Vembimbiliya kelivulu lia Ruti, ulume wa likala oku kala onjovoli ndomo ca lekisiwa Vocihandeleko ca eciwile ku Mose, wa tukuiwa lika hati Ngandi. (Ruti 4:1-12) Omo okuti olonduko viavo ka via tukuiwile Vembimbiliya, ci lekisa hẽ okuti va kala omanu vãvi, ale ka va kuatele esilivilo?

Sio. Kũlĩhĩsa ulandu ukuavo. Eci Yesu a kala oku pongiya ondalelo yasulako yo Paskoa, wa sapuila olondonge viaye hati, “kuendi vimbo, Kungandi” kuenda ovina viosi via pongiyiwa vonjo yaye. (Mateo 26:18) Omo okuti ulume wa tu kuiwa hati “Ngandi” vocinimbu eci, ci lomboloka hẽ okuti wa kala ondingaĩvi ale ka kuatele esilivilo oco a tukuiwe konduko? Sio, hacoko “ulume” waco wa kala umue pokati kolondonge via Yesu, ndaño onduko yaye ka ya tukuiwile vulandu waco.

Embimbiliya litukula olonduko viomanu valua okuti va kala olondingãivi kuenda viomanu valua okuti ndaño va kala vakuekolelo pole, olonduko viavo ka via tukuiwile. Ocili okuti, onduko ya Heva ukãi watete ya kũlĩhĩwa calua. Pole, epela kuenda esino liaye, lia vetiya Adama oku linga ekandu lia tu nenela ovitangi. (Va Roma 5:12) Ukãi wa Noha ndaño onduko yaye ka ya tukuiwile Vovisonehua, pole, tua kũlĩha okuti wa kala omunu uwa kuenda omo liepokolo wa kuatisa ulume waye kupange umue u kuete esilivilo. Ndaño onduko yaye ka ya tukuiwile, ka ci lomboloka okuti ka kuatele esilivilo ale ka taviwile la Yehova.

Omanu vamue ndaño olonduko viavo ka via tukuiwile Vembimbiliya pole, va linga ovina vikomohĩsa oco va tẽlise ocipango ca Yehova. Sokolola umalẽhe umue ufeko u Isareli wa kala upika konjo ya Namana kesongo kolohoka via va Suria. Eye wa sapela lacime caye ukãi wa Namana catiamẽla kuprofeto wa Yehova wa kala ko Isareli. Kuenje, ca koka oku linga ocikomo cinene. (2 Olosoma 5:1-14) Omõla ufeko wa Yefita wa lingavo ongangu yekolelo. Ndaño kotembo yaco omanu va sanjukilile oku kuela loku cita omãla, eye ka ci lingile momo wa yonguile oku tẽlisa ohuminyo isiaye a lingile. (Olonganji 11:30-40) Cimuamue haico ci pita Lolosamo 40 okuti asonehi vaco, olonduko viavo ka via tukuiwile kuenda ovaprofeto vamue okuti ndaño va tẽlisa ovikele viavo lekolelo olonduko viavo ka via tukuiwile.—1 Olosoma 20:37-43.

Cimuamue haico ci popiwa catiamẽla kovangelo vamue vakuekolelo. Ndaño kuli olohuluwa vio vangelo, pole Embimbiliya li tukula lika olonduko vio vangelo vavali okuti Gabrieli kuenda Mingeli. (Daniele 7:10; Luka 1:19; Yuda 9) Vakuavo ka va tukuiwile Vembimbiliya. Manoa isia ya Samisone wa pulile ungelo umue hati: “Onduko yove, ove elie, ha tu ku sambiliya eci olondaka viove vi telisiwa?” Ungelo wa tambulula ndati? “Nye o pulila onduko yange?” Ungelo wa likala oku tambula ekemãlo lina okuti li sesamẽla lika oku li eca ku Suku.—Olonganji 13:17, 18.

Embimbiliya ka lilombolola esunga lieci olonduko vimue via tukuiwila, pole vikuavo sio. Pole, tu pondola oku lilongisa catiamẽla kekolelo lia vana va vumba Suku ndaño okuti vamue va tukuiwa kolonduko, pole vakuavo sio.