O Pondola hẽ Oku Kolela Ketavo Lilikembisa Oku Lekisa Ovituwa Viwa?
O Pondola hẽ Oku Kolela Ketavo Lilikembisa Oku Lekisa Ovituwa Viwa?
Ukãi umue o tukuiwa hati Sylvia okuti o talavaya kosipitali, wa popia hati: “Kosikola nda tangela omanu va siata oku liyeya calua omo liovituwa vĩvi via siata oku lekisiwa la vakuetavo, momo poku linga oloseteko, va siata oku kopiyala ovina vakuavo va soneha, kuenda va fenya epangue. Omanu vaco ka va kapeleko ovina va siata oku lilongisa ketavo liavo.”
Ulume umue o tukuiwa hati Lionel wa popia hati: “Omanu ndi talavaya lavo kupange, va siata oku telefonala ku va cime cavo oco va kembe vati va vela. Ndaño okuti omanu vaco vatiamẽla ketavo, pole, ka va kapeleko ovina va siata oku lilongisa.”
Etavo ka lia siatele oku vetiya omanu oku kuata ovituwa viwa. Omanu valua koloneke vilo va siata oku ‘limolehĩsa ndu okuti va kolela Suku, pole va likala unene waye.’ (2 Timoteo 3:5) Asongui vetavo liaco, ka va siatele oku lekisa ongangu yiwa, kuenda ka va longisa olonumbi Viembimbiliya omanu va sukila. Omanu valua va sima okuti Suku ka kapeleko ovituwa vivĩ va siata oku lekisa.
EMBIMBILIYA LI LONGISA NYE?
Embimbiliya li tu sapuila okuti, Suku wa kapako ovina viosi tu linga. Va Isareli eci va enda oku tomba olonumbi via Suku va ‘sumuisa utima waye.’ (Osamo 78:40) Omo liaco, nda omunu o liwekapo oku linga ovina ka via sungulukile, “ovangelo kilu va yolela.” (Luka 15:7) Nda omunu o sanjukila ovituwa via Isiaye wo kilu, ocisola a kuetele Suku ci livokiya kuenda ocisola caco, cu vetiya oku sola ovina Suku a sole loku suvuka avina a nyãle.—Amosi 5:15.
OLOMBANGI VIA YEHOVA VIA SIATA NDATI OKU LINGA OVOPANGE AVO?
Ukanda umue wasapulo wovolupale luo Utah, kofeka yo Estados Unidos wa lombolola ndoco: Olombangi Via Yehova via siata oku “kuatisa omanu oku likuata omunga kuenda oku kala vakuacili.”
Oku lilongisa ovina viatiamẽla kovituwa via Yehova ci kuatisa ndati Afendeli vaye? Sylvia, wa tukuiwa kefetikilo liocipama cilo, wa popia hati: “Koloneke vilo oku feta ovitukiko ca siata calua kolomĩlu, momo ca leluka oku ci linga. Pole, oku limbuka ndomo Yehova a a siata oku ndi kuatisa ci ndi vetiya oku linga ovina via sunguluka. Cilo ndi kuete esanju lialua kuenda ombembua yovutima.”
Sylvia wa limbuka okuti oku pokola kovina a kasi oku lilongisa Vembimbiliya, ci kuete esilivilo lia velapo komuenyo waye.
[Etosi pombuelo]
a Yehova oyo onduko ya Suku ya situluiwa Vembimbiliya.
[Elitalatu kemẽla 6]
[Etosi lia velapo 6]
Anga hẽ asongui vetavo va siata oku kuatisa omanu oku pokola kolonumbi via Suku?
