OSAPI YO KOÑOÑO | NOKE YOKU FA—CI TAVA HẼ OKU KUATA VALI OMUENYO?
Nye ci Pita Noke Yoku fa?
“Nda kuatele ocisimĩlo cokuti, kuli ovitumãlo vitatu omunu a pondola oku enda noke yoku fa ndeci: Kilu, vifelu ale vopurgatoriu. Nda kũlĩhĩle okuti si sesamẽla oku enda kilu ale oku enda vifelu. Sia kũlĩhile eci ci lomboloka opurgatoriu. Lalimue eteke nda muile ulandu waco Vembimbiliya. Evi via kala lika ovisimĩlo viomanu vamue.”—Lionel
“Nda longisiwile okuti eci omanu va fa va enda kilu pole, sia tavele kocisimĩlo caco. Nda simĩle okuti olofa esulilo liovina viosi kuenda omanu va fa ka va kuete vali elavoko lalimue.”—Fernando.
Lipula ndoco: ‘Nye ci pita lomunu eci a fa? Vangandietu va fa va kasi hẽ oku tala ohali kocitumãlo cimue? Eteke limue tu ka li sanga vali lavo? Tu kuata ndati ekolelo liaco?’ Kũlĩhisa eci Embimbiliya li popia. Catete tu kũlĩhisi eci Embimbiliya li popia catiamẽla kolofa. Noke, tu kũlĩhisavo elavoko Ondaka ya Suku yeca.
Lipi ekalo liomanu va fa?
ETAMBULULO LIEMBIMBILIYA: “Ava va kasi lomuenyo va kũliha okuti va laika oku fa, puãi ava va fa lacimue va kũliha, ndaño onima yimue ka va kuete vali, momo onjivaluko yavo ya nyõleha. Cosi eka liove lia kuata ci linga longusu yove; momo vonjembo omo wenda ka muli upange, ndaño ovikuata, ndaño ukũlihiso, ndaño olondunge.” a—Ukundi 9:5, 10.
Ondaka Onjembo, yi lomboloka ocitumãlo coku kenda omanu eci va fa. Pole ocitumãlo caco cocindekaise ale ekalo limue ka li ecelela oku linga cimue. Yovi ulume umue ukuekolelo wa tendele ndati Onjembo? Eye wa pesela ovina viosi a kuatele ndeci: Olofa viomãla vaye veteke liongongo, kuenda etimba liaye liosi lia kuatele olombulu. Kuenje wa popia la Suku hati: “Nda wa tavele oku mbundisa vonjembo! Nda wa tavele oku mbundisa.” (Yovi 1:13-19; 2:7; 14:13) Ocili okuti Yovi ka tendele Onjembo ndocitumãlo cimue co ku talisiwa ohali, pole wa ci tendele ndocitumãlo cimue cepuyuko.
Kuli onjila yikuavo yoku lilongisa ocili catiamẽla kekalo liomanu va fa. Tu pondola oku kũlĩhisa ovolandu a sangiwa Vembimbiliya atiamẽla komanu ecelãla va pinduiwa.—Tanga okakasia, ““ Apinduko Ecelãla a Tukuiwa Vembimbiliya.”
Omanu vaco ecelãla va pinduiwa, lomue pokati kavo wa popia hati, wa kala vondalu ale vocitumãlo coku kangisiwa. Nda ovo va kalele vovitumãlo viaco eci va fa, nda ka va ci popele hẽ komanu? Eci nda ka ca kongeliwile hẽ vulandu Wembimbiliya oco vosi yetu tu ci tange? Vembimbiliya ka mu sangiwa ulandu waco. Omanu ecelãla va pinduiwa ka va popele lacimue catiamẽla kulandu waco. Momo lie? Momo ka va kũlĩhile lacimue kuenda va kala ndu okuti va pekelele. Olonjanja vimue Embimbiliya li sokisa olofa ndotulo. Ndeci Daviti kuenda Stefano, vosi yavo ‘va pekela kolofa.’—Ovilinga 7:60; 13:36.
Omanu va fa, va kuete elavoko li pi? Va pondola hẽ oku pasuka kotulo tuaco?
a Vo Tradução do Novo Mundo das Escrituras Sagradas, ondaka “onjembo” kelimi lio Heveru yi tukuiwa hati: “Seol,” kuenda kelimi lio Helasi yi tukuiwa hati, “Hades.” Ambimbiliya amue poku tukula ondaka “ifelu,” yeca ocisimĩlo cokuti kuli ocitumãlo cimue coku talisila ohali omanu vana va fa, pole ocisimĩlo caco ka ci sangiwa Vembimbiliya.
Ove o ka ci Sola
UTALA WONDAVULULI
Anga hẽ Yesu wa pindula omanu?
Apinduko Yesu alinga a situlula nye catiamẽla kolohuminyo viaye vi ka tẽlisiwa kovaso yoloneke?
