Espiritu Sandu Olio Ongusu o Sukila Komuenyo Wove

“KU KA nundise kovaso ove. Ku ka njupe espiritu liove li kola.” (Osamo 51:11) Eyi ya kala ohutililo ya Daviti noke yoku linga ekandu limue linene.

Daviti vokuenda kuomuenyo waye, wa limbuka unene wespiritu sandu. Eci a kala umalẽhe, wa liyaka la Goliata ocindululu haeye esualali. (1 Samuele 17:45-50) Espiritu sandu, lio kuatisavo oku soneha olosamo vina a imba. Eye wa popia hati: “Espiritu lia Yehova li popia, ame ndinga mitakati. Ondaka yaye yi kasi kelimi liange.”—2 Samuele 23:2.

Yesu Kristu wa lombololavo ndomo espiritu sandu lia kuatisa Daviti. Onjanja yimue, wa sapuilile olonjeveleli viaye hati: “Eye muele Daviti, wa popia lespiritu sandu hati, Ñala [Yehova] wa popia la Ñala yange hati, Tumala kondio yange, toke ndinga ovanyali vove ociliatelo colomãi viove.” (Marko 12:36; Osamo 110:1) Yesu wa kũlĩhĩle okuti eci Daviti a soneha olosamo viaye, wa kuatisiwa lespiritu sandu. Anga hẽ, espiritu liaco, li pondolavo oku tu kuatisa?

“Pingi, Kuenje cu Wihiwa”

Ocili okuti, ove lalimue eteke o soneha osamo. Pole, o pondola oku liyaka lovitangi vialua via tĩla havio vinene nda Goliata. Kũlĩhĩsa ulandu wukãi umue o tukuiwa hati, Isabel. a Eci va litepa lulume waye, wa kala umalẽhe. Ulume waco wo sila ofuka yimue yinene, kuenda ko silile ekuatiso lioku tekula omãla vavo vavali vafeko. Isabel wa popia hati: “Nda yeva esumuo lialua omo lioku yandulukiwa kuenda nda liyeva  ndu okuti si kuete vali esilivilo. Pole, tunde eci ulume wange a ndi siapo, nda limbuka ndomo espiritu sandu lia siata oku ndi kuatisa.”

Anga hẽ, Isabel wa tambula espiritu sandu locikomo? Sio, eye wa pinga ku Suku eteke leteke oco o wĩhe espiritu sandu liaye. Isabel wa kũlĩhĩle okuti o sukila ongusu ya Suku oco yu kuatise kovitangi a lakele oku liyaka lavio ndeci, oku tekula omãla, kuenda oku u kolisa. Eye wa kuatisiwa lolondaka via Yesu vi popia hati: “Pingi, kuenje cu wihiwa, [vanjiliyi], kuenje vu sanga; totoli, kuenje liu yikuluilua.”—Mateo 7:7.

Roberto, wa limbukavo okuti wa sukilile ekuatiso liespiritu sandu kocitangi caye. Eye wa kala locituwa coku sipa akaya kuenda ovina vikuavo vi koluisa. Wa liyaka locitangi caco vokuenda kuanyamo avali kuenda olonjanja vimue wa enda oku konyoha. Eye wa popia hati: “Eci omunu a liwekapo oku sipa ovina vi koluisa, o kuata esakalalo lialua. Momo eteke leteke, etimba li kuata onjongole yoku sipa ovina viaco.”

Roberto wamisako hati: “Nda nõlapo oku linga epongoloko komuenyo oco ndi vumbe Suku ndeci a yongola. Nda likolisilako oku yukisa vutima wange ovisimĩlo Viembimbiliya. Nda likutilila oloneke viosi oku pinga ku Suku oco a nyihe ongusu yoku ambata omuenyo u likuata lolonumbi Viembimbiliya. Nda kũlĩhĩle okuti si pondola oku yula ocitangi caco longusu yange muẽle. Nda limbuka ndomo Yehova a tambulula olohutililo viange, capiãla enene olonjanja vimue eci nda enda oku sumua omo lioku linga vali ekandu liaco. Espiritu sandu lia Suku lia nyiha ongusu. Nda ka ca kale ekuatiso liespiritu sandu, nda lalimue eteke nda yula ocitangi cange.”—Va Filipoi 4:6-8.

Oku “Palãla Lavava Ndolongonga”

Ndeci ca pita la Isabel kuenda Roberto, Olombangi vialua via Yehova via siatavo oku kuatisiwa lunene wespiritu sandu. Ongusu ya Yehova yina a lulika layo oluali, yi pondolavo oku ku kuatisa nda o yongola. Suku wa likapelako oku eca espiritu liaye kokuove nda wa li pinga lutima wosi. Pole, oco o tambule espiritu liaco, o sukila oku lilongisa ocili catiamẽla kokuaye, kuenda oku sandiliya oku linga ocipango caye.—Isaya 55:6; Va Heveru 11:6.

Lekuatiso liespiritu sandu, o pondola oku tambula ongusu yoku vumba ciwa Suku, kuenda oku pandikisa kovitangi viosi viya vomuenyo wove. Embimbiliya li tu likuminya hati: “[Yehova] o kolisa ava va lenda, o vokiya olohõlo ku ka vi kuete. ... Ava va imba Yehova ovaso va sakumuha; va palãla lavava ndolongonga, va lupuka kuenje ka va kavi, va enda kuenje ka va vela epuila.”—Isaya 40:28-31.

[Etosi pombuelo yemẽla]

 [Okakasia kemẽla 9]

NDOMO ESPIRITU SANDU LI TU KUATISA

[Olondaka vielitalatu kemẽla 9]

Espiritu sandu li ku kuatisa oku tamãlala layonjo kuenda oku yula ovituwa vĩvi. Upostolo Paulu wa popia hati: “Suku wa kolelua, kuenje ka tava okuti wu yonjiwa te leli wu tela, puãi kumuamue leyonjo u muisivo evelo lioku puluka okuti vu soka lalio.” —1 Va Korindo 10:13.

[Elitalatu kemẽla 9]

Espiritu sandu li ku kuatisa oku kuata ovituwa vi sanjuisa Suku. “Epako liespiritu lieli: ocisola, esanju, ombembua, epandi, unu, esunga, ekolelo, umbombe, esuluviko.”—Va Galatia 5:22, 23.

[Elitalatu kemẽla 9]

Espiritu sandu li ku kuatisa oku pandikisa kovitangi. “Nela ovina viosi vu Kristu u o ñolaisa.”—Va Filipoi 4:13.

[Olondaka vielitalatu kemẽla 8]

‘Nda likutilila oloneke viosi oku pinga ku Suku oco a nyihe ongusu. Nda kũlĩhĩle okuti si pondola oku yula ocitangi caco longusu yange muẽle. Nda limbuka ndomo a tambulula olohutililo viange’

 [Okakasia kemẽla 7]

Ovilinga Viespiritu Sandu

Suku poku lulika ongongo kuenda ovina viosi, wa ci linga lespiritu sandu. Ukualosamo wa popia hati: “A Yehova, oviluvo viove via lua cimue. Viosi wa vi lulika lolondunge. Oluali lue yuka ovilulikilo viove. Eci o tuma espiritu liove, vi lulikua.”—Osamo 104:24, 30; Efetikilo 1:2; Yovi 33:4.

Espiritu sandu lia kuatisa omanu oku soneha Embimbiliya. Upostolo Paulu wa popia hati: “Ovisonehua vi kola viosi ovitumasuku, kuenje vi silivila.” (2 Timoteo 3:16) Espiritu sandu lia Yehova olio lia kuatisa asonehi Vembimbiliya oku pitiya “ondaka ya Suku.”—1 Va Tesalonike 2:13.

Espiritu sandu lia kuatisa omanu va Suku oku lombolola ovina vi keya kovaso. Upostolo Petulu wa popia hati: “Limbuki eci cokuti, la-umue owanji wovaprofeto u kasi vovisonehua wa eciwa lelomboluilo liomunu, momo, la-umue owanji wovaprofeto weya locipango comunu, puãi omanu va kola va vetiyiwa lespiritu sandu va popia ondaka ya tunda ku Suku.”—2 Petulu 1:20, 21; Yoeli 2:28.

Espiritu sandu lia kuatisa Yesu lomanu vakuavo vakuekolelo oku kunda olondaka viwa Viusoma wa Suku kuenda oku linga ovikomo. Yesu wa popia hati: “Espiritu lia Yehova lia mbuila, momo lia mbuaveka. Lia numa oku kundila olosuke ondaka yiwa, loku sakula ava va teka kovitima. Lia numa oku sapula eyovo kolohute, kuenda eletuluko kolomeke. Lia numa oku pandulula ava va pandekua.”—Luka 4:18; Mateo 12:28.