Pa pita ale eci ci pitahãla 130 kanyamo, tunde eci Olombangi Via Yehova via fetika oku liongolola unyamo lunyamo, oco vi linge olohongele viofeka. Cilo ovolandu ohongele yofeka, a lekisa eci ci pitãhala 40 kolohundo via litepa, ovisungo, oku pulisiwa kuenda olovideo. Oco ohongele yaco yi kuatise kuenda oku vetiya vana va ka kalako, yi sukila oku ‘yeviwa kuenda oku muiwa’ ciwa. (Luka 2:20) Olombanjaile viove va siata oku talavaya lavio ndati oco okuti vosi va enda kolohongele viaco va kuatisiwa ndaño va kasi kovitumãlo via litepata?

Ovila vialua vioku tasuila ombunje kuenda ovitumãlo vikuavo, kolofeka vioku tundilo vi kuete ale ovimalẽho vio audio/video. Pole, eci tu fetela ocitumãlo cimue oco tu lingilepo ohongele yofeka, momo lie tu kapelapo ovimalẽho vietu? Manji David, o talavaya Koseketa yo Broadcasting Kombala Yolombangi Via Yehova Voluali, wa lombolola ndoco: “Pokati kovitumãlo tua siata oku fetela, vimue ño via pangiwa lonjila yimue yecelela okuti olonjeveleli vi yevelela eci ci pitahãla olowola epandu viulandu u kasi oku vanguiwa. Ndeci, ovitumãlo vimue vioku tasuila ombunje va talavaya lovingungu via sapulo oco va sandeke asapulo amue a teta onimbu, loku sika ovisikilo vimue. Ovikete viavo vi lekisa lika atendelo ombunje a iñila, asapulo kuenda ovina vikuavo. Pole, etu tu yongola okuti omanu va kasi kohongele yofeka va tala olovideo viakukutu alua, oku yevelela kuenda oku kuata elomboloko lia suapo lieci ci kasi oku popiwa kembumbua.”

Ohongele lohongele yofeka ya litepa, omo liaco, ovimalẽho vio audio/video vi sukila oku kũlĩhĩsiwa ciwa. Noke yoku nõliwa kuovitumãlo viaco, Oloseketa Vio Broadcasting violofiliale, vi sokiya apa omanu va ka tumãla, poku konomuisa ciwa etendelo liomanu vaco kuenda epondolo liocitumãlo caco. Vamanji va kũlĩhĩsa pana pa ka kala vamanji va linga olohundo kuenda apa pa kapiwa ovikete, va sokiya ndomo vi tokekiwa kuenda oku soneha ovina vi sukiliwa oco okuti, omanu vosi va ka tala loku yevelela ciwa ulandu wohongele.

Ovimalẽho vio audio/video vieca upange walua oku vi kapa kovitumãlo kuna ku ka lingiwila ohongele yofeka kalimi a litepa. Nda ulandu wohongele yofeka u ka pitiyiwa kalimi akuavo, o audio kuenda ovideo, vi sukila oku pitiyiwa ku ka pitiya, noke u pitiyiwe vovingungu via sapulo via litepa oco u yeviwe la vana va vangula elimi liaco. Omo liesokiyo liaco, ovideo yi lekisiwa komanu vosi ndaño okuti o audio yaco, yi pitiyiwa kalimi ecelãlã a litepa. Manji David wa popia okuti, “oku kuama olonjila viaco ka calelukile kuenda vana va linga upange waco va sukila oku pindisiwa ciwa.”

Olofiliale vialua via siata oku eca ovimalẽho vio audio/video va siata oku talavayala lavio unyamo lunyamo. Nda oco, vamanji va linga esokiyo liwa oco ovimalẽho viaco vi ka kuatise kolohongele vikuavo viofeka. Ofiliale yo ko Estados Unidos unyamo lunyamo yi pesele eci ci pitahãla 200.000 a kolondolale oco yi tume ovimalẽho vioku linga ohongele yofeka. Ndaño ndoco, ka tu sukila oku pesela olombongo vialua oco tu lande ovimalẽho viaco. Manji Steven okuti wa kuatisa oku songuila upange wo audio/video kohongele yimue yofeka ko Kanada, wa lombolola ndoco: “Ocimunga cetu co audio/video ca likolisilako okuti ovimalẽho viosi vi sukiliwa vi sonehiwa, viongotiyiwa ciwa loku kutiwa lonjila yimue ya kolapo oco vi ka kuatise kohongele yikuavo.”

Ovimalẽho vio audio/video vioku fetela via tĩla calua kuenda ka vi tundisa ciwa ocileñi kuenda oku lekisa oviluvialuvia vi letiwe ciwa. Omo liaco, eli olio esunga lieci tu landela ovimalẽho tu sukila. Cilo, ocikete cimosi coku lekisa olovideo ci kuete 5 kolometulu vusõvi kuenda olometulu vitatu voku lepa ci landiwa 24.000 kolondolale kuenda ukolo umosi wenguena u kuete 15 kolometulu, u landiwa leci ci soka 20 kolondolale. Oseketa yo Broadcasting yi talavayela kumosi losekete yoku landa ovina “oco va kũlĩhĩse olombongo vi sukiliwa” osimbu ka va lendele ocimalẽho cimue. (Luka 14:28) Ndeci, omanu vañami va ka kuatisiwa locimalẽho caco? Ocimalẽho cokaliye ci kasi oku landiwa, ca velapo okuti ci tẽlisa a sukila etu? Tu kuete hẽ ocitumãlo ciwa coku seleka ovimalẽho viaco kuenda vamanji va pindisiwa oco va vitate?

Oco ovimalẽho vio audio/video vi kale otembo yalua kuenda oku tetelẽla olombongo, tua siata oku vi semũlũla olonjanja viosi. Tua siatavo oku tuma ovimalẽho viaco volokasia via pongiyiwa ciwa, oco ka vi ka nyõlehe kuenda vi semũlũiwavo nda ci sukiliwa.

Omanu vana okuti halombangiko via Yehova, va siata oku komõha omo lio audio/video va mola kohongele yimue yofeka. Ndeci, kohongele yimue yofeka, onalavayi yimue yovingungu via velapo violuali, ya lombolola eci catiamẽla kulandu wolovideo vietu kuenda ndomo vi pangiwa. Manji Jonathan okuti wa siata oku kuatisa kupange wovimalẽho vio audio/video kolohongele viofeka, wa popia hati: “Eye wa komõha calua poku mola okuti vamanji vo vocimunga cetu, va kala omanu vamue va lieca olumue kuenda ka va kaile vamue va loñoloha calua. Eye wa amisako loku popia hati, onjo yaye yupange nda ya linga oloneke vitãlo oco mu kapiwe ovimalẽho evi okuti, tua vi kapa lika vokuenda kueteke limosi lomeyu.” Kohongele yikuavo, usongui wa vakuakusemũlũla ovileñi wa popia hati: “Omanu valua va loñoloha kovisikilo kuenda koku panga olovideo va kala kulo, pole, sia lamola uloño waco!”

Wa siata hẽ oku kuatisiwa ndati lo audio/video kohongele yofeka? Citava okuti o liyeva ndamanji David, wo ko Inglaterra. Eye wa popia hati: “Ndi kuete eci ci soka 88 kanyamo kuenda nda siata oku enda kolohongele viosi viofeka komuenyo wange. Cilo, ca leluka kokuange oku tiamisila utima kovina viaco. Ngeca olopandu kolovideo via posoka, momo ulandu waco wosi u pitiyiwa lonjanga kuenda esapulo li pitiyiwavo lonjila yimue ya leluka haiyo ya suapo.” Manji Micheal o kasi ko Nigeria, wa popia hati: “Omo okuti vamanjetu ka va kuete vali ocitangi coku yevelela hundi osimbu a linga ohundo, ale oku tala olovideo, kaliye va tẽla oku tiamisila lika utima kovina vi popiwa kohongele.”

Poku enda kohongele yofeka yunyamo ulo losapi “Kunda Olondaka Viwa!” kuenda Ohongele Yilikasi Yofeka, sanda otembo yoku sokolola kovina viosi via kongela vupange wa lingiwa, oco o kuatisiwe koku yevelela kuenda koku tala ulandu wohongele yosi. Tu eca olopandu omo liolombanjaile viove, oku kongelamo vina via lingiwa lekuatiso lio donate.dan124.com, oco vi kuatise kupange waco. Tua pandula calua.