Vakuakutanga Va Pula . . .

Ofeka Yelau ya Tukuiwa Vembimbiliya yi Sangiwa pi?

▪ Yesu wa likuminya kulume wa kala oku fila ponele yaye okuti, wa lekisa ekolelo kokuaye. Kuenje wo sapuila hati: ‘O ka kala kumue lame vofeka Yelau.’ (Luka 23:43) Ulume waco o ka kala pi? Anga hẽ, Ofeka Yelau Yesu a tukula yi ka kala kilu, palo posi, ale kocitumãlo cikuavo kuna omanu va ka sombisiwila?

Olonjali vietu viatete via kala Vocumbo celau palo posi. Embimbiliya li tu sapuila ndoco: “Yehova Suku yu wa kũla ocumbo [ce] Edene [ca] kala kutundilo; omo a kapa omunu a sovola. Yehova Suku wa nyañula ulume wo kapa vocumbo ce Edene ha ci limi loku ci tata.” (Efetikilo 2:8, 15) Eci olondaka evi via pongoluiwila kelimi lio Helasi, ondaka “ocumbo” ya tukuiwile okuti, “ofeka yelau.”

Ocili okuti, eci olohueli vi fetika oku cita omãla, vi sukila oku tunga onjo yinene. Cimuamue haico olonjali vietu viatete nda via linga okuti vi tandisa Ocumbo Cedene kolonepa viosi violuali, osimbu epata liavo li livokiya. Momo, Suku wa va sapuila hati: “Yukisi oluali, lu yuli.”—Efetikilo 1:28.

Ululiki wetu wa yonguile okuti, omanu va kala Vocumbo celau palo posi, kuenda oku cita omãla. Ovo nda va kala vocumbo caco palo posi okuti, ka va sukila ayambo. Omanu vosi nda va kala komuenyo palo posi otembo ka yi pui. Oluali luosi nda lua linga ocitumãlo cetu cesanju! Momo tua lulikiwa oco tu kale vongongo yimue ya posoka palo posi.

Anga hẽ, ocipango ca Suku ca pongoloka? Sio, ka ca pongolokele. Momo, Yehova wa tu likuminya ndoco: “Ondaka yange yi tunda vomẽla wange; ka yi tiukila ño kokuange, puãi yi linga ndeci nda panga oku tẽlĩsa.” (Isaya 55:11) Noke yoku pita ci soka 3.000 kanyamo tunde poku lulikiwa kuomanu vatete, Embimbiliya li tukula eci catiamẽla ‘Kululiki wongongo una wa yi panga.’ Eye ‘ka yi sowilile ekalasoko, pole, wa yi sovola oco omanu va kalemo.’ (Isaya 45:18) Ocipango ca Suku catiamẽla koluali ka ca pongolokele. Eye o ka pongolola oluali luosi oco lu linge ocumbo cimue celau.

Olonepa vialua Viembimbiliya, vi lombolola eci catiamẽla koku kala palo posi. Ocitumasuku ca Isaya ci popia hati: “Va [ka] tunga olonjo kuenje va kalamo; va [ka] kũla oviumbo viayuva kuenje va lia epako liavio.” (Isaya 65:21) Kocitumãlo cipi omanu va sukila oku tungila olonjo, loku kũla oviumbo viayuva? Kocitumãlo cipi va lila apako aco? Mulo vongongo. Elivulu Liolosapo 2:21, li popia hati: “Vakuesunga va [ka] tunga vofeka.”

Yesu wa lombololavo catiamẽla kofeka yelau palo posi. Pole, wa likuminya kokacunda katito hati, va ka kala vofeka yelau kilu. (Luka 12:32) Kuenje, va ka likongela la Kristu, oco va viale Oluali Luokaliye palo posi. (Esituluilo 5:10; 14:1-3) Olosoma viaco, vi ka kuama olonumbi via Suku poku viala Oluali luaco loku lu tata.

Yesu wa kũlĩhĩle ocipango ca Suku catiamẽla koluali. Eci Ocumbo Cedene ca sevetiwa, eye wa kala kilu la Isiaye. Omanu vosi va kuete ekolelo, va pondola oku kuata omuenyo ko pui voluali luokaliye palo posi. (Yoano 3:16) Yesu wa likuminya komanu vaco hati: ‘U ka kala kumue lame vofeka Yelau.’—Luka 23:43.

[Ono Yelitalatu kemẽla 15]

© FORGET Patrick/SAGAPHOTO.COM/Alamy