APULILO EMBIMBILIYA A TAMBULUIWA

Momo lie Yesu a tukuiwila okuti Omõla wa Suku?

Suku ka kuete ukãi ukuetimba liositu a cita laye omõla. Eye wa lulika ovina viosi vi kasi lomuenyo. Omanu va lulikiwa lepondolo lioku setukula ovituwa via Suku. Eli olio esunga lieci Adama una Suku a lulika tete a tukuiwila hati, ‘omõla wa Suku.’ Cimuamue haico catiamẽla ku Yesu okuti, o tukuiwavo hati ‘Omõla wa Suku,’ momo wa lulikiwa lovituwa ndevi via Isiaye.—Tanga Luka 3:38; Yoano 1:14, 49.

Otembo yipi Yesu a lulikiwa?

Suku wa lulika tete Yesu osimbu ka lulikile Adama. Ocili okuti, Suku wa lulika Yesu kuenda wa talavaya laye poku lulika ovina vikuavo, oku kongelamo ovangelo. Eli olio esunga lieci Embimbiliya li tukuila Yesu hati: ‘Eye uveli pokati koviluvo viosi’ via Suku.—Tanga Va Kolosai 1:15, 16.

Osimbu Yesu ka citiwile ko Beteleme wa kala kilu letimba liespiritu. Eci otembo yo ku iya palo posi ya pitĩlapo, Yehova wa sondoluila omuenyo wa Yesu vimo lia Maria oco a citiwe ndomunu.—Tanga Luka 1:30-32; Yoano 6:38; 8:23.

Momo lie Suku a ecelelela okuti Yesu o citiwila palo posi ndomunu? Ocikele cipi cilikasi Yesu a tẽlisa? O pondola oku sanga atambululo apulilo ava Vembimbiliya, oco o vokiye elomboloko liove loku sanjukila ovina Suku la Yesu va siata oku ku lingila.