NOKE yoku tanga ovisimĩlo evi vivali, ci pi ci situlula ocisimĩlo cove? Omanu valua va limbuka okuti olondaka via Saulu u Tarsu, o tukuiwavo hati, upostolo Paulu, vi lembeleka kuenda vi vetiya. (Ovilinga 17:26, 27) Vembimbiliya mu sangiwa olondaka vikuavo ndevi. Yesu vohutililo a linga mua kongela olondaka via vetiya olondonge viaye oku kũlĩha Suku kuenda oku tambula asumũlũho aye.—Yoano 17:3.

Pole, olonoño ndeci Philo va kuatele ovisimĩlo via litepa. Ovo va popia okuti, lalimue eteke tu ka kũlĩha Suku momo ka ca lelukile oku kuata elomboloko liaye. Pokati kavo helie wa vangula ocili?

Embimbiliya li lombolola okuti kuli ovina vimue viatiamẽla ku Suku okuti ka ca lelukile komanu oku sanga elomboloko liaco. Ndeci, anyamo Ululiki, oku loñoloha kuaye, oku longa kuolondunge viaye ka vi sokisiwa kuenda ka vi tendiwa. Ka ca lelukile komanu oku kuata elomboloko liovina via tukuiwa ndeti. Pole, ovina viaco viatiamẽla ku Suku, ka vi tu tateka oku u kũlĩha. Oku sokolola kovina viaco ci pondola oku tu kuatisa oku ‘amela ku Suku.’ (Tiago 4:8) Tu kũlĩhisi ovina vimue okuti ka ca lelukile oku kuata elomboloko liaco. Noke tu kũlĩhĩsavo ovina viatiamẽla ku Suku tu pondola oku kuata elomboloko.

SUKU KA KUETE ESULILO: Embimbiliya li longisa okuti, Suku o kasi “tunde ka ku ci toke ka ku ci.” (Osamo 90:2) Olondaka evi vi lomboloka okuti, Suku ka kuate efetikilo kuenda ka ka kuata esulilo. Omo liaco, kovisimĩlo viomanu, “anyamo aye ka a tendiwa.”—Yovi 36:26.

Ndomo o kuatisiwa: Suku oku likuminya omuenyo ko pui, nda wa sanda oku u kũliha. (Yoano 17:3) Nda Suku ka kale otembo ka yi pui, nda ca tava hẽ oku kolela kolohuminyo viaco? Eye lika “Soma yonahũlũlua” o pondola oku tẽlisa ohuminyo yaco.—1 Timoteo 1:17.

OLONDUNGE VIA SUKU: Embimbiliya li longisa okuti ka ca lelukile oku kuata ‘elomboloko liovisimĩlo’ via Suku, momo vi kasi kupãla lovisimĩlo vietu. (Isaya 40:28; 55:9) Vembimbiliya mu sangiwa epulilo limue li tu vetiya oku sokolola: “Helie wa kũlĩha ovisimilo via Ñala okuti o tẽla oku u longisa?”—1 Va Korindo 2:16.

Ndomo o kuatisiwa: Suku o kuete epondolo lioku yevelela olohutililo violohuluwa viomanu vakuotima wa sunguluka. (Osamo 65:2) Eye wa kũlĩha olongungu viosi vi kupukila posi. Anga hẽ Suku o kuete ovina vialua vioku linga okuti, ka pondola oku ku kũlĩha kuenda oku yevelela olohutililo viove? Sio, momo olondunge viaye via lova. Handi vali, ove wa ‘velapo olongungu via lua.’—Mateo 10:29, 31.

OLONJILA VIA SUKU: Embimbiliya li longisa okuti omunu lalimue eteke a ka “tẽla oku limbuka eci ca linga Suku tunde kefetikilo toke kesulilo.” (Ukundi 3:11) Omo liaco, lalimue eteke tu ka kũlĩha ovina vialua viatiamẽla ku Suku. Olondunge via Suku “ka vi moñoluiwa.” (Va Roma 11:33) Pole, Suku o sanjukila oku situlula olonjila viaye ku vana va yongola oku u sanjuisa.—Amosi 3:7.

Ndomo o kuatisiwa: Nda wa tanga kuenda wa lilongisa Embimbiliya, o ka kũlĩha ovina viokaliye viatiamẽla ku Suku kuenda kolonjila viaye. Eci ci lomboloka okuti tu pondola oku linga ukamba la Isietu wokilu otembo ka yi pui.

Omo okuti ka tu pondola oku kuata elomboloko liasuapo liovina viatiamẽla ku Suku ka ci lekisa okuti ka tu pondola oku u kũlĩha. Vembimbiliya mu sangiwa ovolandu alua a tu kuatisa oku kũlĩha ciwa Suku. Kũlĩhĩsa ovolandu amue:

ONDUKO YA SUKU: Embimbiliya lilongisa okuti, Suku wa liluka eye muẽle onduko. Eye wa popia hati: “Ame Yehova, oyo onduko yange.” Onduko ya Suku yi moleha Vembimbiliya ci soka 7.000 kolonjanja okuti onduko yikuavo ci sule.—Isaya 42:8.

Ndomo o kuatisiwa: Yesu vohutililo a longisa wa popia hati: “A Isietu o kasi kilu. Onduko yove yi sumbiwe.” (Mateo 6:9) O pondolavo oku tukula onduko ya Suku vohutililo? Yehova o yongola okuti omanu vosi va tukula onduko yaye lesumbilo.—Va Roma 10:13.

OCITUMÃLO CA SUKU: Embimbiliya lilongisa okuti, kuli “ovitumãlo” vivali—ndeci ongongo kuenda ilu ku kasi oviluvo vi kuete etimba liespiritu. (Yoano 8:23; 1 Va Korindo 15:44) Vembimbiliya ondaka “ilu”, yi lomboloka ocitumãlo ku kasi oviluvu vi kuete etimba liespiritu. “Ilu” liaco olio “ocitumãlo” Cululiki.—1 Olosoma 8:43.

Ndomo o kuatisiwa: Ove opondola oku kuata  elomboloko liasuapo liatiamẽla ku Suku. Ululiki wetu ongunsu yimueko yi sangiwa kolonepa viosi kuenda kovina viosi. Yehova omunu muẽle, kuenda okasi kocitumãlo cimue ca kũlĩhĩwa. Omo liaco, kokuaye “ka kuli ociluvo ca salamisua.”—Va Heveru 4:13.

OKU TUWA KUA SUKU: Embimbiliya li longisa okuti Suku okuete ovituwa vi vetiya. “Suku eye ocisola.” (1 Yoano 4:8) Eye lalimue eteke a kemba. (Tito 1:2) Eye ka kuete ocame, ukuahenda, ukuacali kuenda ukuakulivala konyeño. (Etundilo 34:6; Ovilinga 10:34) Ocina ci komohisa omanu valua ceci okuti, Ululiki oyongola oku linga “ukamba” lomanu vosi vo sumbila.—Osamo 25:14.

Ndomo o kuatisiwa: Ove o pondola oku linga ekamba lia Yehova. (Tiago 2:23) Poku kũlĩha Yehova, o ka kuata elomboloko lia suapo liovolandu Embimbiliya.

Embimbiliya li situlula ciwa Yehova Suku. Omanu va sima okuti ka ca lelukile oku kuata elomboloko liaye. Pole, Ululiki o yongola okuti ove u kũlĩha. Embimbiliya li likuminya ndoco: “Nda ove u sanda, eye o tava oku sangiwa love.” (1 Asapulo 28:9) Momo lie ku sandela oku kũlĩha Suku poku tanga loku sokolola ovolandu Embimbiliya? Nda wa ci linga, Embimbiliya li likuminya okuti Suku ‘amela kokuove.’—Tiago 4:8.

Citava okuti o lipula ndoco: ‘Nda si pondola oku kuata elomboloko liovina vialua viatiamẽla Kululiki, ndinga ndati ekamba liaye?’ Kũlĩhisa ocindekaise eci: Oco omunu a kale ekamba liukuakupelala, o sukila hẽ oku lilongisavo uloño waco? Sio! Eye o pondola oku kuata uloño wa litepata. Ndaño oco, citava okuti va linga akamba. Ocina ca velapo ceci okuti, ekamba liukuakupelala lia kũlĩha eci eye a sole leci ka sole. Cimuamue haico okuti, lekuatiso Liembimbiliya o pondola oku lilongisa catiamẽla ku Yehova oco o kuate ukamba laye.

Ndaño okuti kuli ovolandu alua ka a sungulukile a tiamẽla Kululiki, pole Vembimbiliya mu sangiwa ovolandu alua tu sukila oco tu kũlĩhe Suku. O yongola hẽ oku amamako oku lilongisa catiamẽla ku Yehova Suku? Olombangi Via Yehova vi kuete esokiyo lioku longisa Embimbiliya konjo. Tu ku laleka oku sapela Lolombangi Via Yehova posongo yove ale iñila vonumbi yetu yo Internet, www.dan124.com.