1 Momo Lie tu Sukilila Oku

Likutilila?

OHUTILILO. Vembimbiliya ka mu sangiwa ovolandu alua a vetiya omanu oku konomuisa ovina vikuavo. Tu konomuisi apulilo epanduvali omanu va siata oku linga atiamẽla kolohutililo, kuenda tu konomuisivo atambululo a sangiwa Vembimbiliya. Ovipama viaco, via pongiyiwa locimãho coku ku kuatisa ndomo o likutilila, ale oku mioñolola olohutililo viove.

VOLUALI luosi mu sangiwa omanu va litepa ketavo, kovituwa, kuenda va siata oku likutilila. Ovo va likutilila eci va kasi likaliavo, ale la vakuavo. Ovo va likutilila volonembele, volosunangonga, volonembele via va Musulumanu, kuenda vatambo. Ovo pamue va yala evinda poku likutilila, va likutilila lotelusu, va kala ovimunga, va tanga olohutililo velivulu limue, va kekamela koviñumañuma poku likutilila, kuenda va likutilila kotuavaya tua kapiwa vovimano.

Olohutililo ovio vi tepisa omanu lovina vikuavo vi kasi lomuenyo voluali. Pole, kuli ovina vimue tu sukila ndeci ci pita lovinyama. Cikale omanu ale ovinyama, vosi yetu tu sukila okulia, ofela, kuenda ovava. Vosi tu citiwa, tu kala komuenyo, kuenda tu fa. (Ukundi 3:19) Pole, omanu ovo lika va siata oku likutilila. Momo lie?

Momo tu vetiyiwa oku ci linga. Ohutililo oyo onjila yoku sapela la Suku. Omanu va tenda ohutililo ndocina cimue ci kola, haico ka ci kuete esulilo. Embimbiliya li lekisa okuti, tua lulikiwa lonjongole yoku likutilila. (Uku. 3:11) Yesu wa popia hati: “Vakuosuke wovutima va sumũlũha.”—Mateo 5:3.

Ondaka “vakuosuke wovutima,” ya siata oku lomboluiwa ndati volonembele, kovina omanu vamue va siata oku fendela, kuenda otembo ka yi tendiwa va pesila kolohutililo? Omanu vamue va li kolela ovo muẽle, ale va kolela ku vakuavo oco va tẽlise olonjongole viavo konepa yespiritu. Ku tava hẽ okuti, omanu ka va tẽla oku eca ekuatiso li sukiliwa? Etu tua hongua, tu kala lika otembo yitito komuenyo, kuenda ka tu kuete elomboloko lia suapo liovina viosi. Pole, kuli umue o kuete ukũlĩhĩso wa velapo, ukuonene wosi, ka kuete efetikilo ndaño esulilo, okuti o tu ĩha ovina viosi tu sukila. Ovina vipi tu sukila kespiritu okuti, vi tu vetiya oku likutilila?

Sokolola ndoco: Ove hẽ eteke limue wa sukilile ovina vimue ndeci: Onumbi yi ku songuila, uloño, ale apulilo amue okuti, lomue omunu o tẽla oku a tambulula? Wa sukilile ale elembeleko eci wa pita lepese limue, poku sanda ekuatiso oco o nõle onjila o yongola oku kuama, ale poku pinga ongecelo eci wa yeva esumuo omo liekandu limue wa linga?

Embimbiliya li lekisa okuti, tu sukila oku kongela volohutililo vietu ovina via tukuiwa ndeti. Olio lia koleliwa, kuenda mu sangiwa ovolandu omanu vakuekolelo va kuatisiwa poku liyaka lovitangi. Volohutililo viavo, va pinga elembeleko, olonumbi, ongecelo yakandu, kuenda va sanga atambululo kapulilo a tĩla calua.—Osamo 23:3; 71:21; Daniele 9:4, 5, 19; Havakuki 1:3.

Ndaño olohutililo via lingiwa volonepa via litepa, pole, via kuata ocimaho cimuamue. Vosi va enda oku likutilila, va kũlĩhĩle eci va sukilile oku linga, oco olohutililo viavo vi tambuluiwe. Momo va kũlĩhĩle kulie va sukila oku suñamisa olohutililo viavo. Pole, omanu valua voluali, ka va kapeleko ovina viaco.