Omo okuti unyamo 2023 wa fetika, vosi yetu tu lavoka okuti, ovina vi enda ciwa kokuetu kuenda kepata lietu. Momo lie tu kuetele ovisimĩlo via sunguluka?

 Embimbiliya li tu sapuila olondaka viwa viokuti, ovitangi tu liyaka lavio cilo, vi pita ombamba kuenda ndopo muẽle vi ka potoluiwa. Ocili okuti Embimbiliya lia “sonehiwila oku tu longisa okuti, omo . . . lielembeleko li tunda Kovisonehua, tu kuata elavoko.”—Va Roma 15:4.

•   Oco o lilongise olohuminyo vikuavo via tukuiwa Vembimbiliya, tanga ocipama losapi hati, “O Pondola Oku Kolela Kekalo Liwa Lio Kovaso Yoloneke.”

 Elavoko Liembimbiliya li sokisiwa “lonjundo kovimuenyo vietu.” (Va Heveru 6:19) Elavoko liaco li tu kolisa. Elavoko liaco, li pondola oku tu kuatisa poku liyaka lovitangi loku kuata ovisimĩlo via sungulula kuenda oku sanga esanju liocili. Ndeci:

•   Limbuka ndomo elavoko Liembimbiliya lia kuatisa ulume umue oku yula ocituwa cimue cĩvi. Tala ovideo losapi hati, ‘Omuenyo wa Ñumile.’

•   Tala ndomo elavoko Liembimbiliya li pondola oku tu kuatisa eci umue ngandietu a fa. Tala ovideo losapi hati, Elembeleko ku Vana va Fisa Vangandiavo.

 Omanu valua va lavoka ovina viwa, pole, ovo ka va kolelele okuti elavoko liavo li ka tẽlisiwa muẽle. Olohuminyo Viembimbiliya via litepa. Momo lie? Momo olohuminyo Viembimbiliya, vi tunda ku Yehova Suku a “una okuti ka pondola oku kemba.” (Tito 1:2) Yehova eye lika o kuete unene woku tẽlisa olohuminyo viaye viosi; eye “o linga ovina viosi eye a yongola oku linga.”—Olosamo 135:5, 6.

 Etu tu ku laleka oco o kuatisiwe lelavoko li sangiwa Vembimbiliya. O pondola oku pamisa ekolelo liove poku “konomuisa lutate Ovisonehua.” (Ovilinga 17:11) Ci limbuka ove muẽle poku lilongisa ocali Embimbiliya. Fetika unyamo 2023 poku kuata ovisimĩlo via sunguluka.