Lilongisila Kondaka Ya Suku

Momo Lie o Lilongisila Ovina Viatiamẽla ku Suku?

Ocipama cilo, ceca atambulula kapulilo amue okuti, pamue wa va lingile ale, kuenda ci lekisa ovinimbu vi ku kuatisa oku tanga atambululo Vembimbiliya liove. Olombangi Via Yehova vi sanjukila oku eca atambulo kokuove kapulilo a lingiwa ndeti.

1. Momo lie o lilongisila ovina viatiamẽla ku Suku?

Suku o kuete olondaka viwa vioku sapula komanu. Eye o tu sapuila ovina viaco lekuatiso Liembimbiliya. Olio li sokisiwa ndukanda umue wa tunda ku Isietu wokilu ukuacisola.—Tanga elivulu lia Yeremiya 29:11.

2. Olondaka viwa vi lomboloka nye?

Omanu va sukila ombiali yimue yiwa. Laumue uviali womunu wa tẽla oku yovola omanu kungangala, kekambo liesunga, kovoveyi, ale kolofa. Pole, kuli olondaka viwa vi lekisa okuti, Suku o ka eca ombiali yiwa komanu. Ombiali yaco yi ka yovola omanu kovina viosi vi koka ohali.—Tanga Daniele 2:44.

3. Momo lie ci kuetele esilivilo oku lilongisa ovina viatiamẽla ku Suku?

Ndopo Suku o ka nyõla omanu vosi va siata oku koka ohali voluali. Eye o kasi oku longisa omanu valua vakuavitima via sunguluka oco va kuate omuenyo umue wesanju wendisiwa locisola. Lekuatiso Liondaka ya Suku, omanu va kasi oku lilongisa ndomo va tẽla oku liyaka lovitangi viomuenyo, kuenda ndomo va sanjuisa Suku.—Tanga Sofoniya 2:3.

4. Helie usovoli Wembimbiliya?

Embimbiliya li kuete 66 kalivulu. Olio, lia sonehiwa leci ci soka 40 kalume. Tunde eci alivulo vatãlo vatete va sonehiwa la Mose, pa pita ale ci soka. 3.500 kanyamo. Tunde eci alivulu a sulako a sonehiwa lupostolo Yoano, pa pita ale 1.900 kanyamo. Pole, asonehi Vembimbiliya, va soneha lika ovisimĩlo via Suku, viavo havioko. Omo liaco, Suku eye Usovoli Wembimbiliya.—Tanga 2 Timoteo 3:16; 2 Petulu 1:21.

Tua kũlĩha okuti, Embimbiliya li tunda ku Suku, momo lia suapo, kuenda li tu sapuila ovina vi keya kovaso yoloneke. Lomue omunu o pondola oku ci linga. (Isaya 46:9, 10) Embimbiliya li tu lomboluilavo ovituwa via Suku. Olio li kuete unene woku kuatisa omanu oco va pongolole ekalo liomuenyo wavo. Ovina via tukuiwa ndeti via siata oku kuatisa omanu valua oku tava okuti, Embimbiliya Ondaka ya Suku.—Tanga Yehosua 23:14; 1 Va Tesalonike 2:13.

5. O kuata ndati elomboloko Liembimbiliya?

Yesu wa kũlĩhĩwile calua omo lioku longisa Ondaka ya Suku. Ndaño omanu valua a sapela lavo va kũlĩhĩle Embimbiliya, pole, va sukilile ekuatiso oco va kuate elomboloko liovina viaco. Oco Yesu a kuatise omanu, wa tukula ovinimbu vimue Viembimbiliya, kuenda ‘wa lekisa elomboloko liaco.’ Onepa losapi hati: “Lilongisila Kondaka ya Suku,” yi ka nenavo ovipama vimue oco vi ku kuatise.—Tanga Luka 24:27, 45.

Kuli ovina vimue vi komohisa tu lilongisa ku Suku, catiamẽla kesilivilo liomuenyo. Omanu vamue ka va yongola okuti, ove o lilongisa Embimbiliya. Pole, amamako loku pandikisa. Momo oco o kuate omuenyo ko pui, o sukila oku kuata ukũlĩhĩso wa Suku.—Tanga Mateo 5:10-12; Yoano 17:3.

Oco o kuate elomboloko lia suapo liatiamẽla kondaka eyi, tala kocipama 2, velivulu lia sandekiwa Lolombangi Via Yehova losapi hati: Embimbiliya li Longisa Nye?