka yi molẽhela Vambimbiliya akuavo, tanga elivulu Embimbiliya Li Longisa Nye? kamẽla 195-197, lia sandekiwa Lolombangi Via Yehova.
[Elitalatu kemẽla 6]
Omunu pamue vo vilikiya hati, Ñala, Cime, Tate ale Pakũlu. Pole onduko yaye yi tu ivaluisa ndomo omunu waco a tuwa