1, 2. (a) Nye asongui vamue vetavo liesanda va yonguile oku kũlĩha, kuenda Petulu wa va tambulula ndati? (Tala ociluvialuvia kefetikilo liocipama cilo.) (b) Momo lie Petulu a kuatela utõi woku vangula?

ECI pa pita olosemana vimue noke liolofa via Yesu, upostolo Petulu wa liyaka lelambalalo liasongui vetavo lia va Yudea. Asongui vaco, ovo va lingile ongombo yoku ponda Yesu. Ovo va kuatela onyeño yalua Petulu, omo a sakula ulume umue okuti, ka ponduile oku enda. Noke vo pulisa vati: “Eci hẽ, wa ci lingi lunene we, pamue vonduko yelie?” Petulu wa kuata utõi woku va tambulula hati: “Vonduko ya Yesu Kristu u Nasara. Eye una . . . wa valeli [kuti,] kuenje Suku wo pindula ku vakualufa.”—Ovilinga 4:5-10.

² Usumba Petulu a kuata tete, wo vetiya oku likala Yesu olonjanja vitatu. (Marko 14:66-72) Pole, noke Petulu wa pua usumba kuenje, wa kuata utõi woku sapela lasongui vetavo lia va Yudea. Momo lie? Ndaño okuti wa kuatisiwa lespiritu sandu, pole wa kolelele okuti, Yesu wa pinduka. Momo lie Petulu a tavela kondaka yaco? Momo lie tu sukilila oku kuata ekolelo ndeli liaye?

3, 4. (a) Ovolandu api atiamẽla komanu vamue va pinduiwa osimbu ovapostolo va Yesu ka va citiwile? (b) Velie Yesu a pindula?

 ³ Ovapostolo va kũlĩhĩle okuti omanu va fa va pondola oku kuata vali omuenyo. Osimbu ovapostolo ka va citiwile, Yehova wa cele kuprofeto Eliya kuenda ku Elisia unene woku pindula omanu va fa. (1 Olosoma 17:17-24; 2 Olosoma 4:32-37) Ulume umue wa file, poku kendiwa eci etimba liaye lia imbiwa veyambo, lia lamba kakepa a Elisia, kuenje wa pinduka. (2 Olosoma 13:20, 21) Akristão vo kocita catete va tavele kovolandu aco, ndeci tu tava okuti Ondaka ya Suku yocili.

⁴ Eci o tanga ovolandu atiamẽla komanu vamue Yesu a pindula, o kuata esanju lialua. Sokolola esanju ukãi ocimbumba a kuata eci Yesu a pindula omõla waye wongunga. (Luka 7:11-15) Sokololavo eci Yesu a pindula omõla umue ufeko. Olonjali viaye via komõha calua eci via mola omõla wavo wa pinduiwa! (Luka 8:49-56) Omanu valua va komõhelevo eci va mola Lasaru wa file wa tunda veyambo lomuenyo!—Yoano 11:38-44.

5. Epinduko lia Yesu lia litepele ndati lapinduko akuavo a lingiwa tete?

⁵ Ovapostolo va kũlĩhĩle okuti, epinduko lia Yesu lia litepele lapinduko osi omanu va pinduiwa tete. Momo omanu vaco va pinduiwa letimba liositu, noke veya oku fa vali. Pole, Yesu wa pinduiwa letimba liespiritu okuti, lalimue eteke a ka fa vali. (Tanga Ovilinga 13:34.) Petulu wa soneha okuti, Yesu “wa pondiwa vetimba puãi wa kuata vali omuenyo vespiritu.” Cilo, “o kasi kondio ya Suku, kuenje ovangelo lolombiali lolosoma via tiamisua kokuaye.” (1 Petulu 3:18-22) Ndaño okuti apinduko akuavo a lingiwa a komõhisa omanu valua, pole, epinduko lia Yesu lia kala ocikomo cimue cavelapo.

6. Epinduko lia Yesu lia kuatisa ndati olondonge viaye?

⁶ Epinduko lia Yesu lia nenela esanju lialua kolondonge viaye. Momo, osimbu ovanyali vaye va kala oku sima okuti handi o kasi kolofa, pole, wa pinduiwa ale. Yesu wa pinduiwa letimba liespiritu okuti, lomue omunu wa tẽla oku u linga cimue cĩvi, omo liunene a kuata. Epinduko liaye lia eca uvangi wokuti, wa kala Omõla wa Suku. Omo okuti  olondonge via kũlĩhĩle okuti Yesu wa pinduiwa, ka via kuatele vali usumba. Ovina viaco via va nenela esanju lialua kuenda via pamisa ekolelo liavo. Nda Yesu ka pinduiwile ocipango ca Yehova Suku nda ka ca tẽlisiwile, kuenda olondaka viwa nda ka vi kuete esilivilo.

7. Nye Yesu a kasi oku linga koloneke vilo, kuenda apulilo api tu sukila oku linga?

⁷ Tua kũlĩha okuti, Yesu wa kala ulume umue wa velapo omanu vakuavo. Eye o kasi komuenyo, kuenda o kasi oku songuila upange woku kunda u kasi oku lingiwa voluali luosi. Yesu eye soma Yuviali wo kilu wa Yehova Suku okuti, ndopo u ka malako ovitangi viosi via palo posi, kuenda u ka pongolola ongongo yosi okuti yi linga yokaliye, oco omanu va kalemo otembo ka yi pui. (Luka 23:43) Nda Yesu ka pinduiwile, nda ka tu kuete elavoko liovina via tukuiwa ndeti. Pole, momo lie tu tavela okuti Yesu wa pinduiwa kolofa? Epinduko liaye li kuete esilivilo lie kokuetu?

8, 9. (a) Momo lie asongui vetavo lia va Yudea va pingila oku lava eyambo mua kala Yesu? (b) Eci akãi va endele keyambo nye va sanga?

⁸ Eci asongui vetavo lia va Yudea va ponda Yesu, noke, va edele ku Pilato, kuenje, va popia vati: “A Kuku tua ivaluka okuti ondimbiki eyi, eci a kala lomuenyo, wa [popele] hati: ‘Kovaso yoloneke vitatu minduka.’ Oco handeleka okuti eleva li kolisiwa toke keteke liatatu sanga olondonge viaye viya, viu yombololamo, kuenje vi popia lomanu viti: ‘Wa pinduka ku vakuavilangu,’ kuenje elimbi lia sulako li piãla, okuti liatete li sule.” Pilato wa popia lavo hati: “Vu kasi lolondavululi. Kuendi, ka kolisi ciwa eleva ndeci wa kũlĩhi.” Kuenje, va linga upange waco.—Mateo 27:62-66.

⁹ Eci Yesu a fa, wa kendiwa veyambo limue va fẽla vewe linene, kuenje, puvelo waco va sitikapo lewe. Momo, asongui vatavo esanda va yonguile okuti, Yesu o kala veyambo otembo ka yi pui. Pole, Yehova wa kuatele ovisimĩlo via litepa levi viavo. Noke lioloneke vitatu, olondonge vivali, la Maria u Magadala kuenda Maria ukuavo, va endele keyambo lia Yesu. Eci va pitĩla va sanga okuti ewe va sitikile puvelo waco lia kala ponele, kuenje ungelo wa tumala kilu liaco. Noke, ungelo waco wa sapuila kakãi vaco hati, tali vokati keyambo liaye, lomue o kasimo. Noke wa amisako hati: “Mulo kemo, momo wa pinduka ndeci a popele.” (Mateo 28:1-6) Ocili okuti, Yesu wa kala komuenyo!

10. Paulu wa eca ndati uvangi u lekisa okuti Yesu wa pinduiwa?

¹⁰ Ovina vieya oku pita noke lieci ci soka 40 koloneke via eca uvangi wokuti, Yesu wa pinduka. Upostolo Paulu wa sonehela Akristão vo ko Korindo ndoco: “Catete nda linga haico cinene ceci okuti, ndo kundili ondaka nda tambulavo ame. Ondaka yaco yeyi, Kristu wa fila akandu etu ndeci ca tukula ovisonehua. Wa kendiwa wa pinduiwa veteke liatatu, ndeci ca tukula ovisonehua. Yu  wa molẽha ku Kefa, noke kekũi liaco la vavali. Kovaso yaco wa molẽha onjanja yimue ku vakuetavo ovita vitãlo via supa. Omanu vaco pa kamba naito okuti vosi nda va kasi toke cilo, vamue puãi va pekela [kolofa]. Yu wa molẽha ku Tiago, noke kovapostolo vosi. Kesulilo wa molẽha kokuange, haime nda citiwila vetavo ndoluselu.”—1 Va Korindo 15:3-8.

11. Epinduko lia Yesu lia pita ndati, ‘ndomo ca tukuiwa Vovisonehua’?

¹¹ Yesu wa pinduiwa muẽle, ‘ndomo ca tukuiwa Vovisonehua.’ Ondaka ya Suku ya tukula eci catiamẽla kepinduko. Daviti wa soneha okuti, Suku ka ecelela okuti, omunu “ukuesunga” o kala veyambo otembo yalua. (Tanga Osamo 16:10.) Keteke liocipito co Pendekoste yunyamo wa 33, Petulu wa lombolola okuti, Yesu “ukuesunga” poku popia hati: “[Daviti] wa imba owanji wepinduko lia Kristu eci a popia hati, ka siwa vonjembo, ndaño etimba liaye ka li futi.”—Ovilinga 2:23-27, 31.

12. Helie wa mola Yesu wa pinduiwa?

¹² Omanu valua va mola Yesu wa pinduiwa. Yesu vokuenda kueci ci soka 40 koloneke noke liepinduko liaye, wa li molẽhisa kolondonge viaye vocumbo colonelẽho ocipepi leyambo a kendiwile vetapalo lioku enda kimbo lio Emausi, kuenda kovambo akuavo. (Luka 24:13-15) Eye wa vangula lomunu lomunu pokati kavo oku kongelamo Petulu, kuenda ovimunga vikuavo viomanu. Onjanja yimue Yesu wa molẽha kueci ci pitahãla 500 komanu. Omo liaco, tu sukila oku kapako uvangi womanu valua va mola Yesu wa pinduiwa.

13. Ombili olondonge via lekisa yeca ndati uvangi wokuti, via tavele kepinduko lia Yesu?

¹³ Olondonge via kunda eci catiamẽla ku Yesu wa pinduiwa. Olondonge via lambalaliwa, via talisiwa ohali, kuenda vimue pokati kavo via pondiwa omo liupange woku kunda. Kũlĩhĩsa ulandu owu: Nda Yesu Kristu ka pinduiwile, Petulu nda wa kapa hẽ kohele omuenyo waye omo lioku kundila omanu vana vo suvukile haivo va lingile ongombo yoku u ponda okuti, o va situluila ovina viatiamẽla kepinduko liaco? Petulu kumue lolondonge vikuavo va kuatele ekolelo liokuti, Yesu wa kala komuenyo, kuenda o kasi oku songuila upange woku kunda. Epinduko lia Yesu lia pamisavo elavoko liolondonge viaye liokuti, via laikelevo oku pinduiwa. Momo, eci Stefano a fa wa kuatele elavoko liokuti, noke o ka pinduiwa.—Ovilinga 7:55-60.

14. Momo lie tu tavela okuti Yesu o kasi komuenyo?

¹⁴ Tu kuete uvangi u lekisa okuti, Yesu wa vialekiwa komangu Yusoma, kuenda eye Utue wekongelo Liakristão vocili. Ekongelo liaco, li kasi oku amamako oku livokiya. Nda Yesu ka pinduiwile, ovolandu a tukuiwa ndeti nda a kasi hẽ oku tẽlisiwa? Nda Yesu ka pinduiwile nda lalimue eteke tua yevele ulandu watiamẽla kokuaye. Pole, tu kuete esunga lieci tu tavela okuti Yesu o kasi komuenyo, kuenda o kasi oku songuila upange woku kundila voluali luosi.

15. Momo lie epinduko lia Yesu li ecela kokuetu utõi woku kunda?

¹⁵ Epinduko lia Kristu, li tu ĩha utõi woku kunda olondaka viwa. Tunde kotembo ya Yesu, ovanyãli va Suku va siata  oku sandiliya olonjila vialua oco va tateke upange woku kunda ndeci: Unanguluke, oku pembuiwa, ungangala, oku tateka upange woku kunda, oku talisiwa ohali, kuenda oku pondiwa. Pole, Embimbiliya lia popele ale hati: “Lacimue ocimãlẽho va ci telela oku yaka love ci ku linga cimue.” (Isaya 54:17) Tu yuvuli oku kuatela usumba vana va vetiyiwa la Satana oco va tu lambalale. Yesu o kasi oku tu kuatisa ndomo a ci likuminyile. (Mateo 28:20) Omo liaco, tua kolela okuti, ndaño ovanyali va tu lambalala, pole, ka va pondola oku tateka upange wetu!

16, 17. (a) Epinduko lia Yesu li eca ndati uvangi wovina viosi a longisa? (b) Ndeci elivulu lia Yoano 11:25 li lekisa, unene upi Yehova a eca ku Yesu?

¹⁶ Epinduko lia Yesu lieca uvangi wovina viosi a longisa. Onoño yimue ukuakukonomuisa Embimbiliya wa soneha okuti, nda Kristu ka pinduiwile, Akristão vana va tava kuhembi waco aveke. Paulu wa soneha okuti nda Yesu ka pinduiwile, upange woku kunda kuenda ekolelo Liakristão nda ka li kuete esilivilo. Omo liaco, Vavangeliu nda tu sangamo lika ovolandu esumuo atiamẽla kulume umue uwa haeye wa loñoloha okuti, wa pondiwa lovanyali vaye. Pole, epinduko lia Yesu li eca uvangi wokuti, ovina viosi a longisa viocili.—Tanga 1 Va Korindo 15:14, 15, 20.

¹⁷ Yesu wa popia hati: “Ame ndipinduko haime ndimuenyo. U o ñolela, ndaño o fa, haimo o kala vali lomuenyo.” (Yoano 11:25) Ohuminyo Yesu a linga  ndeti yeca uvangi wokuti yi ka tẽlisiwa. Yehova wa eca ku Yesu unene woku pindula Akristão vana va ka viala laye kilu, kuenda omanu valua va ka kala palo posi otembo ka yi pui. Ocilumba ca Yesu kuenda epinduko liaye, vi eca uvangi wokuti, ka ku ka kala vali olofa. Omo liaco, tu sukila oku pandikisa kovitangi viosi tu liyaka lavio, kuenda oku lekisa ekolelo ndaño pamue tu fa.

18. Epinduko lia Yesu li tu ĩha ekolelo lie?

¹⁸ Epinduko lia Yesu li tu ĩha ekolelo liokuti omanu va ka sombisiwa lolonumbi via Yehova viocisola. Paulu wa sapuila kocimunga cimue calume kuenda akãi va kala volupale luo Atenai hati, Suku o ka “tetuluila oluali lesunga, kuenje wa nõla ale ulume o linga onganji yaco. Poku pindula [ulume] waco ku vakualufa,” kuenda wa ‘lekisa komanu vosi okuti ondaka yaye yocili.’ (Ovilinga 17:31) Omo okuti Yehova wa nõla Yesu oco a linge onganji yetu, tua kolela okuti, o ka lekisa ocisola poku sombisa.—Tanga Isaya 11:2-4.

19. Oku tava kepinduko lia Kristu ci tu kuatisa ndati?

¹⁹ Tu yongola oku linga ocipango ca Suku omo lioku tava kepinduko lia Yesu. Nda Yesu ka ecele omuenyo waye kuenda ka pinduiwile, toke cilo nda tu kasi vemẽhi liekandu kuenda liolofa. (Va Roma 5:12; 6:23) Nda ka tua kuatele elavoko, nda ca sunguluka oku popia tuti: “Tu li, tu nyui, momo hẽla tu fa.” (1 Va Korindo 15:32) Pole, ka tu tiamisila omuenyo wetu kayele. Momo, tua sanjukila elavoko liepinduko kuenda tu yongola oku pokola ku Yehova.

20. Epinduko lia Yesu lia situlula ndati unene wa Yehova?

²⁰ Epinduko lia Yesu li eca uvangi wokuti, Yehova o kuete unene wa velapo, kuenda “eca onima kuava vo sanda.” (Va Heveru 11:6) Lekuatiso liunene kuenda uloño Yehova a kuete, wa pindula Yesu oco a kale kilu okuti ka fi vali. Yehova wa lekisavo uloño waye poku tẽlisa olohuminyo viaye. Eye wa likuminyile okuti, “ombuto” yilikasi ya laikele oku tetulula ocitangi ca votuiwa vocumbo Cedene catiamẽla kuviali waye. Oco ohuminyo yaco yi tẽlisiwe, Yesu okuti eye “ombuto,” wa sukilile oku fa, kuenda oku pinduiwa.—Efetikilo 3:15.

21. Elavoko liepinduko li lomboloka nye kokuove?

²¹ Tu eca olopandu ku Yehova omo a tu ĩha elavoko liepinduko. Embimbiliya li tu likuminya ndoco: “Tala, onjo ya Suku yi kasi pokati komanu. Eye o tunga lavo, va linga omanu vaye, kuenje Suku eye muẽle, o kala lavo, o linga Suku yavo. Eye o puenya asuẽlela osi kovaso avo. Oku fa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.” Ohuminyo eyi ya eciwile kupostolo Yoano poku u sapuila hati: “Ci soneha cosi, momo olondaka evi via sunguluka, kuenda viocili.” Helie wa eca ku Yoano ocinjonde caco? Ca tunda ku Yesu Kristu wa pinduiwa!—Esituluilo 1:1; 21:3-5.