Embimbiliya li popia hati, “eci olondingaĩvi vi viala, omanu va liyeya.”—Olosapo 29:2.

Ovolandu a lekisa okuti kua siata oku kala olombiali vialua vi viala lungangala okuti vi kokela ohali omanu. Ocili okuti olombiali vimue ka via siatele oku viala lungangala. Olombiali vimue vi kuete onjongole yoku kuatisa omanu va sangiwa vofeka va viala. Pole, osimbu vi kasi oku viala, ku mõleha vamue va yongola okuti vi tunda kuviali. Ale va talavaya lãvi lunene va kuete, kuenje, va kokela omanu ohali. Kuli ovovangi a lekisa okuti voluali mua siata oku pita ovitangi. Ulume umue o tukuiwa hati Henry Kissinger wa kala usonehi wombiali ko Estados Unidos wa popia hati: ‘Omanu ka va siatele oku litunda ciwa kovina va yongola oku linga.’

Embimbiliya li popia ndoco: “Omunu enda ka tẽla eye muẽle oku suñamisa okuenda kuaye.” (Yeremiya 10:23) Omanu ka va lipuile ka va kuete epondolo lioku lisonguila ovo muẽle. Nda ka va tẽla oku lisonguila ovo muẽle, va pondola ndati oku songuila vakuavo? O pondola hẽ oku limbuka esunga lieci uviali womunu ka u malelako ohali? Olonjanja vialua uviali ũvi owo wa siata oku nena ohali!

Yesu wa popia hati: “Kokulisola kuene pokati oko omanu vosi va limbukila okuti vulondonge viange.”—Yoano 13:35.

Asongui vatavo alua va siata oku vetiya ­omanu oco va lekise ocisola loku likuata omunga. Ocili okuti ovo ka va tẽla oku kuatisa oloñame ­viavo oku kuata ocisola ci malako ocame. Ovo ka va kuatisa omanu oku lisola pokati pole vakoka ­olonepele, oku lipakula kuenda ovitangi vikuavo ­pokati komanu. Ulongisi umue o tukuiwa hati Hans Küng, poku malusula elivulu liaye losapi (O Cristianismo e as Religiões do Mundo) wa soneha ndoco: “Asongui vatavo ovo va siata oku vetiya olombiali oku linga ovina ka via sungulukile.”

Asongui vatavo alua va siata oku ecelele ukahonga lukahokolo kuenda oku likuela kuomanu vakuavimatamata vimuamue. Ovina viaco via siata oku koka ovovei, oku pulumula oku minisiwa, oku nyola olowela, apata, ohali kuenda ovitangi vikuavo.

“Omunu omunu o yonjiwa eci a tambiwa loku kokiwa loloñeyi viaye muẽle. Oloñeyi, eci vi mina, vi cita ekandu.”—Tiago 1:14, 15.

Omo okuti ka tua lipuile, tua siata oku lueya kuenda tu kasi oku liyaka ‘lolonjongole vietimba.’ (Va Efeso 2:3) Eci tu kuata epuluvi lioku linga ovina vĩvi pamue ka ci leluka oku vi yuvula. Omo liaco, nda tua ecelela okuti ovisimĩlo vĩvi vi kala vutima, tu kuata ovitangi.

Usonehi londuko P. D. Mehta wa soneha hati: “Olonjanja vimue ohali yi li vokiya omo liolonjongole vietu.” Ovina vikuavo via siata oku koka ohali vievi: Uholua, olodroga, oku imba ocela cosande, ukahonga kuenda ovina vikuavo via siata oku nyõla ekalo liomanu vana va sumbiwa vimbo liavo. Ovina viaco via siatavo oku kokela ohali epata lietu, akamba kuenda omanu vakuavo. Omo liekambo lioku lipua, tu sukila oku tava kueci Embimbiliya li popia: ‘Ovina viosi via lulikiwa vi yevela kumuamue olongembia vioku cita.’—Va Roma 8:22.

Embimbiliya li situlula okuti Satana eye “o suku yoluali lulo” kuenda o talavaya laspiritu ãvi a tukuiwa hati, olondele.—2 Va Korindo 4:4; Esituluilo 12:9.

Olondele vi likolisilako oku yapuisa omanu ndeci Satana a siata oku linga. Upostolo Paulu wa tukula ovina viaco eci a soneha hati: ‘Ka tu kasi loku yaka lositu kuenda osonde, te lovoviali, lovonene, lolombiali violuali viowelema ulo, ­kuenda olohoka viaspiritu ãvi o kilu.’—Va Efeso 6:12.

Ndaño olondele vi sanda oku yapuisa omanu, eci hacoko ocimãho cavo ca velapo. Pole onjongole yavo oku tepa omanu ku Yehova, Suku Tõlo. (Osamo 83:18) Ovituwa ndeci okutãha, umbanda, vimue pokati kolonjanjo olondele via siata oku kuama oco vi yapuise omanu. Eli olio esunga lieci Yehova a tu lunguila oco a tu teyuile koku yapuisiwa la Satana kuenda kolondele.—Tiago 4:7.

Vokuenda kuolohulukãi vivali vianyamo, Embimbiliya lia popia hati: “Limbuka eci okuti, koloneke via sulako kuiya otembo yohali.”

Embimbiliya poku lekisa eci ci ka pita kotembo yohali li popia ndoco: “Omanu va linga vakuakulisola, vakuakusola olombongo, vakuakulipandiya, vakueyengu, . . . ka va kuete ocikembe la vangadiavo. Va linga vakuamanya, vakualundi, haivo ka va tẽla oku likandangiya, va linga olongangala, ka va sole eci ciwa. Haivo olomakuli, vakuacipango, vakuepela, vakuakusola ca lua esanju, Suku ci sule.” Ovina via tukuiwa ndeti vi lekisa okuti, tu kasi “koloneke via sulako.”—2 Timoteo 3:1-4.

Ovina tua konomuisa ndeti ka vi lekisa hẽ okuti, omanu ka va tẽla oku malako ohali ndaño va likolisilako oku ci linga? Pi tu pondola oku sanga ekuatiso? Ululiki wetu wa likuminya oku “nyõla ovilinga Vieliapu” kuenda oloñame viaye. (1 Yoano 3:8) Ocipama ci kuãimo ci ka lombolola ­ndomo Suku a ka malako ovina viosi vi koka ohali.