Suku o Tava hẽ Olonjila Viosi Vioku u Fendela?

Omanu vamue va tambulula ndoco:

▪ “Atavo osi olonjila vi tu tuala toke ku Suku.”

▪ “Ocina ca velapo vali oku kuata utima wa yela, okuti oku kuama etavo ci sule.”

Nye Yesu a popia?

▪ “Iñilili vombundi ya sukatela, momo ombundi yoku iñila koku nyõleha ya tanda, kuenda onjila yendako ya sanjavala, kuenje va lua va iñililamo. Puãi ombundi yoku iñila komuenyo ya sukatela, lonjila yaco ya tĩla, kuenje vañamiñami va yi sanga.” (Mateo 7:​13, 14) Yesu ka longisile okuti atavo osi a tu kuatisa oku amẽla ku Suku.

▪ “Keteke liaco va lua va popia lame vati, A Ñala, a Ñala, ka tua imbaile hẽ owanji wondaka vonduko yove? Ka tua tudaisaile hẽ [olondele] vonduko yove? Ka tua lingile ovonene a lua vonduko yove? Oco mopia lavo siti, Sia lo kũlĩhi. Nundi, alondingaĩvi.” (Mateo 7:​22, 23) Yesu ka tava ño omanu vosi va li tukula ndolondonge viaye.

OMANU valua va kakatela calua kalongiso kuenda kovihilahila vietavo liavo. Nda okuti alongiso aco ka a litava Londaka ya Suku, Embimbiliya, nye ci pondola oku pita lomanu vaco? Yesu wa lekisa ohele yi tunda koku kuama ovihilahila via tumbikiwa lomanu eci a popia lasongui vetavo va kala koloneke viaye hati: “Wa nyõli ocihandeleko ca Suku ha vu tẽlisa ociholo cene.” Noke eye wa tukula olondaka via Suku poku popia hati: “Omanu ava va sumbila ño lovimẽla viavo, puãi ovitima viavo vi kasi ocipãla lame. Va fendela lesanda, osimbu va kasi loku longisa ovisila viomanu.”​—⁠Mateo 15:​1-9; Isaya 29:⁠13.

Tu sukila oku kuata ovituwa via velapo okuti hakukuamako lika etavo. Catiamẽla komanu vana va litukula okuti va vumba Suku, Embimbiliya li popia ndoco: “Va popia vati, Tua kũlĩha Suku, puãi vo likala lovilinga viavo.” (Tito 1:​16) Catiamẽla komanu vo koloneke vilo, Embimbiliya li popia ndoco: “Vakuakusola ca lua esanju, Suku ci sule. Va limolehisa nda vakuekolelo lioku kolela Suku, puãi va likala unene walio. Oco litepa lavo.”​—⁠2 Timoteo 3:​4, 5.

Tu sukila oku kala vakuesunga, pole kuli ovina vikuavo vi sukiliwa. Momo lie? Momo ci tava okuti omunu o linga esunga leci cĩvi. Omo liaco, tu sukila oku kuata ukũlĩhĩso wa Suku. (Va Roma 10:​2, 3) Oku kuata ukũlĩhĩso waco loku kuama olonumbi Viembimbiliya, oco ci tu kuatisa oku sanjuisa Suku. (Mateo 7:​21) Voku kuama etavo liocili mua kongela oku kuata ovisimĩlo via sunguluka, alongiso ocili, kuenda ovituwa viwa. Kuenda oku kuata ovituwa viwa, ci lomboloka oku linga ocipango ca Suku eteke leteke!​—⁠1 Yoano 2:⁠17.

Nda o yongola oku kuata ukũlĩhiso watiamẽla ku Suku, pinga Kolombangi Via Yehova oco o fetike oku lilongisa Embimbiliya konjo yove.

[Etosi Liavelapo kemẽla 9]

Voku kuama etavo liocili mua kongela oku kuata ovisimĩlo via sunguluka, alongiso ocili, kuenda ovituwa viwa