Ukãi umue o kuete 35 kanyamo o tukuiwa hati Smita, * okuti wa kala volupale luo Dhaka, kofeka yo Bangladesh, wa kũlĩhiwile okuti ukuacisola haeye wa kapako omanu. Omanu vo kũlĩhĩle okuti ukãi umue ondingupange haeye o sanjukila oku kuatisa omanu oku kũlĩha ovina a lilongisa via tiamẽla ku Suku. Hesumuokuolio epata kuenda akamba vaye va kuata eci eye a kuatiwa luvei umue okuti ka telisile osemana kuenje wa fa!

Tiago lukãi waye, okuti va kuatele ci soka 30 kanyamo, va kũlĩhiwilevo lovituwa viwa ndevi via Smita. Eteke limue kotembo yonjovo, va endele oku ka nyula ekamba liavo Kocikanjo cimue ko Estados Unidos. Ovo ka va tiukilile vali konjo yavo ko Nova Yorke. Eci va kala vungende va pita locilunga cimue lekalu liavo ca va tuala kolofa, kuenje va sila evalo lialua epata kuenda akamba vavo.

Oco o mõle ndomo ovina vĩvi kuenda ohali yi kasi oku livokiya koloneke vilo, ka ci sukila oku enda kupãla. Ovoyaki a kasi oku ponda asualali kuenda vana okuti asualaliko. Evĩho kuenda ungangala vi kasi oku ponda omanu vana ka va kuete eko. Ovilunga kuenda ovoveyi a kasi oku ponda, omanu vakuavisoko viosi. Ovilemawe via siata oku nyõla ovitumãlo vialua viomanu. Olonepele kuenda ungangala via li sanduila kolonepa viosi. Ove citava okuti pamue wa pitilevo lovitangi viaco.

Omo liaco, ca sanguluka oku lipula ndoco:

• Momo lie omanu vawa va liyakela lovina vĩvi?

• Anga hẽ Suku eye o kuete eko omo liovina viaco?

• Anga hẽ ovilunga via siata ño oku iya ocipikipiki, ale via siata oku kokiwa lomanu?

• Anga hẽ ovina vĩvi omanu va lingile kosimbu ovio vi kasi oku nena ohali?

• Nda kuli Suku umue ukuonenewosi, momo lie ka teyuilila omanu vawa kovina vĩvi?

• Anga hẽ eteke limue uvĩ kuenda ohali vi kapuako?

Oco tu sange atambululo aco, tu sukila oku kũlĩha atambululo apulilo avali ndeci: Momo lie omanu vosi va liyakela lovina vĩvi, kuenda nye Suku a ka linga?