Lilongisila Kondaka Ya Suku

Yesu Kristu Helie?

Ocipama cilo ci konomuisa apulilo wa siata oku lilinga kuenda ci lekisa apa o sanga atambululo poku tanga Vembimbiliya liove. Olombangi Via Yehova, vi ka sanjuka poku konomuisila kumue love atambululo aco.

1. Yesu Kristu helie?

Ca litepa lomanu vakuavo, ceci okuti Yesu wa kala ale kilu, osimbu ka citiwile ndomunu palo posi. (Yoano 8:23) Eye omunu wa lulikiwa tete la Suku kuenda wa kuatisa koku lulika ovina viosi vikuavo. Omo okuti Yehova wo lulika lika liaye, o tukuiwa hati “Mõla wongunga” wa Suku. Omo Yesu wa talavaya Ndakapitiya ka Suku, o tukuiwa hati, “Ndaka.”—Yoano 1:1-3, 14; tanga Olosapo 8:22, 23, 30; Va Kolosai 1:15, 16.

2. Momo lie Yesu eyilile palo posi?

Suku wa tumĩle Omõlaye palo posi poku sondoluila omuenyo waye vimo liufeko umue u Yudea o tukuiwa hati, Maria. Omo liaco ka kuatele Isia umue ukuasitu. (Luka 1:30-35) Yesu weyile palo posi oco (1) a longise ocili catiamẽla ku Suku, (2) oku eca olumapu luoku linga ocipango ca Suku, kuenda (3) oku eca omuenyo waye we li pua “ndocisembi.”—Tanga Mateo 20:28; Yoano 18:37.

3. Momo lie tu sukilila ocisembi?

Ocisembi ofeto yeciwa poku yovola omunu ale ocikuata cimue. Olofa kuenda oku kuka ka via pangele onepa kocipango catete ca Suku catiamẽla komanu. Tua ci kũlĩha ndati? Suku wa sapuila ulume watete, Adama okuti nda wa linga eci Embimbiliya li tukula okuti ekandu, nda wa fa. Nda Adama ka lingile ekandu eye lalimue eteke nda eya oku fa. Ocili okuti, ndaño Adama handi wa kala komuenyo, vokuenda kuovita vimue vianyamo noke yekandu, pole eye wa fa eteke a sinila Suku. (Efetikilo. 2:16, 17; 5:5) Ocitumbulukila cosi ca Adama ca piñala ekandu kuenda ci yambuiwa lolofa. Olofa via “iñila” voluali vonduko ya Adama. Eli olio esunga lieci tu sukilila ocisembi.—Tanga Va Roma 5:12; 6:23.

  4. Momo lie Yesu a fila?

Helie nda wa tẽla oku feta ocisembi oco tu yovuiwe kolofa? Poku fa, tu feta onima yi tunda kekandu lietu muẽle. Pokati komanu ka va li puile, lomue o pondola oku yovola vakuavo kekandu.—Tanga Osamo 49:7-9.

Omo okuti Yesu ka piñalele ekandu ku isia umue ukuetimba liositu, eye ka file omo liakandu aye, pole, wa fila akandu omanu vakuavo. Omo liocisola ca piãla a kuetele omanu, Suku wa tuma Omõlaye oco a tu file. Yesu wa lekisavo ocisola kokuetu, poku pokola ku Isiaye, loku pesela omuenyo waye omo liakandu etu.—Tanga Yoano 3:16; Va Roma 5:18, 19.

5. Nye Yesu a kasi oku linga cilo?

Poku sakula olombei, oku pindula ava va fa, kuenda oku teyuila omanu kohele, Yesu wa lekisa eci a ka lingila omanu vakuepokolo kotembo yo kovaso. (Luka 18:35-42; Yoano 5:28, 29) Noke yolofa via Yesu, Suku wo pindula letimba liespiritu. (1 Petulu 3:18) Yesu wa talamẽla kulamba wa Suku, toke eci Yehova a wĩha unene woku linga Osoma yo kilu lieve. (Va Heveru. 10:12, 13) Cilo o kasi kilu Ndosoma, kuenda oloñame viaye palo posi vi kasi oku kunda esapulo liwa kolonepa viosi violuali.—Tanga Daniele 7:13, 14; Mateo 24:14.

Ndopo, Yesu lunene waye Ndosoma, o ka mãlako olohali viosi tua siata oku liyaka lavio kuenda ava va tu vi kokela. Vosi vana va kolela Yesu haivo vo pokola va ka kuata omuenyo wesanju vofeka yelau palo posi.—Tanga Osamo 37:9-11.

Oco o sange alomboluilo akuavo tanga ocipama 4, velivulu eli, lia sandekiwa Lolombangi Via Yehova. Embimbiliya li Longisa Nye?

[Olondaka vielitalatu kemẽla 25]

Vosi vana va kolela Yesu haivo vo pokola va ka kuata omuenyo wesanju vofeka yelau palo posi