Oku kuata ocisimĩlo cokuti omanu va fa va ka pinduka ekambo liolondunge? Upostolo Paulu ka kuatele ocisimĩlo caco. Eye wa vetiyiwa oku soneha ndoco: “Nda elavoko lietu vu Kristu lia sulila lika vomuenyo ulo, nda esumuo lietu lialua vali enene pokati komanu vosi. Ocili okuti, Kristu wa pinduiwa kuava va fa, haeye epako liatete kuava va fa.” (1 Va Korindo 15:19, 20) Paulu, wa tendele epinduko ndocina cimue cocili. Ekolelo liaye lia kunamelẽle kepinduko lia Yesu. a (Ovilinga 17:31) Eli olio esunga lieci Paulu a tukuila Yesu hati, “epako liatete”—momo eye wa pinduiwa tete lelavoko lioku kala otembo ka yi pui. Nda Yesu eye wa pinduiwa tete, ci lomboloka okuti kua laikele oku pinduiwavo omanu vakuavo.

Kuli esunga likuavo li lekisa okuti kuli elavoko liepinduko. Yehova eye Suku ukuacili. “Suku, ... lalimue eteke a kemba.” (Tito 1:2) Yehova lalimue eteke a kembele kuenda eye lalimue eteke a ka kemba. Nda okuti eye wa likuminya epinduko kuenda wa lekisa okuti o pondola oku pindula omanu, ka pondola hẽ oku tẽlisa eci alikuminya? Ocili okuti o kuete epondolo liaco!

Momo lie Yehova a lingila eliangiliyo liepinduko? Momo eye ukuacisola. Yovi wa pula ndoco: “Omunu nda o fa o kala vali lomuenyo?” Eye wa amisako hati: ‘O ka mbilikiya, lame ndi ka kumbulula. Ove o kuatela upange wovaka ove ongeva.’ (Yovi 14:14, 15) Yovi wa kolelele okuti Isiaye ukuacisola kilu o ka sanjukila oku u pindula. Suku hẽ wa pongoloka? “Ame ndi Yehova, si pongoloka.” (Malakiya 3:6) Suku o sanjukila oku pindula omanu va fa, okuti va kuata uhayele wa suapo kuenda esanju. Eci ci sokisiwa lonjongole yonjali yimue noke yoku fisa omõlaye. Etepiso lieli okuti, Suku o kuete unene woku linga eci a yongola.—Osamo 135:6.

 Yehova o ka eca unene Komõlaye woku nena esanju komanu vosi va fisa vangadiavo. Onjongole yipi Yesu a kuete yatiamẽla kepinduko? Yesu, osimbu ka pinduile Lasaru, wa mõla esumuo lia vamanji akãi va Lasaru kuenda akamba vaye kuenje“wa lila.” (Yoano 11:35) Vepuluvi likuavo, Yesu wa sanga ocimbumba co ko Naini wa fisa omõlaye wongunga. Yesu “wo kuatela ohenda yu wa popia laye hati: ‘Ku ka lile.’” Kuenje wa pindula omõlaye. (Luka 7:13) Omo liaco Yesu o sumua eci a mõla vana va fisa vangandiavo. Eye o ka kuata ombili yoku pongolola esumuo oco li linge esanju voluali luosi!

Ove hẽ wa yevele ale evalo liaco? Pamue wa simĩle ale okuti olofa ocitangi cimue ka ci tava oku ci potoluiwa. Pole, ci ka potoluiwa, eci Suku a ka pindula omanu lekuatiso Liomõlaye. Ivaluka okuti Suku o yongola okuti ove o mõla oku potoluiwa kuocitangi caco. Eye o yongola okuti o kalapo oco o yolele vangandiove. Sokolola oku sokiyila kumosi ovina otembo ka yi pui, okuti lalimue eteke o ka popia vali hati sialipo ciwa!

Lionel, wa tukuiwa kefetikilo wa popia hati: “Nda lilongisa eci catiamẽla kepinduko. Kefetikilo, ka ca lelukile oku tava, kuenda sia kolelele komunu wa kala oku ndi sapuila ulandu waco. Pole, nda kũlĩhisa ulandu waco Vembimbiliya kuenje nda limbuka okuti wocili! Si tẽla oku sokolola esanju ha kuata, eci ndi ka li sanga vali la sekulu yange.”

O yongola hẽ oku kũlĩha ovina vikuavo? Olombangi Via Yehova vi sanjukila oku ku lekisa Vembimbiliya liove, esunga lieci va kolelela okuti kovaso yoloneke ku ka kala epinduko. b